ᔨᕆᒤᐊᐅᑉ ᐊᒡᓚᖏᑦ 14:7 - ᐊᒡᓔᑦ ᐃᑦᔪᕐᖕᓁᑦᑐᑦ

⁷ ᐊᔪᕐᑐᓕᓂᕗᑦ ᐸᓯᔭᒃᓴᐅᑦᔪᑎᒋᒐᓗᐊᕐᐸᕗᑦ, ᐊᑕᓃᕐᓕ, ᐃᑲᔪᕐᑎᒍᑦ ᐊᑏᑦ ᐱᑦᔪᑎᒋᓗᒍ; ᑲᑕᒃᓯᒪᓂᕗᑦ ᐊᖏᔫᖕᒪᑦ, ᐃᓕᖕᓄᑦ ᐊᔪᕐᑐᓕᓚᐅᕋᑦᑕ.

ᔨᕆᒤᐊᐅᑉ ᐊᒡᓚᖏᑦ 14:7 Iomraidhean Croise

ᐄᓱᕋᐅᑉ ᐊᒡᓚᖏᑦ 9:15

ᐊᑕᓃᖅ ᐃᓴᕆᐊᓕᒥᐅᑦ ᒎᑎᖓ, ᐃᕝᕕᑦ ᐃᓱᐊᕐᑑᕗᑎᑦ, ᐅᕙᒍᑦ ᐊᒥᐊᒃᑰᔪᒍᑦ ᐃᓅᑎᓯᒪᕙᑦᑎᒍᑦ ᐅᓪᓗᒥᒧᑦ ᑎᑭᓪᓗᒍ. ᑕᕝᕙ ᐃᕝᕕᑦ ᓵᖓᓃᑉᐳᒍᑦ, ᐸᓯᔭᒃᓴᐅᓂᑦᑎᓐᓂᑦ ᖃᕿᐊᓕᕐᐳᒍᑦ ᐃᓕᓐᓄᑦ; ᐱᔪᒃᓴᐅᓐᖏᓚᒍᓪᓘᓐᓃᑦ ᓵᖕᓄᑦ ᕾᓗᑕ ᑍᒤᑦᑑᓗᑕ!”

ᐃᓐᖏᕈᑎᑦ 115:1

ᐅᕙᒎᖏᑦᑐᖅ ᐊᑕᓃᖅ, ᐅᕙᒎᖏᑦᑐᖅ, ᐃᕝᕕᓪᓕ ᐊᑏᑦ ᓂᕐᑐᕐᑕᐅᓕ, ᓇᒡᓕᒍᓱᖕᓃᑦ ᓱᖁᓯᔪᐃᑦᑐᖅ ᓱᕐᕋᔪᐃᑦᑑᓃᓪᓗ ᐱᓪᓗᒋᑦ!

ᐃᓐᖏᕈᑎᑦ 25:11

ᐊᑏᑦ ᐱᓪᓗᒍ, ᐊᑕᓃᖅ, ᐃᓱᒪᒋᔪᓐᓁᕐᕕᒋᓐᖓ ᑕᒻᒪᕐᓂᓐᓂᒃ, ᐅᓄᕐᑐᐊᓘᒐᓗᐊᕐᑎᓪᓗᒋᑦ.

ᐃᓐᖏᕈᑎᑦ 79:9

ᐃᑲᔪᓚᐅᕐᑎᒍᑦ, ᒎᑏ ᐱᐅᓕᔨᒋᔭᕗᑦ, ᐊᑎᕐᐱᑦ ᓂᕐᑐᕐᑕᐅᑦᔪᑎᒃᓴᖓᓄᑦ; ᓴᐳᑎᓚᐅᕐᑎᒍᑦ, ᐃᓱᒪᒋᔪᓐᓁᕐᕕᒋᓗᑕᓗ ᐊᔪᕐᓂᑦᑎᓐᓂᒃ, ᐊᑏᑦ ᐱᑦᔪᑎᒋᓗᒍ!

ᐂᓮᐊᓯᐅᑉ ᐊᒡᓚᖏᑦ 48:11

ᐅᕙᖓ ᓇᖕᒥᓂᓐᓂᒃ ᐱᑦᔪᑎᖃᕐᓗᖓ, ᐃᓛᒃ ᐅᕙᖓ ᓇᖕᒥᓂᓐᓂᒃ ᐱᑦᔪᑎᖃᕐᓗᖓ ᑍᒤᓕᐅᕐᕕᒋᕙᑦᓯ, ᖃᓄᖅ ᐊᑎᕋ ᓇᕐᕈᓇᕐᓯᑎᑕᐅᔪᒃᓴᐅᕚ? ᓂᕐᑐᕐᓇᕐᓂᕋ ᐊᓯᓐᓄᑦ ᑐᓂᑦᔪᑎᒋᓂᐊᓐᖏᓚᕋ.”

