ᒨᓯᓯ ᑕᓪᓕᒪᖏᑦ 12:7 - ᐊᒡᓔᑦ ᐃᑦᔪᕐᖕᓁᑦᑐᑦ

⁷ ᑕᕝᕙᓂᓗ ᐊᑕᓂᐅᑉ ᒎᑎᑦᓯ ᓇᔪᕐᑕᖓᓂ ᓂᕆᔪᒃᓴᐅᕗᓯ ᖁᕕᐊᓱᒻᒪᕆᒡᓗᓯ, ᐃᓚᒋᔭᓯᓗ ᐃᒡᓗᒥᐅᖃᑎᓕᒫᓯ ᐱᓇᓱᐊᕐᓯᒪᔭᓕᒫᓯᓐᓂ, ᐊᑕᓂᐅᑉ ᒎᑎᑦᓯ ᓮᒻᒪᕐᑎᓯᒪᖕᒪᓯ.

ᒨᓯᓯ ᑕᓪᓕᒪᖏᑦ 12:7 Iomraidhean Croise

ᑯᕉᓂᑲ ᓯᕗᓪᓖᑦ 29:22

ᓂᕆᕗᓪᓗ ᐃᒥᕐᓗᑎᒡᓗ ᐊᑕᓂᐅᑉ ᓵᖓᓂ ᐊᖏᔪᒥᒃ ᖁᕕᐊᓱᒡᓗᑎᒃ ᐅᓪᓗᒥ ᑖᑦᓱᒪᓂ. ᓲᓗᒨᓂᓗ ᑍᕕᑎᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓛᕐᓂᖓᓂᒃ ᓇᓗᓁᕐᐹᑦ ᑐᖓᓕᐊᓂᒃ, ᐅᕐᓱᕐᑎᕐᓗᒍᓗ ᐊᑕᓂᐅᑉ ᓵᖓᓂ ᐊᖓᔪᖅᑳᖑᖁᓪᓗᒍ, ᔭᑑᒡᓗ ᑐᓂᕐᕈᓯᕐᑎᑦᓯᔨᓐᖑᕐᑎᑉᐹᑦ.

ᓂᕼᐃᒤᐊᐅᑉ ᐊᒡᓚᖏᑦ 8:9

ᐃᓄᓕᒫᑦ ᑐᓴᕋᒥᒃ ᐱᖁᔭᓂᒃ, ᐊᒃᑐᕐᑕᐅᒻᒪᕆᒃᐳᑦ ᕿᐊᓕᕐᓗᑎᒡᓗ. ᑍᒤᒻᒪᑦ ᓂᕼᐃᒤᐊ, ᑖᓐᓇ ᐊᐅᓚᑦᓯᔨᐅᔪᖅ, ᐄᓱᕋᓗ, ᑐᓂᕐᕈᓯᕐᑎᑦᓯᔨ ᐱᖁᔭᓂᒡᓗ ᐃᓕᓯᒪᔪᖅ, ᓕᕔᑏᓪᓗ ᐱᖁᔭᓂᒃ ᑐᑭᓯᓇᕐᓯᑎᑦᓯᓚᐅᕐᑐᑦ ᐃᓄᖕᓄᑦ ᐅᖃᕐᐳᑦ, “ᐅᓪᓗᖅ ᑖᓐᓇ ᐃᑦᔪᕐᓁᑦᑑᕗᖅ ᐊᑕᓂᕐᒧᑦ ᒎᑎᑦᓯᓐᓄᑦ, ᑍᒤᒻᒪᑦ ᕿᒃᓵᒃᑐᒃᓴᐅᓐᖏᓚᓯ, ᕿᐊᖏᓪᓗᓯᓗ.

ᐃᓕᓯᒪᓃᑦ ᐃᒃᓖᓯᐊᓯᑏᔅ 3:12

ᖃᐅᔨᒪᕗᖓᓕ ᐱᐅᓂᕐᓴᒥᒃ ᐱᑕᖃᓐᖏᓚᖅ ᑖᒃᑯᐊ ᖁᕕᐊᓱᒋᐊᖃᕐᓂᖏᓐᓂᑦ, ᐱᐅᔪᒥᒡᓗ ᐱᓇᓱᐊᕆᐊᖃᕐᓂᖏᓐᓂᑦ ᐃᓅᓂᕐᒥᖕᓂ.

