San Juan 3:6 - Dibshon Mengi-kan Ni Pansigshan

⁶ Sota i‐anak ni too, etoo‐an i ogadi to, nem sota toon kawad‐an ni Ispirito Santo nen Apo Shiyos, ja singa nay‐anak mowan, say ogadi to, inges to ngoy Ispirito Santo.

San Juan 3:6 Iomraidhean Croise

San Juan 1:13

Say itsora ni kaybidangan ni totoo ey annak nen Apo Shiyos ket kabol nonta panakabalin nen Apo Shiyos; aliẃen inges toy itsora ni kay‐enak ni too so ni maka‐anak so, tep say too, ẃaray nemnem sha ey man‐enak koma ira, tan sakey pay, shaka i‐onod i dekna ni bakdang sha; isonga sotan i kabol la kay‐enaki ni too.

San Juan 3:7

Kareka messhaaw niya inkowan ko ey si‐kayon too, mesepol la may‐enak kayo mowan.

I-Roma 7:18

Amtak ey no ekak emati son Cristo, enshin polos i mapteng son si‐kak. Niman, makedsang mangoy nemnem kon mandeka ni mapteng, nem iso met laeng nga eg kabaalan ni bakdang kon dag‐en.

I-Roma 7:25

nem niman ebadeg i iyaman ko so nen Apo Shiyos ta insalakan towak maypangkep so nen Jesucristo ja Apo tayo! Isonga sajay nin i kasesaad ko: no shi nemnem ko, naka mansilbi son Apo Shiyos, nem saja bakdang ko, ememasig i toka panbesol.

I-Roma 7:5

Nonta eg kito pay laeng emati son Cristo, sota ngaaw wa pipiyan ni bakdang tayon dag‐en, si‐katoy tayoka dagdag‐a ni olay. Jet singa pay ya inpaba‐deg bengat nonta bilin nonta bayag sota tayoka dagdag‐a ja ngaaw. Nakol ni istay patey ingkatod ingka i panpa‐no‐an tayo.

I-Roma 8:13

Ta no sotan i onoren jo, say panpa‐no‐an to, patey ingkatod ingka; nem no sota pengitoshong ni Ispirito Santo nen Apo Shiyos i onoren jo, mebedin jon ibi‐jag sota ngaaw wa aramid jo, jet sota biyag ja medepo son Apo Shiyos i maysa‐dat.

1 I-Korinto 6:17

Nem sota emati ja naykasakey son Apo Jesus, saksakey ma i nemnem sha nen Apo Jesus.

2 I-Korinto 5:17

Jet angken sipen too ja memati so nen Cristo, mebediwan i ẃared nemnem to; singa badon palsowa ma. Sota sigod ja ogadin ngaaw, enshi mala, jet sota bado, si‐katoy naysa‐dat ma.

I-Galasia 5:24

Sota toon ẃara son Cristo Jesus, singa inpakilansara shi koros sota ngaaw wa ogadira, pati sota ngaaw ja istay pipiyan sha, jet inbiyang sha ma sotan iren ngaaw.

I-Ipiso 2:3

Jet angken si‐katejo nonta eg kito pay laeng nin emati, inges tayoy itsora shen ngaaw. No ngantoy piyan tayo, ono nemnemen tayo, si‐katoy dag‐en tayo. Sajay ya ogadin ngaaw, si‐katoy kabol la istay shosa‐an shakito so nen Apo Shiyos, ja inges toy shosa‐an to so ni eshom.

I-Kolosas 2:11

Si‐kayo, niman na emati kayo son Cristo, too kayo ma nen Apo Shiyos. Sota ira eshom, kowan sha ey too ira nen Apo Shiyos ta ekogit ira, nem aliẃen sotan sota kayda‐kaman ni too son Cristo. Say kaydesinan tayo ja too nen Cristo shima eshom, sota eg tayo ma pandeka nonta pipiyan ni bakdang tayon dag‐en ja ngaaw, aliẃen sota kogit.

1 San Juan 3:9

No sipay toon si Apo Shiyos i Ameto, eg ma mandeka ni ngaaw, ta nan‐inges i ogadiren san‐ama, jet eg ma mebedin na itoloy ton manbesol ni olay, tep anak ma nen Apo Shiyos.