Galasi anmàn-bɔ̀ 1:4 - Ɛmɛẅi ankà ankrànkràn 2003

⁴ Krisì dùku bɩ́ n'edomɛ̀n tán, ô bɔ̀ cɔ́ ɛgbàn-bɩ̀-ce, ô nɛ̀n ẅɛn bɔ̀ ɛnhibù wú ci gbàngbàn kɔrɛ̀srɔn wú nɛ̀n sɔhɔ́, hán ɔmu le dú bɔ́ Zi Ɔwɔ kɔrɛ̀zì-ci nɔn.

Galasi anmàn-bɔ̀ 1:4 Iomraidhean Croise

Matie 13:22

Ndɔ hɔ̀n kɛ cɔ́ ɛci-ẅì lɔ ɔwi-tɛ̀ granmɛ̀n: yɔ yá ankà-dɔ̀ lɔ, tɛ́n ɛnhibù wú ankà-tro mán n'ɛfrɛ́n nɛ̀ncüì-dì kɛ kɛ́n ankà-dɔ̀ lɔ ɛndɔ̀nwrɔ̀n hɛ́n, kɩ nɛ́n sɩ́ shi ɛnẅì zriɛmɛ́n.

Matie 20:28

ɔmu lɔ de ɔwrɔnẅì Ẅì mán kè sɩ̀ và, ô kɛ̀ ẅɛ̀n eci-bɩtan-bɔ̀, tɛ́n nɛ́n và, ô nɛ̀n srɔ eci-bɩtan-wrɔn, nɛ̀n bɩ́ n'ɛwúvà nɛ̀n wá *anhɔ́ba, ô nɛ̀n srú anwrɔn bobrebe nɛ̀n ze.”

Matie 26:28

ɔmuhi ndɔ lɔ dú m'ɛnkrɛ̀, ɛnkrɛ̀ léyi ke di Ɔwɔ mìrɛ̀n lɔ dalɛfuɛ, hɩ cüe anwrɔn bobrebe gbàn-wɔɛ̀n-dì kruhú nɔn.

Matie 26:42

Zhezü vru sɔnba ɔhɔnán anhyrɛmɛ̀n kɩ kɛ sɛ́n Ɔwɔ kɛ dɔ̀ le: “Dade, ke dú kɛ grashɛ̀n ndɔ lɔ ke sɩ̀ cɔhɔ́ mɛ̀n ezìwú, kɩ ke ji le mɛ̀n mi nɛ̀n tɛ̀ hô, ke ji le eci léyi ɛ cüɛ̀n nɔn kɛ̀ hán!”

Matie 6:9

Nyàn ɔmu le ke ji le nyɛ́n sɛ̀n nɔn: ‘Bo Zi léyi dú anhobɩ́ nɔn, ke ji le v'ebɩ́ lɔ kè dú prɔnprɔn,

Markɛ̀n 10:45

Ɔmuhi ɔwrɔnẅì Ẅì dùku mán, ke sɩ̀ và ô nɛ̀n ẅɛ̀n eci-bɩtan-bɔ̀, tɛ́n nɛ́n và ô nɛ̀n srɔ eci-bɩtan-wrɔn, ô nɛ̀n bɩ́ n'ɛwúvà lɔ nɛ̀n wá anhɔ̀ba ô nɛ̀n srú anwrɔn bobrebe ɛgbàn mɛ̀n nɛ̀n sɔhɔ́.”

Lükɛ̀n 22:19

Zɛtɛn nɛ̀n bɩ́ abùtùkumɛ́n, nɛ̀n tán Ɔwɔ ɔkùɛn, nɛ̀n voyan abùtùkumɛ́n lɔ nɛ̀n tán yɔ, kɩ nɛ dɔ̀ le: “Ndɔ lɔ dú m'eduwrú léyi yɛ tán nyɛ̀n. Nyɛ́n hán ndɔ lɔ m'ankà-tro mɛ̀n.”

