Ɔwɔ-mɛ̀n-yrikàn 20:6 - Ɛmɛẅi ankà ankrànkràn 2003

⁶ Ɛnbɔrɛbru dú anwrɔn hɔ̀n léyi dú ɛnvrapkà wúemɛ̀n-dùfrɔ́ ndɔ lɔ mɛ̀n nɔn! Yɔ dú Ɔwɔ tɛn, kɩ anhyrɛmɛ̀n wú lɔ kè sɩ̀ ẅɛ̀n ɛkɔrɛ̀srɔn y'ɛwú; Yɔ le dú Ɔwɔ mán Krisì cice-bɔ̀, kɩ yɔ mán Krisì mɛhi yɔ lɛ ẅɛn ɛyri ɛnnànwàn tɛ̀buri.

Ɔwɔ-mɛ̀n-yrikàn 20:6 Iomraidhean Croise

Lükɛ̀n 14:15

Ɛnvra léyi Zhezü dɔ́ ankà ndɔ hɔ̀n lɔ trɔ nɔn, anwrɔn hɔ̀n léyi ye bi ɛci nɔn, ɔtɔ̀n kɛ dɔ́ Zhezü le: “Ɛnbɔrɛbru dú ɔwrɔn léyi ke le dú ɛci-zîemɛ̀n Anhobɩ́ Nɛ̀ncüì-dùyri nɔn tɛn!”

Rɔmɛ̀n-anmàn-bɔ̀ 12:1

Anwrɔn-nɛ́n-muan-ẅì hɔ̀n, ɔmuhi Ɔwɔ yé bɔ̀ n'ɛcüɛ̀n lɔ nɔn, me yɩ́ nyɛ̀n edù nyɛ́n bɩ́ nyɛ́n mumù lɔ ankɔrɛ-kɔrɛ mɛ̀n nyɛ́n ce nɛ̀n, ndɔ lɔ de dú n'ɛvɛ̀-cüɛn-ci nɔn. Hɩ lɔ de dú ecice-kɔ̀hɔ̀n-hán annanwɔrɛ léyi dú ɔwɔ̀ɛn nyɛ́n ẅɛn nɛ̀n nɔn.

Rɔmɛ̀n-anmàn-bɔ̀ 8:17

Bɔ̀ dú n'ɛẅì hɔ̀n, ke dú ɔmu lɔ hô, bɔ́ mán bɔ́ lɛ cɔ́ anvrɛn léyi Ɔwɔ wá nɛ́n fɛcüè ɔmùan, bɔ́ mán Krisì mɛhi bɔ́ le dú n'anvrɛn lɔ mɛ̀n; ɔmuhi ke dú kɛ bɔ́ mán Krisì mɛhi bɔ́ kán ɛgbàn hô, bɔ́ mán nɛ́n mɛhi bɔ́ le dú n'eci-zrɔ lɔ mɛ̀n.

Anhyrɛmɛ̀n timote 2:12

ke dú kɛ bɔ́ nyɔn ɛshishiemɛ̀n, bɔ́ mán nɛ́n mɛhi bɔ́ lɛ ẅɛn ɛyri; ke dú kɛ bɔ́ kɔ́n nɛ̀n bɔ́ ze, nɛ́n mán nɛ lɛ kɔ́n bɔ̀ ne le ze;

1 Piɛrɛ̀n 2:5

Nyɛ́n mán nyɛ́n bɩ́ ɛyri kè dù kɛ̀ hán ɛbù kɔrɛkɔrɛ hɔ̀n léyi srɔ ɛnhɛ́n cice wɔn bù nɔn. Nyɛ lɛ wá Ɔwɔ cice-bɔ̀ kpɔsɔ krumù, yɛ lɛ wá ɛnzhì ɛnkru yɛ tán Ɔwɔ, nye le ce nɛ̀n ɛnhɛ́n mɛ̀n ci léyi kɛ lɛ cüɛn nɛ̀n ɛvɛ̀, Zhezü Krisì bɩmɛ̀n nɔn.

1 Piɛrɛ̀n 2:9

Tɛ́n nyɛ́n, nyɛ́n dú ɛnbrɛ̀ léyi yɛ mrɛ́n ye bɩ, Ɛnnɛ̀ncüì cice-bɔ̀, ɛnhi wú anmàn prɔnprɔn, fɛcüè léyi dú Ɔwɔ tɛn nɔn. Nɛ̀n bi nyɛ̀n nyɛ́n dú ɛyri yɔwɔ mɛ̀n nyɛ́n srɔ n'ɛyrikàn anvrɛnvrɛn lɔ mɛ̀n, ô nyɛ́n dɔ́ ɔkɔ̀hɔ̀n fifi hɔ̀n léyi nɛ̀n hán nɔn hɩ ankà.

