2 “ᐃᓴᕆᐊᓕᒥᐅᑦ ᐃᒫᒃ ᐅᖃᐅᑎᒃᑭᑦ, ‘ᐊᑕᓂᐅᕗᖓ ᒎᑎᓯ.
“ᐊᖏᖃᑎᒌᒍᑎᒋᔭᕋᓗ ᐅᕙᓐᓂᑦ ᐃᓕᖕᓄᑦ ᑭᖑᕚᒃᓴᕐᓄᓪᓗᑦᑕᐅᖅ ᑭᖑᓂᕐᓂ ᑭᖑᕚᕇᖑᔪᒫᕐᑐᓄᓪᓗ ᐃᓱᖃᖏᑦᑐᒧᑦ ᑐᕌᖓᓂᐊᕐᐳᖅ, ᐃᓕᖕᓄᑦ ᒎᑎᒋᔭᐅᓂᐊᕐᐳᖓ ᑭᖑᕚᒃᓴᕐᓄᓪᓗ ᒎᑎᒋᔭᐅᔪᒫᕆᕗᖓ.
ᓮᒪᓇᕐᑐᒦᑉᐳᑦ ᐃᓅᖃᑎᒌᒡᔪᐊᑦ ᐊᑕᓂᕐᒥᒃ ᒎᑎᖃᕐᑐᑦ, ᐃᓄᐃᑦ ᓂᕈᐊᕐᓯᒪᔭᖏᑦ ᓇᖕᒥᓂᖅ ᐱᒃᓴᕆᔪᒪᓪᓗᒋᑦ.
“ᐅᕙᖓ ᐊᑕᓂᐅᕗᖓ ᒎᑎᓯ, ᐅᕙᖓ ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕐᐸᑦᓯ ᑕᕝᕙᓐᖓᑦ ᓱᒃᑯᔨᐊᖑᕕᒋᓚᐅᕐᑕᑦᓯᓐᓂᑦ.
ᐃᓄᖁᑎᑖᕆᓂᐊᕐᐸᑦᓯᓗ, ᐃᓕᑦᓯᓐᓄᓪᓗ ᒎᑎᒋᔭᐅᓂᐊᕐᐳᖓ; ᖃᐅᔨᓕᖁᓪᓗᓯ ᐅᕙᖓ ᐊᑕᓂᐅᒐᒪ ᒎᑎᒋᔭᓯ, ᐊᐅᓪᓚᕐᑎᑦᓯᔨᒋᓚᐅᕐᑕᓯ ᐄᑦᔨᑉᑎᒥᐅᑦ ᐅᖁᒤᒃᓴᕐᑎᑦᓯᓂᖏᓐᓂᑦ.
ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑍᑦᓱᒪᓂ ᐃᓴᕆᐊᓕᒥᐅᑦ ᓂᕈᐊᕋᒃᑭᑦ, ᐊᖏᒻᒪᕆᒡᕕᒋᓚᐅᕐᐸᒃᑲ ᔧᑰᑉ ᑭᖑᕚᖏᑕ ᓯᕗᓕᖏᑦ, ᐅᕙᓐᓂᒡᓗ ᖃᐅᔨᑎᓪᓗᒋᑦ ᐄᑦᔨᑉᑎᒦᑎᓪᓗᒋᑦ, ᐊᖏᕐᕕᒋᓪᓗᒋᑦ ᐅᖃᐅᑎᓚᐅᕐᐸᒃᑲ, ‘ᐅᕙᖓᐅᕗᖓ ᐊᑕᓂᖅ ᒎᑎᓯ.’
ᐅᖃᐅᑎᓚᐅᕐᐸᒃᑲᓗ, ᑕᑯᒥᒋᔭᓯ ᓇᕐᕈᓇᕐᑐᑦ ᐃᒋᓚᐅᕐᓯᐅᒃ, ᐊᑕᖏᕐᓗᓯ ᐃᓕᑦᓯᓐᓂᒃ ᐃᑦᔪᕐᓇᕐᑎᑐᓐᓃᕆᑦᓯ ᐄᑦᔨᑉᑎᒥᐅᑦ ᒎᑎᓐᖑᐊᖏᓐᓄᑦ; ᐅᕙᖓᐅᒐᒪ ᐊᑕᓂᖅ ᒎᑎᓯ.
