San Lucas 6:13 - Dibshon Mengi-kan Ni Pansigshan

¹³ Idi na‐akew, sina‐nop to ali ira sota too to et pinispis toy sampolo tan showa son si‐kara. Jet inngadnan to ira ja sampolo tan showa ni apostol to.

San Lucas 6:13 Iomraidhean Croise

San Mateo 10:2

Say ngaran ira nonta apostol ton sampolo tan showa, sajay. Say epateg son si‐karen emin, si Simon ja say sakey ya ngaran to, si Pedro. Say eshom, si Andres ja agi nen Pedro, tan si Santiago nen Juan ja san‐agin anak nen Sibidi,

San Mateo 19:28

Jet si Jesus, kowan to son si‐kara ey, “Podno iya ikowan ko son si‐kayo. No sota badon dobong ali ket sota kowan sha ey Anak ni Too, ipakat toy kina‐Shiyos ton mantoshay, jet si‐kayon took ja nay‐ol‐olop son si‐kak, mekitoshay kayo. Si‐kayoy mengigsheng ni panbenagan ni emin na Hodiyos ja poli nonta sampolo tan showa ja annak nen Israel.

San Mateo 9:36

Idi inon‐an nen Jesus ira sota eshakel la too, naysemekan, ta say inpangidmang to son si‐kara, singa na‐na‐josan ira ja enshi malay namnama shen pansigshan. Singa sota kalniron ebaybay‐an i kasesaad sha, ja enshiy emengajowan son si‐kara.

San Marcos 6:30

Sota ira apostol nen Jesus ja inbetkag to, imoli ira di et esa‐nop ira son si‐kato. Jet insodsod sha son si‐katon emin sota dingdingkara tan intoro sha nodta dinawdaẃan sha.

San Marcos 6:7

Sina‐nop ma nen Jesus ira sota shinotokan ton sawal ni showen apostol to et inkowan to ey ondaw iren sansheshedẃa shi eshom ma dogad. Jet kowan to son si‐kara ey, “Ipiyal ko son si‐kayo ey angken sama ira dimonyo ja pimeket shi totoo, mebedin na pebtik jo.”

San Lucas 11:49

Nay‐eshom kayo nodta aramid da nonta ap‐apo jo, isonga agpayso noman sota kowan nen Apo Shiyos ey, ‘Mengibetkagak da ngo son si‐kara ni totoon para padto tan sota eshom ma totoo ja mengikowan ni esel ko. Nem bono‐en sha sota ira eshom, tan pedigaten shay eshom.’ Sajay i inkowan nen Apo Shiyos tep amta to ey tima‐nil kayo ja en‐oges joy toka ibetkag ali son si‐kayo.

San Lucas 22:30

Mekiladsak kayo son si‐kak ni pantoshay ko, tan ontongaw kayo pay ja mengigsheng ni panbenagan ni emin na Hodiyos ja poli nonta sampolo tan showa ja annak nen Israel.” Kowan nen Jesus.

San Lucas 6:14

Sajay iray ngaran sha: si Simon ja inngadnan ton Pedro, tan si agin Pedro ja si Andres; tan say kait sha pay ja apostol, si Santiago, Juan, Felipe, Bartolome,

San Juan 4:33

Jet sota ira too to, nanbibinaga ira ja kowan sha ey, “Sigosho ẃaray engi‐kan ali ni kinan to?”

Inpaspasing 1:13

Idi mimotok ira shi Jerusalem, dimaw ira nodta naykayang nga kowadto ni baley ya shaka pan‐iyani. Jet iyay i ngarangaran ira nonta apostol nen Jesus: si Pedro, Juan, Santiago, Andres, Felipe, Tomas, Bartolomeo, Mateo, sota sakey ya si Santiago ja anak nen Alpio, si Simon ja bitirano, tan si Judas ja anak ni apil mowan na Santiago.

I-Ipiso 2:20

Si‐katejon too nen Apo Shiyos, may‐eshig kitod baley ya naypilmid na‐det ta bato. Say arig nonta na‐det ta bato ja naypilmi‐an tayo, sota intoro ira nonta apostol, tan para padto. Si Cristo Jesus i singa enapaja nonta baton naysaashan tayo, jet emin son si‐katejon emati son Apo Jesus, singa nanmomongsan kitejo ngo son si‐kato. Jet no anongosto ma, singa manbedin ni Timplo nen Apo Shiyos.

I-Ipiso 4:11

Jet sotan na in‐akan ton kaasi, ekalkalasi; isonga ekalkalasi ngoy dag‐en tayo. Jet ẃara iray apostol, ẃara iray para padto, ẃara iray mengikowan met laeng ni maypangkep son si‐kato, tan ẃara iray emantosho tan emengiredan ni emati.

Hodiyos 3:1

Isonga si‐kayon a‐akik shi pamati ja pinidi ngo met laeng nen Apo Shiyos ja too to, si Jesus i mesepol la nemnemen tayo. Si‐katoy inbetkag ali nen Apo Shiyos jet may‐eshig ey si‐katoy kangeto‐an na pari ni pamati tayo.

2 San Pedro 3:2

Karejo dibdibkan sota inkowan ni para padto nen Apo Shiyos nonta bayag da tan sota inbilin nen Apo Jesus son si‐kamin apostol to ja mi itoro. Si Apo Jesus i engisedakan son si‐katejo.

Inpa-Amta Nen Jesucristo 12:1

Jet ẃaray kaskasshaaw wa sinjas sa inon‐an kod ma naykayang. Waray bii ja say baro to, singa sekit ja emenenili et sota sedi to, singa inkatin to sota bolan, jet nodta toktok to, ẃaray nandiktob ja sampolo tan showen talaw ja singa korona to.

Inpa-Amta Nen Jesucristo 18:20

“Nem si‐kayon tood dangit, pan‐imdeng kayo ni inkapool to! Si‐kayon too nen Apo Shiyos, pati si‐kayon apostol tan para padto nen Apo Shiyos, pan‐imdeng kayo ta sota inpaspasing to son si‐kayo, inbales nen Apo Shiyos ja shinosa to ngo!”

Inpa-Amta Nen Jesucristo 21:14

Jet sotan na siyodad, ẃaray sampolo tan showen tokod to et naysolat nodtan na tokod iray ngaran nonta sampolo tan showen apostol nonta Kalniro.