Lükɛ̀n 22:42

nɛ dɔ̀ le: “Dade, ke dú kɛ ɛ cüɛ̀n hô, ɛ̀ hán ɛgbàn-kàn glashɛ̀n ndɔ lɔ kɛ̀ cɔhɔ́ mɛ̀n ezìwú. Ɛnvra lɔ fɛn ke bɩ́ dú eci léyi mɛ cüɛ̀n nɔn de kɛ̀ hán nɔn, tɛ́n hɩ le e ji nɔn.” [

Zhan 10:11

Mɛ̀n dú annɔ̀n-kua-wrɔn ankrankran. Annɔ̀n-kua-wrɔn ankrankran lɔ, ne wú nɛ́n kɔ̀kɔ̀sɛ̀ hɔ̀n kruhú.

Zhan 12:31

Zɛtɛ̀ lɔ ɛnvra ndɔ lɔ mɛ̀n, de ye le ci ɛnhibù ɛmrɛ̀n nɔn; zɛtɛ̀ lɔ de yɛ lɛ wrɔ́ ɛnhibù ndɔ lɔ n'ɛnnɛncüì lɔ nɔn.

Zhan 5:30

“Mɛ́n sɩ̀ hán eci zriɛmɛ́n rɔ́ m'ɛkɔrɛ̀levriemɛ̀n. Me ci ɛmrɛ̀n ankà léyi Ɔwɔ kɛ dɔ́ mɛ̀n nɔn yi wú kɩ m'ɛmrɛ̀ncì lɔ nyrɔn, ɔmuhi mɛ́n sɩ́ hán eci léyi me ji nɔn, tɛ́n, mɛ hán eci léyi ɔwrɔn léyi wá mɛ̀n ɔkɔ̀hɔ̀n, ke ji nɔn.

Zhan 6:38

ɔmuhi mɛ̀n dú anhobɩ́ mɛ́n kàkɛ, ô mɛ̀n hán ɔwrɔn léyi wá mɛ̀n ɔkɔhɔ̀n mɛ́n và nɔn, n'ɛkɔrɛzì-ci, tɛ́n kè sɩ̀ dù mɛ tɛn léyi me ji nɔn.

Rɔmɛ̀n-anmàn-bɔ̀ 1:7

Nyɛ́n léyi nyɛ́n dú Rɔmɛ̀n anmàn nɔn, me merɛ́n nyɛ̀n owrú, nyɛ lɛ fɛn léyi Ɔwɔ kɛ cüɛn nyɛ̀n hɩ bi nyɛ̀n, ô nyɛ́n dú ɛwúvà-kɔrɛ̀ mɛ̀n n'ɛkruhú nɔn. Ke ji le Ɔwɔ bo Zi, mán Ɛẅɛnwrɔn Zhezü Krisì kɛ̀ tán nyɛ̀n nboafɔ̀n mán anwɔwɔ.

Rɔmɛ̀n-anmàn-bɔ̀ 12:2

Ɛnhibù wú dùci hɔ̀n lɔ ke bɩ́ dú ny'eci-hán-ci, tɛ́n nyɛ́n teze Ɔwɔ kɛ crɔn nyɛ̀n, ô kɛ̀ tán nyɛ̀n ɛnkruemɛ̀n-wɛ̀n wrù. Zɛtɛn nyɛ lɛ cɔ̀ nyɛ́n nyri eci léyi Ɔwɔ ke ji nɔn: eci léyi zrɔ, eci léyi dú n'ɛvɛ̀-cüɛn-ci mán eci léyi fì nɔn.

Rɔmɛ̀n-anmàn-bɔ̀ 4:25

Ɔwɔ dí nɛ̀n owúemɛ̀n bɔ́ ɛgbàn hɔ̀n lɔ kruhú kɩ nɛ̀n vru nɛ̀n sɩ́ yi ɔkɔrɛ-bɔ̀ mɛ̀n, ô nɛ̀n srɔ bɔ̀ ɛnyrɔnnan-bɔ̀ n'ezìwú.

