Ɔwɔ-mɛ̀n-yrikàn 3:1 - Ɛmɛẅi ankà ankrànkràn 2003

¹ “È merɛ́n owrú è yüre Ɔwɔ kùyüre-wrɔn léyi dú Sardɛ̀n anmàn Wɔ fɛcüe-bɔ̀ mɛ̀n nɔn: Nyàn ankà léyi ɔwrɔn léyi ẅɛn Ɔwɔ Hɛ́n ɔbɔ̀ɛn hɔ̀n mán okùcankro hɔ̀n ɔbɔ̀ɛn kɛ dɔ̀ nɔn: Mɛ̀n nyri v'ɔkɔ̀hɔ̀n-hán-kɔ̀hɔ̀n; mɛ̀n nyri ɔmu le ɛ̀ ẅɛn ɛmrɛ́n ɔmuhi è dú ankɔrɛkɔrɛ mɛ̀n, zɛtɛn e wù.

Ɔwɔ-mɛ̀n-yrikàn 3:1 Iomraidhean Croise

Lükɛ̀n 15:24

ɔmuhi, m'ɛnẅì léyi nyɛ kàn nɔn nwù, kɩ nɛ̀n vru nɛ̀n vá ɔkɔrɛ-bɔ̀ mɛ̀n, nɛ̀n zrɛ́n kɩ mɛ̀n cɔ́ nɛ̀n.’ Kɩ ɔkoran bukru.

Lükɛ̀n 15:32

Tɛ́n, ke ji le bɔ̀ brá pɔ̀püɛ̀, bɔ̀ koran, ɔmuhi ɔmuan-ẅì léyi nyɔn nɔn, nwù kɩ nɛ̀n vru nɛ̀n vá ɔkɔrɛ-bɔ̀ mɛ̀n, nɛ̀n zrɛ́n kɩ mɛ̀n cɔ́ nɛ̀n!’ ”

Zhan 1:16

Bɔ lɔ fɛn bɔ̀ cɔ́ nɛ́n nboafɔ̀n nɛ̀ncüì-dì lɔ; bɔ̀ vru bɔ̀ cɔ́ nboafɔ̀n mán ɛnshifù bobrebe.

Zhan 1:33

Mɛ vá nyrí ɔwrɔn léyi dú nɛ̀n nɔn, tɛ́n Ɔwɔ léyi wá mɛ̀n ɔkɔhɔ̀n mɛ̀n bɩ́ ɛnshi mɛ̀n wá anwrɔn ɛnkru nɔn, dɔ́ mɛ̀n le: ‘Ɛ le kán Ɛnhɛ́n Prɔnprɔn kɛ lɛ kàkɛ, kɩ kɛ lɛ nyɔn ɔwrɔn tɔ̀n ɛwúɛ; nɛ́n de nɛ lɛ wá ɛnshi ɛnkru Ɛnhɛ́n Prɔnprɔn mɛ̀n nɔn.’ ”

Zhan 20:22

N'ankà-dɔ̀ trɔ mɛ̀n lɔ, nɛ̀n fú ɛndɔnwrɔ̀n ku yɔ ɛwú kɩ nɛ dɔ́ yɔ le: “Nyɛ́n cɔ́ Ɛnhɛ́n Prɔnprɔn!

Zhan 3:34

Ɔwrɔn léyi Ɔwɔ wá ɔkɔhɔ̀n nɔn kɛ dɔ́ Ɔwɔ-mùanwú-ankà, ɔmuhi Ɔwɔ kɛ tán nɛ̀n kokroho n'Ɛnhɛ́n lɔ nɔn.

Ɔkɔ̀hɔ̀n-wá-bɔ̀ kɔ̀hɔ̀n hán 2:33

Ye sɩ́ nɛ̀n ɛwú, nɛ̀n yɛ́ Ɔwɔ zì-kɔrɛ̀ kɔrɛ̀a, kɩ nɛ̀n cɔ́ Ɔwɔ tamɛ̀n Ɛnhɛ́n Prɔnprɔn léyi yɛ wá ɔmùan nɔn; nɛ́n bonyi Ɛnhɛ́n Prɔnprɔn ndɔ lɔ bɔ́ ɛwú, kɩ hɩ de dú eci léyi nyɛ kàn kɩ nyɛ yá zɛtɛ̀ lɔ nɔn.