ᐂᓮᐊᓯᐅᑉ ᐊᒡᓚᖏᑦ 59:12

ᐊᔪᕐᑐᓕᓂᕗᑦ ᐅᓄᓗᐊᓕᕐᒪᑕ ᓵᖕᓂ, ᐊᔪᕐᓂᑦᑕᓗ ᐸᓯᔭᒃᓴᐅᓂᖏᓐᓄᑦ ᐃᖅᑲᕐᑐᕐᑕᐅᓪᓗᑕ; ᐊᔪᕐᑐᓕᓂᑦᑕ ᓇᔪᕐᒪᑎᒍᑦ, ᐊᔪᕐᑐᓕᓂᕗᓪᓗ ᖃᐅᔨᒪᓪᓗᒋᑦ.

ᔨᕆᒤᐊᐅᑉ ᐊᒡᓚᖏᑦ 10:19

ᐅᖃᕐᓂᐊᕐᐳᖅ, “ᑲᑉᐱᐊᓐᓇᒦᒃ ᐊᖏᔪᒥᒃ ᐋᓐᓂᕐᓯᒪᔪᖓ! ᐃᑭᓕᕐᑕᐅᓂᒃᑲ ᒪᒥᑦᑐᓐᓁᓪᓕᕗᑦ. ᐃᓱᒪᓂᐊᕆᕗᓪᓕ, ‘ᐋᓂᐊᕆᒐᒃᑯ ᓇᖕᒥᓂᖅ ᕿᓄᐃᓵᕈᑎᒋᔭᕆᐊᖃᕐᐸᕋ.’

ᔨᕆᒤᐊᐅᑉ ᐊᒡᓚᖏᑦ 2:19

ᐱᐅᖏᓐᓂᑦᓯ ᐋᖅᑭᒋᐊᕐᑕᐅᑎᓐᓂᐊᕐᐹᓯ, ᑲᑕᒃᓯᒪᓂᑦᓯᓗ ᓱᐊᖕᓂᐊᕐᐹᓯ. ᐃᓱᒪᒋᑦᓯᐊᕐᓯᐅᒃ ᑐᑭᓯᓇᓱᐊᕐᓗᒍᓗ ᐱᐅᖏᑦᑑᓂᖓ ᖁᕕᐊᓇᖏᑦᑑᓂᖓᓗ ᐊᑕᓂᕐᒥᒃ ᒎᑎᑦᓯᓐᓂᒃ ᕿᒤᓯᒪᓗᓂ ᓂᕐᑐᕐᓇᕐᓂᖓᓗ ᐃᓱᒪᒋᔪᓐᓃᕐᓗᒍ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᒎᑎ ᐅᖃᕐᐳᖅ.”

ᔨᕆᒤᐊᐅᑉ ᐊᒡᓚᖏᑦ 3:25

ᑲᓐᖑᓱᖕᓂᕐᒧᑦ ᒪᑭᑕᔪᓐᓇᕈᓐᓃᕐᑐᒃᓴᐅᕗᒍᑦ. ᑲᓐᖑᓱᖕᓂᕐᒧᓪᓗ ᐅᓕᒃᑕᐅᔪᒃᓴᐅᕗᒍᑦ ᐊᔪᕐᑐᓕᓯᒪᒐᑦᑕ ᐊᑕᓂᕐᒧᑦ ᒎᑎᑦᑎᓐᓄᑦ ᑕᒪᑦᑕ ᐅᕙᒍᓪᓗ, ᓯᕗᓕᕗᓪᓗ ᐃᓅᓱᒃᑑᓂᑦᑎᓐᓂᑦ ᐅᓪᓗᒥᒧᑦ ᑎᑭᓪᓗᒍ, ᐊᑕᓂᖅ ᒎᑎᕗᑦ ᓈᓚᓚᐅᖏᓐᓇᑦᑎᒍ.”

