5 ᐊᑕᓂᖅ ᐊᑕᐅᓯᖅ, ᐅᒃᐱᕐᓂᖅ ᐊᑕᐅᓯᖅ, ᐹᑉᑎᑦᔪᑦ ᐊᑕᐅᓯᖅ;
ᑕᒪᓐᓇ ᓇᓪᓕᐅᑎᒃᐸᑦ ᐊᑕᓂᖅ ᐊᖓᔪᖅᑳᕐᔪᐊᖑᔪᒫᕐᐳᖅ ᓄᓇᕐᔪᐊᓕᒫᒧᑦ: ᑍᑦᓱᒪᓂᓗ ᐊᑕᓂᖃᕈᒫᕐᐳᖅ ᐊᑕᐅᓯᕐᒥᒃ, ᐊᑎᖓᓗ ᐃᑦᔪᕐᓁᑦᑑᓗᓂ.
ᑍᒤᒻᒪᑦ ᐃᓅᖃᑎᒌᒡᔪᐊᓄᑦ ᐂᓕᕆᑦᓯ, ᐃᓕᓐᓂᐊᕐᑎᓐᖑᕐᑎᑦᓯᒋᐊᕐᑐᕐᓗᓯ: ᐹᑉᑎᓪᓗᒋᓪᓗ ᐊᑖᑕᐅᑉ ᐃᕐᓂᐅᓪᓗ ᐊᓂᕐᓂᐅᓪᓗ ᐃᑦᔪᕐᓁᑦᑑᑉ ᐊᑎᖓᓂ,
ᖃᐅᔨᒪᒐᑦᓯ ᐅᖃᐅᓯᕆᓚᐅᕐᑕᖏᓐᓂᒃ ᐃᓴᕆᐊᓕᒥᐅᓄᑦ, ᐊᔪᕆᕐᑑᓰᑦ ᐅᖃᐅᓰᑦ ᑐᓴᕈᒥᓇᕐᑐᑦ ᓮᒻᒪᕐᑎᑕᐅᓇᕐᑐᖅ ᔩᓱᓯ ᙭ᔅᑑᓯᒃᑯᑦ, ᑕᒤᓐᓄᑦ ᐊᑕᓂᐅᔪᒧᑦ.
“ᐃᓕᑦᓯ ᐃᓴᕆᐊᓕᒥᐅᖑᔪᓯ ᑕᒪᑦᓯ, ᖃᐅᔨᒪᑦᓯᐊᓕᕆᑦᓯ ᔩᓱᓯ ᑭᑭᐊᒃᑐᓚᐅᕐᑕᓯ, ᑖᓐᓇ ᒎᑎᐅᑉ ᐊᑕᓂᓐᖑᕐᑎᓚᐅᕐᐹ ᙭ᔅᑑᓯᓐᖑᕐᑎᓪᓗᒍ.”
ᒎᑎ ᐊᑕᐅᓯᐅᖕᒪᑦ; ᑭᐱᔭᐅᓯᒪᔪᑦ ᐸᓯᔭᒃᓴᐅᔪᓐᓃᕐᑎᓚᐅᕐᐰᑦ ᐅᒃᐱᕐᓂᒃᑯᑦ ᑭᐱᔭᐅᓯᒪᖏᑦᑐᑦᑕᐅᖅ ᐅᒃᐱᕐᓂᒃᑯᑦ ᑕᒪᑐᒧᖓᑦᓮᓐᓇᖅ ᐸᓯᔭᒃᓴᐅᔪᓐᓃᕐᑎᑕᐅᒋᕗᑦ.
᙭ᔅᑑᓯ ᐊᒡᒍᕐᓯᒪᕚ? ᐸᐅᓗᓯ ᓴᓐᓂᖓᔪᓕᖕᒧᑦ ᐱᓪᓗᓯ ᑭᑭᐊᒃᑐᕐᑕᐅᓚᐅᕐᐹ? ᐅᕝᕙᓗ ᐸᐅᓗᓯᒧᑦ ᐃᓕᓐᓂᐊᕐᑎᐅᖁᓪᓗᓯ ᐹᑉᑎᑕᐅᓚᐅᕐᐱᓰ?