Efɛzɛ̀n anmàn-bɔ̀ 2:1

Ɛnbiɛhɛ́n lɔ, nyɛ́n wú ɛnhɛ́n mɛ̀n, ny'ɛfɔ̀ndɔ̀n mán ny'ɛgbàn hɔ̀n lɔ kruhú.

Efɛzɛ̀n anmàn-bɔ̀ 2:5

kɩ ɛnvra léyi bɔ̀ wú ɛnhɛ́n mɛ̀n, bɔ̀ ɛgbàn hɔ̀n lɔ kruhú nɔn, nɛ̀n hán bɔ̀, bɔ́ dú ɔkɔrɛ mɛ̀n bɔ́ mán Krisì mɛhi. Ɔwɔ boafɔ̀n mɛ̀n de nyɛ́n cɔ́ ebɩ̀die nɔn.

Kɔlɔsèn anmàn-bɔ̀ 2:13

Ɛnbiɛhɛ́n vra lɔ, nyɛ́n wú ɛnhɛ́n mɛ̀n ny'ɛgbàn hɔ̀n lɔ kruhú, ɔmuhi nyɛ́n dú anwrɔn hɔ̀n léyi kè sɩ̀ nyrì Ɔwɔ nɔn. Tɛ́n zɛtɛ̀ lɔ, Ɔwɔ tán nyɛ̀n ɛwúvà wrù Krisì mɛ̀n. Nɛ̀n bɩ́ bɔ́ ɛgbàn hɔ̀n lɔ fɛn nɛ̀n ce bɔ̀.

Kpàkpà timote 5:6

Tɛ́n ɛngrɔn-hi léyi n'ankàtro dú ɔkoran wú nɔn, nɛ́n wù kɩ nɛ̀n yɛ́, ke dú kɛ nɛ́n kɔrɛ̀ nɛ̀n yɛ́ mán.

Zhakɛ̀n 2:26

Annànwɔrɛ mɛ̀n lɔ ɔmu zri lɔ de edùwrú léyi kè sɩ̀ ẅɛ̀n ɔkɔrɛ́-dɔ̀nwrɔ̀n nɔn dú owúemɛ̀n, hɩ zri lɔ de ankaẅì-bùtan léyi kè sɩ̀ ẅɛ̀n eci-hán nɔn mán, dú owúemɛ̀n.

1 Piɛrɛ̀n 1:11

Yɔ ji kèkrèmɛ̀n, ô yɔ cɔ́ ɛnvra lɔ mɛ̀n mán eci-hán-ci hɔ̀n léyi Krisì Hɛ́n kɛ tán; ɔmuhi Ɛnhɛ́n ndɔ léyi dú y'ɛmɛ̀n nɔn, gɔ́ dɔ́ yɔ ɛgbànkàn léyi Krisì kɛ lɛ srɔ́n ɛsù mán ecizrɔ léyi zɛtɛn ke le dú nɛ tɛn nɔn hɩ ankà.

Zhüdɛ̀n 1:12

Y'ɛtɛ̀sɛ̀n nyɔn kɛ tán ɛnkruemɛ̀n jrɛ́ anwrɔn nɛ́n-muan-ẅì hɔ̀n ci-zîemɛ̀n; nanvrɛn lɔ de, yɔ koran kɩ anvɛvrà zriɛmɛ́n ke sɩ́ ẅɛn yɔ, kɩ yɔ wá yɔ dùku y'ankà esùva. Yɔ dù hán ɛwì-gbú hɔ̀n léyi ɛndɔ̀nwrɔ̀n kɛ kɛ́n wá, kɩ ke sɩ́ nán ɛnhsi nɔn. Yɔ dú yɔ cá antɛ̀ hɔ̀n léyi ke sɩ́ shi ɛẅì zriɛmɛ́n, odùcɛ̀n vra mán, kɩ ɛnvra léyi annyràn ke frɛ yɔ nɔn, yɔ wú owù d'anhyrɛ̀.

Ɔwɔ-mɛ̀n-yrikàn 1:11

esùva lɔ kɛ dɔ̀ le: “È merɛ́n owrú tɔ̀n mɛ̀n eci léyi ɛ kàn nɔn, ô, è bɩ́ owrú lɔ è yüre Ɔwɔ fɛcüè hɔ̀n ɔbɔ̀ɛn lɔ: Efɛzɛ̀n anmàn, Smirnɛ̀n anmàn, Pergamɛ̀n anmàn, Tiatirɛ̀n anmàn, Sardɛ̀n anmàn, Filadɛlfi mán Laodise anmàn.”

