Ɔwɔ-mɛ̀n-yrikàn 20:4 - Ɛmɛẅi ankà ankrànkràn 2003

⁴ Zɛtɛn mɛ̀n kán ɛgbú-tòbù hɔ̀n: anwrɔn hɔ̀n léyi yɛ́ yɔ ɛwúɛ nɔn, cɔ́ ɛkɔrɛ̀srɔn yɔ ci ɛmrɛ̀n. Mɛ̀n vru mɛ̀n kán anhɛ́n hɔ̀n léyi ye wri y'ɔmùan-zri-dì annanwɔrɛ ankà léyi Zhezü yé mán Ɔwɔ mùan-ankà-dɔ̀ wú nɔn. Yɔ sɩ̀ cüè ɔnɔ̀n lɔ mán nɛ́n picɛ̀ lɔ ankɔrɛ̀ ezìwúɛ, kɩ yɔ sɩ̀ cɔ̀ ɔnɔ̀n nrɛ̀n lɔ, ezìwú mán ɛmànmɛ̀n. Yɔ vru yɔ vá ɔkɔrɛ-bɔ̀ mɛ̀n kɩ yɔ ẅɛn ɛyri yɔ mán Krisì mɛhi ɛnnanwàn tɛ̀buri.

Ɔwɔ-mɛ̀n-yrikàn 20:4 Iomraidhean Croise

Matie 19:28

Zhezü kɛ dɔ́ yɔ le: “Mɛ dɔ́ nyɛ̀n annànwɔrɛ mɛ̀n le: ɛnvra léyi ɔwrɔnẅì Ẅì kɛ lɛ yɛ́ n'ecizrɔ gbú-tobù lɔ wú, ɛwúvà wrù lɔ mɛ̀n nɔn, nyɛ́n anwrɔn ɛvà-anhyrɛ̀ hɔ̀n léyi nyɛ́n kɛ́n mɛ̀n ɛsɛ̀n nɔn, nyɛ lɛ yɛ́ ɔmu zri lɔ ɛgbú-tobù wú, nyɛ́n ci Izraɛlɛ̀n mɛ̀n kru ɛvà-anhyrɛ̀ lɔ ɛmrɛ̀n.

Matie 24:10

Hɩ vra lɔ, bobrebe ke le tecüe y'ankàẅì-bùtan lɔ; yɔ le ku y'edomɛ̀n ankà ɛwú kɩ yɔ le gbri y'edomɛ̀n.

Markɛ̀n 6:16

Ɛnvra léyi Herɔdɛ̀n yá ankà ndɔ lɔ nɔn, nɛ dɔ̀ le: “Ɔwrɔn lɔ Zhan Batisì! Mɛ́n hán ye wí nɛ̀n ɛnkru; tɛ́n nɛ̀n vru nɛ̀n vá ɛkɔrɛ-bɔ̀ mɛ̀n!”

Markɛ̀n 6:27

Herɔdɛ̀n wá gɔliɛ-wrɔn tɔ̀n ɔkɔ̀hɔ̀n kpatakpata lɔ anwɔn-mɛ̀n-wá-wɔn mɛ̀n, ô ye bɩ́ Zhan Batisì ɛnkru yɛ và. Gɔliɛ-wrɔn lɔ hɔ́n anwɔn-mɛ̀n-wá-wɔn mɛ̀n, kɩ wí Zhan ɛnkru.

Markɛ̀n 9:11

Zɛtɛn Zhezü sɛ̀nkɛn-bɔ̀ ke yrɛ nɛ̀n le: “Ecitan kruhú kɛ ɛnyànmàn-gbànvri-ankà-yé-bɔ̀ kɛ dɔ̀ le, ke ji le Eli kɛ và yakɛ há?”

Lükɛ̀n 1:17

Nɛ lɛ và kɛ lɛ hán Ɔwɔ-kɔ̀hɔ̀n-hán-wrɔn hɔ́, ne le bɩ́ Ɔwɔ-mùanwú-ankà-dɔ́-wrɔn Eli hɛ́n mán n'ecüì, nɛ̀n hɔ́n Ɔwɔ zìwú, ô nɛ̀n wɔ́ ɛẅì-nɛ́n-zi hɔ̀n mán y'ɛẅì hɔ̀n angranmɛ̀n, ô nɛ̀n bɩ́ nukù-fɔn-bɔ̀ nɛ̀n và di ɛnyrɔnnan-bɔ̀ mɛ̀n, ô nɛ̀n srɔ yɔ Ɛẅɛnwrɔn fɛcüè-bɔ̀.”

