1 Korintofoɛ 2:14 - AHYERƐLƐ KRONGRON

¹⁴ Ebiala bɔ Nyameɛ Sunzum nne ye nu ne, onnya akyɛdeɛ bɔ befi Sunzum ne berɛ ne, ofikyɛ akyɛdeɛ ne te sɔ sona ne nye so ngwaseasɛm; yeɛ ɔngora nde bɛ bo koso, ofikyɛ Sunzum ne yeɛ ɔboka sona maa ɔte akyɛdeɛ ne bo ɔ.

1 Korintofoɛ 2:14 Iomraidhean Croise

Anyandera 14:6

Ngorohoɛniɛ pena nworɛ, na onnwu ye, nakoso sona bɔ ye adwene nu pi de, nimdeɛ nyanɛ nyɛ se mma ye.

Mateo 16:23

Na ɔkakyili ye nwo sele Petro kyɛ, “Dwɔso berɛ kɔ dɔ, Abɔnzam! Ɛte sundidua ma me; ofikyɛ nna Nyameɛ adwene yeɛ ɛdwene ɔ, na mmom ɛdwene kuro sona adwene.”

Yohane 10:20

Bɛ nu pee hane kyɛ, “Ole sunzummɔne, na wabɔ laen. Nzu ati yeɛ ɛmɔtie ye ɔ?”

Yohane 12:37

Ɔwɔ nu kyɛ né wayɔ nzɛngyerɛnneɛ pee wɔ bɛ nyunu de, nakoso banne ye banni.

Yohane 14:17

bɔ ye ole nahorɛ Sunzum bɔ ewiase ngora nne ye ndo nu ne; ofikyɛ onnwu ye, yeɛ ɔnze ye. Nakoso ɛmɔ de, ɛmɔse ye, ofikyɛ ɔne ɛmɔ yeɛ bɛte ɔ, na ɔkɔtena ɛmɔ nu.

Yohane 14:26

Na Aworakyekyerɛniɛ ne, bɔ ye ole Sunzum Krongron ne, bɔ Baba ne kɔsoma ye wɔ me dumaa nu ne, ye yeɛ okohyirehyire ɛmɔ nikyee biala ɔ, na ɔkɔkaye ɛmɔ bɔ mahã mahyire ɛmɔ ne amukoraa.

Yohane 15:26

“Na Aworakyekyerɛniɛ ne, nahorɛ Sunzum bɔ ofi Baba ne berɛ, bɔ ngɔsoma ye ngɔbrɛ ɛmɔ ngofi Baba ne berɛ ne, sɛ ɔba a, ye yeɛ okoli me nwo adanzeɛ ɔ;

Yohane 5:44

Ɔkɔyɛ sɛ né ɛmɔale bali, ɛmɔ bɔ ɛmɔhyehyɛ ɛmɔ nwo ɛmɔ nwo animnyam, bɔ ɛmɔmbena animnyam bɔ ofi Nyameɛ komapɛ ne berɛ ɔ?

Yohane 8:43

Nzu ati yeɛ ɛmɔnde me dwirɛ bo ɔ? Ɔnate kyɛ ɛmɔngora bendie me dwirɛ.

Asomafoɛ 16:14

Né mmrasua ne ko li Lidia; ofi Tiatira. Né ɔtɔne ago. Ɔte Nyamesomniɛ, na Awurade bukyele ye adwene nu maa ɔyɛle asoɛ mane Pɔɔlo.

Asomafoɛ 17:18

Na nwomanimfoɛ fekue nyɔ bie bɔ bɛfrɛ bɛ Epikurofoɛ ne Setokifoɛ koso ne ye suli aporowaa. Ebiemɔ hane kyɛ, “Akoaa he bɔ ɔnze hwee ye, nzu yeɛ okyire ye?” Na biemɔ koso hane kyɛ, “Osoma kyɛ ɔ́ka mmosoen ɛwɔfoɛ biemɔ nwo dwirɛ.” Bɛhane sɔ, ɔnate kyɛ né Pɔɔlo ka Yesu ne ewutingyelɛ nwo dwirɛ.

Asomafoɛ 17:32

Na mmerɛ bɔ bɛtele awufoɛ etingyelɛ nwo dwirɛ nen, bɛ nu biemɔ serele Pɔɔlo; na ebiemɔ koso hane kyɛ, “Yɛkuro kyɛ esa si dwirɛ he aso bieku mmerɛ foforɛ.”

Asomafoɛ 18:15

Nakoso kyɛbɔ waayɛ edwirɛ, ɔne dumaa ne ɛmɔ bɔbɔ ɛmɔ mmeraa nwo aporowaasulɛ ye de, ɛmɔ bɔbɔ beesiesie; na edwirɛ sɔaa mɔ de, mengɔyɛ ye nwo ndɛenbualɛniɛ!”

