ᐃᓗᐊᕐᓮᔩᑦ ᐊᒡᓚᖏᑦ 2:13 - ᐊᒡᓔᑦ ᐃᑦᔪᕐᖕᓁᑦᑐᑦ

¹³ ᐊᑕᓂᖅ ᑲᒪᒋᔪᓐᓃᕋᒥᑦᔪᒃ, ᐱᔨᑦᓯᓕᕐᓗᑎᒃ ᐰᓕᓂᒃ ᐋᔅᑕᕉᑎᒥᒡᓗ ᒎᑎᓐᖑᐊᓂᒃ.

ᐃᓗᐊᕐᓮᔩᑦ ᐊᒡᓚᖏᑦ 2:13 Iomraidhean Croise

ᐊᑕᓃᑦ ᓯᕗᓪᓖᑦ 11:33

ᕿᒤᓯᒪᓕᕐᒪᑦ ᐅᕙᓐᓂᒃ ᑐᒃᓯᐊᖃᑦᑕᓕᕐᓗᓂᓗ ᒎᑎᓐᖑᐊᓄᑦ ᐋᔅᑕᕉᑎᒧᑦ ᓮᑐᓂᒥᐅᑦ ᒎᑎᖓᓐᓄᑦ, ᑭᒧᓯᒧᓪᓗ, ᒧᐊᐱᒥᐅᑦ ᒎᑎᖓᓐᓄᑦ, ᒥᐅᓪᑲᒻᒧᓪᓗ ᐊᒧᓁᑎᑦ ᒎᑎᖓᓐᓄᑦ, ᐊᑐᕐᑕᐅᖁᔭᒃᑲ ᐊᑐᕈᓐᓃᕐᒪᒋᑦ ᐱᐅᔪᓂᒃ ᐱᓇᓱᐊᕈᓐᓃᕐᒪᑦ, ᐊᑖᑕᖓᑕ ᑍᕕᑎᐅᑉ ᒪᓕᑦᓯᐊᓚᐅᕐᑕᖏᓐᓂᒃ.

ᐊᑕᓃᑦ ᓯᕗᓪᓖᑦ 11:5

ᓲᓗᒨᓂ ᑐᒃᓯᐊᖃᑦᑕᓕᓚᐅᕐᐳᖅ ᐋᔅᑕᕉᑎᒧᑦ ᐊᕐᓇᐅᓪᓗᓂ ᓮᑐᓂᒥᐅᑦ ᒎᑎᓐᖑᐊᖓᓄᑦ, ᒧᓕᑭᒧᓪᓗ ᐊᒧᓁᑎᑦ ᒎᑎᓐᖑᐊᖓᓄᑦ ᒎᑎᐅᑉ ᓇᕐᕈᒋᔭᖓᓄᑦ.

ᐊᑕᓃᑦ ᐂᑉᐸᖏᑦ 23:13

ᐊᖓᔪᖅᑳᕐᔪᐊᑉ ᔫᓮᐊᐅᑉ ᐱᓪᓚᕆᒋᔭᐅᓪᓗᑎᒃ ᑐᒃᓯᐊᕐᕕᐅᖃᑦᑕᕐᑐᕕᓃᑦ ᐊᑐᕐᑕᐅᔪᓐᓁᓪᓕᑎᑉᐰᑦ ᔨᕉᓴᓕᐅᑉ ᓯᕿᓂᐊᑕ ᓇᓛᓃᑦᑐᑦ ᐱᖒᑉ ᐱᐅᖏᑦᑐᓕᕝᕕᖕᒥᒃ ᑍᔭᐅᔫᑉ ᓯᕿᓂᖓᓃᑦᑐᑦ, ᓲᓗᒨᓂᐅᑉ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᓴᓇᔭᐅᑎᑕᕕᓂᖏᑦ ᒎᑎᓐᖑᐊᒧᑦ ᐋᔅᑕᕉᑎᒥᒃ ᑍᔭᐅᔪᒧᑦ ᓮᑐᓂᐊᒥᐅᑦ ᒎᑎᓐᖑᐊᖓᓐᓄᑦ ᓇᕐᕈᓇᕐᑐᒧᑦ, ᑭᒨᓯᓗ ᒧᐊᐱᒥᐅᑦ ᒎᑎᓐᖑᐊᖓᓄᑦ ᓇᕐᕈᓇᕐᑐᒧᑦ, ᒥᐅᓪᑲᒻᒧᓪᓗ ᐊᒧᓁᑎᒥᐅᑦ ᒎᑎᓐᖑᐊᖓᓐᓄᑦ ᓇᕐᕈᓇᕐᑐᒧᑦ.

