San Lucas 18:12 - Dibshon Mengi-kan Ni Pansigshan

¹² Naka ngidinay meminshowa ni makadomingko ja naka ibiyang i pengan, tan emin na naka epita, naka idaton pay i ikasampolo son si‐kam.’ Kowan nonta Parisiyo ni shawat to.

San Lucas 18:12 Iomraidhean Croise

San Mateo 5:20

Mesepol la may‐enam i ogadiyo shi bilin nen Apo Shiyos, ja aliẃen inges to ira sota Parisiyo tan mamaistoro ni dinteg. No eg mandesin i pengonod jo nontan na bilin nem say si‐kara, eg mebedin na mayda‐kam kayo shi pantoshayan nen Apo Shiyos.

San Mateo 6:1

“Eg mesepol la ipa‐sas joy mapteng nga aramid jod karakdan, ja kowan jo ey say i‐etek shakejo nonta mengesas son si‐kayo. No sotan i pesing jo, enshiy jo kon‐oren ja i‐akan ali nen Apo Shiyos ja Amejo shi dangit.

San Mateo 6:16

“Jet, no ibiyang jo nin ja eg mengan pangkep ni pamatiyo, eg mesepol la pa‐amtayo shi eshom ma too, ja inges toy kepesing ira nonta toon mengipa‐sas ni mapteng nga aramid sha say eg amta‐an ni karakdan ey ngaaw gayam i nemnem sha. Emedew shi dopara ey si‐kara, inbiyang sha nin i pangan sha maypangkep ni pamatira. Nem podno iya ikowan ko son si‐kayo. Sota ira toon sajay i itsora ni aramid sha, enshiy isobadit nen Apo Shiyos son si‐kara, ta singa ineẃat sha lay konkona sha nonta in‐etek ira ni totoo.

San Mateo 6:5

“No mansheẃat kayo so nen Apo Shiyos, eg jo onoran sota kepesing ira nonta toon emengipa‐sas ni mapteng nga aramid sha say eg amta‐an ni karakdan ey ngaaw i nemnem sha. Say pipiyan sha ja pansheẃatan son Apo Shiyos, shima sa‐nopan, ono shima kalsara ja karakdan ni too say asen ira nonta eshakel la too. Nem podno iya ikowan ko son si‐kayo. Sotan iren too, enshiy isobadit nen Apo Shiyos son si‐kara, ta singa ineẃat sha lay konkona sha nonta in‐etek ni totoo ira.

San Mateo 9:14

Nontan met laeng, dimaw ali son Jesus sota too nen Juan na para bonjag, jet kowan sha ey, “Si‐kami tan sama ira Parisiyo ket kanayon na mika ibiyang i pangan mi no manngidin kami, nem apay nga sama toom ket eg sha ibiyang i pangan sha?”

San Lucas 11:42

“Kaasi kayo di, si‐kayon Parisiyo! Ta joka tongtongpala sota bilin na ootik i pateg to, nem joka et ngo mowan ibiyang sota bilin na epateg ga pasiya! Kaspangarigan, joka idaton so nen Apo Shiyos ja singa bingay to sota maykesampolo nodta emin na apit jo, angken pay sota molejo ja para seng‐ew ni sira. Nem joka diẃayi sota koston pesing shi kait jon too tan sota penmek jo son Apo Shiyos. Sajay ya joka pesing nga mengi‐kan ni singa bingay nen Apo Shiyos, mapteng; nem mesepol la eg jo diẃayan iya ẃa‐ẃa‐shen piyan nen Apo Shiyos.

San Lucas 17:10

Inges to ngo son si‐kayo. No kinsheng jon emin i kowan nen Apo Shiyos ey dag‐en jo, eg jo koma nemnemen ey ẃaray otang nen Apo Shiyos son si‐kayo, no diket say ikowan jo koma, ‘Baga‐en mokami bengat, Apo Shiyos. Saja dingka mi bengat, sota inkowan mo, enshiy eshom.’ ”

I-Roma 3:27

Jet enshi mala niman i tayo idastog, ta say kosto‐an shakito so nen Apo Shiyos, aliẃen sobadit nonta dag‐en tayon mapteng ja pengonod ni bilin to. Say kowan ko, say kekosto‐i so nen Apo Shiyos so ni too, sota pemati to son Cristo.

1 I-Korinto 1:29

Inpa‐sas to iyay say angken sipa, enshiy to idastog so nen Apo Shiyos, ja to ikowan ey ẃaray nandasinan to shi eshom.

I-Galasia 1:14

Jet no sota maypangkep ni ogadi ni si‐kamin Hodiyos, nandasinak ka pasiya nem say sota ira ka‐idaran ko ja kait ko, ta si‐kak, inpakat koy kabaalan ko ja onoren sota ogadi ira da nonta ap‐apok nonta bayag da.

I-Ipiso 2:9

Sajay i inpasing nen Apo Shiyos ta say enshiy ondastog ey say naysalakanan to, sota maypangkep ni dingka ton mapteng.

1 Timoteo 4:8

Say bakdang, mesepol to sota kowan sha ey exercise ni olay say makedsang, nem mas epatpateg pay ja i‐ashal shi bakdang tayoy eshiyosan na nemnem tan aramid, ta ebadeg i itolong to ni saja maramen biyag niman, tan shi man‐onod alin biyag shi dangit.