San Juan 19:6 - Dibshon Mengi-kan Ni Pansigshan

⁶ Idi inon‐an nonta ira apo ni papashi, tan sota ira kowadja ni Timplo, kimeljaw ira ja kowan sha ey, “Paidansam shi koros! Paidansam shi koros!” Nem si Pilato, simongbat ja kowan to son si‐kara ey, “Si‐kayo ngoy mengilansa son si‐kato shi koros tep enshi met i nak dinoktalan na to nanbasolan!”

San Juan 19:6 Iomraidhean Croise

San Mateo 26:58

Jet si Pedro, tinned to ira nem bimetaw, ingkatod simabi nodta bo‐dayan ni kangeto‐an na pari jet simekep nodtan. Ekitongaw so nonta ira kowadja ta piyan ton asen no ngantoy pesing sha son Jesus.

San Mateo 27:22

Jet si Pilato, kowan to son si‐kara ey, “Jet no sotan i kowan jo, ngaranto ma i dag‐en ko so nen Jesus ja inbetkag kono nen Apo Shiyos son si‐kayo?” Jet emin ira sota totoo, kowan sha ey, “Paidansam shi koros!”

San Mateo 27:24

Idi indasin ma nen Pilato ey enshiy pesing ton mengibediw son Jesus, tan ninamnama to pay ey ẃara aliy kolo ja medeka, en nanbolo shi sango‐an ira nonta totoo, ta si‐katoy ogadira nontan da no piyan shen ipa‐sas ey enshi may kaybibiyangan sha shi dag‐en ni eshom ma too. Isonga inkowan to ey, “Enshiy basol ko no mebono iyay ya too; olay tokajo ngo!”

San Lucas 23:4

Jet kowan nen Pilato so ira nonta apo ni papashi tan sota kait shen eshakel ey, “Enshi met i sinepolan kon ngaaw wa aramid niyay ya too.”

San Juan 18:3

Jet si Judas Iskariote, en engolop ni eshakel la solsharo tan kowadja ni Timplo, ja inbetkag ira nonta apo ni papashi tan sota ira Parisiyo, jet dimaw ira shima gardin ja kawad‐an nen Jesus. Sajay iren totoo, nansilew ira di, tan nanpan‐almas ira.

San Juan 18:31

Jet si Pilato, kowan to son si‐kara ey, “No sajay ya too ket nanbasol, alejo et tongtong jo ngo shi dinteg jo.” Nem sota ira Hodiyos, simongbat ira ja kowan sha ey, “Eg met maypedobos shi dinteg jon i‐Roma ey onbono kami; isonga eg mebedin.”

San Juan 18:38

Jet si Pilato, kowan to ey, “Jet ngarantoy piyan mon a‐selen ni engikowanan mo ni podno?” Idi naksheng nga inkowan nen Pilato iyay, bimo‐day mowan ali jet kowan to so nonta ira pangolo ni Hodiyos ey, “Enshi met i naka sokali ja basol niyay ya too ja to kebono‐an.

San Juan 19:15

Sota ira Hodiyos, kimeljaw mowan ira ja kowan sha ey, “Bonom! Bonom! Paidansam et shi koros!” Jet si Pilato, kowan to son si‐kara ey, “Jet piyan jon angken paidansak iya ari jod koros?” Sota ira apo ni papashi, simongbat ira ja kowan sha ey, “Enshiy eshom ma ari mi; sota ari bengat shi Roma!”

San Juan 19:4

Jet si Pilato, bimo‐day ali mowan jet kowan to so nonta ira Hodiyos ey, “Enshi met i nak dinoktalan na to nanbasolan, ja si‐katoy kabol la to keshosa‐an; ekak itoloy ya bistigalen. Isonga niman, pebo‐day ko di say asen jo, say mepnek kayo ni epalikatan to la.”

Inpaspasing 2:23

Sigod ja amta nen Apo Shiyos i mepesamak ali son Jesus shiya dobong tep plano to ngoreshan na sigod. Jet siya, intolok ton metey si Jesus. Nem si‐kayon Hodiyos i mismo emono son si‐kato! Inpabonoyo so nonta ira i‐Roma ja nankekedsel jet indansara shi koros.

Inpaspasing 7:52

Sipay amtayo ja para padto nen Apo Shiyos nonta bayag da ja eg pinedigat ni appoyo? Enshiy sha binaybay‐an! Binonoren emin ira sota engipadto nonta bayag da ey ẃaray ibetkag ali nen Apo Shiyos ja mengisedakan! Jet idi nay‐agpayso sota padto ni indaw ali nen Cristo, si‐kato sota inpa‐shel jo jet inpabonoyo, ey enshiy basol to.