ᒎᑎᐅᑉ ᐃᓚᒌᒃᑐᖁᑎᖏᓐᓄᑦ ᐅᒃᐱᕐᑐᓄᑦ ᑯᕆᓐᑎᒦᑦᑐᓄᑦ, ᐃᑦᔪᕐᓁᑎᑕᐅᓯᒪᔪᓄᑦ ᔩᓱᓯ ᙭ᔅᑑᓯᒃᑯᑦ, ᐃᑦᔪᕐᓁᑎᑕᐅᖁᓪᓗᒋᑦ ᕾᖁᔭᐅᓯᒪᔪᓕᒫᓄᑦ ᑐᒃᓯᐊᕐᐸᒃᑐᓄᓪᓗ ᐊᑕᓂᐅᑉ ᔩᓱᓯ ᙭ᔅᑑᓯᐅᑉ ᐊᑎᖓᓄᑦ, ᐊᑕᓂᕆᔭᒥᖕᓄᑦ ᐊᑕᓂᕆᔭᑦᑎᓐᓄᓪᓗ.
ᐊᓂᕐᓂᕐᒧᑦ ᐊᑕᐅᓯᕐᒧᑦ ᐹᑉᑎᑕᐅᓯᒪᒐᑦᑕ ᑎᒥᒥ ᐊᑕᐅᓯᐅᖁᓪᓗᑕ; ᔫᑎᑦ ᒍᕇᑭᓪᓗ, ᐱᔨᐅᔪᑦ ᐱᔨᐅᖏᑦᑐᓪᓗ, ᑕᒪᑦᑕᓗ ᐃᒥᕐᑎᑕᐅᕗᒍᑦ ᐊᓂᕐᓂᕐᒥᑦ ᐊᑕᐅᓯᕐᒥᑦ.
ᐱᔨᑦᓯᕐᓃᓪᓗ ᐊᑦᔨᒌᓐᖏᓚᑦ, ᐊᑕᓂᕐᓕ ᐱᔨᑦᓯᕐᑕᐅᔪᖅ ᑖᓐᓇᑦᓮᓐᓇᐅᕗᖅ.
ᐅᕙᑦᑎᓐᓄᓪᓕ ᒎᑎ ᐊᑕᐅᓯᐅᕗᖅ, ᐊᑖᑕ, ᑖᑦᓱᒪᓐᖓᑦ ᓱᓇᓕᒫᑦ ᐱᓯᒪᖕᒪᑕ, ᑖᑦᓱᒨᓇᓗ ᐃᓅᓪᓗᑕ; ᐊᑕᓂᕐᓗ ᐊᑕᐅᓯᐅᕗᖅ ᔩᓱᓯ ᙭ᔅᑑᓯ, ᑖᑦᓱᒨᓇ ᓱᓇᓕᒫᑦ ᐱᓐᖑᕐᑎᑕᐅᓯᒪᖕᒪᑕ ᑖᑦᓱᒨᓇᓗ ᐃᓅᓪᓗᑕ.
ᐃᓕᑦᓯᓐᓄᑦ ᑎᑭᑦᑐᖃᕐᐸᑦ ᔩᓱᓯᐅᑉ ᐊᓯᐊᓂᒃ ᐊᔪᕆᕐᑐᐃᑦᔪᑎᖃᕐᑐᒥᒃ ᐊᔪᕆᕐᑐᐃᑦᔪᑎᒋᓚᐅᓐᖏᑕᑦᑎᓐᓂᒃ, ᐅᕝᕙᓗ ᐊᓂᕐᓂᕐᒥᒃ ᐃᓚᓕᐅᕐᓯᒍᑦᓯ ᐱᓯᒪᔭᑦᓯ ᐊᑦᔨᒋᓐᖏᑕᖓᓂᒃ, ᐅᕝᕙᓗ ᐅᖃᐅᓰᑦ ᑐᓴᕈᒥᓇᕐᑐᑦ ᐊᓯᐊᓂᒃ ᐃᓚᓕᐅᕐᓯᒍᑦᓯ ᐃᓚᓕᐅᕐᓯᒪᔭᑦᓯ ᐊᑦᔨᒋᓐᖏᑕᖓᓂᒃ, ᑍᒤᑦᑐᓂᒃ ᖃᓄᐃᒃᓴᕋᓯ ᐱᕕᖃᕐᑎᑦᓯᓲᖑᒐᑦᓯ.
᙭ᔅᑑᓯ ᔩᓱᓯᒥ ᑭᐱᓯᒪᓂᖅ ᑭᐱᓯᒪᖏᓐᓂᕐᓗ ᐊᑐᖏᒻᒪᑎᒃ, ᐅᒃᐱᕐᓂᒃᑯᓪᓕ ᐱᓇᓱᐊᕐᓂᖅ ᓇᒡᓕᖕᓂᒃᑯᑦ ᐊᑐᕐᑐᑑᕗᖅ.
