Lükɛ̀n 16:2 - Ɛmɛẅi ankà ankrànkràn 2003

² Ɛnnɛ̀ncüì lɔ bi nɛ̀n kɩ kɛ dɔ́ nɛ̀n le: ‘Ankà tán de mɛ yá ye dɔ́ v'ɛwú nɛ́n? Ɛ̀ krɛ́ ɛci ɛ̀ tán mɛ̀n, ɔmuhi e sɩ̀ vru dú m'ɛci-krɛ́-wrɔn hàn nɔn.’

Lükɛ̀n 16:2 Iomraidhean Croise

Matie 12:36

Mɛ dɔ́ nyɛ̀n le: ɛmrɛ̀nci bì lɔ, anwrɔn ke le di ɔwɔɛ̀n ankà gbàngbàn hɔ̀n léyi yɔ dɔ̀ nɔn hɩ wú.

Matie 20:8

Ɛnvra léyi ɔwɔɛmɛ̀n cɔ̀ nɔn, ɛkɛ̀tɛ̀-nɛ́n-zi dɔ́ n'ezìwú wrɔn lɔ le: ‘È bi ɔkɔ̀hɔ̀n-hán-bɔ̀ lɔ, ô è di ɔwrɔn-wrɔn n'ɔwɔɛ̀n. Ɛ̀ bukru ɛmɛẅi trɔ bɔ̀ lɔ yri, ô kpàkpà-bɔ̀ lɔ kɛ̀ trɔ ɛmɛẅi.’

Lükɛ̀n 12:20

Tɛ́n Ɔwɔ kɛ dɔ́ nɛ̀n le: ‘Ɔbrɔsà-wrɔn! Ɛnnyran ndɔ lɔ mɛ̀n, e sɩ̀ vru dú ɔkɔrɛ-bɔ̀ mɛ̀n. Zɛtɛn, antɔn de ɛ̀ tán ɛci léyi ɛ̀ bɔrɛkru ɛ̀ hɛ́n nɛ́n?’ ”

Lükɛ̀n 12:42

Ɛẅɛnwrɔn mrɛ́n ɔmùan le: “Antɔn de dú ankà-nyrì mán ɔmùan-zri-dì ci-bɩtan-wrɔn nɛ́n? Nɛ̀n dú ɔwrɔn tɔ̀n léyi n'ankà-yé-wrɔn kɛ wá nɛ̀n n'ebɩ́ lɔ antamɛ̀n, kɩ kɛ lɛ tán eci-bɩ̀tan-bɔ̀ ndɔ hɔ̀n lɔ ɛci-zî ɛnvra krɔn muàn mɛ̀n lɔ nɔn.

Lükɛ̀n 16:1

Zhezü kɛ dɔ́ n'ɛsɛnkɛn-bɔ̀ le: “Ɛnnɛ̀ncüì tɔ̀n ẅɛn ɛci-krɛ́-wrɔn tɔ̀n, kɩ yɛ vá dɔ́ nɛ̀n le, ɛci-krɛ́-wrɔn lɔ ke yerɛ nɛ̀n ɛci.

Lükɛ̀n 16:3

Ɛci-krɛ́-wrɔn lɔ kɛ dɔ́ n'edomɛ̀n le: ‘M'ankà-yé-wrɔn ke le bɩ́ mɛ̀n ɛci antamɛ̀n kɛ̀ sɔhɔ́. Ecitan de mɛ lɛ hán nɛ́n? Ecüì bádá mɛ̀n edomɛ̀n hɩ m'á hán ovú kɔ̀hɔ̀n, kɩ anvɛvrà kɛ lɛ ẅɛn mɛ̀n ɛci-sán-kɔ̀hɔ̀n-hán mɛ̀n.

Rɔmɛ̀n-anmàn-bɔ̀ 14:12

Ɔmu lɔ de ɔwrɔnwrɔn, n'eci léyi nɛ́n hán nɔn, nɛ lɛ srɔ Ɔwɔ zìwú, ô nɛ́n dùku nɛ̀n dɔ̀.

1 Korɛntɛ̀n anmàn-bɔ̀ 1:11

Annanwɔrɛ mɛ̀n lɔ, nmàn-ẅì hɔ̀n, anwrɔn hɔ̀n léyi dú Kloé mɛ̀n mɛ̀n-bɔ̀ nɔn, dɔ́ mɛ̀n le annankran dú nyɛ̀n ɛmɛ̀n.

