10 ᓴᐳᑦᔭᐅᓂᕋ ᒎᑎᒥᑦ ᐱᕗᖅ; ᑖᑦᓱᒪ ᐆᒻᒪᑏᑦ ᓱᓕᔪᑦ ᓴᐳᑎᖕᒪᒋᑦ.
ᑕᒪᑐᒪᓗ ᑭᖑᓂᖓᒎᓕᕐᑐᖅ ᐊᑕᓂᐅᑉ ᐅᖃᐅᓯᖓ ᐂᑉᕋᒻᒧᑦ ᑎᑭᑉᐳᖅ ᑕᑯᑎᑕᐅᓂᒃᑯᑦ, ᐅᖃᕐᓗᓂ, “ᑲᑉᐱᐊᓱᖕᓇᒃ ᐂᑉᕋᒻ ᓴᐴᓗᑕᕆᕙᕐᒪ; ᐊᑭᓕᕐᑕᐅᓃᑦ ᐊᖏᔪᕐᔪᐊᖑᔪᒫᕐᐳᖅ.”
“ᐃᕝᕕᓪᓕ, ᐃᕐᓃᒃ ᓲᓗᒨᓃ, ᐊᑖᑕᕕᑦ ᒎᑎᖓ ᖃᐅᔨᒪᒍᒃ, ᐱᔨᑦᓯᕐᓗᒍᓗ ᐆᒻᒪᑎᓕᒫᕐᓄᑦ ᐃᓱᒪᑯᓪᓗ ᐱᔪᒪᑦᓯᐊᕐᓗᑎᑦ; ᐊᑕᓂᐅᑉ ᐆᒻᒪᑎᓕᒫᑦ ᖃᐅᔨᓴᕐᐸᖕᒪᒋᑦ, ᖃᐅᔨᒪᓪᓗᓂᓗ ᐸᕐᓇᒃᑕᐅᔪᓕᒫᓂᒃ ᐃᓱᒪᒋᔭᐅᔪᓕᒫᓂᒡᓗ. ᕿᓂᕈᕕᐅᒃ, ᓇᓂᓂᐊᕐᐸᑦ; ᕿᒪᖕᓂᐊᕈᕕᐅᒃ ᑖᑦᓱᒪ ᐃᒋᑦᓱᒫᕐᐹᑎᑦ ᐃᓱᖃᖏᑦᑐᒧᑦ.
ᑐᓴᓚᐅᕆᑦ ᕿᓚᖕᒥᑦ ᐃᓂᒋᔭᕐᓂᑦ, ᐃᓱᒪᒋᔪᓐᓁᕐᓗᒋᓪᓗ, ᑐᓂᓯᕕᒋᓗᒋᓪᓗ ᐊᑐᓂᑦ ᐱᔭᕆᐊᖃᕐᓂᖏᑦ ᒪᓕᒡᓗᒋᑦ ᐆᒻᒪᑎᖏᑦ ᖃᐅᔨᒪᒐᕕᒋᑦ, ᐱᓂᐊᕐᓂᖏᓪᓗ ᒪᓕᒡᓗᒋᑦ (ᐃᕝᕕᑐᐊᖅ ᑭᓯᕕᑦ, ᐆᒻᒪᑎᖏᑦ ᖃᐅᔨᒪᒐᕕᒋᑦ ᐃᓅᑉ ᕿᑐᕐᖓᖏᑦ);
ᐃᑦᔪᕐᓁᒃᑯᕕᑦ ᐸᓯᔭᒃᓴᐅᓂᖃᖏᒃᑯᕕᓪᓗ, ᑕᕝᕙ ᑖᑦᓱᒪ ᒪᑭᓪᓗᓂ ᐅᐸᖕᓂᐊᕐᐹᑎᑦ ᐊᑭᓕᕐᓂᐊᕐᐹᑎᓪᓗ ᓈᒻᒪᓈᕐᓯᒪᓂᕐᓄᑦ.
ᑖᑦᓱᒪ ᑭᖑᕚᖏᑦ ᐊᔪᖏᑦᑐᕐᔪᐊᖑᓂᐊᕐᐳᑦ ᓄᓇᒥ; ᑭᖑᕚᕇᒃᐸᓪᓕᐊᔪᖁᑎᖏᓪᓗ ᓮᒻᒪᕐᑎᑕᐅᓯᒪᓂᐊᕐᓱᑎᒃ.
