ᐂᓮᐊᓯᐅᑉ ᐊᒡᓚᖏᑦ 51:18 - ᐊᒡᓔᑦ ᐃᑦᔪᕐᖕᓁᑦᑐᑦ

¹⁸ ᑕᓯᐅᕐᑎᒃᓴᖃᓐᖏᓚᖅ ᕿᑐᕐᖓᖃᐅᕋᓗᐊᕋᒥ ᐅᓄᕐᑐᓂᒃ; ᓱᓕ ᐊᒡᒐᖏᑎᒍᑦ ᑎᒍᔭᐅᓗᓂ ᑕᓯᐅᕐᑎᒃᓴᖃᓐᖏᓚᖅ, ᐃᕐᓂᓂ ᐅᓄᕐᑐᑦ ᐱᕈᐃᓚᐅᕋᓗᐊᕋᒥᒋᑦ.

ᐂᓮᐊᓯᐅᑉ ᐊᒡᓚᖏᑦ 51:18 Iomraidhean Croise

ᔫᐱᐅᑉ ᐊᒡᓚᖏᑦ 8:20

ᑕᑯᒋᑦ, ᒎᑎ ᐃᒋᑦᓯᓂᐊᓐᖏᓚᖅ ᐸᓯᔭᒃᓴᐅᖏᑦᑐᒥᒃ, ᐱᐅᖏᑦᑐᓕᔪᓪᓗ ᐊᒡᒐᖏᑦ ᑎᒍᒥᐊᕐᓂᐊᓐᖏᓔᑦ.

ᐃᓐᖏᕈᑎᑦ 142:4

ᑕᓕᕐᐱᓐᓄᑦ ᑕᑯᓴᕋᒪ, ᑕᑯᒋᑦ ᑭᓇᒧᓪᓘᓐᓃᑦ ᐃᒃᐱᒋᔭᐅᓐᖏᓚᖓ; ᕿᒫᕕᒃᓴᖃᕈᓐᓃᕐᐳᖓ; ᑭᓇᒧᓪᓘᓐᓃᑦ ᑲᒪᒋᔭᐅᓐᖏᓚᖓ.

ᐃᓐᖏᕈᑎᑦ 88:18

ᐃᓚᒋᔭᒃᑲ ᐃᓚᓐᓇᕆᔭᒃᑲᓗ ᐅᖓᓯᒃᓯᑎᑉᐸᑎᑦ ᐅᕙᓐᓂᑦ; ᐃᓚᓐᓇᕆᓂᕐᐹᒃᑲᓗ ᑖᕐᑐᒧᐊᕐᑎᑉᐸᑎᑦ.

ᐂᓮᐊᓯᐅᑉ ᐊᒡᓚᖏᑦ 41:13

ᐅᕙᖓ ᐊᑕᓂᖅ ᒎᑎᒋᒐᕕᖓ, ᑕᓕᕐᐱᒃᑯᑦ ᑕᓯᐅᕋᒃᑭᑦ; ᐅᖃᐅᑎᓪᓗᑎᓪᓗ, ‘ᑲᑉᐱᐊᓱᒃᑍᓕᒋᑦ, ᐃᑲᔪᕐᓂᐊᕋᒃᑭᑦ.’

ᐂᓮᐊᓯᐅᑉ ᐊᒡᓚᖏᑦ 45:1

“ᐊᑕᓂᖅ ᐃᒫᒃ ᐅᖃᕐᐳᖅ, ᐅᕐᓱᕐᑎᕐᓯᒪᔭᒥᓄᑦ ᓮᕋᓯᒧᑦ, ᑖᓐᓇ ᑕᓕᕐᐱᖓᒍᑦ ᑎᒍᕙᕋ ᓵᓚᖃᖁᓪᓗᒍ ᐃᓅᖃᑎᒌᒡᔪᐊᓂᒃ ᓯᕗᓂᕐᒥᓃᑦᑐᓂᒃ ᐊᖓᔪᖅᑳᕐᔪᐊᓪᓗ ᐊᖓᔪᖅᑳᕐᔪᐊᕐᓯᐅᑎᖏᓐᓂᒃ ᐲᔧᖁᓪᓗᒍ, ᐅᒃᑯᐊᕐᔪᐊᓂᒃ ᒪᕐᕉᓕᖓᔪᓂᒃ ᐅᒃᑯᐃᕐᓯᑦᔪᑎᔪᒫᕐᐸᕋ ᐃᑎᕐᑕᕐᕖᓪᓗ ᐅᒃᑯᐊᕐᑕᐅᔪᓐᓇᕐᓂᐊᓐᖏᓚᑦ.