ᔨᕆᒤᐊᐅᑉ ᐊᒡᓚᖏᑦ 3:6

ᔫᓮᐊ ᐊᖓᔪᖅᑳᕐᔪᐊᖑᑎᓪᓗᒍ, ᐊᑕᓂᐅᑉ ᐅᖃᕐᕕᒋᕚᖓ, “ᑕᑯᓯᒪᕕᓪᓖ? ᐃᓴᕆᐊᓕᒥᐅᑦ ᐅᒃᐱᕈᒪᖏᑦᑐᑦ ᐃᓕᖅᑯᓯᖏᓐᓂᒃ? ᐱᖑᓕᒫᑦ ᖄᖏᓐᓂ ᓇᐹᕐᑐᐃᓪᓗ ᐊᑖᓐᓂ ᐊᓯᓐᓂᐊᓚᐅᕐᐹᖓ ᐊᖑᓐᓂᐊᕐᑎᑎᑐᑦ.

ᔨᕆᒤᐊᐅᑉ ᐊᒡᓚᖏᑦ 5:25

ᓈᒻᒪᖏᑦᑐᓕᓂᑦᓯᓐᓄ ᑕᒪᒃᑯᐊ ᓇᓪᓕᐅᓐᓂᕐᓗᓕᕐᐳᑦ, ᐊᔪᕐᑐᓕᓂᑦᓯᓐᓄᓪᓗ ᐱᐅᔪᑦ ᐱᔭᒃᓴᕋᓗᐊᓯ ᐱᕙᒍᓐᓃᕐᐸᓯ.

ᔨᕆᒤᐊᐅᑉ ᐊᒡᓚᖏᑦ 5:6

ᑕᒪᓐᓇ ᐱᓪᓗᒍ ᓛᔭᒧᑦ ᓇᐹᕐᑐᐃᑦ ᐊᑯᓐᓂᖓᓂ ᑐᖁᑕᐅᓂᐊᕐᐳᑦ. ᐊᒪᕈᕐᓄᓪᓗ ᓱᓇᖃᔪᐃᑦᑐᒥᑦ ᐱᔪᓄᑦ ᐹᔭᐅᓂᐊᕐᐳᑦ. ᐃᕐᓯᓇᕐᑐᒧᓪᓗ ᓕᐅᐸᕐᑦᒧᑦ ᐅᑕᖅᑭᔭᐅᓂᐊᕐᐳᑦ ᓄᓇᓕᖏᑕ ᖃᓂᒋᔭᖏᓐᓂ, ᓄᓇᓖᓪᓗ ᓯᓚᑖᓄᐊᕐᑐᑦ ᐅᒋᐊᕐᑕᓂᐊᕐᐳᑦ, ᑕᒻᒪᕐᓯᒪᓂᖓᑦ ᐊᖏᓗᐊᓕᕐᒪᑦ, ᑲᑕᒍᑎᒋᓯᒪᔭᖏᓪᓗ ᐅᓄᓗᐊᓕᕐᓗᑎᒃ.

ᔨᕆᒤᐊᐅᑉ ᐊᒡᓚᖏᑦ 8:14

“ᖃᓄᐃᒻᒪᑦ ᑲᑎᒪᓪᓗᑕ ᐃᒃᓯᕚᑐᐃᓐᓇᕐᐱᑖ? ᕿᒫᓚᐅᕐᑕ ᐃᒡᓗᒐᓴᒡᔪᐊᓄᑦ ᐱᔭᐅᑦᔧᕐᓯᒪᔪᓄᑦ ᑐᖁᔭᕐᑐᕐᓗᑕ. ᐊᑕᓂᐅᑉ ᒎᑎᑦᑕ ᑐᖁᔪᒃᓴᐅᖁᓕᕐᒪᑎᒍᑦ, ᑐᖁᓐᓇᕐᑐᒥᒡᓗ ᐃᒥᖁᑎᖃᓕᕐᑎᒻᒪᑎᒍᑦ, ᐊᔪᕐᑐᓕᕕᒋᓚᐅᕋᑦᑎᒍ.

ᔨᕆᒤᐊᐅᑉ ᐊᒡᓚᖏᑦ 8:5

ᖃᓄᐃᒻᒪᓪᓕ ᐅᑯᐊ ᐃᓄᐃᑦ ᕿᒤᕙᑦ, ᔨᕉᓴᓕᒥᐅᓪᓗ ᑐᓄᑦᓯᕚᑦ? ᓱᓕᖏᑦᑐᓂᒃ ᐊᑕᕕᖃᕆᐊᖔᕐᓗᑎᒃ ᐅᑎᕈᒪᔪᓐᓃᕐᐸᒃᐳᑦ.