ᑯᕉᓂᑲ ᐂᑉᐸᖏᑦ 12:2

ᐊᖓᔪᖅᑳᕐᔪᐊᖅ ᕆᕼᐅᐳᐊᒻ ᐊᖓᔪᖅᑳᖑᓕᕐᑎᓪᓗᒍ ᐊᕐᕌᒍᓂᒃ ᑕᓪᓕᒪᓂᒃ, ᐊᑕᓂᕐᒧᑦ ᒪᓕᑦᓯᐊᖏᓐᓂᖓ ᐱᑦᔪᑎᒋᓪᓗᒍ, ᐄᑦᔨᑉᑎᒥᐅᑉ ᐊᖓᔪᖅᑳᕐᔪᐊᖓ ᓰᓵᒃ ᐅᓇᑕᕆᐊᕐᐳᖅ ᔨᕉᓴᓕᒧᑦ.

ᑯᕉᓂᑲ ᐂᑉᐸᖏᑦ 28:3

ᐃᑯᐊᓪᓔᓚᐅᕐᐳᕐᓗ ᑎᐱᑦᓯᐊᕆᒃᑐᓂᒃ ᕼᐃᓇᒻ ᐃᕐᓂᖓᑕ ᓇᕐᓴᖓᓂ ᐊᑎᓕᖕᒥ, ᐃᕐᓂᓂᓗ ᐃᑯᐊᓪᓚᒃᐰᑦ ᑐᓂᕐᕈᓯᐅᑎᒋᓪᓗᒋᑦ, ᑕᒪᓐᓇ ᓇᕐᕈᓇᕐᓂᕋᕐᑕᐅᔪᖅ ᐱᓂᐊᕐᓂᕆᓚᐅᕐᐹ ᐃᓅᖃᑎᒌᒡᔪᐊᑦ ᐱᐅᓯᖏᑦ ᒪᓕᒡᓗᒋᑦ ᐊᑕᓂᐅᑉ ᐃᓇᖏᕐᑕᐅᑎᓚᐅᕐᑕᖏᓐᓄᑦ ᐃᓴᕆᐊᓕᒥᐅᓄᑦ.

ᑯᕉᓂᑲ ᐂᑉᐸᖏᑦ 33:3

ᓴᓇᒋᐊᓪᓚᓚᐅᕐᒪᑦ ᒎᑎᓐᖑᐊᓄᑦ ᑐᒃᓯᐊᕐᕕᖕᓂᒃ ᐊᑖᑕᖓᑕ ᕼᐃᓯᑬᐊᐅᑉ ᓱᕋᓚᐅᕐᑕᖏᓐᓂᒃ, ᑐᓂᕐᕈᓯᕐᕖᓪᓗ ᐰᓕᒧᑦ ᐋᖅᑭᒃᓱᕆᐊᓪᓚᒃᓗᒋᑦ, ᕿᔪᖕᓂᒡᓗ ᒎᑎᓐᖑᐊᓂ ᐊᓯᕋᓂᒃ ᐊᑎᓕᖕᓂᒃ ᓴᓇᕗᖅ, ᑐᒃᓯᐊᕐᕕᒋᖃᑦᑕᕐᐰᓪᓗ ᒎᑎᒋᔭᐅᔪᑦ ᐅᓪᓗᕆᐊᑦ ᕿᓚᖕᒦᑦᑐᑦ ᐱᔨᑦᓯᕐᓗᒋᓪᓗ.