ᐊᑕᓃᖅ, ᐱᐅᔪᑦ ᐱᓇᓱᐊᕐᕕᒋᓚᐅᒃᑭᑦ ᐱᐅᔪᒥᒃ, ᐆᒻᒪᑎᒥᒍᓪᓗ ᓈᒻᒪᓈᕐᓯᒪᔪᓂᒃ ᒪᓕᒃᑐᑦ.
ᐃᕝᕕᓪᓕ ᐊᑕᓃᖅ ᐊᕙᑎᓐᓄᑦ ᓴᐴᓗᑕᕆᕙᒋᑦ, ᓂᕐᑐᕐᓇᕐᑐᖁᑎᒋᕙᒋᑦ, ᓂᐊᖁᕋ ᒪᑭᑎᒐᕕᐅᒃ.
ᐊᑕᓂᖅ ᒎᑎ ᓯᕿᓂᐅᖕᒪᑦ ᓴᐴᓗᑕᐅᓪᓗᓂᓗ; ᐊᑕᓂᖅ ᖁᕕᐊᒋᔭᐅᓂᕐᒥᒃ ᓂᕐᑐᕐᓇᕐᓂᕐᒥᒡᓗ ᑐᓂᓯᕗᖅ; ᐃᓅᑦᓯᐊᕋᓱᐊᕐᑐᑦ ᐊᑕᓂᐅᑉ ᐱᐅᔪᒥᒃ ᐊᔪᕐᓴᖁᓂᐊᓐᖏᓔᑦ.
ᐊᑕᓂᖅ ᓴᐴᓗᑕᕆᒐᑦᑎᒍ, ᐃᓴᕆᐊᓕᒥᓗ ᐃᑦᔪᕐᓁᑦᑑᔪᖅ ᐊᖓᔪᖅᑳᕐᔪᐊᕆᕙᕗᑦ.
ᐱᐅᖏᑦᑐᓂᒃ ᐃᓱᒪᓖᑦ ᐊᑕᓂᕐᒧᑦ ᓇᕐᕈᓇᕐᐳᑦ, ᐱᓂᐊᕐᓂᕐᒥᒃᑎᒍᓪᓕ ᐸᓯᔭᒃᓴᐅᓂᖃᖏᑦᑐᑦ ᖁᕕᐊᒋᕔᑦ.
ᐱᐅᔪᒥ ᑲᔪᓯᔪᑦ ᓄᓇᒥ ᓄᓇᖃᕐᓂᐊᕐᐳᑦ, ᓱᓕᔪᕐᓇᑦᓯᐊᕐᑐᓪᓗ ᓄᓇᕾᓐᓇᕐᓂᐊᕐᐳᑦ ᑕᕝᕙᓂ.
ᐸᓯᔭᒃᓴᐅᖏᓪᓗᓂ ᐃᓅᔪᖅ ᓴᐳᑎᔭᐅᔪᒫᕐᐳᖅ, ᐱᐅᖏᓐᓂᕐᒥᒡᓕ ᐃᓅᔪᖅ ᑲᑕᒃᑎᑕᐅᔪᒫᕐᐳᖅ ᐃᑎᕐᓴᒧᑦ.
ᐊᑕᓃᕐᓕ ᖁᑦᓯᖕᓂᕐᐸᐅᔪᑎᑦ, ᓈᒻᒪᓈᕐᑐᒥᒃ ᐃᖅᑲᕐᑐᐃᔪᑎᑦ, ᐃᓄᐃᓪᓗ ᐆᒻᒪᑎᖓᓃᑦᑐᓂᒃ ᐃᓱᒪᖓᓃᑦᑐᓂᒡᓗ ᖃᐅᔨᓴᕈᓐᓇᕐᑐᑎᑦ, ᐊᑭᓂᐊᕐᓂᖅ ᑖᒃᑯᓄᖓ ᐃᓕᖕᓄᑦ ᑐᓂᖔᕐᐸᕋ.
ᐅᕙᖓ ᐊᑕᓂᖅ ᖃᐅᔨᓴᕈᓐᓇᕐᐳᖓ, ᐃᓅᑉ ᐆᒻᒪᑎᖓᓂᒃ ᐃᓱᒪᖓᓂᒡᓗ, ᑐᓂᓯᔪᓐᓇᕐᓗᖓᓗ ᐃᓅᑉ ᐱᓂᐊᕐᓂᖏᑦ ᒪᓕᒡᓗᒋᑦ, ᐱᓂᐊᕐᓂᖏᑕ ᐱᕈᕐᑎᑕᖏᓐᓂᒃ.”