ᐃᓯᑭᐊᓕᐅᑉ ᐊᒡᓚᖏᑦ 20:14

ᑍᒤᓕᐅᓚᐅᓐᖏᓚᖓᓕ ᐊᑎᕋ ᐱᑦᔪᑎᒋᓪᓗᒍ, ᐃᓅᖃᑎᒌᒡᔪᐊᓄᑦ ᓇᕐᕈᓇᕐᓯᑎᑕᐅᖁᓇᒍ, ᐄᑦᔨᑉᑎᒥᑦ ᐊᐅᓪᓚᕐᑎᑦᓯᓂᕆᓚᐅᕐᑕᓐᓂᒃ ᖃᐅᔨᒪᖕᒪᑕ.

ᐃᓯᑭᐊᓕᐅᑉ ᐊᒡᓚᖏᑦ 20:22

ᑍᒤᑦᑐᒪᔪᓐᓁᓚᐅᕆᕙᒃᑲᓕ ᐊᑎᕋ ᐱᑦᔪᑎᒋᓪᓗᒍ, ᐃᓅᖃᑎᒌᒡᔪᐊᑦ ᐄᑦᔨᑉᑎᒥᑦ ᐊᐅᓪᓚᕐᑎᑦᓯᑎᓪᓗᖓ ᖃᐅᔨᓚᐅᕐᑐᑦ ᓇᕐᕈᓇᕐᓯᑎᑦᓯᖁᓇᒋᑦ ᐅᕙᓐᓂᒃ.

ᐃᓯᑭᐊᓕᐅᑉ ᐊᒡᓚᖏᑦ 20:9

ᑲᔪᓯᑎᓚᐅᓐᖏᓚᕋᓕ ᐊᑎᕋ ᐱᓪᓗᒍ ᓇᕐᕈᓇᕐᓯᑎᑕᐅᖁᓇᒍ ᐃᓅᖃᑎᒌᒡᔪᐊᑦ ᓄᓇᖃᑎᒋᔭᖏᑕ ᓵᖏᓐᓂ, ᐅᖃᐅᑎᔭᕇᓚᐅᕋᒃᑭᑦ ᓄᓇᖃᑎᖏᑦ ᑕᑯᓐᓇᕐᑎᓪᓗᒋᑦ ᐊᐅᓪᓚᕐᑎᑦᓱᒪᓂᕋᕐᓗᒋᑦ ᐄᑦᔨᑉᑎᒥᐅᑦ ᓄᓇᖓᓐᓂᑦ.

ᕼᐆᓯᐊᑉ ᐊᒡᓚᖏᑦ 5:5

ᐃᓴᕆᐊᓕᒥᐅᑦ ᐱᐅᔪᕆᓂᖏᑕ ᑖᑦᓱᒪ ᑮᓇᖓ ᐊᑭᕋᕐᑐᕐᐹᑦ; ᐃᕗᕅᒥ ᐸᓯᔭᒃᓴᐅᓂᕐᒥᓄᑦ ᐹᓪᓚᒍᒫᕐᐳᖅ ᐅᕐᕈᓗᓂ; ᔫᑕᐅᓪᓗ ᐃᓄᖏᑦ ᐅᕐᕈᖃᑕᐅᔪᒫᕐᐳᑦ ᑖᒃᑯᓄᖓ.

ᕼᐆᓯᐊᑉ ᐊᒡᓚᖏᑦ 7:10

ᐃᓴᕆᐊᓕᒥᐅᑦ ᐃᓄᖏᑕ ᐱᐅᔪᕆᓂᖏᑦ ᐃᒻᒥᖕᓄᑦ ᐊᑭᕋᕐᑐᕐᐳᑦ; ᓱᓕᓕ ᐅᑎᓚᐅᓐᖏᓚᑦ ᐊᑕᓂᕐᒧᑦ ᒎᑎᒥᖕᓄᑦ, ᑖᑦᓱᒥᖓᓗ ᕿᓂᓚᐅᕋᑎᒃ, ᑕᒪᒃᑯᐊ ᐊᑐᕐᑎᓪᓗᒋᑦ.

ᐂᒨᓯᐅᑉ ᐊᒡᓚᖏᑦ 7:2

ᐱᒡᓕᕐᑕᐅᔮᕐᑐᑦ ᓄᖒᑦᓯᖕᒪᑕ ᐃᕕᖕᓂᒃ ᓄᓇᒦᑦᑐᓂᒃ, ᐅᖃᓚᐅᕐᐳᖓ; ᐊᑕᓃᖅ ᒎᑏᒃ ᕿᓄᕗᖓ ᐃᓱᒪᒋᔪᓐᓁᕐᕕᒋᒃᑭᑦ! ᔧᑰᑉ ᑭᖑᕚᖏᑦ ᐊᓐᓇᒍᓐᓇᖁᓪᓗᒋᑦ, ᒥᑭᔫᓗᐊᕐᒪᑕ.

