ཕི་ལི་པི་ལེའུ་ 3:15 - རྫོང་ཁ་

¹⁵ ཁྱེད་དད་པ་ནང་སྒྲིང་སྒྲིང་ཡོད་མི་ཚུ་གིས་ཡང་ དེ་སྦེ་བརྩོན་ཤུགས་སྦོམ་བསྐྱེད་དགོ་ ཁྱེད་ལ་ལུ་ཅིག་གིས་ དེ་སྦེ་འབད་ནི་མནོ་བསམ་མེད་པ་ཅིན་ འདི་ཡང་དཀོན་མཆོག་གིས་ ཁྱེད་ལུ་གསལ་ཏོག་ཏོ་སྦེ་སྟོན་གནང་འོང་།

ཕི་ལི་པི་ལེའུ་ 3:15 Iomraidhean Croise

མེ་ཐིའུ་ལེའུ་ 5:48

དེ་འབདཝ་ལས་བརྟེན་ཏེ་ ཡར་ཞིང་ཁམས་ལུ་བཞུགས་མི་ ཁྱེད་ཀྱི་ཡབ་སྐྱོན་ག་ནི་ཡང་མེད་པར་ཀྲིག་ཀྲི་སྦེ་བཞུགས་ཡོདཔ་བཟུམ་སྦེ་ ཁྱེད་ཆ་ཁྱབ་ཡང་སྐྱོན་ག་ནི་ཡང་མེད་པར་ཀྲིག་ཀྲི་སྦེ་སྡོད་ཟེར་ཡེ་ཤུ་གིས་གསུངས་ནུག།

ལུ་ཀ་ལེའུ་ 11:13

ཁྱེད་མི་ངན་པ་ཨིན་ཏེ་འབད་རུང་ རང་གི་བུ་དང་བུམོ་ཚུ་ལུ་ གསོལ་རས་ལེགས་ཤོམ་བྱིན་ཤེས་པ་ཅིན་ ཞིང་ཁམས་ལུ་བཞུགས་ཡོད་མི་ཡབ་ཀྱིས་ མི་ངན་པ་ཚུ་ལས་ཡང་ལྷགཔ་སྦེ་ ཁོ་ལས་ཞུ་མི་ལུ་ དམ་པའི་ཐུགས་ཉིད་དེ་ མ་གནང་བར་མི་བཞག་ཟེར་གསུངས་ནུག།

ཡོ་ཧ་ནཱན་ལེའུ་ 6:45

དཀོན་མཆོག་གིས་མི་ག་ར་ལུ་ ཆོས་སྟོན་གནང་འོང་ཟེར་ ལུང་བསྟན་པའི་དེབ་ནང་བྲིས་དོཝ་བཟུམ་སྦེ་ ཡབ་ལས་ཉན་ཏེ་ལྷབ་མི་འདི་ཚུ་ག་ར་ ང་སྡོད་སར་འོང་ནི་ཨིན།

ཡོ་ཧ་ནཱན་ལེའུ་ 7:17

ག་ར་འབད་རུང་ བཏང་གནང་མི་གི་ཐུགས་དགོངས་ སྒྲུབ་ནི་འཚོལ་མི་འདི་གིས་ ང་གིས་བཤད་མི་ཆོས་འདི་ དཀོན་མཆོག་ལས་ཨིན་ན་ ང་རང་ལས་ཨིན་ན་ ཧ་གོ་འོང་།

རོམ་མི་ལེའུ་ 15:1

དད་པ་སྒྲིང་སྒྲིང་ཡོད་མི་ ག་གིས་རང་འབད་རུང་ རང་རྐྱངམ་གཅིག་གི་དོན་ལུ་མནོ་བསམ་མ་བཏང་ དེ་འབདཝ་ད་ དད་པ་སྒྲིང་སྒྲིང་མེད་མི་དེ་ཚུ་ལུ་ ང་བཅས་ཀྱིས་སུ་ཐག་རིངམོ་སྦེ་སྡོད་དགོ།