ᑯᕉᓂᑲ ᐂᑉᐸᖏᑦ 7:22

ᑕᕝᕙ ᐅᖃᓕᕈᒫᕐᐳᑦ, ‘ᐊᑕᓂᕐᒥᒃ ᓯᕗᓕᖏᑦᑕ ᒎᑎᖓᓂᒃ ᕾᒤᓚᐅᕐᒪᑕ ᐄᑦᔨᑉᑎᐅᑉ ᓄᓇᖓᓂᑦ ᐊᐅᓪᓚᕐᑎᑦᓯᔨᒋᓚᐅᕐᑕᒥᖕᓂᒃ, ᒎᑎᐅᓪᓗ ᐊᓯᐊᓄᑦ ᓵᓐᖓᖔᓕᕐᓗᑎᒃ, ᑐᒃᓯᐊᕐᕕᒋᓪᓗᒋᓪᓗ ᐱᔨᑦᓯᓕᕐᓗᒋᑦ; ᑍᒤᒻᒪᑦ ᑎᑭᑕᐅᑎᓚᐅᕐᐰᑦ ᑕᒪᑐᒧᖓ ᐱᐅᖏᑦᑐᒧᑦ.’”

ᐃᓐᖏᕈᑎᑦ 106:36

ᒎᑎᓐᖑᐊᖏᓐᓄᑦ ᑐᒃᓯᐊᖃᑕᐅᖃᑦᑕᓕᓚᐅᕐᐳᑦ: ᑕᒪᑐᒧᖓᓗ ᑕᕝᕙ ᓂᒐᕐᑎᑕᐅᑦᔪᑎᖃᓚᐅᕐᐳᑦ.

ᔨᕆᒤᐊᐅᑉ ᐊᒡᓚᖏᑦ 16:11

ᐃᒫᒃ ᐅᖃᐅᑎᔭᒃᓴᕆᕙᑎᑦ, ‘ᓯᕗᓕᕕᓂᑦᓯ ᕿᒪᓚᐅᕐᒪᖓ, ᐊᑕᓂᖅ ᐅᖃᕐᐳᖅ, ᒎᑎᓐᖑᐊᓂᒡᓗ ᒪᓕᒐᖃᖔᓕᓚᐅᕐᒪᑕ ᑖᒃᑯᐊᓗ ᐱᔨᑦᓯᖔᓕᕐᓗᒋᑦ ᑐᒃᓯᐊᕐᕕᒋᕙᒃᓗᒋᓪᓗ, ᐅᕙᓐᓂᒡᓕ ᕿᒤᓪᓗᑎᒃ ᐱᖁᔭᒃᑲ ᒪᓕᒍᒪᔪᓐᓃᓚᐅᕐᐰᑦ.

ᔨᕆᒤᐊᐅᑉ ᐊᒡᓚᖏᑦ 2:20

ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, “ᑍᑦᓱᒪᓂᐊᓘᓕᕐᐳᖅ ᓇᖕᒪᐅᑍᑦ ᓱᕋᓚᐅᕋᕕᐅᒃ, ᕿᓚᕈᑏᓪᓗ ᕿᒃᑐᕋᕐᓗᒍ ᐅᖃᕐᓗᑎᓪᓗ, ‘ᐱᔨᑦᓯᕐᓂᐊᕈᓐᓃᕐᐸᒋᑦ.’ ᑍᒤᓚᐅᕐᐳᕐᓗ ᑕᒪᓐᓇ ᐱᖑᐃᑦ ᖄᖏᓐᓂ, ᓇᐹᕐᑐᐃᓪᓗ ᐊᑖᓂ ᐊᓯᓐᓂᐊᖃᑦᑕᓚᐅᕐᐸᕐᒪ ᐊᖑᓐᓂᐊᕐᑎᑎᑐᑦ.

