ᐃᓐᖏᕈᑎᑦ 103:3 - ᐊᒡᓔᑦ ᐃᑦᔪᕐᖕᓁᑦᑐᑦ

³ ᑖᑦᓱᒪ ᐊᔪᕐᑐᓕᓂᓕᒫᑎᑦ ᐃᓱᒪᒋᔪᓐᓁᓚᐅᕐᐰᑦ, ᐋᓐᓂᐊᓂᓕᒫᑎᓪᓗ ᐋᖅᑭᓚᐅᕐᐰᑦ,

ᐃᓐᖏᕈᑎᑦ 103:3 Iomraidhean Croise

ᓴᒧᐃᓕ ᐂᑉᐸᖏᑦ 12:13

ᑍᕕᑎ ᐅᖃᕐᐳᖅ ᓁᑕᓂᒧᑦ, “ᐊᔪᕐᑐᓕᓚᐅᕐᐳᖓ ᐊᑕᓂᕐᒧᑦ.” ᓁᑕᓂᓗ ᑭᐅᕗᖅ, “ᐊᑕᓂᐅᑉ ᐃᓱᒪᒋᔪᓐᓁᕐᕕᒋᓯᒪᕚᑎᑦ; ᑐᖁᓂᐊᓐᖏᓚᑎᑦ.

ᐃᓐᖏᕈᑎᑦ 130:4

ᐃᓕᖕᓂᓕ ᐃᓱᒪᒋᔪᓐᓁᕐᕕᐅᓂᕐᑕᖃᕐᐳᖅ, ᓯᕘᕋᒋᔭᐅᔪᓐᓇᖁᓪᓗᑎᑦ.

ᐃᓐᖏᕈᑎᑦ 130:8

ᑖᑦᓱᒪᓗ ᐃᓴᕆᐊᓕᑎᒃᑯᑦ ᐱᐅᓕᔪᒫᕐᐰᑦ ᐊᔪᕐᑐᓕᓂᖏᓐᓂᑦ ᑕᒤᓐᓂᑦ.

ᐃᓐᖏᕈᑎᑦ 147:3

ᐆᒻᒪᑎᒥᒍᑦ ᓯᖁᒥᓯᒪᔪᑦ ᒪᒥᑎᑉᐰᑦ, ᒪᑦᑐᓯᕐᑐᕐᓗᒋᓪᓗ ᐃᑭᖏᑦ.

ᐃᓐᖏᕈᑎᑦ 30:2

ᐊᑕᓃᖅ, ᒎᑎᒐ, ᐃᑲᔪᕐᑕᐅᔪᒪᓂᕐᒧᑦ ᓂᓪᓕᐊᒐᒪ, ᑕᕝᕙ ᑎᒥᒃᑯᑦ ᐋᖅᑭᓚᐅᕐᐸᕐᒪ.

ᐃᓐᖏᕈᑎᑦ 41:8

ᐅᖃᕐᓗᑎᒡᓗ, “ᖃᓂᒻᒪᓯᕐᒧᓄᓇ ᐱᐅᖏᑦᑐᐊᓗᖕᒧᑦ ᐱᔭᐅᓯᒪᔪᖅ, ᓇᓚᕕᒋᔭᒥᓂᓪᓗ ᒪᑭᓐᓂᐊᕈᓐᓃᕐᑐᖅ.”

ᐃᓐᖏᕈᑎᑦ 86:5

ᐊᑕᓃᖅ, ᐱᐅᔫᒐᕕᑦ ᐃᓱᒪᒋᔪᓐᓁᕐᕕᖃᕐᓗᑎᓪᓗ, ᓇᒡᓕᖕᓂᖃᕐᐳᑎᓪᓗ ᓱᖁᓯᔪᐃᑦᑐᒥᒃ ᑕᒤᓐᓄᑦ ᐃᓕᖕᓄᑦ ᓂᓪᓕᐊᕕᖃᕐᑐᓄᑦ.