Lükɛ̀n 14:14

E le dú ɛnbɔrɛ-bruemɛ̀n, ɔmuhi yɔ sɩ̀ wɔrɛ̀ tán mɛ́n rɔ́ nɔn. Ɔwɔ kɛ lɛ wɔrɛ̀ tán mɛ́n ɛnvra léyi yɔ hɔ̀n léyi hán anvrɛn nɔn, ke le dú owúemɛ̀n kɛ̀ wɔrɛ̀ vá ɔkɔrɛ-bɔ̀ mɛ̀n nɔn.”

Lükɛ̀n 22:30

nye le zî ɛci kɩ nye le mi ɛnshí mɛ́n tɛbrɛ̀ lɔ wú, Anhobɩ́ Nɛ̀ncüì-dúyri, kɩ nyɛ lɛ yɛ́ ɛgbú-tobù wúɛ, ô nyɛ́n ci Izraɛlɛ̀n mɛ̀n kru ɛvà-anhyrɛ̀ lɔ ɛmrɛ̀n.”

Zhan 14:19

Ɛnvra buriemɛ̀n ɛnhibù ke sɩ̀ vru kán mɛ̀n, tɛ́n nyɛ́n, nyɛ lɛ kán mɛ̀n, ɔmuhi mɛ̀n dú ɔkɔrɛmɛ̀n kɩ nyɛ́n mán nye le dú ɔkɔrɛmɛ̀n nɔn.

Rɔmɛ̀n-anmàn-bɔ̀ 11:15

Annanwɔrɛ mɛ̀n lɔ, ɛnvra léyi yɛ kɛ́n yɔ sɩ́ ɔhɔ́nan nɔn, ɛnhibù mán Ɔwɔ mɛhi angranmɛ̀n nwɔ̀. Zɛtɛn ecitan de kɛ lɛ wɔɛ̀n ɛnvra léyi Ɔwɔ ke le vru ke bɩ́ yɔ nɛ́n? Ke le dú owú-bɔ̀ mɛ̀n mɛẅi vru và annanwɔrɛ ɔkɔrɛ-bɔ̀ mɛ̀n!

Rɔmɛ̀n-anmàn-bɔ̀ 8:17

Bɔ̀ dú n'ɛẅì hɔ̀n, ke dú ɔmu lɔ hô, bɔ́ mán bɔ́ lɛ cɔ́ anvrɛn léyi Ɔwɔ wá nɛ́n fɛcüè ɔmùan, bɔ́ mán Krisì mɛhi bɔ́ le dú n'anvrɛn lɔ mɛ̀n; ɔmuhi ke dú kɛ bɔ́ mán Krisì mɛhi bɔ́ kán ɛgbàn hô, bɔ́ mán nɛ́n mɛhi bɔ́ le dú n'eci-zrɔ lɔ mɛ̀n.

Anhyrɛmɛ̀n timote 2:12

ke dú kɛ bɔ́ nyɔn ɛshishiemɛ̀n, bɔ́ mán nɛ́n mɛhi bɔ́ lɛ ẅɛn ɛyri; ke dú kɛ bɔ́ kɔ́n nɛ̀n bɔ́ ze, nɛ́n mán nɛ lɛ kɔ́n bɔ̀ ne le ze;

Ɔwɔ-mɛ̀n-yrikàn 1:2

Zhan di dalɛfuɛ le, eci léyi nɛ́n kàn nɔn dú Ɔwɔ mùan-ankà mán annanwɔrɛ ankà léyi Krisì yé nɔn.

Ɔwɔ-mɛ̀n-yrikàn 1:9

Mɛ̀n dú Zhan, nyɛ́n muan-ẅì; mɛ̀n mán mɛ̀n dú Zhezü bɔ̀sɔ̀ lɔ mɛ̀n hán nyɛ́n hɔ́, mɛ̀n dú ny'ɛkɔrɛ̀-wá-wrɔn ejüediemɛ̀n, mɛ̀n dú ɛnnɛ̀ncüì-dúyri mán ɛnbɔrɛ-ẅɛ̀n-hɛ́n-sɛ́ mɛ̀n. Yɛ sɩ́ mɛ̀n anwɔ̀nẅìemɛ̀n Patmɔsɛ̀n shi-vú-ta wú, m'ɔmùan zri-dì Ɔwɔ mùan-ankà wú mán annanwɔrɛ yrikàn léyi mɛ̀n cɔ́ Zhezü mɛ̀n nɔn, hɩ kruhú.

Ɔwɔ-mɛ̀n-yrikàn 11:11

Tɛ́n ɛnvra léyi ɛbi anhɔ̀n mán ɛcá lɔ vacì nɔn, ɛwúvàkɔrɛ̀ dɔnwrɔ̀n tɔ̀n dú Ɔwɔ yri và bru yɔ edù; yɔ tɔ́hú kɩ anwrɔn lɔ fɛn léyi kán yɔ nɔn gbɔ̀gbɔ̀ bru edù.

