17 ᑍᒤᒻᒪᑦ ᐆᒻᒪᑎᕗᑦ ᖃᓂᒪᕗᑦ, ᐃᔨᕗᓪᓗ ᑕᐅᑐᑦᓯᐊᕈᓐᓃᕐᓗᑎᒃ.
ᕿᒃᓵᖕᓂᕐᒧᑦ ᑕᑯᓐᓇᑦᓯᐊᕈᓐᓁᕐᐳᖓ, ᐊᕙᑎᓕᒫᒃᑲᓗ ᑕᕐᕋᑎᑐᑦ ᓵᑦᑑᑎᒋᓕᕐᐳᑦ.
ᐊᑕᓃᖅ, ᓂᑲᒋᓚᐅᓐᖓ, ᐅᖁᒤᑦᑐᒦᓗᐊᓕᕋᒪ; ᐃᔩᒃᑲᒃ ᓴᓐᖐᑦᑑᓕᕐᐳᒃ ᕿᒃᓵᖕᓂᕐᒧᑦ; ᐃᓛᒃ ᑕᕐᓂᕋ ᑎᒥᒐᓗᑦᑕᐅᖅ,
ᐱᒡᒐᕐᑐᐊᓘᓕᕐᐳᖓ, ᓯᖁᒥᓯᒪᓕᕐᓗᖓᓗ; ᐋᓐᓂᐊᓂᕐᒧᓪᓗ ᓂᓪᓕᐊᕗᖓ ᐆᒻᒪᑎᒪ ᐅᖁᒤᒃᓴᓗᐊᕐᓂᖓᓄᑦ.
ᐃᔩᒃᑲᒃ ᓴᓐᖐᑦᑑᓕᕐᐴᒃ ᕿᒃᓵᖕᓂᓐᓄᑦ; ᑕᒃᐲᑦᑑᓕᕐᐳᖓ ᐊᑭᕋᕐᑐᕐᑎᒃᑲ ᐱᑦᔪᑎᒋᓪᓗᒋᑦ.
ᑕᖃᓯᒪᓕᕐᐳᖓ ᕿᐊᓂᕐᒧᑦ; ᐃᒡᒋᐊᕋᓗ ᐸᓂᓕᕐᓗᓂ. ᐃᔩᒃᑲᒃ ᐅᐃᑕᓂᖅ ᐊᔪᓕᕐᒪᑎᒃ, ᒎᑎᓐᓂᒃ ᕿᓂᕐᓂᕐᒧᑦ.
ᓱᖕᒪᑦ ᓱᒋᐊᕐᑕᐅᔪᒤᓐᓇᕐᐱᓰ? ᐊᑭᕋᕐᑐᐃᓐᓇᕐᓂᑦᓯᓐᓄᑦ? ᓂᐊᖁᓯ ᐊᑕᖏᕐᓗᑎᒃ ᖃᓂᒪᕗᑦ, ᐆᒻᒪᑎᓯᓗ ᐊᑕᖏᕐᓗᑎᒃ ᓄᑭᑮᑦᑑᓪᓗᑎᒃ.
ᖁᐸᓄᐊᑎᑐᑦ ᑕᑎᒡᒐᕐᔪᐊᑐᓪᓗ ᓂᓪᓕᐊᓕᓚᐅᕐᐳᖓ, ᑑᕕᑎᑐᑦ ᑎᖕᒥᐊᑐᑦ ᓂᑦᔮᔫᔮᓕᕐᓗᖓ, ᐃᔩᒃᑲᒡᓗ ᑕᖃᓪᓗᑎᒃ ᖁᒻᒧᑦ ᑕᑯᓇᓱᖕᓂᕐᒧᑦ, ᐊᑕᓃᖅ, ᐅᖁᒤᒃᓴᕕᒡᔪᐊᓕᕋᒪ ᓴᐳᑎᓚᐅᓐᖓ!