ᒨᓯᓯ ᐂᑉᐸᖏᑦ 15:26

ᐅᖃᕐᓗᓂᓗ, “ᐊᑕᓂᐅᑉ ᒎᑎᕕᑦ ᓂᐱᖓᓂᒃ ᓈᓚᑦᓯᐊᕐᓂᐊᕈᕕᑦ, ᑖᑦᓱᒪᓗ ᓈᒻᒪᒋᔭᖓᓂᒃ ᐱᓇᓱᐊᕐᓂᐊᕈᕕᑦ, ᐱᖁᔨᓂᕆᔭᓕᒫᖏᓪᓗ ᒪᓕᑦᓯᐊᕐᓂᐊᕈᕕᒋᑦ, ᑕᕝᕙ ᖃᓂᒪᓇᕐᑐᓄᑦ ᑎᑭᑕᐅᑎᓐᓂᐊᓐᖏᓚᒋᑦ ᐄᑦᔨᑉᑎᒥᐅᓄᑦ ᑎᑭᑎᓚᐅᕐᑕᒪ ᐊᑦᔨᖏᓐᓄᑦ; ᐅᕙᖓ ᐊᑕᓂᐅᒐᒪ, ᐃᓕᖕᓂᒃ ᐋᖅᑭᒃᓱᐃᔨ.”

ᒨᓯᓯ ᐂᑉᐸᖏᑦ 34:7

ᐊᖏᕈᑎᒋᓯᒪᔭᓐᓂᒃ ᓇᒡᓕᖕᓂᒃᑯᑦ ᑲᔪᓯᑎᑦᓯᕙᒃᐳᖓ ᑭᖑᕚᕇᑦ 1,000ᐃᑦ ᑎᑭᓪᓗᒋᑦ ᐃᓱᒪᒋᔪᓐᓁᕐᓯᔪᓐᓇᕐᓗᖓᓗ ᓈᒻᒪᖏᑦᑐᓕᓂᕐᓂᒃ ᐱᖁᔭᓂᒃ ᓈᓚᖏᓐᓂᕐᓂᒃ ᐊᔪᕐᑐᓕᓂᕐᓂᒡᓗ, ᑭᓯᐊᓂᓕ ᐸᓯᔭᒃᓴᐅᔪᓂᒃ ᐊᔪᕐᑐᓕᔪᓂᒡᓗ ᓱᒋᐊᕐᓯᖏᑦᑑᓂᐊᓐᖏᓚᖓ ᕿᑐᕐᖓᖏᑦ ᐃᕐᖑᑕᖏᓪᓗ ᑭᖑᕚᕇᑦ ᐱᖓᔪᖏᑦ ᓯᑕᒪᖏᓪᓘᓐᓃᑦ ᑎᑭᓪᓗᒋᑦ.”

ᐂᓮᐊᓯᐅᑉ ᐊᒡᓚᖏᑦ 33:24

ᑕᕝᕙᓂᒥᐅᑦ ᓇᓪᓕᐊᑦ ᐅᖃᕈᒫᓐᖏᓚᖅ, “ᐋᓐᓂᐊᒐᒪ,” ᐃᓄᐃᓪᓗ ᑕᕝᕙᓃᑦᑐᑦ ᐊᔪᕐᑐᓕᓂᖏᑦ ᐃᓱᒪᒋᔪᓐᓁᕐᑕᐅᔪᒫᕐᐳᑦ.

ᐂᓮᐊᓯᐅᑉ ᐊᒡᓚᖏᑦ 38:17

ᐃᓛᒃ ᐱᕚᓪᓕᕈᓐᓇᖁᓪᓗᖓ ᓂᓐᖓᐅᒪᓂᕐᔪᐊᖃᓚᐅᕐᐳᖓ; ᓇᒡᓕᖕᓂᕐᓄᓪᓕ ᓴᐳᑎᓚᐅᕐᐸᕐᒪ ᐃᑎᕐᓴᒥᑦ ᐊᓯᕈᕐᑕᐅᕕᖕᒥᑦ.

ᐂᓮᐊᓯᐅᑉ ᐊᒡᓚᖏᑦ 43:25

ᐅᕙᖓ, ᓇᖕᒥᓂᖅ ᐅᕙᖓᐅᕗᖅ ᐊᔪᕐᑐᓕᓂᓯ ᐲᔭᓚᐅᕐᐸᒃᑲ ᐅᕙᖓ ᓇᖕᒥᓂᖅ ᐱᑦᔪᑎᒋᓪᓗᖓ, ᐃᖅᑲᐅᒪᓂᐊᕈᓐᓃᕐᐸᒃᑲᓗ ᐊᔪᕐᓂᓯ.