Ɔwɔ-mɛ̀n-yrikàn 11:15

Zɛtɛn ɔbɔɛn mɛ̀n Wɔ kùyüre-wrɔn lɔ mú ɛbrɛ̀n. Esùva cüìcüì hɔ̀n dú anhobɩ́ ke di nkù; yɔ dɔ̀ le: “Ɛnhibù yri ẅɛ̀n zɛtɛ̀ lɔ dú Ɛẅɛnwrɔn mán n'Ebɩdie-wrɔn tɛn, kɩ ɛyri ẅɛ̀n ndɔ lɔ ke le dú ɛnvra lɔ fɛn!”

Ɔwɔ-mɛ̀n-yrikàn 11:3

Mɛ lɛ wá mɛ́n dalɛfuɛ-di-bɔ̀ anhyrɛ̀ ɔkɔ̀hɔ̀n, yɔ le ku ɛbrá ceci edù, kɩ yɔ lɛ dɔ́ ɛmɛẅi ankà léyi yɔ cɔ́ Ɔwɔ yri ɛbi tɛ̀buri kru zri mán ɛkɔẅi ɛvà anhɔ̀n ndɔ hɔ̀n granmɛ̀n nɔn.”

Ɔwɔ-mɛ̀n-yrikàn 11:7

Ɛnvra léyi yɔ lɛ trɔ y'ɛmɛẅi ankà lɔ dɔ̀ nɔn, ɔnɔ̀n léyi dú ɛnnànmàn vrɛ́n lɔ mɛ̀n nɔn, kɛ lɛ kɔ́n yɔ anhà. Nɛ lɛ ká yɔ, kɩ ne le wri yɔ.

Ɔwɔ-mɛ̀n-yrikàn 12:11

Bo muanẅì hɔ̀n kɔ́nká nɛ̀n Ɔwɔ Kɔ̀kɔ̀sɛ̀-ẅì krɛ̀ kɔrɛ̀levriemɛ̀n, mán ankà léyi yɔ di dalɛfuɛ n'ɛwú nɔn n'ɛmɛ̀n; yɔ sɩ̀ bàn y'ɛwúvà lɔ, yɔ krɔn kpehɛ́n, ô yɔ wù.

Ɔwɔ-mɛ̀n-yrikàn 14:11

Ɛnhyà-bri léyi kɛ hán yɔ, yɔ kán ɛgbàn nɔn, kɛ hɔ́n ɛwú ɛnvra lɔ fɛn. Yɔ sɩ̀ ẅɛ̀n ɛwrɔncüe ɛnnyran mán ɛcɛ̀n, anwrɔn hɔ̀n léyi ke cüe ɔnɔ̀n lɔ mán nɛ́n picɛ̀ ankorɛ̀ ezìwú mán ɔwrɔn totɔtɔ̀n léyi kɛ cɔ́ n'ebi lɔ n'ɛnrɛ̀n edòmɛ̀n nɔn.”

Ɔwɔ-mɛ̀n-yrikàn 15:2

Zɛtɛn mɛ̀n kán eci cá ecüe léyi ɛmɛ̀n bí hán zɛnci hɔ́, ɛnhyà dú nɛ̀n ɛmɛ̀n. Anwrɔn hɔ̀n lɔ fɛn léyi kɔ́nká ɔnɔ̀n lɔ, nɛ́n picɛ̀ mán eci-krɛ̀ léyi dú n'ebi lɔ wú nɔn, nyɔn ɛwú, ecüe zɛnci ndɔ lɔ wú. Anhɛ́ mràn léyi Ɔwɔ tán yɔ nɔn, dú yɔ antamɛ̀n.

Ɔwɔ-mɛ̀n-yrikàn 17:8

Ɔnɔ̀n léyi ɛ kàn nɔn, ɛnbiɛhɛ́n lɔ nɛ̀n dú ankɔrɛkɔrɛ mɛ̀n, tɛ́n nɛ̀n sɩ̀ vrù dù ankɔrɛkɔrɛ mɛ̀n hàn; ke ji le nɛ̀n dú gbàzrɔ mɛ̀n nɛ̀n srɔ ɛntrɛ, ô nɛ̀n hɔ́n n'ɛzrɛ́n mɛ̀n. Ɛnhi-wú-anmàn-bɔ̀ léyi ɛnhibù krubɔmɛ̀n hàn-hɛ́n ye sɩ̀ mrɛ̀n yɔ bi, kè dù ɔkɔrɛ wrú lɔ mɛ̀n nɔn, ke le dú anvɛmɛ̀n-frɛ́n mɛ̀n ɛnvra léyi yɔ lɛ kán ɔnɔ̀n lɔ nɔn: annanwɔrɛ mɛ̀n lɔ, ɛnbiɛhɛ́n vra lɔ, nɛ̀n dú ankɔrɛkɔrɛ mɛ̀n, tɛ́n nɛ̀n sɩ̀ vrù dù ɔmu lɔa, kɩ ne le vru nɛ̀n srɔ.

