2 ᕼᐃᓯᑬᐊᓗ ᐃᒡᓘᑉ ᐊᑭᓐᓇᖓᓄᑦ ᓵᓐᓇᒥ, ᐊᑕᓂᕐᒧᑦ ᑐᒃᓯᐊᕐᐳᖅ:
“ᐱᔨᕕᑦ ᑐᒃᓯᐊᕐᓂᖓ ᑐᓴᓚᐅᕈᒃ ᐃᓄᖁᑎᕕᓪᓗ ᐃᓴᕆᐊᓕᑏᑦ ᑐᒃᓯᐊᕐᓂᖏᑦ, ᑐᒃᓯᐊᕌᖓᑕ ᐅᕗᖓ ᓵᓐᖓᓗᑎᒃ; ᑐᓵᖃᑦᑕᕆᑦ ᕿᓚᖕᒥᑦ ᐃᓂᒋᔭᕐᓂᑦ; ᑐᓵᑐᐊᕈᕕᑦ ᐃᓱᒪᒋᔪᓐᓁᕐᕕᒋᑎᒍᑦ.
ᓂᓪᓕᐊᕕᒋᓯᓐᖓ ᐅᓪᓗᒥᒃ ᐊᒃᓱᕈᕐᓇᕐᑐᖃᕐᑎᓪᓗᒍ; ᑕᕝᕙ ᓴᐳᑎᓂᐊᕐᐸᑦᓯ, ᓂᕐᑐᕐᓂᐊᕐᐸᑦᓯᓐᖓᓗ.”
ᓂᓪᓕᐊᕕᒋᒃᐸᖓ, ᑕᕝᕙ ᑭᐅᓂᐊᕐᐸᕋ; ᐊᑲᐅᖏᑦᑐᒦᓕᕐᐸᑦ ᓇᔪᕐᓂᐊᕐᐸᕋ, ᓴᐳᑎᓗᒍ ᐅᐱᓐᓇᕐᓯᑎᓐᓂᐊᕐᐸᕋ.
ᐅᓪᓗᐃᑦ ᐃᓚᖏᓐᓂ ᐊᖓᔪᖅᑳᕐᔪᐊᖅ ᕼᐃᓯᑬᐊ ᖃᓂᒻᒪᓚᐅᕐᐳᖅ ᖁᓚᕐᓇᕐᓯᓪᓗᓂ ᐃᓅᓂᐊᕐᒪᖔᑦ, ᒎᑎᐅᓪᓗ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐂᓮᐊᓯᐅᑉ ᐂᒨᓯᐅᑉ ᐃᕐᓂᖓᑕ ᑕᑯᔭᕐᑐᕋᒥᐅᒃ, ᐅᖃᓪᓚᒡᕕᒋᕚ ᐅᖃᕐᓗᓂ, “ᐊᑕᓂᐅᑉ ᐅᖃᐅᑎᖁᖕᒪᑎᑦ ᓱᓇᓕᒫᓂᒃ ᐅᐸᓗᖎᔭᓕᕆᑦ ᐋᖅᑭᓚᐅᖏᓪᓗᑎᑦ ᐃᓅᔪᓐᓃᕐᓂᐊᓕᕋᕕᑦ.”
ᐅᖃᕐᓗᓂ, “ᐊᑕᓃᖅ ᐃᖅᑲᐅᒪᒋᑦ, ᒫᓐᓇ ᐊᑕᓃᖅ ᓵᖕᓂ ᐃᓅᓚᐅᕋᒪ ᓱᖁᓯᔪᐃᑦᑐᒥᒃ ᐃᓕᖕᓂᒃ ᒪᓕᒡᓗᖓ ᐆᒻᒪᑎᒪ ᐱᔪᓐᓇᕐᑕᓕᒫᖓᓄᑦ, ᐱᓇᓱᐊᓚᐅᕐᓗᖓᓗ ᐱᔪᒪᔭᕐᓂᒃ.” ᕼᐃᓯᑬᐊᓗ ᕿᐊᓯᒐᒥ ᕿᐊᕕᒡᔪᐊᓕᕐᐳᖅ.
ᑐᒃᓯᐊᓕᕌᖓᑦᓯᓕ, ᐃᓄᑑᕕᒋᔪᓐᓇᕐᑕᑦᓯᓐᓄᑦ ᐃᑎᕆᑦᓯ, ᐅᒃᑯᐊᖓ ᐅᒃᑯᐊᕐᓗᒍ, ᐊᑖᑕᓯ ᑕᑯᒃᓴᐅᖏᑦᑐᖅ ᑐᒃᓯᐊᕐᕕᒋᓕᕐᓯᐅᒃ, ᐊᑖᑕᑦᓯ ᑕᒤᓐᓂᒃ ᑕᑯᓐᓇᕐᑑᑉ ᐊᑭᓕᕈᒫᕐᐹᓯ.
