San Juan 8:19 - Dibshon Mengi-kan Ni Pansigshan

¹⁹ Jet sota ira Parisiyo, kowan sha son Jesus ey, “Toway kad‐an nen amam?” Si Jesus, simongbat ja kowan to son si‐kara ey, “Si‐kayo, eg jowak amta, isonga angken si Amak, eg jo ngo amta. No amtayowak koma, istay amtayo koma ngo si Amak.”

San Juan 8:19 Iomraidhean Croise

San Mateo 11:25

Nontan met laeng, si Jesus kowan to son Apo Shiyos ey, “Ama, apo ni dangit tan saja dobong, man‐iyamanak son si‐kam, tep say inpa‐amta‐an mo so maypangkep ni pantoshayan mo ket sota ira toon mapiyan na metod‐an. Nem sota ira toon kowan sha ey eshakel i amta to, eg mo ipalobos sa amta‐an shay maypangkep ni pantoshayan mo.

San Juan 1:10

Si‐katoy kabol la epalsowa‐an ni dobong, nem idi dimaw ali, eg binigbig ni tood ja dobong ey si‐kato sotan.

San Juan 1:18

Angken sipa, enshiy en engasas son Apo Shiyos, nem eg sota sesakey bengat ja Anak to. Sajay ya Anak to pay i engipa‐amta ni maypangkep son Apo Shiyos ja Ameto.

San Juan 15:21

Eshakel aliy digat ja dag‐en sha son si‐kayo pangkep ni pamatiyo son si‐kak, ta sota engibetkag son si‐kak, eg sha pati‐en.

San Juan 16:3

Jet sajay i dag‐en sha son si‐kayo, ta eg sha‐ak amta, tan eg sha pay amta si Amak.

San Juan 17:3

Jet no meẃad‐an ma ira ni biyag ja enshiy to engintegan, si‐kato may amta‐an sha son si‐kam, ey si‐kam i podnon Shiyos ja enshiy eshom, tan si‐kato ngoy amta‐an sha son si‐kak, ey si‐kak si Jesucristo ja inbetkag mo alid ja dobong.

San Juan 7:28

Isonga si Jesus, nonta ẃared ma Timplo ja emantosho, inkedsang toy esel to ja kowan to ey, “Say kowan jo, amtayowak, tan amtayoy edapo‐an ko. Nem aliẃen nemnem koy dinaẃan ko did jay, no diket ẃaray engibetkag son si‐kak, ja si Apo Shiyos ja kedepo‐i ni podno. Jet eg jo amtes Apo Shiyos.

I-Galasia 4:9

Nem niman ma, ta amtayo si Apo Shiyos, tan si Apo Shiyos ngo, tokejoka ibilang ma ey annak tokejo, apay nga on‐oli kayo mowan nodta ogadin enshiy silbi to ja kaitoro met laeng ni kait ta too? Apay, piyan jo ayen manbedin mowan na singa baga‐en?

I-Ipiso 1:17

Jet kowan ko ni shawat ko so nen Apo Shiyos ja Kangeto‐an, ja Ama nen Apo Jesucristo, ey si‐kato komay mengi‐kan ni daing son si‐kayo ja medepo son si‐kato, tan ipa‐amta to pay ya emin i maypangkep ni pamati, say eẃatan jo pay i maypangkep son si‐kato.

I-Kolosas 1:15

Si Apo Shiyos, eg ma‐sas, nem si Cristoy dimaw ali ja engipa‐sas ni emin pangkep son Apo Shiyos. Si Cristo, ẃara ngo eshan, asan kepalsowa‐a nen Apo Shiyos i kompormi.

Hodiyos 1:3

Si‐katoy engipa‐sas ni koskoston ogadi nen Apo Shiyos, ja enshiy maka‐inges ni kinamapteng to; si‐kato bengat i maka‐inges sa koskosto so nen Apo Shiyos, jet na‐olnos iya dobong tep si‐katoy timengel so. Sota esel to bengat i mebedin na mengolnos ni emin kabol ni panakabalin to. Idi naksheng nga etey ja inkaro toy basol ni totoo, dimaw ma shi dangit, jet timongaw shi petek ni kanawan nen Apo Shiyos ja Kangeto‐an.

1 San Juan 2:23

Nem say nemnemen jo, sajay. No sipay too ja eg memati ey si Cristoy Anak nen Apo Shiyos, eg maybidang ey Ametos Apo Shiyos. Nem no sipay toon ememati ey si Jesus i Anak nen Apo Shiyos, si‐katoy maka‐ama so nen Apo Shiyos.

1 San Juan 5:20

Jet amta tayo pay ey sota Anak nen Apo Shiyos, dimaw ali shiya dobong jet engi‐kan son si‐katejo ni koston pannemnem say eẃatan tayo i maypangkep son Apo Shiyos, ey si‐kato i podno. Jet say kawad‐an tayo ma niman, sota podnon Shiyos, tan si Jesucristo ja Anak to. Sajay i podnon Shiyos, ja emengi‐kan ni biyag ja enshiy to engintegan.

2 San Juan 1:9

Sota eg meki‐onod nonta koston toro nen Cristo, ja toka da‐to‐i, enshis Apo Shiyos son si‐kato. Nem sota ka‐onong shi koston pamati son Cristo, ẃara son si‐kato si Apo Shiyos ja Ama, tan si Jesucriston Anak to.