San Juan 5:19 - Dibshon Mengi-kan Ni Pansigshan

¹⁹ Jet si Jesus, kowan to so nonta ira Hodiyos ey, “Kinapodpodno iya ikowan ko son si‐kayo. Si‐kak ja Anak to, enshiy kabedinan kon mandeka ni angken nganto, no a‐abos ko bengat; jet say mebedin bengat ja dag‐en ko, sota inon‐an ko ja obda nen Amak. Sota obdak, inges toy obda nen Amak.

San Juan 5:19 Iomraidhean Croise

San Mateo 26:39

Idi naksheng nga inkowan to iyay, bintawan to ira ni ootik, jet nanshomog ja nanshawat son Apo Shiyos, ja kowan to ey, “Ama, no mebedin koma, karam ipalobos iyay ya pandikat ko di. Nem say kowan ko, sota piyan mo, si‐katoy metongpal; aliẃen sota kostok.”

San Lucas 21:15

tep si‐kak met laeng i mengi‐kan son si‐kayo ni koston isongbat jo tan daing jon man‐a‐sel. Isonga sota makakontra son si‐kayo, enshi son si‐kara i makabaal ja mengebak son si‐kayo; mesampolo et ira.

San Juan 10:18

Angken sipen too, enshiy kabaalan ton onbono son si‐kak no ekak itolok i bakdang ko, ta si‐kak met laeng i maka‐amta ni biyag ko, no piyan kon metey ono enshi. Mebedin na itolok ko iya biyag ko ja metey, jet mebedin met laeng nga odi‐en ko ja manbiyag mowan, ta si‐katoy inbilin nen Amak son si‐kak.”

San Juan 12:49

Ta sotan na inkowan ko, aliẃen si‐kak i makanemnem, no diket sotan i inkowan nen Amak ja engibetkag alid jay son si‐kak.

San Juan 12:50

Jet amtak ey sota inkowan nen Amak ja itorok so ni totoo, sotan i mengi‐kan ni biyag ja enshiy to engintegan; isonga emin sotan na inkowan nen Amak son si‐kak, si‐kato ngoy naka itoro ni olay son si‐kara.”

San Juan 14:10

Apay eg kayo memati aya ey si‐kak, ẃara‐ak so nen Amak, jet si Amak ẃara ngo son si‐kak? Emin sota inkowan ko la son si‐kayo, aliẃen edapo shi nemnem ko, no diket sotan i inkowan nen Amak son si‐kak. Jet emin sota dingkak, si‐katoy inbilin to. Si Amak, ẃara ni olay son si‐kak.

San Juan 2:19

Si Jesus, simongbat ja kowan to ey, “Sharal jo iyay ya timplo, jet no maykatdon akew, i‐olik met laeng ja dag‐en.”

San Juan 3:3

Jet si Jesus, simongbat ja kowan to ey, “Kinapodpodno iya ikowan ko son si‐kam. Angken sipa, eg mebedin na asen toy pantoshayan nen Apo Shiyos, no eg may‐enak mowan.”

San Juan 5:21

Si Amak, si‐katoy ememiyag nonta nanketey, jet angken si‐kak ja Anak to, mengi‐kanak ni biyag so nonta toon piyan kon pengi‐kanan.

San Juan 6:38

Ta si‐kak, edapo‐ak alid dangit, jet say obda‐en ko bengat, sota piyan nonta engibetkag son si‐kak; aliẃen sota piyan ko.

San Juan 8:28

Isonga si Jesus, ẃara pay i inkowan to son si‐kara, ja kowan to ey, “No onsabi sota timpo ja ikayang jo sota Anak ni Too ja idansa, amta‐an jo ma ey si‐kak sota naypadton mengisedakan ja ibetkag ali nen Apo Shiyos. Tan amta‐an jo pay ey emin na maramen naka pan‐ikowan niman ket aliẃen na edapod nemnem ko, no diket sotan i inkowan nen Amak son si‐kak.

San Juan 9:4

Niman ta ẃara kito pay laeng shi biyag, mesepol la dag‐en tayo sota obda ja piyan nonta engibetkag son si‐kak, ta no onsabi sota timpon ketey tayo, ibi‐jag tayo ma ja man‐obda.

Inpaspasing 2:24

Nem si Apo Shiyos, eg to intolok ja on‐onong si Jesus ja metey; isonga inpanbiyag to, ta say patey, enshiy panakabalin ton mengipked son Jesus.

