San Lucas 8:13 - Dibshon Mengi-kan Ni Pansigshan

¹³ Jet sota nayponta‐an ni botil la kabato‐an, si‐katoy kay‐eshigan nonta ira toon mengitneng ni esel nen Apo Shiyos. No itenengan sha, ẃara shagos i imdeng shen mengeẃat, nem eg may‐a‐det shi nemnem sha. Memati ni sanka‐atikan, nem ibi‐jag shen shagos no onmotok i shaka kedigdikati.

San Lucas 8:13 Iomraidhean Croise

San Marcos 6:20

tep si Ari Hirodis, entakot to si Juan et toka ibaliẃi ni olay. Amta nen Hirodis ey si Juan, eshiyosan na too ja in‐apil nen Apo Shiyos ja mansilbi son si‐kato. Idi itenengan nen Hirodis i pan‐ikowan nen Juan, emandikat i nemnem to, nem piyan to met laeng karin mengitneng ni kowan to.

San Lucas 8:12

Sota nayponta‐an ni botil ja shalan, si‐katoy kay‐eshigan nonta ira toon engitneng ni esel nen Apo Shiyos, nem ondaw ali si Satanas ja to dingdingen sota esel ja intenengan sha, say eg sha pati‐en, tan say eg ira maysedakan.

San Lucas 8:14

Sota nayponta‐an ni botil ja similja ni sebit, si‐katoy kay‐eshigan nonta ira toon mengitneng ni esel nen Apo Shiyos, nem say shaka nemnemnema, sota pesing shen manbiyag, sota pandadsakan sha, tan sota ekanas sa biyag ni baknang. Jet anongosto ma ey ma‐abak. Isonga enshiy ka‐asan ma ni shaka pemati.

San Juan 15:2

Jet no sotan na mola ket ẃaray pangeto ja eg ondames, a‐kalen to sotan na panga. Nem sota panga ja mandemes, shedosan to, say mas ondames pay.

San Juan 15:6

Isonga sota eg on‐onong ja memati son si‐kak, may‐ibong ja singa inges to sota panga ja epotol nodta makapanga so. Jet sotan na panga, mekkit; jet olnongen shen maypool shi apoy.

San Juan 5:35

Si Juan, may‐eshig ey si‐kato sota singa silew wa maredang, ta si‐katoy ondawag so ni nemnem ni too, jet kayoka man‐imdeng ja mengeẃat son si‐kato; nem sanka‐atikan bengat.

1 I-Korinto 13:2

Jet angken bilang ey edaingak ja mengitosho nonta inpa‐amta nen Apo Shiyos tan amtak pay ya emin sota eg amta ni eshom maypangkep son Apo Shiyos, tan angken amtak pay ya emin sota ashal ni emin na too, tan ebadeg ga pasiya i pamatik, ja sotan i kabol la posi‐an ko son pa‐tan so ni shontog, no enshiy semek ko so ni kait ko, enshi met laeng i silbik ka too.

1 I-Korinto 15:2

jet sotan i kaysedakan jo, no eg jo ibi‐jag. Nem amtak ey eg jo ibi‐jag no agpayson pinatiyo.

I-Galasia 3:1

A, nganto et ngoy inpasing jon tood ta Galasia aya? Eg kayo gayam maka‐aw‐awat! Ngantoy? Wara gayam i engawis son si‐kayo shi apil la pamati, ket inpaleẃag mi met son si‐kayo i inkaydansa nen Jesucristo shi koros!

I-Galasia 3:4

Sata eshakel la ninamtan jo manipod nonta emati kayo son Cristo, enshi aya i silbi to ma son si‐kayo? Sapay koma ta ẃara.

I-Ipiso 3:17

say si Cristoy nemnemen jo koma ni olay, ni joka pemati son si‐kato. Say shawat ko pay son Apo Shiyos, maynadnad kayo shi pamati ja singa ondamot i semek jo,

I-Kolosas 1:23

Nem mesepol la itoloy joy pamatiyo, karejo ibi‐jag; mesepol la edagshay pamatiyo. Jet mesepol pay ya eg jo itolok ka maysi‐jan nodta esel nen Apo Shiyos ja naytoro son si‐kayo, ta sajay i kawad‐an ni namnama jo. Jet sajay ya esel nen Apo Shiyos, naykowan da shi emin na sakop ni dobong, jet si‐kak i sakey ja kaontolong ja mengikowan so.

