San Juan 6:51 - Dibshon Mengi-kan Ni Pansigshan

⁵¹ Si‐kak sota mismon tinapay ya sibibiyag ja edapod dangit, jet sota mengan so niyay ya tinapay, may‐aknan ni biyag ja enshiy to engintegan. Jet sota kowan ko ey tinapay, si‐kato iya bakdang ko ja i‐akan ko para so ni totood ja dobong say meẃad‐an ira ni biyag.” Sajay i kowan nen Jesus.

San Juan 6:51 Iomraidhean Croise

San Mateo 20:28

Ta angken si‐kak ja naypadto nonta bayag da ey Anak ni Too, ekak dimaw ali ja pansilbi‐an ni karakdan, no diket dimawak ali say mansilbi‐ak son si‐kara. Tan say sakey pay ya dinaẃan ko di, say itolok koy bakdang kon metey, tep si‐katoy kaysedakan ni eshakel la totoo.”

San Lucas 22:19

Inda to sota tinapay et nan‐iyaman son Apo Shiyos, asan toka showashowa‐a. Jet in‐akan to nodta ira apostol to, ja kowan to ey, “Sajay i bakdang kon itolok kon bono‐en sha; si‐katoy kaysedakan jon took. Si‐kayo, itodtodoy jon mandilikob ja menowashowa ni tinapay, ja si‐katoy penginemneman jo son si‐kak.”

San Juan 1:14

Sotan na sigod ja ẃara son Apo Shiyos, ja engipa‐amta ali ni maypangkep son Apo Shiyos, nanbalin ni too, jet eki‐iyan son si‐katejon too. Inon‐an min mismoy kina‐Shiyos to — sota kina‐Shiyos ja in‐akan nen Ameto ta si‐kato bengat i Anak to. Emin na inon‐an min dingka to, ma‐sas ni olay ey ebadeg i semek to tan podnon emin i kowan to.

San Juan 1:29

Idi nonta eẃa‐ẃa, si Juan, inon‐an tos Jesus ja emandaw son si‐kato, jet kowan to ey, “Sajay sota mengikesho ni basol ni totood dobong ni ketey to di. Si‐katoy may‐eshig ey singa kalniron in‐akan nen Apo Shiyos ja maydeton.

San Juan 11:26

Jet angken sota ira too niman ja eg pay laeng etey, no memati ira son si‐kak, i‐aknan ko ira ni biyag ja enshiy to engintegan. Jet si‐kam, moka pati‐a iya inkowan ko la?”

San Juan 3:13

Angken sipen too, enshiy en dimaw shi dangit, nem eg si‐kak bengat, ja kowan sha ey Anak ni Too; shiman aliy edapo‐an ko.

San Juan 3:14

Si Moises, indansa tod kiyew sota sinan oleg ja boronsi, asan toka ikedjang nonta bayag da, ja kawashared ma nan‐ak‐akshan shen enshiy koston pan‐iyanan sha. Jet si‐kak ja kowan sha ey Anak ni Too, inges niyay ngoy pesing sha son si‐kak,

San Juan 3:16

“Ta si Apo Shiyos, ensemek ton pasiya i totood ja dobong; isonga in‐akan to ali sota saksakey bengat ta Anak to, say sota emin na memati so nontan na Anak to, eg meshosa ni ingkatod ingka, no diket may‐aknan ira ni biyag ja enshiy to engintegan.

San Juan 3:36

Sota toon memati so nonta Anak nen Apo Shiyos, may‐aknan ni biyag ja enshiy to engintegan, nem sota eg memati so nonta Anak nen Apo Shiyos, eg may‐aknan nonta biyag ja enshiy to engintegan, no diket emansessesked son si‐kato sota penosa nen Apo Shiyos ja shosen ingkatod ingka.”

San Juan 5:24

Kinapodpodno iya ikowan ko son si‐kayo. Sota memati nonta ikowan ko tan memati son Amak ja engibetkag ali son si‐kak, si‐katoy eẃad‐an ni biyag ja enshiy to engintegan, jet eg to da‐kaman na meshosa, ta ẃara son si‐kato sota biyag ja edapo son Apo Shiyos.

San Juan 6:33

Sota tinapay ya edapod dangit, ja in‐akan nen Apo Shiyos, si‐katoy emengi‐kan ni biyag ni tood ja dobong.”

