29 ᓇᓪᓕᐊᑦ ᑖᑦᓱᒪ ᓵᖓᓂ ᐃᒻᒥᓂᒃ ᓂᕐᑐᕈᑎᒃᓴᖃᖁᓇᒍ.
ᐊᔪᕐᓴᖏᓐᓂᕐᒥᖕᓂᒃ ᑕᑎᖃᕐᑐᑦ ᐃᓄᒋᐊᒃᑐᓂᓗ ᐊᒃᓗᐃᓐᓂᕐᒥᖕᓂᒃ ᐱᐅᔪᕆᑦᔪᑎᖃᕐᑐᑦ.
ᐅᓕᒪᐅᑦ ᐱᔪᓐᓇᕐᓂᕐᓴᐅᓂᕋᕈᓐᓇᕐᐹ ᐅᓕᒪᕐᑐᒥᑦ? ᐅᕝᕙᓗ ᑭᓪᓘᑦ ᐊᖏᓂᕐᓴᐅᑎᑦᓱᓐᓇᕐᐹ ᑭᓪᓗᕐᑐᒥᑦ? ᐊᓇᐅᑕᖅ ᐃᓄᖕᒥᒃ ᐊᐅᓚᑦᓯᔪᓐᓇᕐᐹ ᑎᒍᒥᐊᕐᑎᒋᔭᒥᓂᒃ? ᐊᔭᐅᑉᐱᐊᖅ ᑭᕕᒃᓯᔪᓐᓇᕐᐹ ᐃᓄᖕᒥᒃ ᕿᔫᖏᑦᑐᒥᒃ?
ᐃᒫᒃ ᐊᑕᓂᖅ ᐅᖃᕐᐳᖅ, “ᓯᓚᑐᔪᑦ ᓯᓚᑐᓂᕐᒥᖕᓂᒃ ᓂᕐᑐᕐᑕᐅᑦᔪᑎᖃᕈᒪᑦᑍᓕᓕᑦ, ᓴᓐᖏᔪᓪᓗ ᓴᓐᖏᓂᕐᒥᖕᓂᒃ, ᐊᔪᕐᓴᖏᑦᑐᓪᓗ ᐊᔪᕐᓴᖏᓐᓂᕐᒥᖕᓂᒃ.
᙭ᔅᑑᓯ ᔩᓱᓯᒥ, ᐱᑦᔪᑎᒃᓴᖃᑦᓯᐊᕐᓗᖓ ᐱᓇᓱᐊᕐᓂᕋ ᒎᑎᒧᑦ ᓂᕐᑐᕐᓇᐅᑎᒋᔪᓐᓇᖁᓪᓗᒍ.
ᒫᓐᓇ ᖃᐅᔨᒪᕗᒍᑦ ᐱᖁᔧᑦ ᐅᖃᐅᑦᔨᖕᒪᑕ ᐱᖁᔭᖃᕐᑐᓄᑦ, ᐃᓄᓕᒫᑦ ᑭᐅᑦᔪᑎᒃᓴᖃᖁᓇᒋᑦ, ᓯᓚᕐᔪᐊᕐᒥᐅᓕᒫᑦ ᐃᖅᑲᕐᑐᕐᑕᐅᓕᕐᐸᑕ ᒎᑎᒧᑦ.
ᖃᓄᕐᓕ ᓂᕐᑐᕐᓇᐅᑎᒃᓴᖃᕐᐱᑖ? ᓂᕐᑐᕐᓇᐅᑎᒃᓴᖃᓐᖏᓚᒍᑦ. ᓱᓇ ᐱᑦᔪᑎᒋᓪᓗᒍ? ᐱᖁᔭᓂᒃ ᒪᓕᒋᐊᖃᕐᓂᖅ ᐱᑦᔪᑎᒋᓪᓗᒍ ᐅᖃᐅᓯᐅᓐᖏᓛᖅ? ᑍᒤᓐᖏᓚᖅ, ᐅᒃᐱᕐᓂᖅ ᐱᑦᔪᑎᒋᓪᓗᒍ.
ᐂᑉᕋᕼᐋᒻᓕ ᐱᓂᐊᑦᓯᐊᕐᓂᕐᒥᓄᑦ ᐸᓯᔭᒃᓴᐅᔪᓐᓃᕐᑎᑕᐅᓚᐅᕈᓂ, ᐃᒻᒥᓂᒃ ᓂᕐᑐᕈᑎᒃᓴᖃᕋᔭᓚᐅᕐᐳᖅ, ᓂᕐᑐᕐᓇᑎᑕᐅᒐᔭᓐᖏᓚᕐᓕ ᒎᑎᐅᑉ ᓵᖓᓂ.
ᑍᒤᒻᒪᑦ, ᐊᒡᓚᖕᓂ ᑎᑎᕋᕐᓯᒪᕗᖅ, “ᐃᒻᒥᓂᒃ ᓂᕐᑑᑎᔪᒪᔫᑉ ᐊᑕᓂᖅ ᓂᕐᑐᕈᑎᒋᓕᐅᒃ.”
ᑭᐊ ᐃᓅᖃᑎᖕᓂᑦ ᐊᔪᖏᓐᓂᕐᓴᐅᑎᑉᐹᑏᑦ? ᓱᓇᒥᒡᓕ ᐱᓯᒪᕕᑦ ᑐᓂᕐᕈᓯᐊᕆᓐᖏᑕᕐᓂᒃ? ᑐᓂᓯᕕᐅᓯᒪᒍᕕᑦ, ᓱᖕᒪᓪᓕ ᐃᓕᖕᓂᒃ ᓂᕐᑐᕐᐲᑦ? ᐱᓯᒪᔧᑦ ᑐᓂᕐᕈᓯᐊᕆᓯᒪᓐᖏᑕᕐᑐᑦ ᐱᓕᕐᓗᒎ?
ᐱᐅᓱᒋᓂᓯ ᓈᒻᒪᖏᒻᒪᑦ. ᖃᐅᔨᒪᓐᖏᓚᓰ ᐳᕙᓪᓚᕐᓯᐊᒃᓴᐅᑉ ᒥᑭᑦᔫᑉ ᓂᐊᖂᔭᒃᓴᓕᒫᖅ ᐳᕙᓪᓚᕐᑎᑉᐸᓐᖕᒪᒍ?
ᐱᓂᐊᕐᓂᒃᑯᑦ ᐃᒻᒥᓂᒃ ᐱᓯᒪᔪᖃᖏᒻᒪᑦ, ᑍᒤᒻᒪᑦ ᓇᓪᓕᐊᓪᓘᓐᓃᑦ ᐱᐅᔪᕆᑦᔪᑎᖃᕈᓐᓇᓐᖏᓚᖅ ᑕᒪᑐᒥᖓ.