ᓱᓇᒥᒃ ᑕᑯᕗᖔ? ᑲᑉᐱᐊᓱᓕᕐᑐᓂᒃ ᐅᑎᕆᐊᓕᕐᓗᑎᒡᓗ, ᐅᓇᑕᕐᑎᖁᑎᖏᑦ ᓵᓚᐅᕗᑦ, ᑐᐊᕕᕐᓗᑎᒃ ᕿᒫᕗᑦ, ᑲᑉᐱᐊᓱᓕᕐᐳᑦ ᓇᑭᑐᐃᓐᓇᖅ ᐊᕙᑕᖏᕐᑕᐅᓕᕋᒥᒃ, ᐊᑕᓂᖅ ᐅᖃᕐᐳᖅ.
ᕿᒃᓵᓕᕋᒪ ᒪᓂᒍᒐᒃᓴᐅᖏᑦᑐᒥᒃ; ᐆᒻᒪᑎᒐ ᓄᑮᕈᑎᕗᖅ ᐃᓗᓐᓂ.
ᖁᑦᓯᒃᑐᒥᑦ ᐃᑯᒪᒥᒃ ᑎᑭᑎᑦᓯᕗᖅ ᐃᑯᐊᓚᔪᒥᒃ, ᓴᐅᓂᒃᑲ ᑎᑭᓪᓗᒋᑦ, ᒎᑎ ᓂᒐᕐᕕᒃᓴᓂᒃ ᐋᖅᑭᒃᓯᕗᖅ, ᓂᒐᕋᒪᓗ ᐅᑎᕆᐊᕐᑎᑉᐹᖓ, ᓱᓁᕈᑎᓪᓗᓂᖓ ᓄᑭᖃᕈᓐᓁᕐᑎᑉᐹᖓ ᐅᓪᓗᓕᒫᖅ.
ᐊᔪᕐᑐᓕᓂᖏᑦ ᓵᖕᓄᑦ ᓴᖅᑭᑎᒃᑭᑦ ᐱᓇᓱᐊᕈᑎᒋᓗᒋᓪᓗ, ᑍᒫᒃᑕᐅᖅ ᐊᔪᕐᑐᓕᓂᒃᑲ ᐱᓪᓗᒋᑦ ᐱᓂᐊᕐᕕᒋᓚᐊᕋᕕᖓ, ᐅᖁᒤᒃᓴᕈᑎᒋᔭᒃᑲ ᐅᓄᕐᒪᑕ ᐆᒻᒪᑎᒐᓗ ᓄᑭᖏᕈᑎᓕᕐᐳᖅ.
ᐃᔩᒃᑲᒃ ᖁᕕᕐᓴᖃᕈᓐᓁᕐᐴᒃ ᕿᐊᓂᕐᒧᑦ, ᐃᓗᒃᑯᑦ ᐋᓐᓂᐊᕋᒪ, ᐃᓄᖁᑎᒃᑲ ᐊᓯᕈᕐᑕᐅᔪᑦ ᐱᑦᔪᑎᒋᓪᓗᒋᑦ ᑕᖃᕗᖓ, ᓄᑕᖅᑲᑦ ᓄᑕᕋᓛᓪᓗ ᓄᑭᖏᕈᑎᓂᑯᐃᑦ ᓇᓂᑐᐃᓐᓈᓕᕐᐳᑦ ᐊᖅᑯᑎᓂ.
ᓴᐱᓕᕐᑎᑦᓯᖁᓪᓗᒍ, ᐹᓪᓚᒃᑎᑦᓯᓗᓂᓗ ᐅᓄᕐᑐᓂᒃ ᐃᑎᕐᑕᕐᕕᓕᒫᖏᓐᓂ. ᓯᕗᕋᓵᕆᕗᖓ ᓴᕕᒡᔪᐊᕐᒧᑦ ᖃᐅᒻᒪᓪᓚᒃᑎᑐᑦ ᓴᖅᑭᖃᑦᑕᕐᑐᒥᒃ; ᕿᓪᓚᕆᒃᓴᕐᓯᒪᔪᒥᒃ ᑐᖁᕅᓂᐊᓕᕋᒥ.
