San Lucas 8:44 - Dibshon Mengi-kan Ni Pansigshan

⁴⁴ Ekisikil la imonod son Jesus et pinishat toy kajaran ni baro nen Jesus. Jet nay‐inshas ngon simalsheng sota ebayag ga toka pansheda.

San Lucas 8:44 Iomraidhean Croise

San Mateo 20:34

Jet si Jesus, toka ira kaasi‐i, isonga pinishat to i matesha. Jet mimapteng iren shagos ja nan‐asas. Jet nay‐eshom ira ma son Jesus.

San Mateo 8:3

Jet si Jesus, inojad toy takday to et pinishat to sotan na too. Jet kowan nen Jesus son si‐kato ey, “Siya piyan kon onmapteng ka.” Jet nontan met laeng, mimapteng nga shagos sota bakdang to.

San Mateo 9:20

Eshakel i toon imonod son Jesus et ẃara ngoy sakey ya biin naydaok ja nanshala ni sampolo tan showen tawen. Ekisikil la imonod son Jesus et pinishat toy kajaran ni baro nen Jesus.

San Marcos 6:56

Angken toway daẃan nen Jesus nontan — shi siyodad, shi baryo, ono shi angken nganton kawad‐an ni too — ẃaren kenshat i emaysespa ja totoon emansekit, jet kinshaw sha ni olay son si‐kato ey no mebedin, angken sota kajaran ni baro to i pishaten sha say onmapteng ira. Jet emin sota ira emirat son si‐kato, mimapteng ira.

San Lucas 13:13

Inkepap toy takday to so nonta bii et nay‐inshas ngon mimapteng i bakdang to, jet imekẃas ma. Jet ebadeg i iyaman nonta bii son Apo Shiyos.

San Lucas 7:38

En nantalimokod shi kad‐an nen Jesus ja nannanginangis. Sota sayeto, dimbeng toy sedi nen Jesus et sota bowek to, si‐katoy inponas to nodta sedi nen Jesus, tan inongo‐an to pay sota sedi to, asan toka iro‐jag sota dana nodta sedi to.

San Lucas 8:43

Nodta eshakel la toon imonod son Jesus, ẃara ngoy sakey ya biin naydaok ja nanshala ni sampolo tan showen tawen. Kinastos ton emin i kokowa to shi doktor, nem enshiy makabaal ja engagas niyay ya sakit to.

San Lucas 8:45

Si Jesus, kowan to ey, “Sipay emirat son si‐kak?” Nem emin ira sota too, kowan sha ey, “Aliẃen si‐kak.” Jet si Pedro, kowan to ey, “Apo, eshakel met ita toon shakaka pantikshona?”

San Juan 5:13

Nem sajay ya toon mimapteng, eg to amta sotan na toon inpamapteng son si‐kato, ta si Jesus, indekjas ton shagos, ta eshakel la pasiya sota too nodta kilig ni nabneng.

Inpaspasing 19:12

Jet sota ira totoo, indaw shay towaljara, ono panjora, ja sha inpirat shi bakdang nen Pablo, jet sotan i inpamapteng so nonta ira emanpansekit, tan mimapteng ngo sota ira toon pingketan ni dimonyo.

Inpaspasing 5:15

Jet sota ira emanpansekit, in‐ilaw sha ali ira nodta kalsara ja imonong ira nodta shinokolan sha, jet kowan sha ey no ondabas alis Pedro, balang nem dabsan ni adirong to ira, say ma‐kal i sakit sha.