Asomafoɛ 25:19

na mmom bɛ bɔbɔ bɛ nyamesom nwo aporowaa, ɔne Yesu bie bɔ wawu nakoso Pɔɔlo nwa ɔte ase nwo aporowaa yeɛ bɛ ne ye suli ɔ.

1 Korintofoɛ 1:18

Kristo mmeamudua ne nwo dwirɛ te ngwaseasɛm ma bɛ bɔ bɛwɔ so bemini ne, nakoso ɔte Nyameɛ tumi ma yɛ bɔ ogu so ode yɛ ngoa ne.

1 Korintofoɛ 1:21

Ɔnate Nyameɛ nworɛ (nhyehyɛleɛ) ne ati, adasammaa bangora bamva bɛ nworɛ so bannwu Nyameɛ. Yiti ɔsɔle Nyameɛ nye kyɛ ɔkɔfa edwirɛ bɔ yɛkã, bɔ bebu ye ngwaseasɛm ne aso kole bɛ bɔ bede bedi ne ngoa.

1 Korintofoɛ 1:23

Nakoso yɛ de, yɛbɔ Kristo bɔ bɛbɔle ye mmeamudua nu ne nwo dawure. Ɛhe te sundidua ma Yudafoɛ, yeɛ ɔte ngwaseasɛm ma Helafoɛ.

1 Korintofoɛ 1:25

Ɔnate kyɛ Nyameɛ nhyehyɛleɛ bɔ bebu ye ngwaseasɛm ne, nworɛ wɔ nu tra adasammaa nworɛ; yeɛ bɔ bebu ye kyɛ ɔte Nyameɛ mmerɛyɛlɛ nen, anwoserɛ wɔ nu tra adasammaa anwoserɛ.

1 Korintofoɛ 15:44

Bedua ye anwoɔnaen nu, na betingye ye a, ɔte sunzum nu nipadua. Anwoɔnaen nu nipadua wɔ berɛ, yeɛ sunzum nu nipadua koso wɔ berɛ.

1 Korintofoɛ 15:46

Nna bɔ ɔte sunzum ne yeɛ oli moa ɔ, na mmom anwoɔnaen deɛ ne ba koraa né sunzum deɛ ne awa.

1 Korintofoɛ 2:12

Nna ewiase wa sunzum yeɛ yanya ye ɔ, na mmom Sunzum bɔ ofi Nyameɛ berɛ yeɛ yanya ye ɔ; na ɛhe maa yɛte akyɛdeɛ bɔ Nyameɛ afa ama yɛ ne bo.

1 Korintofoɛ 3:1

Aliɛmaa mɔ, mangora me ne ɛmɔ andwudwo kyɛ mmenia bɔ Nyameɛ Sunzum ne ayi bɛ tɛkyɛ ɔ, na mmom kyɛ anwoɔnaenufoɛ bɔ bɛte nnɔma wɔ Kristo nu ɔ.

Yakobo 3:15

Sɔ nworɛ he de, nna anwuro yeɛ ofi ɔ, na mmom ɔte aseɛ so deɛ; nna sunzum nu deɛ ɔ, na ɔte sunzummɔne mɔ deɛ.

1 Yohane 2:20

Nakoso ɛmɔ de, Krongronniɛ ne wapopa ɛmɔ ngoo, yiti ɛmɔse nikyee biala.

1 Yohane 2:27

Nakoso ɛmɔ de, ngoo bɔ wafa wapopa ɛmɔ ne, ɔte ɛmɔ nu, yiti onhia kyɛ ebie kohyirehyire ɛmɔ ɔ. Na sɔ ngoopalɛ ne ala kyirekyire ɛmɔ nikyee biala, ɔkã nahorɛ, ɔmbɛ ngondombo, na kyɛbɔ wahyirehyire ɛmɔ ne, ɛmɔli so.

1 Yohane 5:20

Yɛsa yɛse kyɛ Nyameɛ Awa ne awa, na wabukye y’adwene nu maa yanwu nahorɛniɛ ne. Yɛne Ɔwa Yesu Kristo bɔ ɔte nahorɛniɛ ne atira abiɛngoɛ, na ye yeɛ ɔte nahorɛ Nyameɛ ne ɔne daa ngoa ne ɔ.

Yuda 1:19

Bɛ yeɛ bɛfa mbakyembakyemuɛ bɛba ɔ, Sunzum ne ɔnne bɛ nu, na bɛte mmenia bɔ bedi anwoɔnaen si ɔ.