1 Korɛntɛ̀n anmàn-bɔ̀ 4:2

Eci lɔ fɛn léyi ye ji ɛci-nán-wrɔn tamɛ̀n nɔn, dú ɔmùan-zri-dì.

1 Korɛntɛ̀n anmàn-bɔ̀ 4:5

Hɩ le kruhú de ke sɩ́ ji le nyɛ́n ci ɔwrɔn zriɛmɛ́n ɛ̀mrɛ̀n, ke dú kɛ ɛnvra léyi yɛ wá nɔn kɛ vá cɔ̀. Nyɛ́n vrá Ɛẅɛnwrɔn kɛ̀ và: ne le sɩ́ ɛyri-kán mɛ̀n, eci léyi bán ɛyri-yɔwɔ mɛ̀n, kɩ ne le sɩ́ anwrɔnẅì ankà-tro ci-bán-ci hɔ̀n lɔ fɛn ɛntrɛ. Zɛtɛn ɔwrɔnwrɔn kɛ lɛ cɔ́ Ɔwɔ yri, ɛmrɛ́n léyi dú nɛ tɛn nɔn.

2 Korɛntɛ̀n anmàn-bɔ̀ 5:10

Ɔmuhi ke ji le bɔ́ lɔ fɛn bɔ̀ srɔ Krisì zìwú, ô nɛ̀n ci bɔ̀ ɛmrɛ̀n; zɛtɛn ɔwrɔnwrɔn kɛ lɛ cɔ́ eci léyi dú nɛ tɛn, n'ɛwúvà ankrankran mán angbàngbàn ẅɛn mɛ̀n, n'ɛnu ɛnhi wúvà lɔ mɛ̀n nɔn.

Kpàkpà timote 4:14

Ɛnhɛ́n mɛ̀n cice léyi Ɔwɔ tán mɛ́n nɔn, e bɩ́ di nɛ̀n zàngɔnhán, ecice léyi yɛ tán mɛ́n ɛnvra léyi Ɔwɔ-mùan-wú-ankà-dɔ́-bɔ̀ dɔ́ ankà, kɩ ɛcüìcüì-bɔ̀ di mɛ́n ankɔrɛ̀ ɛwú nɔn.

Kpàkpà timote 5:24

Anwrɔn janbɔ̀ gbàn, yɛ kán kpetee yakɛ ye ci yɔ ɛmrɛ̀n; tɛ́n anwrɔn nyantɛn hɔ̀n yri tɛn, ɛnvra kɛ vacì yakɛ yɔ kɔnbru.

1 Piɛrɛ̀n 4:10

Ke ji le ɔwrɔnwrɔn ke bɩ́ nɛ́n nyran hɔ̀n kruhú, ɛkɔrɛ̀-wá-ci léyi nɛ̀n cɔ́ Ɔwɔ yri nɔn nɛ̀n hán yɔ anvrɛn. Ɔmu lɔ de nyɛ lɛ srɔ Ɔwɔ kɔrɛ̀-wá-ci bobrebe hɔ̀n léyi nyɛ́n cɔ̀ nɔn, n'eci-hán-bɔ̀ ankrankràn.

1 Piɛrɛ̀n 4:5

Tɛ́n yɔ ẅɛn eci krɛ̀ y'eci-hán mɛ̀n Ɔwɔ zìwú, nɛ́n léyi nɛ̀n krɔn kpehɛ́n, ne ci ɔkɔrɛ-bɔ̀ mán owú-bɔ̀ ɛmrɛ̀n nɔn.

Ɔwɔ-mɛ̀n-yrikàn 20:12

Zɛtɛn, mɛ̀n kán owú-bɔ̀, ɛcüìcüì hɔ̀n mán ɛẅi hɔ̀n, tɔhú nyɔn ɛgbú-tòbù zìwúɛ. Ye vuru ɛwrú hɔ̀n ɔmùan. Owrú nyantɛn tɔ̀n mán ye vuru ɔmùan, ɔkɔrɛ wrú lɔ. Ye ci owú-bɔ̀ ɛmrɛ̀n eci léyi yɔ hán nɔn wú, hán ɔmu le ye merɛ́n ɛwrú hɔ̀n lɔ mɛ̀n nɔn.