ᑕᒪᑦᑕ ᑎᑭᐅᑎᓚᐅᖏᓐᓂᑦᑎᓐᓂ ᐅᒃᐱᕐᓂᑯᑦ ᐊᑕᐅᓯᐅᓕᖅᑲᖓᔪᒧᑦ ᖃᐅᔨᓂᕐᒧᓪᓗ ᒎᑎᐅᑉ ᐃᕐᓂᖓᓂᒃ, ᐅᒃᐱᕐᓂᕐᒥ ᐱᕈᕇᑦᓯᐊᕐᓂᕐᒧᑦ ᑎᑭᐅᑎᖁᓪᓗᑕ, ᙭ᔅᑑᓯᐅᑉ ᐃᓅᓯᖓᑕ ᓱᓇᒥᑦᓯᐊᕐᓂᖓ ᐊᒡᓛᑦ ᓇᓪᓕᕈᓐᓇᕐᓯᓗᒍ;
ᐅᕾᓪᓗ ᑕᒪᕐᒥᒃ ᓇᓗᓁᔧᔪᒃᓴᐅᕗᑦ ᔩᓱᓯ ᙭ᔅᑑᓯᐅᑉ ᐊᑕᓂᐅᓂᖓᓂᒃ, ᒎᑎᐅᑉ ᐊᑖᑕᐅᑉ ᓂᕐᑐᕐᑕᐅᓂᒃᓴᖓᓄᑦ.
ᑕᒪᒃᑯᐊᑑᖏᑦᑐᕐᓕ; ᐊᓯᓕᒫᖏᓕᑦᑕᐅᖅ ᐊᑑᑎᒃᓴᖃᕈᓐᓃᕐᐳᑦ ᐱᐅᓂᕐᓴᒻᒪᕆᐊᓗᖕᒥᒃ ᑕᑯᓯᒪᓕᕐᑎᓪᓗᖓ ᑐᑭᓯᓕᕐᑎᓪᓗᖓᓗ ᔩᓱᓯ ᙭ᔅᑑᓯᒥᒃ ᐊᑕᓂᕆᔭᓐᓂᒃ. ᑖᓐᓇᓗ ᐱᓪᓗᒍ ᑕᒪᕐᒥᒃ ᐃᒋᓯᒪᕙᒃᑲ; ᑕᒪᕐᒥᒡᓗ ᐃᒋᑕᒃᓴᑎᑐᑦ ᐃᓱᒪᒋᕙᒃᑲ, ᐱᓯᒪᓂᕐᓴᐅᖁᓪᓗᖓ ᙭ᔅᑑᓯᒥ
ᐸᐅᓗᓯᒥᑦ, ᒎᑎᐅᑉ ᐱᔨᖓᓂᑦ ᔩᓱᓯᐅᓪᓗ ᙭ᔅᑑᓯᐅᑉ ᐋᐴᓯᑕᓕᖓᓂᑦ, ᒎᑎᐅᑉ ᓂᕈᐊᕐᓯᒪᔭᖏᓐᓄᑦ ᓱᓕᔪᒥᒡᓗ ᖃᐅᔨᓯᒪᔪᓄᑦ ᐊᑕᐅᓯᐅᓕᖓᑎᑦᓯᔪᒧᑦ ᐅᒃᐱᕐᓂᑦᑎᓐᓄᓪᓗ.
ᑍᑑᓯᒧᑦ, ᐅᒃᐱᕐᓂᑯᑦ ᓱᓕᔪᒥᒃ ᐃᕐᓂᓐᓄᑦ ᑕᒪᑐᒧᖓ ᐊᑕᐅᓯᐅᑦᔪᑎᒋᔭᑦᑎᓐᓄᑦ. ᒎᑎᐅᑉ ᐊᑖᑕᐅᑉ ᔩᓱᓯᐅᓪᓗ ᙭ᔅᑑᓯᐅᑉ ᐱᐅᓕᔨᑦᑕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓂᒃ ᓮᒻᒪᕐᑎᑦᓯᓂᖓᓂᒡᓗ ᑐᓂᓯᕕᐅᖁᕙᒋᑦ.
ᐃᖅᑲᐅᒪᓯᐅᒃ ᓯᕗᓕᕐᑎᓯ, ᒎᑎᐅᑉ ᐅᖃᐅᓯᖏᓐᓂᒃ ᐃᓕᑦᓯᓐᓄᑦ ᐅᖃᕐᐸᒃᑐᑦ; ᐃᓱᒪᒋᓯᐅᒃ ᖃᓄᖅ ᐃᓅᓯᖃᕐᒪᖔᑕ, ᐅᒃᐱᕐᓂᖏᓪᓗ ᒪᓕᒡᓗᒋᑦ.