ᐃᓕᓯᒪᓃᑦ ᐃᒃᓖᓯᐊᓯᑏᔅ 3:13

ᐊᒻᒪᓗ ᐃᓄᐃᑦ ᑕᒪᕐᒥᒃ ᓂᕆᔭᕆᐊᖃᕐᒪᑕ ᐃᒥᕆᐊᖃᕐᓗᑎᒡᓗ ᐊᒃᓱᕈᕐᓂᕐᒧᑦ ᓴᖅᑭᑎᑕᒥᖕᓂᒃ ᑕᒪᓐᓇ ᒎᑎᐅᑉ ᑐᓂᕐᕈᑎᒋᖕᒪᒍ.

ᐃᓕᓯᒪᓃᑦ ᐃᒃᓖᓯᐊᓯᑏᔅ 5:18

ᐃᒫᒃ ᑕᕝᕙ ᐱᐅᔪᖅ ᑕᑯᓚᐅᕐᑕᕋ: ᓈᒻᒪᒃᐳᖅ ᓂᕆᓗᓂ ᐃᒥᕐᓗᓂᓗ ᖁᕕᐊᒋᔭᖃᕐᓗᓂᓗ ᓴᓇᔭᒥᓂᒃ ᐊᒃᓱᕈᕐᓂᕐᒥᓄᑦ ᓴᓇᔭᒥᓂᒃ ᓯᕿᓂᐅᑉ ᐊᑖᓂ ᓴᓇᔭᐅᕙᒃᑐᒥᒃ ᐅᓪᓗᓂᒃ ᐅᓄᖏᑦᑐᓂᒃ ᒎᑎᐅᑉ ᑐᓂᔭᖏᓐᓂᒃ ᑖᑦᓱᒧᖓ; ᑕᒪᓐᓇ ᑖᑦᓱᒧᖓ ᑐᕌᖓᖕᒪᑦ.

ᐂᓮᐊᓯᐅᑉ ᐊᒡᓚᖏᑦ 23:18

ᓂᐅᕕᕋᕐᑎᑦᓯᓂᕐᒧᓪᓗ ᑮᓇᐅᔭᕐᑖᕆᔭᑎᒃ ᐊᑕᓂᕐᒧᑦ ᑐᕌᖓᑎᑦᓱᒫᕐᐰᑦ; ᑮᓇᐅᔭᒃᑯᕕᖕᓄᑦ ᑲᑎᕐᓱᕈᒫᓐᖏᓔᑦ. ᐊᑕᓂᕐᒥᒡᓕ ᐅᐱᒍᓱᒃᑐᑦ ᑮᓇᐅᔭᖏᓐᓂᒃ ᓂᕿᑖᕋᓲᑎᖃᕈᒫᕐᐳᑦ ᐊᓐᓄᕌᒃᓴᕐᑖᕈᑎᒋᓗᒋᓪᓗ ᐱᔭᕆᐊᖃᕐᑕᒥᖕᓂᒃ.

ᐂᓮᐊᓯᐅᑉ ᐊᒡᓚᖏᑦ 62:9

ᑲᑎᕐᓱᐃᓚᐅᕐᑐᓪᓕ ᓂᕿᒋᔪᒫᕐᐹᑦ, ᐊᑕᓂᕐᓗ ᓂᕐᑐᕐᓗᒍ, ᐸᐅᕐᖓᓂᒡᓗ ᑲᑎᕐᓱᐃᔪᑦ ᐃᒥᕈᒫᕐᐳᑦ ᐃᑦᔪᕐᓁᑦᑐᕕᖁᑎᓐᓂ.”

ᐃᓯᑭᐊᓕᐅᑉ ᐊᒡᓚᖏᑦ 44:3

ᐊᖓᔪᖅᑳᕐᔪᐊᖅ ᑕᕝᕙᓂ ᓂᕆᔪᓐᓇᕐᑐᑑᕗᖅ ᐊᑕᓂᐅᑉ ᓵᖓᓂ; ᐃᑎᕐᑐᒃᓴᐅᕗᖅ ᐃᑎᕐᑕᕐᕕᐅᑉ ᑐᕐᓲᖑᔭᖓᑕ ᐃᒡᓗᕈᓯᖓᒍᑦ ᐃᓱᐊᓃᑦᑐᒃᑯᑦ, ᑕᕝᕘᓇᓗ ᐊᓂᖕᒥᓗᓂ.”