Ɔwɔ-mɛ̀n-yrikàn 1:16

Okùcankrò hɔ̀n ɔbɔ̀ɛn dú nɛ̀n ezì-kɔrɛ̀ màn mɛ̀n, kɩ ezì-anhyrɛ̀-nyan-she piɛnpiɛn tɔ̀n dú nɛ̀n anmùan mɛ̀n kɛ srɔ ɛntrɛ. N'ezì lɔ kɛ gbrɛ́n kɛ hán ɛnbri-shɛ́n bri hɔ́.

Ɔwɔ-mɛ̀n-yrikàn 1:20

Nyàn ankà bán ankà léyi dú okùcankrò ɔbɔ̀ɛn hɔ̀n léyi ɛ kán m'ezì-kɔrɛ̀ kɔrɛ̀ màn lɔ mɛ̀n mán ansikɛ kɛniɛn hɔ̀n ɔbɔ̀ɛn lɔ mɛ̀n nɔn: okùcankrò ɔbɔ̀ɛn hɔ̀n lɔ dú Ɔwɔ fɛcüè hɔ̀n ɔbɔ̀ɛn lɔ y'Ɔwɔ kùyüre-bɔ̀, kɩ kɛniɛn hɔ̀n ɔbɔ̀ɛn lɔ, dú Ɔwɔ fɛcüè hɔ̀n ɔbɔ̀ɛn lɔ.”

Ɔwɔ-mɛ̀n-yrikàn 1:4

Ebinyan ndɔ lɔ dú Zhan yri kɛ và, kè dú Ɔwɔ-fɛcüè ɔbɔ̀ɛn hɔ̀n léyi dú Azi kpɔsɔ wú nɔn tɛn: Nboafɔ̀n mán anwɔwɔ kè dú Ɔwɔ léyi ndù, ngo dù kɩ kɛ và nɔn, ne yri kɛ̀ và cɔ́ nyɛ̀n, kè dú anhɛ́n hɔ̀n ɔbɔ̀ɛn léyi nyɔn n'ɛgbú-tòbù zìwú, y'eyri kɛ̀ và cɔ́ nyɛ̀n,

Ɔwɔ-mɛ̀n-yrikàn 2:13

Mɛ̀n nyri ɛyri léyi ɛ̀ sɔ́n ebɩ́ nɔn: ɛyri léyi anwa-bɔ̀ wrɔn cüìcüì gbú-tòbù ndù nɔn. Ɛ̀ brɛ́ mɛ̀n kɩkɩ ɛ̀ hɛ́n kɩ è sɩ̀ crɔ̀n ankàẅìbùtan léyi ɛ̀ ẅɛn mɛ̀n ɛmɛ̀n nɔn, annannan le ɛnvra léyi ye wri Antipasɛ̀n, mɛ́n dalɛfuɛ mùan-zri-di-wrɔn, ny'anmàn, ɛyri leyi anwa-bɔ̀ wrɔn cüìcüì sɔ́n ebɩ́ nɔn.

Ɔwɔ-mɛ̀n-yrikàn 2:19

Mɛ̀n nyri v'ɔkɔ̀hɔ̀n-hán-kɔ̀hɔ̀n, v'ɛcüɛ̀n, v'ɔmùan-zri-dì, v'edùyì-ci-hán mán v'ɛnbɔrɛ-ẅɛ̀n-hɛ́n-sɛ́. Mɛ̀n vru mɛ̀n nyri ɔmu le zɛtɛ̀ lɔ, è dú edùyiemɛ̀n vrán ɛnkrubɔmɛ̀n lɔ.

