San Lucas 6:42 - Dibshon Mengi-kan Ni Pansigshan

⁴² Na‐alas ja mo ikowan so ni kait mo ey a‐kalen mo sota naybosi shi mateto, ey si‐kam ket ebadeg i naypadkal shi matam ma shorog. Ngaaw ita moka pesing ja moka idibak i ngaaw wa nemnem mo! Ekal mo nin sota mismon naypadkal shi matam say kosto may pan‐esas mo, et say asen mo men pasiya sota a‐kalen mon naybosi shi mata ni kait mo.

San Lucas 6:42 Iomraidhean Croise

San Mateo 26:75

Jet idi intenengan nen Pedro, ninemnem to ma sota inkowan nen Jesus ey, “Isaot mowak ni memintedo, ja kowan mo ey eg mowak am‐amta, jet no meksheng, ẃara ngoy ontekok ja kawitan.” Jet si Pedro, dimaw shima powisha ja epaladoy nangis to tep naydaw‐an.

San Mateo 7:3

Apay nga sota ootik ka naybosi shi mata ni kait mo i moka iningning, ey si‐kam ma mismo ket eg mo nemnemen ey ebadeg i naypadkal shi matam?

San Mateo 7:4

Na‐alas ja mo ikowan so ni kait mo ey a‐kalen mo sota naybosi shi mateto, ey si‐kam ket ebadeg i naypadkal shi matam ma shorog.

San Lucas 13:15

Nem si Jesus, simongbat ja kowan to ey, “Si‐kayon ma‐o‐owap! Aliẃen emin kayo ket joka ibolos i nowang jo ono kabajoyo no akew ni ngilin, say en man‐inom?

San Lucas 22:32

Mebedin na ma‐adilaw ka Simon, ni sanka‐atikan, nem inshawat ko son Apo Shiyos ey eg mekolpin onkapoy i pamatim. Jet no may‐odi mowan i pamatim son si‐kak, si‐kam ngoy pekedsang so ni kait mo.”

San Lucas 6:41

In‐arigan to pay ira ja kowan to ey, “Apay nga sota ootik ka naybosi shi mata ni kait mo i moka iningning, ey si‐kam ma mismo ket eg mo nemnemen ey ebadeg i naypadkal shi matam?

San Lucas 6:43

“Sota molen ngaaw, eg ondames ni mapteng, nem say mapteng nga mola, mapteng ngoy dames to. Jet sota ngaaw wa mola, ngaaw ngoy dames to.

Inpaspasing 13:10

Jet kowan nen Pablo son si‐kato ey, “Si‐kam, anak toka nen Satanas! Si‐kam i makakontra ni emin na mapteng nga banag ja panmaptengan ni too! Wara son si‐kam ma emin i itsora ni pengi‐owap, tan ngaaw wa aramid. Isalsheng moy moka pemediktad ni podno ja maypangkep son Apo!

Inpaspasing 2:38

Si Pedro, simongbat ja kowan to ey, “Panbebawi kayo et emin kayo, panpabonjag kayo ja si Jesucristo i toshongen jon pati‐en ni olay, say mepekawanan i basol jo. Jet eẃaten jo sota Ispirito Santo nen Apo Shiyos ja i‐akan to.

Inpaspasing 8:21

Enshiy mo kaybiyangan, ono bingay mo, shi pamati mi, ta sota ẃared nemnem mo, aliẃen sota piyan nen Apo Shiyos.

I-Roma 2:1

Say inkowan ko la, sajay. Sota toon ẃaray basol to, anam ton meshosa. No sota mengitneng niyay ket kowan to ey epalado noman i basol ni eshom, ja eg to ida‐kam i bakdang to, enshi met laeng i to idason son Apo Shiyos, ta singa bakdang to met laeng i toka panshoyshoya nontan na kowan to ey basol ni eshom. Ta iso met laeng ja nan‐inges i aramid shen ngaaw. Jet amta tayo ey sota showen toon nan‐inges i basol sha, nan‐inges met laeng nga shosa‐en nen Apo Shiyos iren showa, angken ngantoy katoora.

2 I-Korinto 5:18

Jet emin iyay, si Apo Shiyos i dimaga so, ta si‐kato met laeng i engawat son si‐katejo pangkep nonta inkatey nen Cristo, jet in‐esop shakito met laeng son si‐kato say dag‐en tayo may piyan to. Jet say piyan to ngon dag‐en min apostol, itod‐an miy eshom ma totoo say may‐a‐sop ngo ira son si‐kato.

2 Timoteo 2:21

Sajay i kay‐eshigan ni si‐katen emati. Isonga sota toon ngaaw to ma jen manbesol, si‐kato sota may‐eshig ey pingkan na epateg so nonta makakokowa so. Anam ton sota makapingkan na mismoy mengosal so, ta esagana ja ma‐osal shi emin na mapteng nga pangkep.

2 San Pedro 1:9

No bilang ey ẃaray toon kowan to ey emati, nem sajay den eshiyosan na ogadi ket enshi son si‐kato, sotan na too ket malibag, eg maka‐awat ni maypangkep ni pamati, ta eg to nemnemen sota mapteng nga dingka nen Apo Shiyos son si‐kato ni inpamakaẃan to ni basol to.