ᔪᐃᓕᐅᑉ ᐊᒡᓚᖏᑦ 1:16

ᓂᕿᒃᓴᕗᑦ ᐊᓯᕈᕐᑕᐅᕗᑦ ᑕᑯᓐᓇᑐᐃᓐᓇᕐᑎᓪᓗᑕ, ᖁᕕᐊᓱᖕᓂᕐᑕᖃᕉᓐᓁᕐᐳᖅ ᒎᑎᑦᑕ ᐃᒡᓗᖓᓂ.

ᔪᐃᓕᐅᑉ ᐊᒡᓚᖏᑦ 2:26

ᐊᒥᒐᖏᑦᑐᒥᒃ ᓂᕆᔪᒫᕐᐳᓯ ᐊᕿᐊᑦᑐᕐᓗᓯᓗ, ᓂᕐᑐᕈᒫᕐᐸᓯ ᐊᑕᓂᐅᑉ ᒎᑎᐅᑉ ᐊᑎᖓ. ᑲᒪᓇᕐᑐᓂᒃ ᐱᓂᐊᕐᓯᒪᓂᖓ ᐃᓕᑦᓯᓐᓄᑦ ᐱᓪᓗᒍ, ᐃᓄᖁᑎᒃᑲ ᑲᓐᖑᓱᒃᑎᑕᐅᓚᐅᕐᓯᒪᓂᐊᕈᓐᓁᕐᐳᑦ.

ᒨᓯᓯ ᐱᖓᔪᖏᑦ 23:40

ᑖᒃᑯᐊ ᐅᓪᓗᐃᑦ ᓯᕗᓪᓕᕐᐹᖓᓂ ᓇᐹᕐᑐᐃᑦ ᐸᐅᕐᖓᖏᑕ ᐱᐅᓂᕐᐹᖏᓐᓂᒃ ᐱᔭᕆᐊᖃᕐᐳᓯ, ᓇᐹᕐᑐᓪᓗ ᐹᒥᓂᒃ ᐊᑎᓖᑦ ᐊᕙᓚᖓᔪᖏᓐᓂᒃ ᓇᐹᕐᑐᓪᓗ ᐅᖃᐅᔭᖅᑯᕐᑐᔪᐃᑦ ᐊᕙᓚᖓᔪᖏᓐᓂᒃ ᐱᔭᕆᐊᖃᕆᕗᓯ, ᖁᕕᐊᓱᒡᓗᓯ ᐊᑕᓂᐅᑉ ᒎᑎᑦᓯ ᓵᖓᓂ ᓇᓪᓕᐅᓐᓂᕐᓯᐅᕆᐊᖃᕐᐳᓯ ᐅᓪᓗᓂᒃ 7ᓂᒃ.

ᒪᓚᑬᑉ ᐊᒡᓚᖏᑦ 2:13

ᓱᓕᓗ ᐃᒫᒃ ᐱᓂᐊᕐᓂᖃᕆᕗᓯ: ᐊᑕᓂᐅᑉ ᑐᓂᕐᕈᓯᕐᕕᖓ ᖁᕝᕕᐅᕐᓂᕐᓄᑦ ᐅᓕᒃᐸᓯ, ᕿᐊᓂᑦᓯᓐᓄᑦ ᐅᒡᒍᐊᕐᓂᑦᓯᓐᓄᓪᓗ; ᑐᓂᕐᕈᑎᓯ ᐃᓚᓕᐅᕈᓐᓁᕐᒪᒋᑦ, ᖁᕕᐊᒋᔪᓐᓁᕐᓗᒋᓪᓗ ᐱᓂᐊᕐᓂᓯ.

ᐋᐴᓯᑕᓖᑦ ᐱᓂᐊᕐᓂᖏᑦ 2:46

ᖃᐅᑕᒫᑦ ᑲᑎᒪᖃᑦᑕᓚᐅᕐᐳᑦ ᑐᒃᓯᐊᕐᕕᒡᔪᐊᒥ ᐊᑕᐅᑦᓯᒃᑯᑦ, ᓂᐊᖂᔭᒥᒃ ᐊᒡᒍᐃᕙᒃᓗᑎᒃ ᐊᖏᕐᕋᒥᖕᓂ, ᖁᕕᐊᓱᒡᓗᑎᒃ ᓂᕆᖃᑎᒌᖃᑦᑕᓚᐅᕐᐳᑦ ᐆᒻᒪᑎᒥᒃᑎᒍᑦ ᐊᓐᓂᕈᑦᔨᓂᖃᕋᑎᒃ,