Ɔwɔ-mɛ̀n-yrikàn 2:2

Mɛ̀n nyri v'ɔkɔ̀hɔ̀n-hán-kɔ̀hɔ̀n, ɛgbànkàn léyi ɛ̀ tán v'edomɛ̀n mán v'ɛnbɔrɛ-ẅɛ̀n-hɛ́n-sɛ́. Mɛ̀n nyri ɔmu le e sɩ́ cüɛn anbɔrɛ-bɔ̀, anwrɔn hɔ̀n léyi kɛ krɛ́ y'edomɛ̀n ɔkɔ̀hɔ̀n-wá-bɔ̀ nɔn, ɛ̀ wɔɛn yɔ ɛ̀ nyan, tɛ́n yɔ sɩ̀ dù ɔkɔ̀hɔ̀n-wá-bɔ̀ kɩ ɛ cɔ̀ e nyrì le, yɔ dú anhyɔ̀n-bɔ̀.

Ɔwɔ-mɛ̀n-yrikàn 2:9

Mɛ̀n nyri v'ejüedì mán v'ɛmiàn; tɛ́n annanwɔrɛ mɛ̀n lɔ, è di ɛnnɛ̀ncüì! Mɛ̀n nyri ankà gbàn léyi anwrɔn hɔ̀n léyi ke bú y'edomɛ̀n kɛ hán Zhüifɛ̀n-bɔ̀ hɔ́ hɩ kɛ dɔ́ tán mɛ́n nɔn, tɛ́n yɔ sɩ̀ dù Zhüifɛ̀n-bɔ̀: yɔ dú Anwa-wrɔn-fɛcüè tɔ̀n!

Ɔwɔ-mɛ̀n-yrikàn 3:15

Mɛ̀n nyri v'ɔkɔ̀hɔ̀n-hán-kɔ̀hɔ̀n; mɛ̀n nyri ɔmu le è sɩ̀ wroà kɩ e sɩ́ friɛ mán. Ke dú kɛ eci d'anhyrɛ̀ lɔ è dú ɔtɔ̀n!

Ɔwɔ-mɛ̀n-yrikàn 3:2

Gbɛ̀ anvɛ̀, eci léyi ɛ ẅɛ̀n nɔn, è vru ɛ̀ hán nɛ̀n, nɛ̀n cɔ́ ecüì, yakɛ kɛ̀ cɔ́ ɛnvra léyi ne le wú mrìmrì nɔn. Ɔmuhi mɛ́n cɔ̀ mɛ́n nyrì le, v'eci-hán-ci hɔ̀n lɔ fɛn kè sɩ̀ krɔn kpehɛ́n m'Ɔwɔ zìwú nɔn.

Ɔwɔ-mɛ̀n-yrikàn 3:8

Mɛ̀n nyri v'ɔkɔ̀hɔ̀n-hán-kɔhɔ̀n; mɛ̀n nyri ɔmu le ecüì ẅiɛ kɩ dú mɛ́n edomɛ̀n, kɩ ɔmu tɛ̀kɩ m'ɔmùan ankà-dɔ̀ wú, è dí ɔmùan zri kɩ è sɩ̀ krɔ mɛ̀n. Zɛtɛn, mɛ̀n srú esù tɔ̀n v'ezìwú, kɩ esù ndɔ lɔ ɔwrɔn zriɛmɛ́n ke sɩ̀ sɛ́n nɛ̀n rɔ́.

Ɔwɔ-mɛ̀n-yrikàn 4:5

Ɛgbú-tòbù wú lɔ, anhobɩ́ hyà, esùva bobo mán ɛwú kù-dì ke dù kɛ và. Ɛnhyà lakà ɔbɔ̀ɛn ke wrú ɛgbú-tòbù zìwú; ndɔ lɔ de dú Ɔwɔ hɛ́n ɔbɔ̀ɛn hɔ̀n lɔ nɔn.

Ɔwɔ-mɛ̀n-yrikàn 5:6

Kɩ mɛ̀n kán Ɔwɔ kɔ̀kɔ̀sɛ̀ ẅì nyɔn ɛgbú-tòbù wanzi, ɛci kɔrɛkɔrɛ anzɔ̀ hɔ̀n lɔ mán ɛcüìcüì-bɔ̀ gbrɛnkɛ́n nɛ̀n ɔmùan. Nɛ̀n cá eci léyi ye wi esùva nɔn. Nɛ̀n ẅɛn ɛtrù ɔbɔ̀ɛn mán anvɛ̀ ɔbɔ̀ɛn léyi dú Ɔwɔ hɛ́n ɔbɔ̀ɛn léyi yɛ hán dú ɛnhibù mumù lɔ fɛn wú và nɔn.