San Juan 4:21 - Dibshon Mengi-kan Ni Pansigshan

²¹ Jet si Jesus kowan to so nonta bii ey, “Patim iya naka pan‐ikowan. Waray timpon onsabi ali ja say panshedjaw son Apo Shiyos, aliẃen sota idaw nodta shontog shiyay, ono shi Jerusalem.

San Juan 4:21 Iomraidhean Croise

San Mateo 18:20

Ta sota showa ono tedo ja esa‐nop pangkep son si‐kak, ẃara‐ak son si‐kara nontan na inkasa‐nop sha.” Sajay den emin, inkowan nen Jesus.

San Mateo 28:19

Isonga ikowan ko son si‐kayo ey daw kayo shi emin na ili shiya dobong, jet itoshoyo i maypangkep son si‐kak say memati ira. Bonjagi jo ira shi ngaran nen Apo Shiyos ja Amak, shi ngaran ko ja Anak to, tan shi ngaran ni Ispirito Santo.

San Lucas 21:24

Say eshom son si‐kara, bono‐en ni kabakal sha ni kampilan, tan sota ira ebay‐an, al‐en sha iren maybedod shi emin na ka‐ili‐ili. Jet sota toon aliẃen Hodiyos, si‐karay onkatin so ni Jerusalem, ingkatod kepospos ni timpon inkesheng nen Apo Shiyos ja penosara so ni Israel.

San Juan 14:6

Jet si Jesus, simongbat ja kowan to ey, “Si‐kak i may‐eshig ja shalan, si‐kak i podno, si‐kak i mengi‐kan ni biyag. Enshiy angken sipa ja maka‐edaw so nen Amak, no eg nin manshedan son si‐kak.

San Juan 16:2

Ta a‐kalen shakejo pay shima dogad ja sa‐nopan ni Hodiyos, ja eg shakejo ma ipalobos ja mekisa‐sa‐nop son si‐kara. Aliẃen sotan bengat: sota pay ira memono son si‐kayo, say ẃared nemnem sha, kowan sha ey sotan na dag‐en sha, aliẃen basol, no diket shaka pandag‐a ja para son Apo Shiyos.

San Juan 16:32

Nem simabi ma sota timpon kebodak jo, jet emin kayo, sakey ey on‐akad shi baley to. Si‐kayo, bay‐an jowak, nem aliẃen saksakey kon mebay‐an, ta si Amak, ẃara son si‐kak.

San Juan 4:23

Jet niman, simabi ma sota timpo, ja say koston panshedjaw son Apo Shiyos ja Ama, mesepol la sota podno ja mandepod poso, tep si Apo Shiyos ja Ametayo, sajay i piyan ton pesing nga manshedjaw son si‐kato.

San Juan 5:25

“Kinapodpodno iya ikowan ko son si‐kayo. Say too, singa may‐eshig ey etey pangkep ni basol, nem no itenengan sha niman sota ikowan ko, may‐aknan ira ni biyag, ta si‐kak sota Anak nen Apo Shiyos.

San Juan 5:28

Karekayo messhaaw ni sajay ya inkowan ko la, ta ẃaray onsabi alin timpo, ja sota ira nanketey, itenengan shay esel ko,

Inpaspasing 6:14

Sajay i intenengan min kowan to: si Jesus kono ja i‐Nasarit, sheshalen to di ja Timplo, tan sa‐datan to kono pay ya emin i ogadi tayon tineẃid tayo so nen Moises!”

I-Ipiso 2:18

Amtayo ey agpayso iyay tep pineshas jo. Saksakey met i Ispirito Santo nen Apo Shiyos ja ẃara son si‐katejo et sotan i naymongsanan tayon emin ja on‐esop son Apo Shiyos ja Ametayo, niman na inpamati tayo ma son Cristo.

I-Ipiso 3:14

Jet sajay ya ebadeg ga plano nen Apo Shiyos, no nemnemen ko, naka mantedimokod ni iyaman ko so nen Apo Shiyos ja Ametayo.

1 Timoteo 2:8

Isonga say piyan ko, no mesa‐nop i emati son Cristo shi emin na dogad, mesepol la sota dalekiy mansheẃat son Apo Shiyos. Nem no timpon pansheẃat, mesepol la metopog i nemnemen sha ja si Apo Shiyos bengat; aliẃen en metaksholan ni bonget ono empait ta nemnem so ni eshom.

1 San Pedro 1:17

No mansheẃat kayo so nen Apo Shiyos, joka eẃagin Amejo; isonga niman na kawashayo pay laeng shiya dobong, mesepol la si Apo Shiyos i ishayaw jo ni olay. Nemnem jo ey si Apo Shiyos met laeng i mengigsheng ni panbenagan ni emin na totoo ingkatod ingka, jet i‐anam to nodta dingka ni sakey tan sakey nonta ẃara ired biyag; enshiy to paboran.

Inpa-Amta Nen Jesucristo 21:22

Nodtan na siyodad, enshiy nak inon‐an na Timplo. Eg mesepol, ta si Apo Shiyos ja Kangeto‐an, tan sota Kalniro, ẃara iren mismo nodtan et si‐karay singa Timplo nodtan.