San Mateo 26:53 - Dibshon Mengi-kan Ni Pansigshan

⁵³ Say kowan mo emo, eg mebedin na mengshawak so nen Amak ni tolong? Say agpayso, no mengshawak son si‐kato, mengibetkag alin shagos ni dinibon anghil.

San Mateo 26:53 Iomraidhean Croise

San Mateo 4:11

Idi naksheng nga pineshas nen Satanas si Jesus ja istay piyan ton panbesol, indekjas to ma. Jet sota anghil, dimaw ira di son Jesus ja sha in‐aknan ni kompormin kasapolan to.

San Lucas 8:30

Si Jesus, inbag‐an to, ja kowan to ey, “Sipay ngaran mo?” Kowan nonta too ey, “Say ngaran ko, si Dinibo.” Tep dinibo i dimonyon pimeket son si‐kato.

San Judas 1:14

Si Inok ja maykapiton apo nen Adan ja pilmiron too nonta bayag da, ẃaray inpadto to jet sajay iren too i kaytoshongan to. Kowan nonta padto to ey, “Asas jo, ondaw ali si Apo Shiyos jet odopen to aliy dinibon anghil to.

2 I-Tisalonika 1:7

Jet si‐kayon nandigat, si Apo Shiyos aliy mengi‐kan ni pannam‐ayan jo, kasta met son si‐kami. Sajay i pesing to ni imotok mowan ali nen Apo Jesus ja medepod dangit. Odopen to ali sota anghil to et ma‐on‐an na mismo sota ebadeg ga panakabalin to tan ẃara pay i apoy ya emanshedang.

San Mateo 25:31

Kowan to pay ey, “Sota timpon idaw mowan ali nonta kowan ni para padto ey Anak ni Too, ondaw ali ja inges tos Apo Shiyos. Emin sota anghil, may‐odop ali son si‐kato, jet isaad toy pantoshay to ja enshiy to kay‐ingesan.

San Marcos 5:9

Jet si Jesus, inbag‐an to, ja kowan to ey, “Sipay ngaran mo?” Kowan nonta too ey, “Say ngaran ko, si Dinibo, tep eshakel kamin pasiya.”

San Marcos 5:15

Jet simbires Jesus, tan sota toon istay pingketan ni dinibon dimonyo, ja mimapteng may nemnem to. Timongaw ja nanbaro ma. Jet timakot iren emin.

San Juan 10:18

Angken sipen too, enshiy kabaalan ton onbono son si‐kak no ekak itolok i bakdang ko, ta si‐kak met laeng i maka‐amta ni biyag ko, no piyan kon metey ono enshi. Mebedin na itolok ko iya biyag ko ja metey, jet mebedin met laeng nga odi‐en ko ja manbiyag mowan, ta si‐katoy inbilin nen Amak son si‐kak.”

San Juan 18:36

Si Jesus, simongbat ja kowan to ey, “Say pantoshayan ko, aliẃen shiya dobong, ta no shiya dobong, sota ira took, istay mekibekal koma ira; eg sha itolok ja may‐eẃatak so nonta ira Hodiyos. Nem aliẃen shiyay i pantoshayan ko.”