ᒨᓯᓯ ᓯᑕᒪᖏᑦ 25:3

ᑍᒤᒻᒪᑦ ᐃᓴᕆᐊᓕᒥᐅᑦ ᑐᒃᓯᐊᖃᑕᐅᓕᓚᐅᕐᐳᑦ ᐰᓕ-ᐱᐅᕆᒥ, ᐊᑕᓂᐅᓪᓗ ᓂᓐᖓᐅᓯᖓ ᐆᒻᒪᕐᐳᖅ ᐃᓴᕆᐊᓕᒥᐅᓄᑦ.

ᑯᕆᓐᑎᐊᒥᐅᓄᑦ ᓯᕗᓪᓖᑦ 8:5

ᒎᑎᐅᓂᕋᕐᑕᐅᔪᓂᒃ ᐱᑕᖃᕋᓗᐊᕐᑎᓪᓗᒍ, ᕿᓚᖕᒥᓘᓐᓃᑦ ᓄᓇᒥᓘᓐᓃᑦ ᒎᑎᒋᔭᐅᔪᑦ ᐅᓄᕐᒪᑕ; ᐊᑕᓂᕆᔭᐅᔪᓪᓗ ᐅᓄᕆᓪᓗᑎᒃ,

ᐃᓗᐊᕐᓮᔩᑦ ᐊᒡᓚᖏᑦ 10:6

ᐃᓴᕆᐊᓕᒥᐅᑦ ᓱᓕ ᐊᔪᕐᑐᓕᓚᐅᕆᕗᑦ ᐊᑕᓂᕐᒧᑦ ᑐᓯᐊᕐᓂᕐᒥᖕᓄᑦ ᐰᓕᒧᑦ ᐋᔅᑕᕉᑎᒧᓪᓗ, ᒎᑎᖃᕐᓂᕐᒥᖕᓄᑦ, ᓯᕆᐊᒥᐅᓪᓗ ᒎᑎᓐᖑᐊᖏᓐᓂᒃ, ᓮᑐᓂᒥᐅᓪᓗ ᒎᑎᓐᖑᐊᖏᓐᓂᒃ, ᒧᐊᐱᒥᐅᓪᓗ ᒎᑎᓐᖑᐊᖏᓐᓂᒃ, ᐊᒧᓁᑎᒥᐅᓪᓗ ᒎᑎᓐᖑᐊᖏᓐᓂᒃ, ᐱᓕᔅᑍᓂᒥᐅᓪᓗ ᒎᑎᓐᖑᐊᖏᓐᓂᒃ. ᐊᑕᓂᕐᒥᒃ ᕿᒤᓚᐅᕐᐳᑦ ᑐᒃᓯᐊᕐᕕᒋᔪᓐᓁᕐᓗᒍᓗ.

ᐃᓗᐊᕐᓮᔩᑦ ᐊᒡᓚᖏᑦ 2:11

ᐃᓴᕆᐊᓕᒥᐅᑦ ᐃᓄᖏᑦ ᐊᔪᕐᑐᓕᓚᐅᕐᐳᑦ ᐊᑕᓂᐅᑉ ᓵᖓᓂ ᐱᔨᑦᓯᓕᕐᓗᑎᒡᓗ ᐰᓕᓄᑦ ᒎᑎᓐᖑᐊᓄᑦ.