Ɔwɔ-mɛ̀n-yrikàn 1:6

nɛ̀n srɔ bɔ̀ Ɔwɔ-cice-bɔ̀, ô bo dú nɛ́n Zi Ɔwɔ ci-bɩ̀tan kɔ̀hɔ́n mɛ̀n. Eci-zrɔ mán ɛkɔrɛ̀srɔn kè dú nɛ tɛn ɛnvra lɔ fɛn! Kè dú ɔmu lɔ.

Ɔwɔ-mɛ̀n-yrikàn 14:13

Zɛtɛn mɛ̀n yá anhobɩ́ sùva tɔ̀n kɛ dɔ́ mɛ̀n le: “È merɛ́n ankà ndɔ lɔ: ‘Ɛnbɔrɛbru dú anwrɔn hɔ̀n léyi zɛtɛ̀ lɔ ke wú Ɛẅɛnwrɔn ci-bɩ̀tan kɔ̀hɔ́n mɛ̀n nɔn!’ – ‘Hɛ̀ɛ̀, yɔ dú ɛnbɔrɛbruemɛ̀n, ɔmu lɔ de Ɛnhɛ́n kɛ dɔ̀ nɔn. Yɔ lɛ cɔ́ y'ɔkɔ̀hɔ̀n-shishi-hán wrɔncüe, ɔmuhi anvrɛn léyi yɔ hán nɔn, kɛ kɛ́n yɔ ɛsɛ̀n!’ ”

Ɔwɔ-mɛ̀n-yrikàn 2:11

Ke ji le ɔwrɔnwrɔn, ke dú kɛ nɛ̀n ẅɛn nukù hô, nɛ̀n yá anvrɛnvrɛn ankà léyi Ɛnhɛ́n kɛ dɔ́ Ɔwɔ-fɛcüè-bɔ̀ nɔn! Anwrɔn hɔ̀n léyi kɛ lɛ kɔ̀nkà nɔn, yɔ sɩ̀ vru wú anhyrɛmɛ̀n wù lɔ.”

Ɔwɔ-mɛ̀n-yrikàn 20:14

Owù mán owú-bɔ̀-hibù, yɔ lɔ fɛn yɛ kɔ́n yɔ ku ɛnhyà-ẅì nɛnbà lɔ mɛ̀n. Nɛ́nbà ndɔ lɔ dú anhyrɛmɛ̀n wù.

Ɔwɔ-mɛ̀n-yrikàn 21:8

Zɛtɛn, nyɛ́n anbrá-di-bɔ̀, anmùan-anhyrɛ̀-dí-bɔ̀, ɛci-gbàngbàn-hán-bɔ̀, anwrɔn-wri-bɔ̀, ɛci-gbangbàn-kɔ̀hɔ̀n-hán-bɔ̀, seke-kɔ̀hɔ̀n-hán-bɔ̀, antɛ̀buri-sɛ́n-bɔ̀ mán anhyɔ̀n-bɔ̀ lɔ fɛn, ny'ɛyri dú ɛnhyà-ẅì nɛ́nbà lɔ mɛ̀n, nɛ́n de nɛ̀n dú anhyrɛmɛ̀n wù lɔ nɔn.”

Ɔwɔ-mɛ̀n-yrikàn 22:5

Ɛnnyran ke sɩ̀ vru dùɛ, kɩ ye sɩ̀ vru ji kɛ̀níɛn mán ɛnbrí yrikàn, ɔmuhi Ɛẅɛnwrɔn Ɔwɔ kɛ lɛ tán yɔ n'ɛyri-kàn, kɩ yɔ lɛ ẅɛn ɛyri ɛnvra lɔ fɛn nɔn.

Ɔwɔ-mɛ̀n-yrikàn 22:7

“Zhezü kɛ dɔ̀ le, è die nukù, mɛ vá ɛnvra bruemɛ̀n! Ɛnbɔrɛbru dú anwrɔn hɔ̀n léyi ke bɩ́ ɛshishiemɛ̀n Ɔwɔ-mùan-wú-ankà-dɔ̀ léyi dú owrú ndɔ lɔ mɛ̀n nɔn tɛ́n!”

Ɔwɔ-mɛ̀n-yrikàn 3:21

Anwrɔn hɔ̀n léyi kɛ kɔ́nkà nɔn, mɛ lɛ tán yɔ ɛkɔrɛ̀levri yɔ le bɩ́ ɛyri m'ɛgbú-tòbù lɔ wú, hán ɔmu le ɛnvra léyi mɛ́n kɔ́nkà nɔn, mɛ́n hɔ̀n mɛ̀n yɛ́, mɛ̀n mán Dade mɛhi n'ɛgbú-tòbù lɔ wú.

Ɔwɔ-mɛ̀n-yrikàn 5:10

Ɛ̀ srɔ yɔ ɛnnɛ̀ncüi dúyri Wɔ-cice-bɔ̀, ô yɔ dú b'Ɔwɔ lɔ n'ɛcice kɔ̀hɔ́n mɛ̀n, kɩ yɔ lɛ ẅɛn ɛyri ɛnhi wú.”