ᐊᐱᕆᔭᐅᒍᕕᑦ ᖃᓄᐃᒻᒪᑦ ᕿᒃᓵᖕᓂᕐᒧᑦ ᐊᓂᕐᓴᐅᒥᖕᒪᖔᕐᐱᑦ, ᐅᖃᕐᑐᒃᓴᐅᕗᑎᑦ, ‘ᑐᓴᕐᑕᐅᔭᕆᐊᓕᖕᓂᒃ ᐱᑦᔪᑎᖃᕐᐳᖓ. ᑐᓴᕐᑕᐅᓕᕈᑎᒃ ᐆᒻᒪᑎᖏᑦ ᑲᑉᐱᐊᓱᓕᕈᒫᕐᐳᑦ ᑲᑉᐱᐊᓱᖕᓂᕐᒧᑦ ᑕᓕᖏᑦ ᓄᑮᕈᑎᔪᒫᕐᐳᑦ, ᓴᐱᕐᓇᕐᑐᕐᔪᐊᒧᓪᓗ ᑎᑭᐅᑎᓗᑎᒃ ᓂᐅᖏᓪᓗ ᓴᓐᖐᓕᔪᒫᕐᐳᑦ ᐃᒥᕐᑎᑐᑦ. ᑕᑯᒋᑦ, ᑎᑭᓕᕐᐳᖅ ᓇᓪᓕᐅᑎᓂᐊᕐᓗᓂᓗ,’ ᐊᑕᓂᖅ ᒎᑎ ᐅᖃᕐᐳᖅ.”
“ᐃᓕᑦᓯᓐᓂᓪᓗ ᐊᒥᐊᒃᑯᑦ ᕿᒫᑎᑕᐅᓯᒪᔪᑦ ᐊᑭᕋᑦᓯᓐᓃᑎᑕᐅᔪᑦ, ᐃᕐᓯᓂᕐᒥᒃ ᐱᑎᑦᓱᒪᕙᒃᑲ ᐊᒡᓛᑦ ᓇᐹᕐᑑᑉ ᐅᖃᐅᔭᖏᓐᓂᒃ ᐊᓄᕆᒧᑦ ᐊᐅᓚᑕᐅᔪᓂᒃ ᕿᒫᖃᑦᑕᓕᕋᔭᕐᐳᑦ. ᑕᒪᒃᑯᓂᖓ ᕿᒫᖃᑦᑕᓕᕋᔭᕐᐳᑦ ᐅᓇᑕᕐᓂᕐᒧᑦ ᐊᑭᕋᒥᖕᓂᑦ ᒪᓕᒃᑕᐅᔪᑐᑦ, ᐹᓪᓚᖃᑦᑕᓕᕐᓗᑎᒡᓗ ᕿᒫᑎᑕᐅᓇᓱᖏᒃᑲᓗᐊᕐᓗᑎᒃ.
ᑍᒤᒻᒪᑦ, ᓱᒋᐊᓕᕐᐸᑦᓯ, ᐊᔪᓕᕐᑎᓪᓗᓯ ᐊᔪᕐᑐᓕᓂᓯ ᐱᓪᓗᒋᑦ.
ᑕᒪᒃᑯᓇᓂᓗ ᐃᓅᖃᑎᒌᒡᔪᐊᓃᑎᓪᓗᓯ ᓮᓕᑦᓯᐊᕐᓇᕐᑐᒥᒃ ᓇᓂᓯᔪᒫᓐᖏᓚᓯ, ᓇᖕᒥᓂᕆᔭᕐᓂᒡᓗ ᑍᔭᒃᓴᕐᑕᖃᕈᒫᓐᖏᓚᖅ; ᐊᑕᓂᐅᑉ ᓵᓚᒋᔭᐅᑎᑦᓱᒫᕐᒪᓯ ᐃᓱᒪᔮᕐᓂᕐᒧᑦ, ᓂᕆᐅᒋᔭᒃᓴᖃᖏᓐᓂᕐᒧᑦ, ᓴᐱᓕᕐᓂᕐᒧᓪᓗ.