ᐃᓗᐊᕐᓮᔩᑦ ᐊᒡᓚᖏᑦ 3:7

ᐃᓴᕆᐊᓕᒥᐅᑦ ᐃᓄᖏᑦ ᐱᐅᖏᑦᑐᐊᓗᖕᓂᒃ ᐱᓂᐊᕐᓂᖃᓚᐅᕐᐳᑦ ᐊᑕᓂᐅᑉ ᓵᖓᓂ, ᐊᑕᓂᖅ ᒎᑎᑎᒃ ᐳᐃᒍᕐᓗᒍ, ᐱᔨᑦᓯᓕᕐᓗᑎᒃ ᐰᓕᓂᒃ ᐊᓯᕋᑎᒥᒡᓗ ᒎᑎᓐᖑᐊᓂᒃ.

ᓴᒧᐃᓕ ᓯᕗᓪᓖᑦ 12:10

ᕿᐊᓪᓗᑎᒡᓗ ᑐᒃᓯᐊᓚᐅᕐᐳᑦ ᐊᑕᓂᕐᒧᑦ ᐅᖃᕐᓗᑎᒃ, ‘ᐊᔪᕐᑐᓕᓚᐅᕐᐳᒍᑦ, ᐃᓕᖕᓂᑦ ᕿᒪᕉᑎᓚᐅᕐᐳᒍᑦ ᐊᑕᓃᖅ, ᒎᑎᓐᖑᐊᓄᓪᓗ ᑐᒃᓯᐊᓚᐅᕐᐳᒍᑦ ᐰᓕᒧᑦ ᐋᔅᑕᕉᑎᒧᓪᓗ; ᒫᓐᓇᓕ ᐱᐅᓕᓚᐅᕐᑎᒍᑦ ᐊᑭᕋᑦᑎᓐᓂᑦ, ᐃᓕᖕᓂᒡᓗ ᐱᔨᑦᓯᓕᕐᓂᐊᕐᐳᒍᑦ!’

ᓴᒧᐃᓕ ᓯᕗᓪᓖᑦ 31:10

ᐅᓇᑕᐅᑎᖏᓪᓗ ᐃᓕᓚᐅᕐᐰᑦ ᑐᒃᓯᐊᕐᕕᖁᑎᒥᖕᓄᑦ ᒎᑎᓐᖑᐊᒧᑦ ᐋᔅᑕᕉᑎᒧᑦ, ᑎᒥᖓᓗ ᐊᑭᓐᓇᒧᑦ ᑭᑭᐊᒃᑕᐅᓚᐅᕐᐳᖅ ᐃᒡᓗᒐᓴᒧᑦ ᐱᑦ-ᓵᓂᒧᑦ.

ᓴᒧᐃᓕ ᓯᕗᓪᓖᑦ 7:3

ᓴᒧᐃᓕᓕ ᐅᖃᕐᐳᖅ ᐃᓴᕆᐊᓕᒥᐅᑦ ᐃᓄᓕᒫᖏᓐᓄᑦ, “ᐊᑕᓂᕐᒧᑦ ᐅᑎᕐᓂᐊᕈᑦᓯ ᐆᒻᒪᑎᑦᓯᓐᓄᑦ ᐊᑕᖏᕐᑐᒧᑦ, ᑕᕝᕙ ᒎᑎᓐᖑᐊᑦ ᐱᒃᓴᔭᕆᓐᖏᑕᓯ ᐃᒋᑕᒃᓴᕆᕙᓯ ᒎᑎᓐᖑᐊᓪᓗ ᐊᕐᓇᐅᑉ ᐋᔅᑕᕉᑎᐅᑉ ᐊᑦᔨᓐᖑᐊᖏᑦ, ᐆᒻᒪᑎᑦᓯᒍᑦ ᑐᓂᒃᑲᓐᓂᓕᕆᑦᓯ ᐊᑕᖏᕐᑐᒧᑦ ᐊᑕᓂᖅ ᐱᔨᑦᓯᕐᑕᑐᐊᕆᓕᕐᓗᒍ, ᑕᕝᕙ ᐱᐅᓕᓂᐊᕐᐹᓯ ᐱᓕᔅᑍᓂᒥᐅᑦ ᐱᔪᓐᓇᕐᓂᖏᓐᓂᑦ.”