ᑍᒤᑦᑐᓂᒃ ᖃᐅᔨᓚᐅᕐᓗᑎᒃ ᑲᑕᒃᐸᑕ, ᓵᒋᐊᕐᑎᑕᐅᒃᑲᓐᓂᕆᐊᒃᓴᖅ ᐊᔪᕐᓇᕐᐳᑦ, ᒎᑎᐅᑉ ᐃᕐᓂᖓᓂᒃ ᑭᑭᐊᒃᑐᐃᒃᑲᓐᓂᕐᒪᑕ ᓴᓐᓂᖓᔪᓕᖕᒧᑦ ᐃᓄᖕᓄᓪᓗ ᑲᓐᖑᓇᕐᓯᑎᓪᓗᒍ.
ᐅᖃᕐᑐᖃᕋᔭᕐᐸᑦ, “ᐅᒃᐱᕐᓂᖃᕐᐳᑎᑦ, ᐅᕙᖓᓕ ᐱᓂᐊᕐᓂᖃᕐᐳᖓ.” ᐅᒃᐱᕐᓂᕐᒥᒃᓕ ᐱᓂᐊᕐᓂᕐᒥᒃ ᐃᓚᖃᖏᑦᑐᒥᒃ ᑕᑯᑎᓚᐅᓐᖓ, ᐅᒃᐱᕐᓂᓐᓂᒃᑕᐅᖅ ᑕᑯᑎᓐᓂᐊᕋᒃᑭᑦ ᐱᓂᐊᕐᓂᒃᑯᑦ.
ᑕᒪᓐᓇ ᓇᓗᓁᒃᑯᑕᐅᕗᖅ ᐹᑉᑎᑕᐅᓂᕐᒧᑦ, ᐱᐅᓕᒃᓯᔪᒧᑦ ᐃᓕᑦᓯᓐᓂᒃ, ᑎᒥᐅᑉ ᐃᑉᐸᖕᓂᖓᓂᒃ ᓴᓗᒻᒪᕐᓴᐅᑕᐅᖏᑦᑐᖅ ᒎᑎᒧᓪᓕ ᐊᖏᒻᒪᕆᒍᑕᐅᕗᖅ ᐃᓱᒪᒃᑯᑦ ᐸᓯᔭᒃᓴᐅᓂᕐᒥᑦ, ᔩᓱᓯ ᙭ᔅᑑᓯᐅᑉ ᒪᑭᓐᓂᖓᒍᑦ,
ᓮᒨᓂ ᐲᑦᑐᕉᓯᒥᑦ, ᐱᔨᒋᔭᐅᓪᓗᓂ ᐋᐴᓯᑕᓕᐅᔪᒥᑦ ᔩᓱᓯ ᙭ᔅᑑᓯᒧᑦ, ᐱᑖᕐᓯᒪᔪᓄᑦ ᐅᒃᐱᕐᓂᕐᒥᒃ ᐱᕕᐊᕐᓇᕐᑐᒥᒃ ᐅᕙᑦᑎᑐᑦ ᒎᑎᑦᑕ ᐃᓗᐊᕐᑐᓐᖑᕐᑎᑦᓯᓂᖓᓄᑦ ᐱᐅᓕᔨᑦᑎᒍᓪᓗ ᔩᓱᓯ ᙭ᔅᑑᓯᒃᑯᑦ:
ᐃᓕᑦᓯᓕ ᓇᒡᓕᒋᔭᒃᑲ, ᐃᓕᑦᓯᓐᓂᒃ ᐱᕙᓪᓕᐊᑎᓕᕆᑦᓯ ᐅᒃᐱᕐᓂᑯᑦ ᐃᑦᔪᕐᓁᑦᑐᒃᑯᑦ; ᑐᒃᓯᐊᕐᓗᓯ ᐊᓂᕐᓂᒃᑯᑦ ᐃᑦᔪᕐᓁᑦᑐᒃᑯᑦ;
ᓇᒡᓕᖕᓇᕐᑐᓯ, ᑎᑎᕋᐅᓯᖃᕈᒪᓯᒪᒐᒪ ᐱᐅᓕᔭᐅᓯᒪᖃᑎᒌᖕᓂᑦᑎᓐᓂᒃ, ᐱᔭᕆᐊᖃᓪᓚᕆᒐᓱᒋᒐᒪ ᑎᑎᕋᕐᕕᒋᓗᓯ ᑕᒪᒃᑯᓂᖓ ᑲᔪᖏᕐᓴᕐᓗᓯ ᐅᒃᐱᕐᓂᒃᑯᑦ ᐃᑦᔪᕐᓁᑎᑕᐅᔪᓄᑦ ᑐᓂᔭᐅᓯᒪᔪᖅ ᑲᔪᓯᑦᔪᑎᒋᑦᓯᐊᕐᓗᒍ ᓯᕐᓂᒋᓗᒍᓗ ᐱᖁᓪᓗᓯ.