ᐂᓮᐊᓯᐅᑉ ᐊᒡᓚᖏᑦ 49:21

ᐃᓱᒪᒃᑯᑦ ᐅᖃᕈᒫᕐᐳᑎᑦ: ‘ᑭᐊ ᒪᑯᓂᖓ ᕿᑐᕐᖓᕐᑖᕐᑎᓐᓂᕐᐹᖓ? ᖁᕕᐊᓇᖏᑦᑐᕐᓯᐅᕐᓗᑕ ᕿᑐᕐᖓᖃᕆᐊᒥᒃ ᐃᓱᒪᓚᐅᖏᒃᑲᓗᐊᕐᑐᖓ, ᓄᓇᒋᓐᖏᑕᑦᑎᓐᓄᓪᓗ ᐊᐅᓪᓚᕈᑦᔭᐅᓯᒪᓪᓗᑕ ᖁᔭᓈᕐᑕᐅᓪᓗᑕᓗ, ᑭᐊᓕ ᒪᑯᐊ ᐱᕈᕐᓴᔭᕕᓂᖏᑦ? ᑕᑯᒋᑦ, ᐃᓄᑑᓚᐅᕐᑐᖓ; ᒪᑯᐊᓕ ᓇᑭᑦ ᓴᖅᑭᑦᑐᐊᓗᐃᑦ?’”

ᐂᓮᐊᓯᐅᑉ ᐊᒡᓚᖏᑦ 54:11

ᐋᓐᓂᐊᑎᑕᐅᔪᓯ, ᐊᖅᑯᓇᕐᒧᓪᓗ ᐃᒋᑕᐅᖃᑦᑕᕐᑐᓯ, ᐃᑲᔪᕐᑕᐅᓇᓯᓗ, ᑕᑯᒋᑦ, ᐃᓕᐅᕋᕐᓂᐊᕐᐸᑦᓯ ᐅᔭᖅᑲᓄᑦ ᐱᐅᔪᓄᑦ, ᑐᓐᖓᕕᓕᐅᕐᓗᓯᓗ ᐅᔭᕋᖕᓄᑦ ᑕᑯᒥᓇᕐᑐᕐᔪᐊᓄᑦ.

ᔨᕆᒤᐊᐅᑉ ᐊᒡᓚᖏᑦ 10:20

ᑐᐱᕋ ᑐᖅᑭᕐᑕᐅᖕᒪᑦ, ᓄᖃᕐᑑᑎᓕᒫᖏᑦ ᕿᒃᑐᕌᕗᑦ; ᕿᑐᕐᖓᓕᒫᒃᑲ ᐅᕙᓐᓂᒃ ᕿᒤᓯᒪᓕᕐᐳᑦ. ᑐᑉᐸᒃᓴᕐᑎᒃᓴᖃᕈᓐᓃᕐᐳᖓ ᐅᖅᑯᐃᕝᕕᒃᓴᓐᓂᒃ.”

ᔨᕆᒤᐊᐅᑉ ᐊᒡᓚᖏᑦ 31:32

ᑖᓐᓇ ᐊᖏᖃᑎᒌᒍᑎᒋᔭᕋ ᐊᑦᔨᖃᕈᒫᓐᖏᓚᖅ ᓯᕗᓕᖏᓐᓄᑦ ᐊᖏᖃᑎᒌᒍᑎᒋᓚᐅᕐᑕᓐᓄᑦ, ᑎᒍᓪᓗᒋᑦ ᑕᓯᐅᓚᐅᕋᒃᑭᑦ ᐄᑦᔨᑉᑎᒥᑦ, ᐊᖏᖃᑎᒌᒃᓯᒪᓂᑦᑎᓐᓂᒃ ᓯᖁᒥᑦᓯᓚᐅᕐᒪᑕ, ᐅᐃᒋᔭᐅᔪᑎᑐᑦ ᑖᒃᑯᓄᖓ ᑍᒤᒃᑲᓗᐊᕐᑎᓪᓗᖓ, ᐊᑕᓂᖅ ᐅᖃᕐᐳᖅ.

ᐃᓯᑭᐊᓕᐅᑉ ᐊᒡᓚᖏᑦ 34:6

ᓰᐱᖁᑎᒃᑲ ᓯᐊᒻᒪᕐᓯᒪᓕᕐᐳᑦ, ᖃᖅᑲᓂᓗ ᐱᖑᕐᓂᓗ ᐳᕐᑐᔪᓂ ᐃᓂᖃᓕᕐᓗᑎᒃ; ᓰᐱᖁᑎᒃᑲᓗ ᓄᓇᕐᔪᐊᓕᒫᒧᑦ ᓯᐊᒻᒪᕐᓯᒪᓕᕐᐳᑦ, ᕿᓂᕐᑕᐅᖏᓐᓇᒥᒃ ᕿᓂᕆᐊᕐᑕᐅᓯᒪᓇᑎᒡᓗ.

ᐂᒨᓯᐅᑉ ᐊᒡᓚᖏᑦ 5:2

ᐊᕐᓇᖅ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᖅ ᐃᓴᕆᐊᓕᒥᐅᖅ ᐅᕐᕈᕗᖅ; ᒪᑭᒃᑲᓐᓂᕐᓂᐊᕈᓐᓁᕐᓗᓂ! ᓇᓚᕗᖅ ᕿᒪᒃᑕᐅᓪᓗᓂ ᓄᓇᒥᓂ; ᑭᓇᒥᒡᓘᓐᓃᑦ ᒪᑭᑎᑦᓯᔨᒃᓴᖃᓐᖏᓚᖅ.”