Ɔwɔ-mɛ̀n-yrikàn 2:26

Anwrɔn hɔ̀n léyi kɛ lɛ kɔ̀nkà, kɩ kɛ lɛ hán m'ɛkɔrɛ̀-zì-ci hàn kɩ ɛtrɔmɛ̀n nɔn, mɛ lɛ tán yɔ ɛkɔrɛ̀srɔn léyi mɛ́n mumù mɛ̀n cɔ́ Dade yri nɔn: mɛ lɛ tán yɔ ɛkɔrɛ̀srɔn ɛnhi-wú-anmàn hɔ̀n wú, yɔ lɛ nyrɔn ɛnhi-wú anmàn hɔ̀n lɔ ɛngbɛn-ẅì kɔrɛ̀levri shishiemɛ̀n, kɩ yɔ lɛ boyɛ yɔ kɛ lɛ hán antà sî hɔ́. Me le vru mɛ̀n tán yɔ ɛcɛ̀n dɔ̀gbɔ̀.

Ɔwɔ-mɛ̀n-yrikàn 20:6

Ɛnbɔrɛbru dú anwrɔn hɔ̀n léyi dú ɛnvrapkà wúemɛ̀n-dùfrɔ́ ndɔ lɔ mɛ̀n nɔn! Yɔ dú Ɔwɔ tɛn, kɩ anhyrɛmɛ̀n wú lɔ kè sɩ̀ ẅɛ̀n ɛkɔrɛ̀srɔn y'ɛwú; Yɔ le dú Ɔwɔ mán Krisì cice-bɔ̀, kɩ yɔ mán Krisì mɛhi yɔ lɛ ẅɛn ɛyri ɛnnànwàn tɛ̀buri.

Ɔwɔ-mɛ̀n-yrikàn 22:5

Ɛnnyran ke sɩ̀ vru dùɛ, kɩ ye sɩ̀ vru ji kɛ̀níɛn mán ɛnbrí yrikàn, ɔmuhi Ɛẅɛnwrɔn Ɔwɔ kɛ lɛ tán yɔ n'ɛyri-kàn, kɩ yɔ lɛ ẅɛn ɛyri ɛnvra lɔ fɛn nɔn.

Ɔwɔ-mɛ̀n-yrikàn 3:21

Anwrɔn hɔ̀n léyi kɛ kɔ́nkà nɔn, mɛ lɛ tán yɔ ɛkɔrɛ̀levri yɔ le bɩ́ ɛyri m'ɛgbú-tòbù lɔ wú, hán ɔmu le ɛnvra léyi mɛ́n kɔ́nkà nɔn, mɛ́n hɔ̀n mɛ̀n yɛ́, mɛ̀n mán Dade mɛhi n'ɛgbú-tòbù lɔ wú.

Ɔwɔ-mɛ̀n-yrikàn 4:4

Ɛgbú-tòbù lɔ dòmɛ̀n, ɛgbú-tòbù ɛẅia anzɔ̀ nyantɛn hɔ̀n ndù, y'ɛwú lɔ ɛcüìcüì-bɔ̀ ɛẅia anzɔ̀ cɔ́ ɛceci wosú yɛ́, kɩ ansikɛ krusɔn-ci dú yɔ ɛnkru.

Ɔwɔ-mɛ̀n-yrikàn 6:9

Ɛnvra léyi Ɔwɔ kɔ̀kɔ̀sɛ̀-ẅì srú ɛnriemɛ̀n ci-tɔ́n-ci lɔ nɔn, mɛ̀n kán anwrɔn hɔ̀n léyi ye wri y'ɔmùan-zri-dì kruhú Ɔwɔ ankà-dɔ́ mɛ̀n mán yɔ dalɛfuɛ ankrànkràn dìemɛ̀n nɔn, y'anhɛ́n hɔ̀n lɔ Ɔwɔ-cice-tɛbrɛ̀ krugbɛ̀n.

Ɔwɔ-mɛ̀n-yrikàn 7:3

“Nyɛ́n bɩ́ jrɛ́ ɛnhi mán, ecüe mán, antɛ̀ mán, ke dú kɛ b'Ɔwɔ lɔ n'eci-bɩtan-bɔ̀ lɔ, bɔ̀ sɩ̀ dì yɔ ɛnrɛ̀n ezìwú.”