ᒨᓯᓯ ᑕᓪᓕᒪᖏᑦ 12:12

ᑖᑦᓱᒪ ᐊᑕᓂᐅᑉ ᒎᑎᑦᓯ ᓇᔪᕐᑕᖓᓂ ᖁᕕᐊᓱᒃᑐᒃᓴᐅᕗᓯ, ᕿᑐᕐᖓᓯ ᐃᓚᒋᓗᒋᑦ, ᐱᔨᓯᓗ ᐃᓚᒋᓗᒋᑦ, ᓕᕔᑎᒃᑯᓪᓗ ᓄᓇᑦᓯᓐᓂ ᓄᓇᖅᑲᑎᒋᔭᓯ ᐃᓚᒋᓗᒋᑦ; ᐃᖅᑲᐅᒪᓗᓯ ᓕᕔᑎᒃᑯᑦ ᓇᖕᒥᓂᒃᓴᒥᓂᒃ ᓄᓇᖁᑎᖃᖏᒻᒪᑕ.

ᒨᓯᓯ ᑕᓪᓕᒪᖏᑦ 12:18

ᕿᑐᕐᖓᓯ ᐃᓚᒋᓗᒋᑦ, ᐱᔨᓯᓗ ᓕᕔᑎᓪᓗ ᓄᓇᒋᔭᑦᓯᓐᓂ ᓄᓇᖃᕐᑐᑦ, ᑕᒪᒃᑯᐊ ᓂᕆᔭᒃᓴᕆᕙᓯ ᑐᓂᕐᕈᑎᐅᓯᒪᔪᑦ ᐊᑕᓂᐅᑉ ᒎᑎᑦᓯ ᓇᔪᒑᖓᓂ ᐊᓯᐊᓂᐅᖏᑦᑐᖅ, ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᔭᖓᓂ ᑐᓂᕐᕈᓯᕐᕕᒃᓴᐅᖁᔭᖓᓂ ᑕᕝᕙᓂᑐᐊᖅ. ᑕᕝᕙᓂᓗ ᖁᕕᐊᓲᑎᖃᕐᑐᒃᓴᐅᕗᑎᑦ ᐱᓇᓱᐊᕐᓯᒪᔭᓕᒫᕐᓂᒃ.

ᒨᓯᓯ ᑕᓪᓕᒪᖏᑦ 12:8

“ᑕᒪᓐᓇᓕ ᓇᓪᓕᐅᑎᒃᐸᑦ, ᐱᓇᓱᐊᕐᓂᕆᖃᑦᑕᓚᐅᕐᑕᓯ ᒪᓕᑐᐃᓐᓇᕐᓗᒍ ᐱᓇᓱᐊᕐᑐᒃᓴᐅᓐᖏᓚᓯ. ᒫᓐᓇᒧᑦ ᑎᑭᓪᓗᒍ ᑐᒃᓯᐊᕐᓂᖃᖃᑦᑕᕐᓯᒪᒐᑦᓯ ᐃᓕᑦᓯᓐᓄᑦ ᓈᒻᒪᒐᓱᒋᔭᓯ ᒪᓕᑐᐃᓐᓇᕐᓗᒍ,

ᒨᓯᓯ ᑕᓪᓕᒪᖏᑦ 14:23

ᑕᕝᕙ ᐊᑕᓂᐅᑉ ᒎᑎᑦᓯ ᓵᖓᓂ, ᑐᒃᓯᐊᕐᕕᒃᓴᐅᖁᓪᓗᒍ ᓂᕈᐊᕐᓯᒪᔭᖓᓄᐊᕐᑐᒃᓴᐅᕗᓯ; ᑕᓪᓕᒪᐅᔪᐃᕈᑎᓯ ᓂᕆᔭᒃᓴᕆᕙᓯ ᓂᐊᖂᔭᒃᓮᑦ, ᐅᐂᓃᓪᓗ, ᓇᐹᕐᑐᐃᓪᓗ ᐸᐅᕐᖓᖏᑕ ᐅᕐᓱᖏᑦ, ᐃᒻᒧᒃᓯᐅᒐᖁᑎᑦᓯᓪᓗ ᓰᐱᖁᑎᑦᓯᓗ ᓯᕗᓪᓕᕐᐹᒥᒃ ᐃᕐᓂᐊᕆᓯᒪᔭᖏᑦ. ᑐᑭᓯᕙᓪᓕᐊᖁᓪᓗᓯ ᐊᑕᓂᕐᒥᒃ ᒎᑎᑦᓯᓐᓂᒃ ᑍᒪᓐᖓᓕᒫᖅ ᐃᓕᕋᓱᒋᐊᖃᕐᓂᕐᒥᒃ.