ᒫᑎᐅᓯᐅᑉ ᐊᒡᓚᖏᑦ 15:14

ᐃᓕᑦᓯ ᐃᓱᒫᓗᑎᒋᔭᕆᐊᖃᓐᖏᑕᓯ! ᑕᓯᐅᕐᑎᐅᖕᒪᑕ ᑕᐅᑐᖏᑑᓪᓗᑎᒃ, ᑕᐅᑐᓐᖏᑑᖃᑎᒥᖕᓂᒃ ᑕᓯᐅᕐᓯᓇᓱᐊᕐᑐᑦ ᑕᐅᑐᖏᑦᑐᐃᓐᓇᐅᒍᑎᒃᓗ ᐃᑎᕐᓴᒧᑦ ᑲᑕᒃᑲᔭᕐᐳᑦ.”

ᒫᑎᐅᓯᐅᑉ ᐊᒡᓚᖏᑦ 9:36

ᐃᓄᒋᐊᒃᑐᕐᔪᐊᓪᓕ ᑕᑯᒐᒥᒋᑦ, ᐃᓚᑦᓱᒋᓕᕐᐰᑦ, ᐃᓱᒪᔮᕐᒪᑕ ᐃᑲᔪᕐᑎᒃᓴᖃᕐᑑᔮᕋᑎᒃ, ᓰᐱᑎᑐᑦ ᐰᕐᓯᔨᖃᖏᑦᑐᑎᑐᑦ.

ᒫᑯᓯᐅᑉ ᐊᒡᓚᖏᑦ 8:23

ᑕᐅᑐᖏᑦᑐᖅ ᑕᓯᐅᕐᓗᒍ ᓄᓇᓖᑦ ᓯᓚᑖᓄᐊᕈᑎᕚ; ᐃᔨᖏᒃ ᓄᕙᒥᑦᑕᓚᐅᕐᓗᒋᒃ ᐸᑎᒻᒥᓚᐅᕐᓗᒍ ᐊᐱᕆᕚ, “ᓱᓇᑐᐃᓐᓇᒥᒃ ᑕᑯᕖᑦ?”

ᐋᐴᓯᑕᓖᑦ ᐱᓂᐊᕐᓂᖏᑦ 13:11

ᒫᓐᓇ ᑕᑯᒋᑦ, ᐊᑕᓂᐅᑉ ᓱᒋᐊᕐᓂᐊᕐᐹᑎᑦ, ᑕᐅᑐᒍᓐᓃᕐᓂᐊᕐᐳᑎᑦ ᐊᑯᓂ ᓯᕿᓂᕐᒥᒃ ᑕᑯᔪᓐᓁᓪᓕᓂᐊᕐᐳᑎᑦ.” ᑕᕝᕔᓐᓇᖅ ᐃᓔᒪᓯᐅᑉ ᑕᐅᑐᒃᑕᖓ ᐳᔪᕐᒧᑦ ᑖᕐᑐᒧᑦ ᐅᓕᒃᑕᐅᕗᖅ, ᑕᒪᐅᖓᑐᐃᓐᓇᖅ ᕿᓂᓕᕐᐳᖅ ᑕᓯᐅᕐᑎᒃᓴᒥᓂᒃ.

ᐋᐴᓯᑕᓖᑦ ᐱᓂᐊᕐᓂᖏᑦ 9:8

ᓴᐅᓗᓯ ᓂᑯᕕᓐᓇᒥ; ᐅᐃᒃᑲᓗᐊᕋᒥ ᑕᑯᔪᓐᓇᓐᖏᓚᖅ; ᐊᒡᒐᖏᑎᒍᑦ ᑎᒍᓪᓗᒍ ᑕᓯᐅᕐᐹᑦ ᑕᒫᓯᑰᓯᒧᑦ.

ᐄᑉᕈᐃᓄᑦ 8:9

ᓯᕗᓕᕆᓚᐅᕐᑕᖏᓐᓄᑦ ᐊᖏᖃᑎᒌᒍᑎᒋᓚᐅᕐᑕᒪ ᐊᑦᔨᒋᔪᒫᓐᖏᓛ, ᑍᑦᓱᒪᓂ ᑕᓯᐅᕐᓗᒋᑦ ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕋᒃᑭᑦ, ᑲᒪᑦᓯᐊᓚᐅᖏᒻᒪᑕ ᐊᖏᖃᑎᒌᒍᑎᒋᓚᐅᕐᑕᓐᓂᒃ ᑖᒃᑯᓄᖓ, ᑍᒤᒻᒪᑦ ᕿᒪᓚᐅᕐᐸᒃᑲ, ᐊᑕᓂᖅ ᐅᖃᕐᐳᖅ.