San Mateo 5:12 - Dibshon Mengi-kan Ni Pansigshan

¹² Pan‐imdeng kayo no sajay i mepesamak son si‐kayo, ta ebadeg i naytalo shi dangit ja kon‐oren jo ali. May‐inges kayo nodta ira para padto nen Apo Shiyos nonta bayag da, ja pinedigat ngo ni too nontan da, jet may‐inges kayo nodta kon‐oren sha.

San Mateo 5:12 Iomraidhean Croise

San Mateo 16:27

Epateg, ta no sakey alin timpo, emin sota aramid ni too, si‐kak met laeng i onsobadit son si‐kara. Agpayson si‐kak sota kowan nonta para padto nonta bayag da ey Anak ni Too, jet sota idaw ko ali mowan, say kasesaad ko, inges ko met laeng i kasesaad nen Apo Shiyos. Jet may‐odop ali sota anghil ko son si‐kak.

San Mateo 6:16

“Jet, no ibiyang jo nin ja eg mengan pangkep ni pamatiyo, eg mesepol la pa‐amtayo shi eshom ma too, ja inges toy kepesing ira nonta toon mengipa‐sas ni mapteng nga aramid sha say eg amta‐an ni karakdan ey ngaaw gayam i nemnem sha. Emedew shi dopara ey si‐kara, inbiyang sha nin i pangan sha maypangkep ni pamatira. Nem podno iya ikowan ko son si‐kayo. Sota ira toon sajay i itsora ni aramid sha, enshiy isobadit nen Apo Shiyos son si‐kara, ta singa ineẃat sha lay konkona sha nonta in‐etek ira ni totoo.

San Lucas 13:34

Jet si Jesus, idi ninemnem toy kakedsel ni tood Jerusalem, dinekna toy toka pengisekit son si‐kara, jet kowan to ey, “Si‐kayon tood Jerusalem! Manshoki nonta bayag da ingkato niman, joka bono‐a ni olay ja kespigan ni bato iray inbetkag nen Apo Shiyos son si‐kayo, pati sota ira para padto. Ara, piga mangoy pesing ko son si‐kayo! Eminshakel la piyan kon i‐okong takejon i‐Jerusalem ja inges to sota kepengi‐okong ni manok ira ni kipkip to. Nem en‐asneng kayo!

San Lucas 6:23

Pan‐imdeng kayo no sajay i mepesamak son si‐kayo, ta ebadeg i naytalo shi dangit ja kon‐oren jo ali. May‐inges kayo nodta ira para padto nen Apo Shiyos nonta bayag da, ja pinedigat ngo ni too nontan da.

San Lucas 6:35

No ẃaray kowan to ey memodod son si‐kayo, pabodori jo ira, angken eg to i‐oli. Semek joy makakontra son si‐kayo, tan mapteng koma mangoy pesing jo son si‐kara. Ta no satan i pesing jo, joka pan‐ipa‐sas ey annak shakejo nen Apo Shiyos ja Kangeto‐an. Ebadeg i kon‐oren jon isobadit nen Apo Shiyos tep si Apo Shiyos, mapteng i toka pesing ni emin na too, angken sota eg man‐iyaman son si‐kato tan sota makedsel.

Inpaspasing 16:25

Nem idi shanshanin kawa ni dabi, emansheẃat si Pablo nen Silas son Apo Shiyos, tan ireka mankankansiyon pay ni shayaw sha son Apo Shiyos. Jet intenengan nonta eshom ma balod iyay.

Inpaspasing 5:41

Jet sota ira apostol, indekjas sha ira sota esa‐nop pa toray ja ireka eman‐imdeng nga pasiya tep si Jesus i kabol ni ebebaingan sha. Ninemnem sha ey sajay i ka‐asan to ey kinosto‐an ira nen Apo Shiyos.

I-Roma 5:3

Jet aliẃen sotan bengat, no diket kitoka pay eman‐imdeng nonta digat niman ja tayoka da‐da‐kami, ta amta tayo ey no enosan tayo jay ya digat, onkedsang i nemnem tayo, say eg kito ma‐ebak no ẃara pay i onsabin digat,

1 I-Korinto 3:8

Sota engimoda tan simibog so, nan‐atang bengat ira, jet si Apo Shiyos, si‐katoy mengi‐kan ni sobadit shen showa, no ngantoy inpasing shen nan‐obda.

2 I-Korinto 4:17

Jet sajay ya ootik ka digat ja sanka‐atikan, si‐kato iya mika da‐da‐kami, nem say panpa‐no‐an to shi ka‐onoran, sota ebadeg ga sobadit ja i‐akan nen Apo Shiyos ingkatod ingka, ja enshiy to kay‐ingesan.