ᒤᑲᐅᑉ ᐊᒡᓚᖏᑦ 7:9

ᐊᑕᓂᕐᒧᑦ ᐱᐅᖏᑦᑐᓕᓚᐅᕋᒪ, ᕿᓄᐃᓵᕐᓗᖓ ᐊᑐᕈᒪᕙᕋ ᐊᑕᓂᐅᑉ ᓂᓐᖓᐅᓯᖓ, ᕿᓄᑦᔪᑎᒋᔭᓐᓂᒃ ᐋᖅᑭᒃᓯᓚᐅᖅᑳᕐᑎᓐᓇᒍ ᐃᓱᐊᕐᓯᑎᓪᓗᖓᓗ, ᖃᐅᒪᓂᕐᒧᐊᕈᑎᓂᐊᕐᐹᖓ ᖃᐅᔨᓗᒍᓗ ᐃᓱᐊᕐᓂᖓ.

ᐃᐱᓯᒥᐅᓄᑦ 1:12

ᑍᒤᒻᒪᑦ, ᐅᕙᒍᑦ ᓂᕆᐅᒋᔭᒃᓴᖃᖅᑳᕐᓯᒪᔪᒍᑦ ᙭ᔅᑑᓯᒥ ᑍᒤᑎᑕᐅᓯᒪᕗᒍᑦ ᑎᓕᔭᐅᓪᓗᑕ ᐃᓅᖁᓪᓗᑕ ᒎᑎᐅᑉ ᐱᓐᓇᕐᓇᕐᓂᕐᔪᐊᖓᑕ ᓂᕐᑐᕐᑕᐅᓂᒃᓴᖓᓄᑦ.

ᐃᐱᓯᒥᐅᓄᑦ 1:6

ᒎᑎ ᓂᕐᑐᓚᐅᕐᓚᕗᑦ ᓂᕐᑐᕐᓇᕐᓂᕐᔪᐊᒥᒍᑦ ᐱᑦᓯᐊᕐᓂᖓᑕ ᐱᔪᓐᓇᕐᓯᑎᑦᓯᓂᖓ ᐱᑦᔪᑎᒋᓗᒍ, ᐊᑭᖃᖏᑦᑐᒥᒃ ᑐᓂᓯᕕᒋᓚᐅᕐᒪᑎᒍᑦ ᓇᒡᓕᒋᒻᒪᕆᒃᑕᒥᒍᑦ.

ᒨᓯᓯ ᑕᓪᓕᒪᖏᑦ 32:27

ᐊᑭᕋᕐᑐᕐᑎᖏᑦ ᐱᐅᔪᕆᓂᐊᕋᓱᒋᖏᒃᑯᒃᑭᑦ ᑍᒤᓕᐅᕋᔭᕐᐳᖓ, ᐊᑭᕋᖏᑦ ᓱᓕᖏᑦᑐᒥᒃ ᐅᖃᐅᓯᖃᕐᓂᐅᓴᖏᑉᐸᑕ, ᐅᖃᓕᖁᓇᒋᑦ, ᐱᔪᓐᓇᕐᓂᑦᑎᓐᓄᑦ ᓵᓚᖃᕐᐳᒍᑦ ᐊᑕᓂᖅ ᐃᑲᔪᕐᑎᒋᓇᒍ ᓵᓚᖃᕐᐳᒍᑦ.’

ᔮᓱᐊᑉ ᐊᒡᓚᖏᑦ 7:9

ᑬᓇᓂᒥᐅᑉ ᓄᓇᓕᓕᒫᓪᓗ ᖃᓂᒋᔮᓃᑦᑐᑦ ᑐᓴᕐᓂᐊᕐᐳᑦ ᑕᒪᑐᒥᖓ, ᐊᕙᓗᔭᐅᓗᑕ ᑐᖁᑕᐅᓂᐊᓕᕐᐳᒍᑦ! ᖃᓄᐃᓕᐅᕐᓂᐊᕐᐱᓪᓖ ᐊᑎᕐᐱᑦ ᐅᐱᓐᓇᕐᓂᖓ ᓴᐳᑎᓗᒍ?”