San Juan 6:35

Si Jesus, simongbat ja kowan to ey, “Si‐kak sota may‐eshig ey singa tinapay ya emengi‐kan ni biyag, jet sota ondaw ali son si‐kak ja memati, eg ma‐ekang, tan eg ma ma‐kew ni shanom.

San Juan 6:41

Waray eshom nodta Hodiyos ja eg makakosto son Jesus; idi inteneng sha sota kowan nen Jesus ey si‐kato sota tinapay ja edapod dangit, ireka mankotot,

San Juan 6:47

Kinapodpodno iya inkowan ko son si‐kayo. Sota memati son si‐kak, may‐aknan ni biyag ja enshiy to engintegan.

San Juan 6:48

Si‐kak sota may‐eshig ey tinapay ya mengi‐kan ni biyag.

San Juan 6:50

Nem saja tinapay ya naka pan‐ikowan son si‐kayo niman, mismon edapo alid dangit, jet sota ira mengan so niyay, eg ira metey ingkatod ingka.

San Juan 7:38

Ta say kowan ni esel nen Apo Shiyos ja naysolat nonta bayag da, kowan to ey, ‘Sota memati son si‐kak, may‐eshig ey ẃara ni olay son si‐kato sota shanom ja singa temtem ja eg ma‐ti‐an.’ ”

2 I-Korinto 5:19

Say olog nonta inkowan ko la, nonta etey si Cristo, si Apo Shiyos, toka pandag‐a i pesing ton mengi‐sop met laeng so ni emin na totoo son si‐kato, say eg to ma ibilang sota ngaaw den aramid sha. Jet sajay i inpiyal ton itoro mi.

2 I-Korinto 5:21

Si Cristo, enshin polos i ngaaw wa aramid to, nem si Apo Shiyos, inkowan to ey si‐kato et ngo mowan i mengikesho nonta basol tayon totoo, say no memati kito son si‐kato, ibilang shakito ma nen Apo Shiyos ey mapteng kito, ja inges ni ogadi tayoy ogadi to met laeng.

I-Ipiso 5:2

Mesepol la ẃaray semek jo ni olay shi sakey tan sakey. Nemnem jo ey si Cristo, ebadeg i semek to ngo son si‐katejo; isonga intolok toy bakdang ton metey para son si‐katejo. Saja engitodokan to ni bakdang to, may‐eshig ga daton ja piyan nen Apo Shiyos.

I-Ipiso 5:25

Jet si‐kayo ngon daleki, semek jo ni olay i aseẃayo, ja inges toy semek nen Cristo son si‐katejon emati son si‐kato. Ta sajay met i kabol la intolokan to so ni bakdang to ja metey para son si‐katejo.

Tito 2:14

ta intolok toy bakdang to shorog ja etey shi koros, say sa‐datan toy emin na ngaaw wa aramid tayo ni mapteng, say manbedin kiton too to ja masi‐met ni olay ja mandeka ni mapteng.

Hodiyos 10:20

Jet nonta etey i bakdang to, singa epo‐jasan ma sota Kapatkan na dogad nen Apo Shiyos, ta na‐kal ma sota kortina ja naysa‐din nodtan. Isonga angken si‐katejo ma niman, ẃaray pesing tayon onsekep, ta ẃara ngod biyag si Cristo shi dangit,

1 San Pedro 2:4

Si Apo Jesus i onoren jo ni olay, ta si‐katoy emengi‐kan ni biyag son si‐katejo. Si‐kato, may‐eshig ey baton binedaw ira nonta emengemag ni baley ta kowan sha ey enshiy silbi to, nem eg sha amta ey si Apo Shiyos i emili nontan na binedaw shen bato tep son si‐kato, epateg mango iyay ya bato.

1 San Juan 2:2

Si‐katoy engikesho ni basol tayon emati son si‐kato ni inkatey to shi koros jet aliẃen si‐katejo bengat, no diket angken sota basol ni emin na totood ja dobong.

1 San Juan 4:10

Owen, say itsora nonta mapteng nga semek ka kowan ko la son si‐kayo, aliẃen inges to sota semek tayo son Apo Shiyos, no diket sajay sota ebadeg ga semek nen Apo Shiyos son si‐katejo, jet say ka‐amta‐an to, inbetkag to ali sota Anak to shiya dobong ja etey shi koros, say ma‐omas i basol tayo.

1 San Juan 4:14

Isonga amta tayo ey sota Anak nen Apo Shiyos ja inbetkag to di, si‐katoy mengisedakan ni emin na tood ja dobong. Inon‐an min mismo jet si‐katoy mika ikokowan so ni totoo.