San Lucas 24:36 - Dibshon Mengi-kan Ni Pansigshan36 Idi maramen shaka pan‐isodsod i epasemak son si‐kara, ngaran ni ẃara gayam si Jesus shi nankaẃa‐an sha! Kowan to son si‐kara ey, “Talna i meẃesha son si‐kayo!” Faic an caibideil |
Si‐kak si Juan ja mismon makasolat niyay et sajay ya solat ko, si‐kak i engisodat para son si‐kayon piton gropo ja emati son Cristo shi piton siyodad shi Asiya. Say shawat ko son Apo Shiyos, sapay koma ta sota kaasi, tan talna ja edapo son si‐katon ẃara son si‐kayo, si‐katoy ma‐shoman. Si Apo Shiyos, si‐kato sota sigod ja ẃara ngo eshan, ingkato niman et si‐kato met laeng aliy ondaw shi ma‐onod ja timpo no mantepos iya dobong. Sota Ispirito Santo nen Apo Shiyos, ja eg nagshengan i kabedinan to, ja ẃara nodta sango‐an ni tinongawan to, tan si Jesucristo, sapay koma ta si‐kara met laeng i mengi‐kan ni kaasi tan talna son si‐kayo. Si Jesucristo, agpayso i toka ikowan, tan si‐kato, nanbiyag alid patey, isonga si‐katoy singa pangodowan tayon emin ja manbiyag shi patey. Si‐kato pay i mengitoshay so nonta ira emin na ari shiya dobong. Si Jesucristo, imayos i shaleto ni inkatey to shi koros pangkep nonta ebadeg ga semek to son si‐katejo et sotan i kabol la epakaẃanan ni emin na basol tayo.