San Lucas 12:42 - Dibshon Mengi-kan Ni Pansigshan

⁴² Si Apo Jesus, simongbat ja kowan to ey, “Sota baga‐en ja emepiyal, ja amta toy toka dagdag‐a, si‐katoy piyalen nonta apo ton mengimanshal ni kokowa to, tan si‐katoy mepiyal la mengi‐kan ni dasjon ira nonta kait ton baga‐en no timpo to.

San Lucas 12:42 Iomraidhean Croise

San Mateo 13:52

Jet kowan pay nen Jesus son si‐kara ey, “No kasta, si‐kayon maka‐amta ni sigod ja bilin nen Apo Shiyos, no man‐ashal kayo nonta maypangkep ni pantoshayan nen Apo Shiyos, komplito may amtayo. Jet may‐eshig kayo so nonta toon ẃaray baley to ja amta ton mengosal nonta kompormin shaan tan bado ja naytalo nodtan.”

San Mateo 20:8

Idi mama‐shem mala, sota makakokowa nonta gardin, inkowan to so nonta emengimanshal nonta ira man‐obda ey, ‘Ta‐ẃal mo di ira sota nan‐obda et dagbo‐im ira, manshoki nodta na‐onod ja mimotok ingkato nodta epangdo.’

San Lucas 12:43

Jet no sotan na baga‐en ket maramen eman‐obda ey onmotok ali sota apo to, mapteng i konkona ton i‐akan nonta apo to.

San Lucas 7:13

Idi inon‐an nen Apo Jesus sota bii, naysemekan et kowan to so nonta bii ey, “Kareka onnangis.”

San Lucas 7:19

Jet tineẃal nen Juan i showa son si‐kara et inbetkag ton en mengibeka son Jesus nem si‐kato sota inkari nen Apo Shiyos nonta bayag da ey ibetkag to di ja mengisedakan, ono ẃaray apil la seskeshen sha.

Inpaspasing 20:28

“Isonga niman, si‐kayon pangolo, asas joy bakdang jo shorog, tan asas jo pay sota ira emati son Apo Jesus ja inpiyal ni Ispirito Santo son si‐kayo ja bantayan jo. Singpet joy bantay son si‐kara ta kokowa ira nen Apo Shiyos. Nemnem jo ni olay ey kowinta ey binayshan to ira ni shala nonta Anak to ja imayos shi koros.

1 Timoteo 3:15

say amtam i pesing mo so nonta ira emati son Apo Shiyos, ta si‐karay singa pamilja nen Apo Shiyos ja sibibiyag. Ta baka metaktakak da. Mesepol la amtam i pesing mon meno‐tok nonta mengipangolo so nonta emati, ta si‐katejon emati i naypiyal ja mengitosho ni podnon pamati, si‐katejo met laeng i ontiped so ni aliẃen koston toro.

1 Timoteo 5:17

Iyay mowan i ikowan ko pangkep nonta pangolo ni emati. Sota ira pangolo ja mapteng i shaka pengiredan, agdalo sota ira eman‐obden pasiya ni shaka pantosho tan shaka pengikowan ni maypangkep so nen Jesucristo, mesepol la ma‐shoman i sowilshora.

2 Timoteo 4:2

Isonga iyay i ibilin ko son si‐kam: sota esel nen Apo Shiyos, si‐katoy ishingan mon itoro, angken kompormin timpo, jet angken pay eg sha koston itenengan, pilit ta ikowan mo. No ẃaray ngaaw i shaka pesing ono shaka itoro, bilin mo say metod‐an. Bilin mo pay ira sota ẃaray nankolangan ni pamatira say onkedsang ira shi pamati. Nem sajay, mesepol la metaksholan ni kina‐anos ni moka pengitosho.

Tito 1:7

Sajay i mesepol, tep say toon mengipangolo ket si‐katoy piniyal nen Apo Shiyos ja mengi‐obda ni pansigshan ni too to. Isonga mesepol la say pidi‐en mo, sota enshiy mebedaw son si‐kato: sota aliẃen edastog, no diket na‐anos; sota aliẃen maboteng, sota aliẃen mabekal, sota aliẃen pilak i toka nemnemnema.

Hodiyos 13:17

Patiyo ira sota pangolo jo shi pamati, jet onod jo sota ikowan sha. Si‐karay may‐eshig ey emanbanbantay son si‐kayo ni panmaptengan jo shi pamati, ta si‐kara diy onsongbat son Apo Shiyos no apil i toshongen jo. Isonga aliẃa komen kayo mandeka ni pandeshingitan sha, say mapteng ngoy deknara ni shaka pansilbi. No pati‐en jo sota pangolo jo shi pamati, panmaptengan jo met laeng.

Hodiyos 13:7

Nemnem jo kari ira sota pangolo jo la, ja engikowan ni esel nen Apo Shiyos son si‐kayo. Nemnem jo sota inpaspasing sha nonta ẃara ired biyag, tan nemnem jo ngo sota inkatey sha, jet onoshiyo i itsora ni pamatira nontan da.

Hodiyos 3:5

Si Moises, dingka ton emin sota inpiyal nen Apo Shiyos son si‐katon obda, ja say inpasing to, inpa‐amta toy pangkep nonta ikowan met laeng ali nonta para padto tan sota ikowan ali nen Cristo, shi ma‐onod ja timpo.

1 San Pedro 4:10

Si Apo Shiyos, ekalkalasi i in‐akan ton kabaalan ni sakey tan sakey ja mebedin na dag‐en to, jet sajay ya in‐akan to, mesepol la osalen jon ontolong shi eshom. Ta no ẃaray nay‐akan son si‐kayo, si‐kayo ngoy maka‐amta ja mengosal shi panmaptengan ni kait jo.