San Lucas 24:47 - Dibshon Mengi-kan Ni Pansigshan47-48 Tan say inpadtora pay, kowan sha ey maytosho shi emin na ka‐ili‐ilin sakop niya dobong ey mesepol la manbebawi komay totoo ni basol sha say pekawanan ira nen Apo Shiyos. Inpadtora pay ey say mengitosho, si‐kayon mengi‐edagey son si‐kak, jet ishogi jo konod Jerusalem. Si‐kayoy ondaga so niyay tep mismon inon‐an jo iya epasemak son si‐kak niman na timpo. Faic an caibideil |
Jet si Jesus, idi ninemnem toy kakedsel ni tood Jerusalem, dinekna toy toka pengisekit son si‐kara, jet kowan to ey, “Si‐kayon tood Jerusalem! Manshoki nonta bayag da ingkato niman, joka bono‐a ni olay ja kespigan ni bato iray inbetkag nen Apo Shiyos son si‐kayo, pati sota ira para padto. Ara, piga mangoy pesing ko son si‐kayo! Eminshakel la piyan kon i‐okong takejon i‐Jerusalem ja inges to sota kepengi‐okong ni manok ira ni kipkip to. Nem en‐asneng kayo!
Jet idi intenengan sha iyay, imeket ira ma sota totoon istay bimalaw so ni inpasing nen Pedro, jet say inpasing sha ma, nan‐iyaman ira son Apo Shiyos, ja kowan sha ey, “No kasta, si Apo Shiyos, kinaasi‐an toy toon aliẃen Hodiyos et intolok ton manbebawi ira, say may‐aknan ngo ira ni biyag ja enshiy to engintegan.”
Nem si Pablo nen Bernabe, mas timoled ira ja man‐a‐sel, jet kowan sha ey, “Mesepol la si‐kayon Hodiyos nin i kaykowanan ni esel nen Apo Shiyos, nem niman ta binedaw jo, ja endedamsis jo sota biyag ja enshiy to engintegan ja eg jo koston eẃaten, ondaw kami ma shi toon aliẃen Hodiyos jet si‐kara may pengitosho‐an mi.
Ibetkag taka so ni aliẃen Hodiyos say maynemneman ira ja amta‐en sha ey ẃara ired embolinget jet say ontorong ira shi dawag, say maysi‐jan ira nodta toray nen Satanas jet si Apo Shiyos may toshongen sha. Jet no memati ira son si‐kak, mepekawanan may basol sha, tan mayda‐kam ira ja mekiteẃid so nonta ira toon pinidi nen Apo Shiyos ja too to.’ Sajay i inkowan nen Apo Jesus son si‐kak.
Say pilmiron nantoro‐an ko, shi Damasko, asan shi Jerusalem, asan ma shima intiron sakop ni Jodia, tan angken shima nay‐araẃin dogad ni aliẃen Hodiyos. Intorok son si‐kara ey manbebawi ira ni basol sha, ja si Apo Shiyos i kemangen sha ja panshedjawan, say ibi‐jag shay aramid shen ngaaw jet mandeka ma ira ni mapteng.
Jet sota plano ton inpa‐amta to niman, enshiy eshom nem eg sajay: si Cristo, ẃaren mismo son si‐kayo. Eg to nin inpa‐amta iyay ya plano to nonta bayag da, ta say piyan ton pa‐amta‐an so, sota memati son si‐kato niman, jet sajay ya plano ton epateg, enshiy to kay‐ingesan. Jet si‐kayon aliẃen Hodiyos, nayda‐kam kayo ma. Isonga niman ẃara may namnama jo ja mayda‐kam son Apo Shiyos shi dangit.