47 ᓲᓗᒨᓂᐅᑉ ᒎᑎ ᐃᒡᓗᓕᐅᓚᐅᕐᐹ.
ᑖᓐᓇ ᓴᓇᔪᒫᕐᐳᖅ ᐃᒡᓗᒃᓴᓐᓂᒃ, ᑖᑦᓱᒪᓗ ᐊᖓᔪᖅᑲᐅᕕᖓ ᑲᔪᓯᑎᑦᓱᒫᕐᐸᕋ ᐃᓱᖃᖏᑦᑐᒧᑦ.
ᕼᐂᕋᒻ ᑍᕆᐅᑉ ᐊᖓᔪᖅᑳᕐᔪᐊᖓ ᐱᔨᒥᓂᒃ ᑎᓕᓯᓚᐅᕐᐳᖅ ᓲᓗᒨᓂᒧᑦ, ᑐᓴᕋᒥ ᓲᓗᒨᓂ ᐊᖓᔪᖅᑳᕐᔪᐊᓐᖑᕐᑎᑕᐅᖕᒪᑦ ᐊᑖᑕᒥᓂᒃ ᐃᓇᖐᓪᓗᓂ, ᕼᐂᕋᒥᐅᑉ ᑍᕕᑎ ᐃᓚᓐᓈᕆᓚᐅᕋᒥᐅᒃ.
480 ᐊᕐᕌᒍᐃᑦ ᐊᓂᒍᕐᓯᒪᓕᕐᑎᓪᓗᒋᑦ ᐃᓴᕆᐊᓕᐅᑦ ᐃᓄᖏᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᓂᖏᑕ, ᐊᕐᕌᒍᓂᒃ ᓯᑕᒪᓂᒃ ᓲᓗᒨᓂ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐃᓴᕆᐊᓕᒥ, ᑕᖅᑭᐅᑉ ᐂᑉᐸᖓᓂ ᔨᕝᒥ, ᐱᒋᐊᓚᐅᕐᐳᖅ ᓴᓇᓕᕐᓗᓂ ᐊᑕᓂᐅᑉ ᐃᒡᓗᖓᓂᒃ.
“ᒫᓐᓇ ᐊᑕᓂᐅᑉ ᐊᖏᕐᓂᕆᓯᒪᔭᒥᓂᒃ ᓇᓚᐅᑦᓯᑎᑦᓯᓂᖓ ᓇᓪᓕᐅᑎᕗᖅ; ᐊᑖᑕᒐ ᑍᕕᑎ ᐃᓇᖏᕐᓗᒍ, ᐃᒃᓯᕙᐅᑕᖃᕐᓗᖓᓗ ᐃᓴᕆᐊᓕᒥᐅᑦ ᐃᒃᓯᕙᐅᑕᕐᔪᐊᖓᓂᒃ, ᐊᑕᓂᐅᑉ ᐊᖏᕐᓯᒪᓂᖓᓄᑦ, ᐃᒡᓗᓕᐅᓚᐅᕐᐳᖓ ᐊᑕᓂᐅᑉ ᐊᑎᖓᓄᑦ, ᐃᓴᕆᐊᓕᑎᑦ ᒎᑎᖓᓐᓄᑦ.
ᑕᒪᑐᒪ ᑭᖑᕐᖓᒍᑦ ᑍᕕᑎ ᐃᒡᓗᖃᓕᕐᓗᓂ ᐊᖓᔪᖅᑳᕐᔪᐊᑉ ᐃᒡᓗᖓᓂ, ᑍᕕᑎ ᐅᖃᕐᐳᖅ ᓁᑕᓂᒧᑦ ᐊᑕᓂᐅᑉ ᐅᖃᕐᑎᖓᓄᑦ, “ᑕᑯᒋᑦ, ᐃᒡᓗᒦᑉᐳᖓ ᓰᑕᕆᓂᒃ ᕿᔪᑦᓯᐊᕚᓗᖕᓂᑦ ᓴᓇᓯᒪᔪᒥ, ᒎᑎᐅᓪᓕ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓ ᑐᐱᕐᒦᑐᐃᓐᓇᕐᑎᓪᓗᒍ!”
ᑕᕝᕙ ᓲᓗᒨᓂ ᓴᓇᒋᐊᓯᕗᖅ ᐊᑕᓂᐅᑉ ᐃᒡᓗᖓᓂᒃ ᔨᕉᓴᓕᒥ ᖃᖅᑲᐅᑉ ᒧᕅᐊᑉ ᖄᖓᓂ, ᑕᕝᕙᓂ ᐊᑕᓂᐅᑉ ᓴᖅᑭᕝᕕᒋᓚᐅᕐᑕᖓᓂ ᐊᑖᑕᖓᓄᑦ ᑍᕕᑎᒧᑦ, ᑕᕝᕙᓂᓗ ᑍᕕᑎᐅᑉ ᓴᓇᔭᐅᖁᓚᐅᕐᒪᒍ, ᐅᐊᕐᓇᓂᐅᑉ ᔨᐳᓮᑎᒥᐅᑕᐅᑉ ᐃᕖᔧᕕᖓᑕ ᓇᑎᖓᓂ.