ཀོ་རཱིན་ཐི་དང་པ་ལེའུ་ 14:20

སྤུན་ཆ་ཚུ་ ཨ་ལོ་བཟུམ་སྦེ་མནོ་བསམ་གཏང་ནི་དེ་བཞག་ ངན་པ་གི་སྐོར་ལས་འབད་བ་ཅིན་ ཨ་ལོ་ཆུང་ཀུ་ ངན་པ་རྩ་ལས་མ་ཤེསཔ་བཟུམ་སྦེ་སྡོད་ དེ་འབདཝ་ད་ མནོ་བསམ་གཏང་ཐངས་དེ་འབད་བ་ཅིན་ མི་ལོ་ན་ཁུག་ཁུགཔ་བཟུམ་སྦེ་སྡོད་དགོ།

ཀོ་རཱིན་ཐི་དང་པ་ལེའུ་ 2:6

ཨིན་རུང་ དད་པ་ནང་སྒྲིང་སྒྲིང་ཡོད་མི་ཆ་ཁྱབ་ཀྱི་སྦུག་ལུ་ ང་བཅས་ཤེས་རབ་ཀྱི་ཆོས་བཤདཔ་ཨིན་ དེ་འཛམ་བུ་གླིང་གི་ཤེས་རབ་བཟུམ་སྦེ་མེན་ དེ་བཟུམ་གྱི་ཤེས་རབ་དེ་ འཛམ་བུ་གླིང་དང་འཛམ་བུ་གླིང་གི་དབང་དཔོན་ཚུ་བཟུམ་སྦེ་ མགྱོགས་པ་རང་ཡལ་འགྱོ་ནི་ཨིན།

ག་ལ་ཏི་ལེའུ་ 5:10

དེ་འབདཝ་ད་ ཁྱེད་ང་དང་གཅིག་ཁར་སེམས་མཐུན་ཏེ་སྡོད་འོང་ཟེར་ ང་བློ་གཏད་དེ་སྡོད་ཅི་ ག་ཅི་སྨོ་ཟེར་བ་ཅིན་ ང་བཅས་ག་ར་དཀོན་མཆོག་ནང་དད་པ་གཅིག་ཨིན་ ད་ཁྱེད་ལུ་ཨ་ནི་ཚུན་ཚོད་སེམས་དཀྲུགས་ཏེ་ མགུ་འཐོམ་བཅུག་མི་དེ་ལུ་ དཀོན་མཆོག་གི་ཉེས་ཆད་ཕོག་འོང་།

ཨི་ཕི་སིཔ་ལེའུ་ 1:17

ངེ་གི་སྨོན་ལམ་ནང་ ང་བཅས་རའི་གཙོ་བོ་ཡེ་ཤུ་ཁིརཱིས་ཀྱི་དཀོན་མཆོག་གི་ གཟི་བརྗིད་དང་ལྡན་པའི་ཡབ་ ངོ་ཤེས་ཚུགས་པའི་དོན་ལུ་ ཁྱེད་ཆ་ཁྱབ་ལུ་ཤེས་རབ་དང་ཤེསཔ་མཐོངམ་གི་རིག་པ་གནང་ཟེར་ཞུཝ་ཨིན།

ཀོ་ལོ་སི་ལེའུ་ 1:28

དེ་གིས་འབད་ ང་བཅས་ཀྱིས་མི་ག་ར་ལུ་ ཁིརཱིས་ཁོ་རང་བཟུམ་སྦེ་རང་ ལྷག་ཆད་ག་ནི་ཡང་མེད་པར་ ག་ར་ཚངམ་སྦེ་སྟོན་ཚུགས་པའི་དོན་ལུ་ མི་རེ་རེ་ལུ་ཤེས་རབ་ཀྱི་ཐོག་ལས་སྦེ་ ཆོས་སྟོན་ནི་དང་ཉེན་བརྡ་འབད་དེ་ ཁོ་གི་སྐོར་ལས་ཁྱབ་བསྒྲགས་འབདཝ་ཨིན།

