San Lucas 12:48 - Dibshon Mengi-kan Ni Pansigshan

⁴⁸ Nem sota baga‐en ja eg to amtay piyan nonta apo ton dag‐en to, jet ẃaray dag‐en ton panbesolan to, engka‐jas i shosa to. Iyay i nemnemen jo koma. Sota toon ẃa‐ẃa‐shay nay‐akan son si‐kato, asdeg toy namnama‐en ni apo ton obda‐en to. Tan sota toon ebadbadeg i may‐eẃat son si‐kato, ebadbadeg ngoy songbatan to.

San Lucas 12:48 Iomraidhean Croise

San Mateo 13:12

Ta sota ẃaray amta to, si‐kato pay i metod‐an, ingkatod eshakel i amta‐an to. Nem sota enshiy am‐amta to, angken sota ootik ja amta to, ma‐kal son si‐kato.

San Mateo 23:14

Kakaasi kayo di, si‐kayon mamaistoro ni dinteg tan si‐kayon Parisiyo, ta sinan maronong kayo! Manpa‐otang kayo mango ira nonta bibiin nankebalo; jet no enshiy ibayad sha, piditen jon angken sota baley sha i ibayad sha. Jet no ondaw kayod sa‐nopan, say joka pesing nga mena‐din ni kakedsel jo, joka ishokey i shawat jo son Apo Shiyos, say ikowan ni too ey maronong kayo. Jet sotan i keshosa‐an jo ni ebadeg.

San Lucas 12:41

Jet kowan nen Pedro ey, “Apo, si‐kamin toom i inkowanan mo so niyay ya arig, ono angken pay sota karakdan?”

San Lucas 12:49

“Dimawak alin mengidaw ni singa apoy shiya dobong et sapay koma ta ẃara ma niman.

San Lucas 16:2

Inpa‐odop to sota toon emengimanshal et inbag‐an to, ja kowan to ey, ‘Iyay i shamag ko pangkep son si‐kam. I‐odim alin emin sota inpiyal ko son si‐kam; a‐kalen taka med jay tep eg ka mepiyal.’ Kowan nonta baknang.

San Juan 15:22

No ekak ali dimaw ja engitosho son si‐kara, istay mebedin na ikowan sha ey enshiy basol sha, nem niman, enshiy pangbal sha ja mengikowan ey enshiy basol sha.

Inpaspasing 17:30

Si Apo Shiyos, pinedabas ton binaybay‐an sota apil la dingdingka ni too nontan, ja eg sha amtay panshedjawan sha. Nem niman, say kowan to, mesepol la emin na too ket manbebawi ira et memati ma ira son si‐kato.

1 Timoteo 1:13

Nonta pilmiro ja enshi pay laeng i pamatik son Apo Jesus, ngaaw i inkokowan ko pangkep son si‐kato, eshakel i pinedigat kon too to, tan binebaingan ko pay ira. Nem kinaasi‐an towak, ta ekak amta ey ngaaw sotan na dingdingkak.

1 Timoteo 6:20

Si‐kam Timoteo, mesepol la eg mo baybay‐an sota inpiyal nen Apo Shiyos son si‐kam, ja dag‐en mo. Kareka maybibiyang nonta enshiy silbi ton toro ni eshom, ja singa notnotnot bengat. Say itsora nontan na too, ireka mansosongbat bengat. Kowan sha ey ẃaray inpa‐amta kono nen Apo Shiyos son si‐kara, nem enshi kari.

Tito 1:3

Sajay ya inkari to, inpa‐amta to nonta inkayẃadsak ni esel to, ta nontan may koston timpo ni kaytosho to. Jet si‐kak i inpiyal ton en mengitosho nonta esel to. Sajay i inbilin nen Apo Shiyos son si‐kak, ta si‐katoy Mengisedakan.

Santiago 3:1

Si‐kayon a‐akik shi pamati, eg jo koma kamkaman ja manbedin ni sakey ngon mengitosho, ta amtayo met ey si‐kamin emengitosho, ẃa‐ẃa‐sha i namnama nen Apo Shiyos son si‐kami ey say sota ira eg mengitosho.