I-Kolosas 2:7

Kostoy naytoro son si‐kayo, isonga dagsha‐iyo i pamatiyo son Cristo, ja ondeshek son si‐kato ja singa damot, jet no ondeshek, memasig ja onba‐deg sotan na pamatiyo et man‐iyaman kayo ni olay son Apo Shiyos.

1 I-Tisalonika 3:5

Sajay i kabol la inbetkagan ko la son Timoteo son si‐kayo, say amta‐en ko no ngarantoy itsora jo, no makedsang pay laeng i pamatiyo ono enshi. Ta ekak maynemneman, naka manshanag ey baka et ey si Satanas, inadilaw tokejo; nakol ni enshi et day en panbenagan ni obda mi son si‐kayo.

1 Timoteo 1:19

Jet say singa almas mo, sota makedsang nga pamatim tan sota mapteng nga nemnem mo. Nemnemnem mo ira jay ni olay, ta ẃaray eshom ma toon eg ira nannemnem ni mapteng, nakol ni epilshiy pamatira.

Hodiyos 10:39

Nem si‐katejo, aliẃen inges tayo ira sota toon timengdaw ja say panpa‐no‐an sha, mepokaw ira. No si‐katejo, inges tayo ira sota ememati; jet eg kito di meshosa.

Santiago 2:26

Sota bakdang nga enshiy jasjas to, etey, ja enshiy silbi to. Kasta met i pamatin enshiy takshol ton mapteng nga aramid, enshi ngoy silbi to.

2 San Pedro 2:20

Mapteng i kasesaad ni toon emati so nen Jesucristo ja Apo tayon engisedakan son si‐katejo, no ibi‐jag to sota ensekig ga aramid ja kedagdag‐a ni tood ja dobong. Nem no itolok to shorog i bakdang ton maydowam nodta sigod ja aramid to, ja enshi may kedsang ton memediw nontan na ogadi to, mema‐ma may kasesaad to ey say nonta pilmiro.

2 San Pedro 2:22

Isonga agpayso sota kowan nonta arig ey, “Sota aso, to inodin kinan met laeng sota in‐ota to. Tan sota keshel ja na‐mes, nay‐oli met laeng nga en nanpitdaw shi pitek.” Sajay i kaytoshongan nonta ira toon istay edinisan nonta aramid ton ensekig nem nay‐oli met laeng mowan na sotan i toka dagdag‐a.

1 San Juan 2:19

Sajay iren too, istay ya singa nay‐eshom ira son si‐katejon emati son Cristo, nem enshi gayam. Isonga tinaynan shakito, ja eg sha ma intoloy ja mekikadẃa son si‐katejo. No agpayson naykait ira son si‐katejo, ka‐onong koma ira niman. Nem indekjas shakito, jet sajay i ka‐amta‐an ton pasiya ey emin ira, apil ira, aliẃa karin kait tayod pamati.

San Judas 1:12

Sajay iren sinan a‐aki tayo shi pamati, no mekilikob ira son si‐kayo ni joka pengan ja penginemneman jo so nen Cristo, may‐eshig ira ey dogit ira ja naydaok nodtan na joka pankena. Ta no may‐a‐shom ira ja mekipengan son si‐kayo, say shaka kamkamkami bengat, sota kepsel sha, tan enshi pay i bebaing sha. Sajay iren too, may‐eshig ira nodta kolpot ja kaitektekjab ni shagem ja enshiy to inegshi‐an ja oran. May‐eshig pay ey singa iren sota molen eg ondames, angken na timpo komen pandemes to. Singa pay iren sota molen ekabot ja ekigebot ta emin ali sota damot to, jet oltimon patey to ma, ja eg onbengis mowan.