ᔨᕆᒤᐊᐅᑉ ᐊᒡᓚᖏᑦ 17:8 - ᐊᒡᓔᑦ ᐃᑦᔪᕐᖕᓁᑦᑐᑦ

⁸ ᓇᐹᕐᑐᑎᑐᑦ ᑍᒤᑉᐳᖅ ᐃᒪᖃᑦᓯᐊᕐᑐᒥ ᐱᕈᕐᓯᒪᔪᑎᑐᑦ, ᐊᒫᖏᓪᓗ ᐃᒫᓄᑦ ᑎᑭᐅᒪᑦᓯᐊᕐᑐᑎᑐᑦ, ᓯᓚ ᐅᖅᑰᔪᐊᓘᓕᕋᓗᐊᕐᐸᑦ ᓯᕘᕋᖏᑦᑐᑎᑐᑦ, ᐅᖃᐅᔭᖃᕐᑐᑎᑐᑦ ᑐᖑᔪᐃᓐᓇᕐᑐᓂᒃ, ᐸᓂᕐᓇᕐᑐᖃᕋᓗᐊᕐᐸᑦ ᐃᓱᒫᓗᖏᑦᑐᑎᑐᑦ, ᐱᕈᕐᑐᒃᓴᖁᑎᖏᑦ ᐱᕈᐃᓐᓇᐅᔭᕐᒪᑕ.

ᔨᕆᒤᐊᐅᑉ ᐊᒡᓚᖏᑦ 17:8 Iomraidhean Croise

ᔫᐱᐅᑉ ᐊᒡᓚᖏᑦ 29:19

ᓇᐹᕐᑐᑎᑐᑦ ᐊᒫᒃᑲ ᓯᐊᒻᒪᕐᓯᒪᓚᐅᕐᐳᑦ ᐃᒫᓄᑦ, ᐊᕙᓚᖓᔪᒃᑲᓗ ᖃᐅᓯᕐᑎᑕᐅᓯᒪᓪᓗᑎᒃ ᓄᓇᐅᑉ ᐂᔪᖓᓂᖓᓄᑦ.

ᔫᐱᐅᑉ ᐊᒡᓚᖏᑦ 8:16

ᐅᖃᐅᔭᕐᔪᐊᑎᑐᑦ ᓯᕿᓐᓂᕐᑎᓪᓗᒍ ᐃᑦᑎᖃᕋᓗᐊᕐᐳᑦ ᐱᕈᕐᓰᕕᖕᒥ ᐃᓯᕕᖓᔪᑎᑐᑦ ᐆᒻᒪᐅᑦᓯᐊᕐᓗᑎᒃ.

ᐃᓐᖏᕈᑎᑦ 1:3

ᑖᓐᓇ ᐊᑦᔨᖃᕐᐳᖅ ᓇᐹᕐᑐᒥᒃ ᑰᑉ ᓯᓈᓂ ᐱᕈᕐᓯᐊᒥᒃ, ᐸᐅᕐᖓᕐᑖᕐᐸᒃᑐᑐᑦ ᐱᕈᕐᕕᐅᕕᒃᓴᖓ ᓇᓪᓕᐅᑎᔭᕌᖓᑦ, ᐅᖃᐅᔭᖏᓪᓗ ᑐᖁᓕᓂᐊᓐᖏᓚᑦ; ᖃᓄᐃᓕᐅᕐᑕᖏᑦ ᑕᒪᕐᒥᒃ ᓴᖅᑭᕈᒫᕐᐳᑦ.

ᓲᓗᒨᓂᐅᑉ ᐅᖃᓪᓚᖕᓂᖏᑦ 11:28

ᐊᒃᓗᐃᑦᔪᑎᒥᓂᒃ ᑕᑎᖃᕐᑐᖅ ᓄᖑᕈᑎᓂᐊᕐᐳᖅ, ᐃᓱᐊᕐᑐᕐᓕ ᐆᒻᒪᕐᑎᑐᑦ ᐅᖃᐅᔭᕐᑎᑐᑦ ᐱᕈᕐᐸᓪᓕᐊᓂᐊᕐᐳᖅ.

ᐂᓮᐊᓯᐅᑉ ᐊᒡᓚᖏᑦ 58:11

ᐊᑕᓂᐅᑉ ᑕᕝᕙ ᑕᓯᐅᖏᓐᓇᕐᓂᐊᕐᐹᓯ, ᑕᕐᓂᑦᓯᓗ ᑭᓐᖒᒪᔭᖏᑦ ᓈᒻᒪᒃᓯᑎᓐᓂᐊᕐᐰᑦ, ᓴᐅᓂᓯ ᓴᓐᖏᔫᓕᕐᑎᓪᓗᒋᑦ; ᐃᒪᖃᕐᑎᑕᐅᔪᑎᑐᑦ ᐱᕈᕐᓰᕕᒃᑐᑦ ᑍᒤᓐᓂᐊᕐᐳᓯ, ᓄᓇᐅᓪᓗ ᐃᓗᐊᓂᑦ ᑰᒃᕕᐅᔪᑎᑐᑦ, ᐃᒤᕈᓚᐅᕐᓯᒪᖏᑦᑐᑎᑐᑦ ᑍᒤᓪᓗᓯ.