Rɔmɛ̀n-anmàn-bɔ̀ 8:27

Kɩ Ɔwɔ léyi kɛ kán ɛnbɔrɛ hɔ̀n lɔ mɛ̀n nɔn, ke nyri eci léyi Ɛnhɛ́n Prɔnprɔn ke ji kɛ̀ sán, ɔmuhi Ɛnhɛ́n Prɔnprɔn kɛ sɛ́n tán ankaẅì-bùtan-ẅɛn-bɔ̀ hán ɔmu le Ɔwɔ kɛ cüɛ̀n nɔn.

Rɔmɛ̀n-anmàn-bɔ̀ 8:3

Ɔwɔ hán eci léyi Mohizì nyànmàn kè sɩ̀ hàn rɔ̀a nɔn sá nmù, ɔmuhi ɔwrɔnẅì jɛ̀ ke sɩ̀ tán nɛ̀n ɛkɔrɛ̀srɔn: ɛgbàn léyi nɛ lɛ mrɛ́n nɛ̀n sɔhɔ́ nɔn, nɛ̀n bó ɔwrɔnẅì nwù n'edùwrú-ẅia lɔ mɛ̀n, kɩ nɛ̀n hán nɛ́n dùku n'ɛnẅì vá dú ɔwrɔnẅì wúvà gbànkàn lɔ mɛ̀n.

Rɔmɛ̀n-anmàn-bɔ̀ 8:32

Ɔwɔ kè sɩ̀ ẅɛ̀n n'ɛnẅì kɛ̀ sɔhɔ́, tɛ́n nɛ̀n bɩ́ yi nɛ̀n tán ye wrì, bɔ́ lɛ fɛn bɔ́ ɛkruhú: anhɔntan kɛ́ nɛ́n sɩ̀ tán bɔ̀ eci lɔ fɛn mán n'ɛnẅì mɛhiɛ?

1 Korɛntɛ̀n anmàn-bɔ̀ 15:3

Eci lɔ fɛn hán mɛ̀n, mɛ̀n tán nyɛ̀n ankà-yé ndɔ léyi mɛ́n mumù mɛ́n cɔ̀ nɔn: Krisì wú bɔ́ ɛgbàn kruhú hán ɔmu le Ɛwrú Prɔnprɔn hɔ̀n ndɔ̀ nɔn;

2 Korɛntɛ̀n anmàn-bɔ̀ 4:4

Yɔ sɩ̀ ẅɛ̀n ankaẅì-bùtan ɔmuhi Anwa-wrɔn léyi dú ɛnhibù ndɔ lɔ wɔ, boyɛ y'ɛnkruemɛ̀n-ẅɛn lɔ anvɛ̀. Ɔwɔ ndɔ lɔ ke sɩ́ tán yɔ ɛkɔrɛ̀levri yɔ cɔ́ ɛyri-kàn léyi Ɛmɛẅi ankà Ankrankran kɛ tán Krisì ci-zrɔ lɔ mɛ̀n, Krisì léyi dú Ɔwɔ mumù picɛ̀ nɔn.

Galasi anmàn-bɔ̀ 2:20

hán tán kɩ kè sɩ̀ vru dù mɛ̀n de mɛ̀n dù ɛwúvà mɛ̀n, tɛ́n Krisì de dú mɛ̀n ɛmɛ̀n nɔn. Ɔmuhi m'ɔwrɔnẅì wúvà léyi mɛ̀n dú ɛmɛ̀n zɛtɛ̀ lɔ nɔn, mɛ̀n dú nɛ̀n ɛmɛ̀n, Ɔwɔ Ẅì léyi cüɛn mɛ̀n kɩ tán mɛ̀n n'ɛwúvà nɔn, n'ankaẅì-bùtan-ẅɛn mɛ̀n.

Galasi anmàn-bɔ̀ 6:14

Mɛ tɛn tɛ́n, m'ɔmùan-gbù ke le dú bɔ́ Ɛẅɛnwrɔn Zhezü Krisì gbàn-hán-tɛ̀ wú kɩ; annanwɔrɛ mɛ̀n lɔ, n'ɛkɔrɛ̀levriemɛ̀n de ɛnhibù wú m'ɛkruhú kɩ mɛ̀n wú ɛnhibù kruhú.