ᒨᓯᓯ ᑕᓪᓕᒪᖏᑦ 14:26

ᑮᓇᐅᔧᓪᓗ ᓂᐅᕕᐅᑎᒋᔪᓐᓇᕐᐸᑎᑦ ᐱᔪᒪᔭᑐᐃᓐᓇᕐᓂᒃ ᐃᒻᒧᒃᓯᐅᒐᕐᒥᒡᓘᓐᓃᑦ, ᓰᐱᒥᒡᓘᓐᓃᑦ, ᐅᐂᓂᒥᒡᓘᓐᓃᑦ, ᓴᓐᖏᔪᒥᒡᓘᓐᓃᑦ ᐃᒥᐊᓗᖕᒥᒃ, ᓂᕆᔪᒪᔭᑐᐃᓐᓇᕐᓂᒃ ᐃᒥᕈᒪᔭᕐᓂᒡᓘᓐᓃᑦ ᐊᑕᓂᐅᑉ ᒎᑎᑦᓯ ᓵᖓᓂ, ᐃᓚᑎᑦ ᐃᒡᓗᒥᐅᖃᑎᑎᑦ ᐃᓚᒋᓗᒋᑦ ᓂᕆᔪᒃᓴᐅᕗᓯ ᖁᕕᐊᓱᖃᑎᒌᒡᓗᓯ.

ᒨᓯᓯ ᑕᓪᓕᒪᖏᑦ 15:20

ᑕᒪᒃᑯᐊᓕ ᐊᕐᕌᒍᑕᒫᑦ ᑍᒤᑦᑐᑦ ᓂᕆᔭᒃᓴᕆᕙᓯ, ᐃᓚᓯ ᐃᓚᒋᓗᒋᑦ ᐊᑕᓂᐅᑉ ᒎᑎᑦᓯ ᓵᖓᓂ ᑐᒃᓯᐊᕐᕕᖕᒥ.

ᒨᓯᓯ ᑕᓪᓕᒪᖏᑦ 26:11

ᐊᑕᓂᕐᒧᑦ ᒎᑎᖕᓄᑦ ᖁᔭᓕᔪᒃᓴᐅᕗᓯ ᐱᐅᔪᓂᒃ ᐊᑕᓂᐅᑉ ᒎᑎᑦᓯ ᑐᓂᓯᕕᒋᖕᒪᓯ ᐃᓚᑎᓪᓗ, ᑕᕝᕙ ᖁᕕᐊᓱᖃᑎᒌᒃᑐᒃᓴᐅᕗᓯ ᓕᕔᑎᓪᓗ ᓄᓇᖃᕐᑐᑐᖃᐅᖏᑦᑐᓪᓗ ᑕᕝᕙᓂ ᓄᓇᖅᑲᑎᒋᔭᓯ ᐃᓚᒋᓗᒋᑦ.

ᒨᓯᓯ ᑕᓪᓕᒪᖏᑦ 27:7

ᑕᕝᕙᓂᓗ ᑐᓂᕐᕈᓯᕐᑐᒃᓴᐅᕗᓯ ᓂᕆᓗᒋᓪᓗ ᑐᓂᕐᕈᑎᒋᓯᒪᔭᓯ ᐃᓚᒌᖕᓂᕐᒧᑦ ᑐᓂᕐᕈᓯᕈᑎᐅᔪᑦ ᖁᔭᓕᓗᓯᓗ ᐊᑕᓂᐅᑉ ᒎᑎᑦᓯ ᓵᖓᓂ.

ᒨᓯᓯ ᑕᓪᓕᒪᖏᑦ 28:47

ᐊᑕᓂᐅᑉ ᓮᒻᒪᕐᑎᓯᒪᓚᐅᕐᒪᓯ ᑕᒤᑎᒍᑦᓯᐊᖅ, ᐱᔨᑦᓯᓚᐅᓐᖏᓚᓯᓕ ᖁᕕᐊᓱᖕᓂᕐᒧᑦ ᐊᓕᐊᓁᒍᓱᖕᓂᕐᒧᓪᓗ ᐆᒻᒪᑎᒃᑯᑦ.

ᐱᓕᐱᒥᐅᓄᑦ 4:4

ᖁᕕᐊᓱᑦᓮᓐᓇᕆᑦᓯ ᐊᑕᓂᕐᒥ; ᐅᖃᒃᑲᓐᓂᕐᐳᖓ ᖁᕕᐊᓱᒋᑦᓯ.