San Juan 21:7 - Dibshon Mengi-kan Ni Pansigshan

⁷ Jet sota sakey ya apostol ja ensemek nen Jesus, inimatonan to ey si Jesus sota imesel, jet kowan to ey, “Si Apo Jesus met iman!” Idi intenengan nen Simon Pedro sota kowan to, insikkot to sota baro tod bakdang to, tep nandabos ni toka pannikay, jet imabtok da shima shanom ja nimangoy.

San Juan 21:7 Iomraidhean Croise

San Marcos 11:3

No ẃaray mengibeka son si‐kayo no ngantoy joka pan‐okasi so, ikowan jo ey, ‘Si Apo Jesus, mesepol to jet pai‐odi to met laeng alin shagos.’ Satan da i ikowan jo son si‐kara.”

San Lucas 12:35

“Mesepol la esagana kayo ni olay ja enshiy ontiped ni pansilbiyo son si‐kak. Mesepol la ingesen joy kepansesked ni baga‐en shiyay ya istoriya. Waray toon dimaw ja eki‐atindar ni kasal et sota ira baga‐en to, kanayon na ireka mansessesked ali ni imotok to. Wara ni olay i silew sha, say no menogtog si apo sha, idokatan shen shagos.

San Lucas 2:11

Niman na dabi, nay‐anak sota Apo tayon inkari nen Apo Shiyos nonta bayag da ja en ali mengisedakan son si‐kayo. Say nay‐anakan to, shi Bitlihim ja ili da nen Ari David.

San Lucas 7:47

Ta sota eshakel la basol to, binigbig to ey epakaẃanan; isonga sajay i inpasing to. Si‐katoy ka‐asan to ey ebadeg i semek to son si‐kak. Nem sota toon kowan to ey ootik i basol ton epakaẃanan, ootik ngoy semek to.”

San Juan 13:23

Waray sakey so nonta ira apostol nen Jesus ja ensemek ton pasiya; timongaw shi nay‐askang son Jesus.

San Juan 19:26

Jet si Jesus, idi inon‐an to ja dimayat nodta nay‐esop son si‐kato sota sakey ya apostol ton ensemek ton pasiya, tan inon‐an to ja ẃara si ineto, kowan to ey, “Nanang, si iyay may ibilang mon anak mo!”

San Juan 20:2

Jet si Maria Magdalena, nanbetik ja to inkowan so nonta sakey ya apostol ja ensemek ka pasiya nen Jesus, tan to inkowan so nen Simon Pedro ey, “Indara da sota bakdang nen Apo Jesus shima naydiyangan to! Eg mi amta no toway indawan sha so.”

San Juan 20:20

Idi naksheng nga inkowan nen Jesus iyay, inpa‐sas to sota takday to son si‐kara ja kawad‐an ni sogat nonta indansara so shi koros, tan sota tagdang ton natbek. Jet nontan ma, ireka man‐imdeng nga pasiya tep inon‐an shen mismo si Apo Jesus.

San Juan 20:28

Si Tomas, simongbat ja kowan to ey, “Si‐kam i Apok tan Shiyos ko!”

San Juan 21:20

Jet si Pedro, ẃimingi jet inon‐an to sota sakey ya apostol la ensemek nen Jesus ja timened son si‐kara, jet kowan to son Jesus ey, “Apo, jet si iyay ngay? Eg ngo mepesamak son si‐kato?” (Sajay sota sakey ya apostol ja nay‐askang son Jesus nonta ka‐onoran na inpandilikob sha, tan si‐katoy engikowan ey, “Sipa ta kowan mo ey mengibaag son si‐kam?”)

San Juan 21:24

Si‐kak sota sakey ya apostol. Jet emin iyay ya insolat ko, inon‐an kon mismo. Jet agpayson emin iya insolat ko; enshiy showashowa to.

San Juan 21:8

Nem sota eshom, nandogan ira nodta bangka, ingkato da nodta naykilig, jet inkoyod sha ma sota balshew ja enapno ni nigay. Say ka‐ashawi sha nodta kilig ni baybay, ondaw wa sandasos sa mitoro.

Inpaspasing 10:36

Amtayo met ey si‐kamin Hodiyos ja i‐Israel, si‐kamiy inbetkagan to so nen Jesucristo say to ikowan no ngarantoy dag‐en mi say kosto‐an shakami nen Apo Shiyos, jet si‐kato met laeng sota Apo ni toon emin, pati si‐kayon aliẃen Hodiyos.

Inpaspasing 2:36

“Isonga si‐kayon emin ja kait kon Hodiyos, mesepol la amta‐an jon pasiya ey si Jesus ja inpaidansayo shi koros, si‐kato sota inpanbalin nen Apo Shiyos ni Apo tayon emin! Si‐kato sota singsingked tayon inkari nen Apo Shiyos ey ibetkag to din mengisedakan!” Sajay i kowan nen Pedro.

1 I-Korinto 15:47

Sota pilmiron tood ja dobong ja si Adan, depok i edapo‐an to. Nem sota paris nen Adan ja si Cristo, edapod dangit.

2 I-Korinto 5:14

Sota semek nen Cristoy emengitoshong son si‐kami, isonga aliẃen bakdang mi bengat i mika nemnemnema, angken ngarantoy dag‐en mi. Ebadeg i semek to son si‐katejo, isonga etey para so ni emin na totoo. Isonga mika kowinta‐a ey singa etey kiton emin et no sotan, eg mi nemnemen i pansigshan mi shorog. Jet aliẃen si‐kami bengat, no diket si‐katejon emin ja ẃara pay laeng shi biyag, aliẃen tayo nemnemen ma i pansigshan tayo shorog, no diket si Cristo i nemnemen tayo, ta etey maypangkep ni pansigshan tayo, nem nan‐ongal met laeng.

Santiago 2:1

Si‐kayon a‐akik shi pamati, say piyan nen Apo Shiyos ja dag‐en jon emati son Jesucristo, ja Apon Kangeto‐an, man‐i‐inges komay pesing jon menintil ni totoo.