Efɛzɛ̀n anmàn-bɔ̀ 1:11

Bɔ́ mán Krisì mɛhi b'ɔbɔ̀sɔ̀ lɔ mɛ̀n, bɔ̀ cɔ́ b'ɔmùan-wá-ci lɔ, ɔmuhi Ɔwɔ gɔ́ mrɛ́n bɔ̀ nbɩ̀, n'ankɔ́nda ankà lɔ mɛ̀n; kɩ Ɔwɔ kɛ hán eci lɔ fɛn hán ɔmu le nɛ wá tán kɩ ne ji nɔn.

Efɛzɛ̀n anmàn-bɔ̀ 2:2

Nyɛ hán ɛnu ɛnhi wúvà ci; nyɛ wá ɛnhɛ́n cüìcüì léyi ẅɛn ɛwú ɛkɔrɛ̀-srɔn, ɛnhɛ́n ndɔ léyi zɛtɛ̀ lɔ dú anwrɔn hɔ̀n léyi kɛ kɛ́n Ɔwɔ ezì nɔn edomɛ̀n.

Efɛzɛ̀n anmàn-bɔ̀ 5:16

Eci lɔ fɛn mɛ̀n lɔ, nyɛ́n hán eci anvrɛnvrɛn, ɔmuhi ɛnbì hɔ̀n léyi bɔ̀ dú ɛmɛ̀n nɔn krɛfɔn.

Efɛzɛ̀n anmàn-bɔ̀ 5:2

Ke ji le ny'ɛwúvà ci-hán lɔ kè dú ny'ɛcüɛ̀n ci-hán, kɛ̀ cá Krisì léyi cüɛ́n bɔ̀, kɩ tán bɔ̀ n'ɛwúvà, ndù hán ecice tɔ̀n mán ɛcɛ̀nbì-ci léyi Ɔwɔ kɛ cüɛ́n n'ɛndɔ̀ nɔn.

Efɛzɛ̀n anmàn-bɔ̀ 6:12

Ɔmuhi bɔ́ mán anwrɔnẅì mɛhi bɔ̀ sɩ̀ ẅɛ̀n anhà-kɔ̀n, tɛ́n bɔ́ mán ɛkɔrɛ̀-srɔn hɛ́n gbàngbàn hɔ̀n léyi dú anhobɩ́ anmàn nɔn, ɛkɔrɛ̀levri-bɔ̀ mán anwrɔn-ẅɛn-bɔ̀ léyi dú ɛnhibù yɔwɔ ndɔ lɔ wú nɔn de yɔ mɛhi bɔ̀ ẅɛn anhàkɔ̀n nɔn.

Filipɛ̀n anmàn-bɔ̀ 4:20

Eci-zrɔ kè dú bɔ́ Zi Ɔwɔ tɛn ɛnvra lɔ fɛn. Kè dú ɔmu lɔ.

1 Tesalonikɛ̀n anmàn-bɔ̀ 1:3

Annanwɔrɛ mɛ̀n lɔ, bɔ́ kro-sɩ́ bɔ́ edomɛ̀n Ɔwɔ bɔ́ Zi zìwú ny'ankaẅì-bùtan léyi ẅɛn vɔ̀nshɛ́, nyɛ cüɛ̀n léyi ẅɛn edùyì mán ny'esɛ́ annanwɔrɛ léyi nyɛ́n ẅɛn bɔ́ Ɛẅɛnwrɔn Zhezü Krisì wú nɔn.

1 Tesalonikɛ̀n anmàn-bɔ̀ 3:11

Ke ji le Ɔwɔ dùku, bɔ Zi, mán bɔ́ Ɛẅɛnwrɔn Zhezü kè srú bɔ̀ ɛnlevri léyi kɛ hɔ́n ny'anmàn nɔn esù!

1 Tesalonikɛ̀n anmàn-bɔ̀ 3:13

Nɛ̀n tán ny'ɛnbɔrɛ hɔ̀n lɔ ecüì, ô nyɛ́n srɔ prɔnprɔn, ô Ɔwɔ bɔ́ Zi zìwú lɔ, bɔ̀ fì, ɛnvra léyi bɔ́ Ɛẅɛnwrɔn Zhezü kɛ lɛ và, nɛ́n mán anwrɔnẅì lɔ fɛn léyi dú nɛ tɛn nɔn. Kè dú ɔmu lɔ.

