San Mateo 7:16 - Dibshon Mengi-kan Ni Pansigshan

¹⁶ Sajay ira, say pengamta‐an jo no to‐to‐ẃen para padto ira, asas jo nin i shaka dagdag‐a. Say kay‐eshigan ni pengamta‐an jo ni itsora sha, inges to sota mola. Aliẃen shi sebit i ka‐epitan ni kowan sha ey obas, ono sota kowan sha ey higos. Eg ondames i mola ni dames ni sakey ya kalasi ngon mola.

San Mateo 7:16 Iomraidhean Croise

San Mateo 12:33

“Ngaran ni kowan jo ey naykaitan ko so nen Satanas? Na‐alas i joka ikowan ey maptengak nem sina‐shom jet kowan jo mowan ey ngaawak. Topog jon ikowan ey mapteng no mapteng; eg jo bedbediwan; jet no kowan jo ey ngaaw, topog jon ngaaw ngo ni olay. Arig toy mola: no mapteng nga mola, mapteng ngo ni olay i dames to, jet no ngaaw wa mola, ngaaw ngo ni olay i dames to. Say ka‐amta‐an ni itsora ni mola, no mapteng ono ngaaw ket, sota dames to.

San Mateo 7:20

Sajay iray kay‐eshigan ni too. Ma‐amta‐an i itsora ni too no bidbiren i shaka dagdag‐a.

I-Galasia 5:22

Nem sota toon kaishalan ni Ispirito Santo nen Apo Shiyos, iyay iray ma‐sas son si‐kato: semek, imdeng, talna, anos, pengaasi, mapteng nga nemnem, tan emepiyal pay;

Santiago 2:18

Baka et ey ẃara son si‐kayoy kowan to ey angken eg man‐i‐inges i totoo, ta mebedin na sota sakey, ẃa‐ẃa‐shay pamati to, ey sota sakey, ẃa‐ẃa‐shay mapteng nga toka dagdag‐a. Jet siya, nan‐inges ira ja kekosto‐i kono nen Apo Shiyos. Nem say kowan ko, toway amta‐anan ko so ey ẃaray pamatim no enshiy takshol ton mapteng nga aramid? Eg mebedin. Nem mebedin mangon ma‐amta‐an i pamati ni too shi mapteng nga aramid to.

Santiago 3:12

A‐akik shi pamati, arig to mowan ima kadasan ja kowan sha ey higos: eg ondames ni dames ni olibas. Tan sota kowan sha ey obas, eg ondames ni dames ni higos. Eg mebedin mowan ja onbo‐day i mapteng nga shanom shima temtem ja panbo‐dayi ni asin.