ᐂᓮᐊᓯᐅᑉ ᐊᒡᓚᖏᑦ 61:3

ᓮᐅᓂᒥ ᕿᒃᓵᒃᑐᑦ ᐃᑲᔪᕆᐊᕐᓗᒋᑦ, ᑕᑯᒥᓇᕐᑐᕐᔪᐊᕐᒥᒃ ᐱᑖᖁᓪᓗᒋᑦ ᐊᕐᔭᓕᓃᑦ ᐃᓇᖏᕐᓗᒋᑦ, ᐃᓔᓕᕿᓂᕐᒧᑦ ᕿᒃᓵᒃᑐᑦ ᖁᕕᐊᓱᖕᓂᐅᑉ ᐅᕐᓱᖓᓂᒃ ᑐᓂᓯᕕᐅᖁᓪᓗᒋᑦ, ᓂᕐᑐᐃᓂᕐᒥᒃ ᐊᓐᓄᕌᕐᑎᓪᓗᒋᑦ ᑕᖃᓯᒪᔪᒥᒃ ᐊᓂᕐᓂᖃᕐᑐᑦ; ᓇᓛᒎᕐᑐᒥᒃ ᐆᒃᒥᒃ ᓇᐹᕐᑐᒥᒃ ᑍᔭᐅᓕᖁᓪᓗᒋᑦ, ᐊᑕᓂᐅᑉ ᑲᓐᖓᕐᓱᕐᑕᖓᓂᒃ ᐱᕈᕐᓯᐊᒃᓴᒥᒃ, ᓂᕐᑐᕐᑕᐅᑦᔪᑎᒃᓴᒥᓄᑦ.

ᔨᕆᒤᐊᐅᑉ ᐊᒡᓚᖏᑦ 39:18

ᐱᐅᓕᓂᐊᕐᐸᒋᑦ, ᐅᓇᑕᕐᑐᓄᑦ ᑐᖁᑕᐅᓂᐊᓐᖏᓚᑎᑦ, ᐃᓅᑎᑕᐅᓂᐊᕐᐳᑎᓪᓕ ᐅᕙᓐᓂᒃ ᐅᒃᐱᕆᔭᖃᕋᕕᑦ, ᐊᑕᓂᖅ ᐅᖃᕐᐳᖅ.”

ᐃᓯᑭᐊᓕᐅᑉ ᐊᒡᓚᖏᑦ 31:3

ᑕᑯᒋᑦ, ᓕᐸᓇᓂᒥ ᓇᐹᕐᑐᒥᒃ ᓰᑕᕆᒥᒃ ᐊᑦᔨᖃᕐᐳᑎᑦ, ᐊᕙᓚᖓᔪᖃᐅᑦᓯᐊᕐᑐᒥᒃ ᐅᖃᐅᔭᖃᕐᑐᒥᒡᓗ ᓯᐊᒻᒪᖓᑦᓯᐊᕐᑐᓂᒃ, ᑕᑭᔫᓂᕐᒥᓄᑦ ᓄᕗᔭᓄᑦ ᑎᑭᐅᓯᒪᔪᒥᒃ.

ᐃᓯᑭᐊᓕᐅᑉ ᐊᒡᓚᖏᑦ 47:12

ᑰᓪᓗ ᓰᓇ, ᐊᑦᔨᒌᖏᑦᑐᓂᒃ ᓇᐹᕐᑐᖃᕈᒫᕐᐳᖅ ᐊᑭᓕᕇᓂᒃ, ᓂᕿᒃᓴᖃᕐᕕᐅᔪᒫᕐᑐᓂᒃ. ᐅᖃᐅᔭᖏᑦ ᑐᖁᓕᔪᐃᑦᑑᔪᒫᕐᐳᑦ ᐱᕈᕐᑐᐃᕈᑎᔪᓐᓇᖏᓪᓗᑎᒡᓗ, ᑕᖅᑭᑕᒫᓪᓕ ᓄᑖᓂᒃ ᐸᐅᕐᖓᕐᑖᖃᑦᑕᕈᒫᕐᐳᑦ, ᐃᒪᖃᕐᑎᑕᐅᒐᒥᒃ ᑐᒃᓯᐊᕐᕕᒡᔪᐊᕐᒥᑦ ᑰᒃᑐᒧᑦ. ᐱᕈᕐᑐᖏᑦ ᓂᕿᒃᓴᐅᔪᒫᕐᐳᑦ, ᐅᖃᐅᔭᖏᓪᓗ ᐃᓅᓕᓴᐅᑎᐅᔪᒫᕐᐳᑦ ᐋᖅᑭᒃᑕᐅᓇᕐᑑᓗᑎᒃ.”