2 Tesalonikɛ̀n anmàn-bɔ̀ 2:16

Bɔ́ Ɛẅɛnwrɔn Zhezü Krisì dùku mán Ɔwɔ bo Zi léyi cüɛn bɔ̀ hɩ tán bɔ̀ nɛ́n nboafɔ̀n lɔ mɛ̀n, edùsɔ tɔ̀n léyi kè sɩ̀ ẅɛ̀n ɛnkrutrɔ mán esɛ́ ankrankran nɔn,

Kpàkpà timote 2:6

léyi srɔ n'edomɛ̀n anwɔba-ci, ô nɛ̀n srú bɔ́ lɛ fɛn nɛ̀n die. Ɔmu lɔ de ɛnvra léyi yɛ wá nɔn, nɛ̀n yé tán le, Ɔwɔ ke ji le anwrɔnẅì lɔ fɛn kɛ̀ cɔ́ ebɩdie nɔn.

Titɛ̀n 2:14

Nɛ̀n bɩ́ n'edomɛ̀n nɛ́n dí bɔ́ ɛgbàn-ẅɔ̀ɛn, ô nɛ̀n srɔ bɔ̀ fɛcüè fifi tɔ̀n léyi ke le dú nɛ́n zri nɛ tɛn, ô kɛ̀ ẅɛn edùyì ɛci-ankrànkràn-hán mɛ̀n.

Ebre-bɔ̀ 2:5

Annanwɔrɛ mɛ̀n lɔ, kè sɩ̀ dù Ɔwɔ kùyüre-bɔ̀ tamɛ̀n de Ɔwɔ kɛ̀ wà ɛnhibù wrù léyi kɛ lɛ và, hɩ bɔ́ dɔ́ n'ankà nɔn.

Ebre-bɔ̀ 9:14

Ke dú ɔmu lɔ de ndù nɔn hô, andɛ̀n ɛ̀bɛ́ de Krisì krɛ̀ lɔ kɛ lɛ ẅɛn vɔnshɛ́! Ɛnhɛ́n léyi kè sɩ̀ ẅɛ̀n ɔtrɔ nɔn, n'ecüiemɛ̀n de nɛ̀n bɩ́ nɛ́n dùku n'edomɛ̀n nɛ̀n ce Ɔwɔ, dú nmù sà cice. N'ɛnkrɛ̀ ke le fi bɔ́ wàwúyɛ lɔ n'ɛci-hán gbàngbàn hɔ̀n lɔ mɛ̀n, ô Ɔwɔ kɔrɛkɔrɛ lɔ, bɔ́ dú n'eci-bɩ̀tan-bɔ̀.

Zhakɛ̀n 4:4

Anmùan-anhyrɛ̀-bɔ̀ léyi de dú nyɛ̀n nɔn! Nyɛ́n sɩ̀ nyrì ɔmu le, e dú ɛnhibù nɛ́n nyran hô, è dú Ɔwɔ gbri-wrɔn hàn? Ɔwrɔn léyi ke ji ke dú ɛnhibù nɛ́n nyran nɔn, nɛ srɔ Ɔwɔ gbri-wrɔn.

1 Piɛrɛ̀n 2:24

Nɛ́n dùku n'edùwru ẅia lɔ mɛ̀n, nɛ̀n bɩ́ bɔ́ ɛgbàn hɔ̀n lɔ ɛgbàn-hán-tɛ̀ wú, ô bɔ̀ wú ɛgbàn mɛ̀n, ô bɔ̀ cɔ́ ɛnyrɔnnan wúvà. N'ecifɔn hɔ̀n lɔ mɛ̀n de nyɛ́n cɔ́ ɔkɔrɛ̀ nɔn.