ཀོ་ལོ་སི་ལེའུ་ 4:12

ཁྱེད་ཀྱི་གྲལ་ལས་ཨིན་མི་ ཁིརཱིས་ཡེ་ཤུ་གི་ཞབས་ཕྱིཔ་ ཨེ་པ་ཕརཱས་ཀྱིས་ ཁྱེད་ལུ་སྐུ་གཟུགས་བཟང་པོ་ཟེར་སླབ་བཏང་དེས་ ཁྱེད་ཆ་ཁྱབ་དད་པ་ནང་ན་ཁུག་སྟེ་ དཀོན་མཆོག་གི་ཐུགས་དགོངས་ ཐད་རི་བ་རི་ཤེས་ནི་གི་དོན་ལུ་ ཁོ་གིས་ཁྱེད་ཀྱི་དོན་ལུ་ རྟག་བུ་རང་དཀའཝ་སྤྱད་དེ་ སྨོན་ལམ་ཞུཝ་ཨིན།

ཐེ་ས་ལོ་ནི་ཀ་དང་པ་ལེའུ་ 4:9

ད་ང་བཅས་ཀྱིས་ཁྱེད་དདཔ་ཅན་སྤུན་ཆ་ཚུ་ལུ་ གཅིག་གིས་གཅིག་ལུ་ བྱམས་པ་ག་དེ་སྦེ་འབད་དགོ་ག་ཟེར་ ད་རུང་འབྲི་མི་དགོ་ ག་ཅི་སྨོ་ཟེར་བ་ཅིན་ དཀོན་མཆོག་གིས་ཁྱེད་ལུ་ འདི་གི་སྐོར་ལས་སྟོན་གནང་ཚར་ཡི།

ཏི་མོ་ཐི་གཉིས་པ་ལེའུ་ 3:17

རྒྱུ་མཚན་དེ་ལས་བརྟེན་ཏེ་ དཀོན་མཆོག་གི་ཕྱག་ཞུ་མི་དེ་ ལཱ་བཟང་པོ་རེ་རེ་བཞིན་གྱི་སྦྱོང་བརྡར་ ཡོངས་སུ་རྫོགསཔ་སྦེ་ཐོབ་སྟེ་ཡོད་མི་གཅིག་ཨིན།།

ཧིབ་རུ་ལེའུ་ 5:14

དེ་འབདཝ་ད་ བཞེས་སྒོ་དེ་ མི་ལོ་ན་ཁུག་མི་ཚུ་གི་དོན་ལུ་ཨིན་ ཁོང་ ལེགསཔ་དང་ཟོགཔོ་གི་དབྱེ་བ་ཕྱེ་ནིའི་སྦྱོང་བརྡར་དེ་གི་ཐོག་ལས་སྦེ་ ཨ་རྟག་རང་ རིག་པ་གསལ་ཏོག་ཏོ་སྦེ་ཐོབ་མི་ཚུ་ཨིན།།

ཡོ་ཧ་ནཱན་དང་པ་ལེའུ་ 2:5

དེ་འབདཝ་ད་ ག་ར་འབད་རུང་ ཁོ་གི་བཀའ་ལུ་ཉན་མི་ མི་འདི་གི་ནང་ན་ དཀོན་མཆོག་གི་བྱམས་པ་དེ་ དོན་ལས་རང་ཡོངས་སུ་རྫོགསཔ་སྦེ་བཞུགས་འོང་ རྒྱུ་མཚན་དེ་ལས་བརྟེན་ཏེ་ ང་བཅས་ཁོ་གི་ནང་ན་གནས་ཏེ་ཡོད་ཟེར་ ང་བཅས་ཀྱིས་ཤེས་ཚུགསཔ།