I-Roma 6:4

Sota inpanbonjag tayo, say kay‐eshigan to, singa etey kiton nayda‐kam so nen Cristo ja naybeka. Jet say sakey pay ja kay‐eshigan ni inpanbonjag tayo, singa nayda‐kam kito so nen Cristo nonta inpanbiyag so nen Apo Shiyos maypangkep ni panakabalin to, say mebado‐an ngoy biyag tayo niman na ẃara kitod biyag.

I-Roma 8:11

No sota Ispirito nen Apo Shiyos ket ẃara son si‐kayo, si‐kato met laeng i mengi‐kan ni biyag nonta bakdang jo ja emetey, ta si‐kato ngoy engi‐kan ni biyag son Cristo nonta inkatey tod koros, jet sotan na Ispirito, ẃara son si‐kayo.

1 I-Korinto 15:12

Apay nga kowan ni eshom son si‐kayo ey sota nanketey ket, eg ma manbiyag mowan? Say kowan met ni mapteng nga shamag maypangkep son Cristo, inpanbiyag nen Apo Shiyos shi patey.

2 I-Korinto 4:14

Ta amta mi ey si Apo Shiyos ja inpan‐ongal so nen Apo Jesus, panbiyag shakami ngo, ta ẃara kami son Jesus. Jet angken si‐kayo ngo. Isonga no anongosto, man‐o‐odop kito, si‐katejod Cristo, ja ondaw son Apo Shiyos.

2 I-Korinto 5:10

Ta emin kito, onsango kito so nen Cristo, jet bisna‐en toy dingdingka tayo nonta kawasha tayod biyag shiya dobong, no mapteng ono ngaaw, jet eẃaten tayoy sobadit nonta dingka tayo.

I-Ipiso 2:5

isonga angken singa etey kito kabol ni basol tayo, say inpasing to, inda‐kam shakito so nen Cristo ja nay‐aknan ni biyag. Isonga say naysalakanan tayo, sota maypangkep ni kaasi nen Apo Shiyos.

I-Ipiso 3:16

Jet say shawat ko so nen Apo Shiyos ja Kangeto‐an, kowan ko ey sota Ispirito to komay mengi‐kan ni kedsang ni nemnem jo, ta ebadeg i panakabalin to,

I-Pilipos 3:21

Si‐kato aliy onsa‐dat niya bakdang tayon kabeba‐an ja manbedin ni inges toy bakdang tod dangit ja emenenili. Jet sajay alin pesing to, osalen toy panakabalin to et sotan na panakabalin i toka osala met laeng niman ja mengitoshay so ni emin.

I-Pilipos 4:13

Esagana‐ak ja mengitoded ni angken nganto, ta si Jesucristo, si‐katoy emengi‐kan ni kedsang ko.

I-Kolosas 1:11

Jet say shawat mi pay son Apo Shiyos, si‐kato komay mengi‐kan ni edagshen kedsang ni pamatiyo, ta Manakabalin, say angken ngantoy mepesamak son si‐kayo, itoled jo et man‐enos kayo, tan man‐imdeng kayo pay koma.

I-Kolosas 1:16

Emin na banag ja ẃared dangit, tan shiya dobong — saja ma‐sas, tan saja eg ma‐sas — si Apo Shiyos i emalsowa — angken pay sota ira anghil la kangeto‐an shi dangit, nem si Cristoy kadẃa ton emalsowa iren jay. Si Cristoy kabol la epalsowa‐an sha, say si‐kato met laeng i ishayaw sha.

1 I-Tisalonika 4:14

Kitejoka memati ey si Jesus, etey, nem nan‐ongal met laeng. Jet kitejoka memati met laeng ey si Apo Shiyos, panbiyag to ngo ali sota ira nanketey ja emati so nen Jesus et peki‐odop to ira son Jesus no maykadẃen idaw to mowan ali.

1 San Pedro 3:18

Nemnem jo sota inkatey nen Cristo. Ta si Cristo, si‐katoy engitodok ni bakdang to shorog ja metey say ikaro ton emin i basol ni totoo, tan say i‐esop shakito so nen Apo Shiyos. Jet si Apo Jesus, enshin polos i basol to, nem etey ni maypangkep son si‐katejon toon eshakel i basol to. Etey nin mangon pinsak i bakdang to, nem sota dinaẃa to, eg etey.

Inpa-Amta Nen Jesucristo 2:23

Tan angken sota ira annak to, shosa‐en ko, et metey ira. Sajay i dag‐en ko say sota emin na emati son si‐kak, amta‐en sha ey si‐kak ket amtak i emin na ẃared nemnem tan poso ni too, tan say amta‐en sha ey si‐kak i onsobadit ni dingka ni sanseskey son si‐kayo.