1 Piɛrɛ̀n 3:18

Annanwɔrɛ mɛ̀n lɔ Krisì dùku mán kán ɛgbàn ɛdɛ̀n zri brɛzri anwrɔnẅì gbàn kruhú; nɛ̀n sɩ̀ hán eci zriɛmɛ́n, kɩ nɛ̀n wú ɛgbàn-hán-bɔ̀ kruhú, ô nɛ̀n bɩ́ nyɛ̀n nɛ̀n hɔ́n sɩ́ Ɔwɔ. Ye di nɛ̀n owúemɛ̀n n'edùwrú ẅia mɛ̀n, tɛ́n ye sɩ́ nɛ̀n ɛwúvà-kɔrɛ mɛ̀n Ɛnhɛ́n Prɔnprɔn cüiemɛ̀n.

1 Zhan 2:2

Ɔmuhi Zhezü Krisì bɩ́ n'edomɛ̀n ce eci, kè dú bɔ́ ɛgbàn wɔ̀ɛndì, kɩ kè sɩ̀ dù bɔ́ ɛgbàn zri kɩ, tɛ́n anwrɔn hɔ̀n léyi dú ɛnhibù mumù lɔ fɛn wú nɔn yɔ mán y'ɛgbàn kruhú.

1 Zhan 3:16

Nyàn ɔmu le bo nyri eci léyi dú ɛcüɛ̀n nɔn: Zhezü Krisì tán n'ɛwuvà bɔ́ kruhú. Zɛtɛn, bɔ́ mán ke ji le bɔ̀ tán bɔ́ ɛwuvà, bɔ́ muan-ẅì hɔ̀n kruhú.

Ɔwɔ-mɛ̀n-yrikàn 1:5

kè dú Zhezü Krisì léyi dú ɔmùan-zri dì dalɛfuɛ-wrɔn, ezì-hɛ́ ẅì, kpàpkà-wrɔn léyi ye bɩ́ owú-bɔ̀ mɛ̀n ye sɩ́ ɔkɔrɛ-bɔ̀ mɛ̀n nɔn, mán ɛnhibù wú nɛ̀ncüì hɔ̀n nɛ̀ncüì, yri kɛ̀ và cɔ́ nyɛ̀n. Krisì kɛ cüɛn bɔ̀, kɩ n'eci ce mɛ̀n lɔ, nɛ̀n mrɛ́n bɔ̀ ɛgbàn mɛ̀n nɛ̀n sɔhɔ́,

Ɔwɔ-mɛ̀n-yrikàn 5:9

Yɔ krɛ́ ɛcɔ̀ wrù tɔ̀n: “Ɛ̀krɔn kpehɛ́n e le bɩ́ owrú lɔ, kɩ ɛ lɛ bɔyɛ n'ɛci-tɔn-ci hɔ̀n lɔ. Ɔmuhi ye dí mɛ́n owuemɛ̀n, kɩ v'ɛgbànkàn cice lɔ mɛ̀n, è bɩ́ ɛmɛ̀n mɛ̀ntɛ mɛ̀ntɛ bɔ̀, fɛcüè mɛ̀ntɛ mɛ̀ntɛ bɔ̀ mán ɛnhi wú anmàn mɛ̀ntɛ mɛntɛ bɔ̀, ɛ và sɩ́ Ɔwɔ.

Ɔwɔ-mɛ̀n-yrikàn 7:9

Eci ndɔ lɔ n'ɛmɛẅi lɔ, mɛ̀n vru mɛ̀n nyan kɩ mɛ̀n kán anwrɔn fɛcüè vri léyi ɔwrɔn zriɛmɛ́n ke sɩ̀ krɛ̀ rɔ́ nɔn. Yɔ dú ɛnhi wú anmàn lɔ fɛn, ɔkpɔsɔ lɔ fɛn, fɛcüè lɔ fɛn mán ɛnbrɛ̀ lɔ fɛn bɔ̀. Yɔ nyɔn ɛgbú-tòbù mán Ɔwɔ Kɔ̀kɔ̀sɛ̀-ẅì zìwú, yɔ cɔ́ ɛceci she wosù kɩ ɛnnangbànkɔrɛ̀ dú yɔ ɛmàn mɛ̀n.