I-Pilipos 1:29

jet eẃatan sha ey angken sota joka pandikat, ontolong si Apo Shiyos son si‐kayo, ja eg shakayo i‐oway. Ta aliẃen sota inpamatiyo son Cristo bengat i inpalobos nen Apo Shiyos son si‐kayo, no diket inpalobos to pay ja manda‐kam kayo ngo ni digat pangkep son si‐kato.

I-Pilipos 2:17

Angken bono‐en sha‐ak, man‐imdengak pay laeng. Arig toy ogadi min Hodiyos, ja no mandeton kami ni animal son Apo Shiyos, mika iso‐jat met laeng sota shaleto nodta bakdang ton emankaileton say ma‐enay. Jet singa inges to ngo sota shalak, ja si‐kato ngoy mayso‐jat nodta daton jo. Nem sota mismon daton jo, si‐kato sota joka pandigdikat ni maypangkep ni pamatiyo. Siya, man‐imdengak et meki‐imdeng kayo ngo son si‐kak.

I-Kolosas 1:24

Jet niman, angken naka emedigdikati pangkep son si‐kayo, ebadeg i imdeng ko, tep saja naka pandikat, toloy ni inpandigat nen Cristo, pangkep nonta emati ja may‐eshig ey bakdang to.

I-Kolosas 3:24

Amtayo met ey si Apo Jesus, ẃaray isobadit ton konkona jo kabol nonta dingkayo son si‐kato, jet say i‐akan to son si‐kayo, biyag shi dangit. Si Cristoy joka pansilbi‐i,

1 I-Tisalonika 2:15

Sota apo ira niya Hodiyos, si‐karay bimono so nonta ira para padto nen Apo Shiyos nonta bayag da. Jet niman, sajay ngo iren annak sha, si‐karay bimono so nen Apo Jesus et si‐kara pay i emaligat son si‐kami. Nem eg kosto nen Apo Shiyos iya shaka dagdag‐a. Eg sha pay nemnemen i pansigshan ni kait shen too shiya dobong,

Hodiyos 10:34

Ta kinaasi‐an jo met sota ira naybalod ja kait jo. Jet idi pinidiw sha sota kokowayo, intolok jo, ja eg kayo nandaringit, ta amtayo ey ẃara aliy kokowayon mapmapteng, ja eg ma‐omas, ja ẃara ni olay ingkatod ingka, ja emansessesked son si‐kayo.

Hodiyos 11:26

Jet nanda‐kam ni digat ja naykait so nonta ira kait ton too nen Apo Shiyos, ja inges toy tayoka panda‐kam ni digat niman pangkep son Cristo. Nem inbilang to ey epatpateg sota toka pandigdigat ey say sota emin na kameng shi Egypt, ta say ẃared nemnem to ni olay, sota maypangkep ni konkona to ja i‐akan ali nen Apo Shiyos shi ma‐onod ja timpo.

Hodiyos 11:33

Emin ira jay, emati ira son Apo Shiyos, isonga sajay i dingdingka ni eshom son si‐kara: ekigobat ira shi apil la ili jet engabak ira; intod‐an sha sota ira toon intorayan sha ja mandeka ni koskosto, jet ineẃat sha sota inkari nen Apo Shiyos son si‐kara; angken sota bongot ni lion ja kowan to ey mengedat son si‐kara, binaalan shen inpanngiyem sha;

Hodiyos 11:6

Angken ngantoy dag‐en ni too, aliẃen sotan i mengi‐kan ni pan‐imdengan nen Apo Shiyos, no sotan na too ket eg memati son si‐kato. Ta sota mapiyan ja on‐esop so nen Apo Shiyos, mesepol la pati‐en to ey si Apo Shiyos, ẃara ngo eshan, tan mesepol pay ya pati‐en to ey no sheẃaten toy kaasi nen Apo Shiyos, mekaasi‐an.

Santiago 1:2

Si‐kayon a‐akik shi pamati, no ẃaray onsabi son si‐kayon digat — angken nganton digat — karejo nemnemnemen ey ngaaw sotan na simabi son si‐kayo, no diket nemnem jo ey sotan na digat ta simabi ket panmaptengan jo.

Santiago 5:10

Si‐kayon a‐akik shi pamati, nemnem jo kari iyay. Sota ira para padto nonta bayag da ja engikowan ni esel nen Apo Shiyos, intoled shen inenosan i emin na digat ta mimotok son si‐kara. Isonga si‐kara koma ngoy onoran jo ja mengitoded tan mengenos ni digat.

1 San Pedro 4:13

Say nemnemen jo et mango, pan‐imdeng kayo no da‐kaman joy digat, ta singa ekilikat kayo shi digat ta dina‐kaman nen Cristo nontan da. Et pan‐imdeng kayo, ta shi ma‐onod alin timpo, ja asen jon mismo i panakabalin ni idaw to ali, mas ebadbadeg pay ali i pan‐imdeng jo.