ᐂᓮᐊᓯᐅᑉ ᐊᒡᓚᖏᑦ 53:5

ᐃᑭᓕᕐᓱᕐᑕᐅᓚᐅᕐᐳᖅ ᓈᓚᒍᒪᖏᓐᓂᑦᑎᓐᓄᑦ, ᑭᓪᓕᐊᔭᐅᓚᐅᕐᐳᖅ ᐊᔪᕐᑐᓕᓂᑦᑎᓐᓄᑦ; ᓱᒋᐊᕐᑕᐅᓚᐅᕐᓂᖓᓄᑦ ᐃᓗᐃᑦᑐᕈᕐᑎᑕᐅᕗᒍᑦ, ᑏᒐᕐᑐᕐᑕᐅᓂᖏᓐᓄᓪᓗ ᐋᖅᑭᒃᑕᐅᓪᓗᑕ.

ᔨᕆᒤᐊᐅᑉ ᐊᒡᓚᖏᑦ 17:14

ᐊᑕᓃᖅ ᐋᖅᑭᓚᐅᓐᖓ, ᑕᕝᕙ ᐋᖅᑭᖕᓂᐊᕐᐳᖓ; ᐱᐅᓕᓚᐅᓐᖓ ᑕᕝᕙ ᐱᐅᓕᔭᐅᓂᐊᕐᐳᖓ; ᐃᕝᕕᑐᐊᖅ ᓂᕐᑐᒐᒃᓴᕆᒐᒃᑭᑦ.

ᒨᓯᓯ ᓯᑕᒪᖏᑦ 12:13

ᒨᓯᓯᓗ ᐊᑕᓂᕐᒧᑦ ᓂᓪᓕᐊᓪᓗᓂ, ᐅᖃᕐᐳᖅ, “ᒎᑏ, ᐅᓇ ᐱᔪᓐᓁᕐᑎᓚᐅᕈᒃ, ᑐᒃᓯᐊᕐᐳᖓ ᐃᓕᖕᓄᑦ!”

ᒫᑯᓯᐅᑉ ᐊᒡᓚᖏᑦ 2:5

ᔩᓱᓯᐅᑉ ᐊᖑᑎᑦ ᑕᑯᒐᒥᒋᑦ ᐅᒃᐱᕐᓂᖃᓪᓚᕆᒃᑐᑦ, ᐊᖑᑦ ᓄᑭᖃᖏᑦᑐᖅ ᐅᖃᐅᑎᕚ, “ᐃᕐᓃᒃ ᐊᔪᕐᓂᑎᑦ ᐃᓱᒪᒋᔭᐅᔪᓐᓃᕐᐳᑦ.”

ᐃᐱᓯᒥᐅᓄᑦ 1:7

ᑖᑦᓱᒪ ᐊᐅᖓᒍᑦ ᐱᐅᓕᓚᐅᕐᒪᑎᒍᑦ, ᐊᔪᕐᓂᑦᑎᓐᓂᑦ ᐃᓱᒪᒋᔪᓐᓁᕐᕕᒋᓪᓗᑕ, ᐱᑦᓯᐊᕐᓂᒥᒍᑦ ᐱᔪᓐᓇᕐᑎᑦᓯᓂᖓᑕ ᐊᒥᒐᖏᑦᑐᐊᓘᓂᖓᒍᑦ,

ᔧᒥᓯᐅᑉ ᐊᒡᓚᖏᑦ 5:15

ᑐᒃᓯᐊᕐᓂᐅᓪᓗ ᐅᒃᐱᕐᓂᒃᑰᕐᑐᑉ ᖃᓂᒪᔪᖅ ᐋᖅᑭᖕᓂᐊᕐᐹ, ᐊᑕᓂᐅᓪᓗ ᒪᑭᑎᓗᒍ; ᐊᔪᕐᑐᓕᓯᒪᒃᐸᓪᓗ, ᐃᓱᒪᒋᔪᓐᓁᕐᕕᐅᓂᐊᕐᐳᖅ.