ᐊᑕᓂᐅᒐᒪ ᒎᑎᓯ; ᐃᓕᑦᓯᓐᓂᒃ ᑐᓂᓕᕆᑦᓯ ᐃᑦᔪᕐᓁᓕᕐᓗᓯᓗ, ᐅᕙᖓ ᐃᑦᔪᕐᓁᓐᓇᒪ. ᐃᓕᑦᓯᓐᓂᒃ ᓴᓗᒤᓕᕐᑎᓐᓂᐊᕋᓯ ᐆᒪᔪᐃᑦ ᐹᕐᖑᕐᑐᑦ ᓄᓇᒥ ᐱᑦᔪᑎᒋᓗᒋᑦ.
ᐊᑕᓂᖅ ᒨᓯᓯᒧᑦ ᐅᖃᕐᐳᖅ,
“ᐊᑐᖁᔭᒃᑲ ᐃᖅᑲᐅᒪᑦᓯᐊᕐᓯᒋᒃ, ᑕᒫᓂᓗ ᓄᓇᖃᓚᐅᕐᑐᑦ ᐱᐅᓯᕆᓚᐅᕐᑕᖏᑦ ᑎᑭᓚᐅᕐᑎᓐᓇᓯ ᒪᓕᖕᓂᐊᕐᓇᒋᑦ, ᑕᒪᒃᑯᓂᖓ ᐃᓕᑦᓯᓐᓂᒃ ᐃᑦᔪᕐᓇᕐᓯᑎᓐᓂᐊᕋᓯ, ᐅᕙᖓ ᐊᑕᓂᐅᒐᒪ ᒎᑎᓯ!”
ᐱᖁᔭᒃᑲ ᓈᓚᒃᓯᒋᒃ ᒪᓕᒐᒃᓴᐅᖁᔭᒃᑲᓗ ᐅᑦᔨᕆᓯᒋᒃ, ᐊᑕᓂᐅᒐᒪ ᐃᓕᑦᓯ ᒎᑎᓯ.
ᐱᕈᕐᓰᕖᑦ ᐸᐅᕐᖓᓕᒃ ᑲᑎᕐᓱᐃᕕᒋᒍᕕᐅᒃ, ᕿᒪᒃᑕᑎᑦ ᐸᐅᕐᖎᑦ ᐅᑎᕐᕕᒋᔭᕆᐊᖃᓐᖏᓚᑎᑦ. ᐊᒥᐊᒃᑯᒋᓕᒃᑭᑦ ᐊᔪᕐᓴᕐᑐᓄᑦ, ᑕᒫᓂᓗ ᓄᓇᖃᖏᑦᑐᓄᑦ. ᐅᕙᖓ ᐊᑕᓂᐅᒐᒪ ᒎᑎᓯ.
ᐃᓴᕆᐊᓕᒥᐅᖑᖏᑦᑐᑦ ᓄᓇᑦᓯᓐᓂ ᓄᓇᖃᕐᐸᑕ, ᐃᓴᕆᐊᓕᒥᐅᖑᖃᑎᑦᓯᑐᑦ ᐱᔭᐅᔭᕆᐊᖃᕐᐳᑦ, ᓇᒡᓕᒋᓗᒋᑦ ᐃᓕᑦᓯᑐᑦ ᐃᓕᑦᓯᑦᑕᐅᖅ ᓄᓇᒋᓐᖏᑕᑦᓯᓐᓃᓚᐅᕋᑦᓯ ᐄᑦᔨᑉᑎᒥ; ᐅᕙᖓ ᐊᑕᓂᐅᒐᒪ ᒎᑎᓯ.
ᓄᓇᖃᕐᑐᑦ ᑕᒫᓂ ᐃᓅᖃᑎᒌᒡᔪᐊᑦ ᐱᐅᓯᑐᖃᖏᓐᓂᒃ ᐃᓕᖅᑯᓯᖃᖁᓐᖏᓚᑦᓯ, ᑍᒃᑯᐊ ᑕᒫᓐᖓᑦ ᐊᐅᓪᓚᕐᑎᓐᓂᐊᕐᐸᒃᑲ, ᐱᐅᖏᑦᑐᐊᓗᖕᓂᒃ ᑕᒪᒃᑯᓂᖓ ᐱᐅᓯᖃᓚᐅᕐᒪᑕ. ᖁᕕᐊᒋᓐᖏᑕᓐᓂᒃ ᐊᑐᓚᐅᕐᒪᑕ.
ᐃᓕᑦᓯᓐᓂᒃ ᐃᑦᔪᕐᓁᑎᓐᓂᐊᕆᑦᓯ, ᐅᕙᖓ ᐊᑕᓂᐅᒐᒪ ᒎᑎᓯ.
