San Juan 19:4 - Dibshon Mengi-kan Ni Pansigshan

⁴ Jet si Pilato, bimo‐day ali mowan jet kowan to so nonta ira Hodiyos ey, “Enshi met i nak dinoktalan na to nanbasolan, ja si‐katoy kabol la to keshosa‐an; ekak itoloy ya bistigalen. Isonga niman, pebo‐day ko di say asen jo, say mepnek kayo ni epalikatan to la.”

San Juan 19:4 Iomraidhean Croise

San Mateo 27:24

Idi indasin ma nen Pilato ey enshiy pesing ton mengibediw son Jesus, tan ninamnama to pay ey ẃara aliy kolo ja medeka, en nanbolo shi sango‐an ira nonta totoo, ta si‐katoy ogadira nontan da no piyan shen ipa‐sas ey enshi may kaybibiyangan sha shi dag‐en ni eshom ma too. Isonga inkowan to ey, “Enshiy basol ko no mebono iyay ya too; olay tokajo ngo!”

San Mateo 27:4

jet kowan to ey, “Nanbasolak ka pasiya! Ta inbaag ko sota toon enshiy basol to son si‐kayo jet niman pebonoyo gayam!” Nem kowan sha son si‐kato ey, “Enshiy mi naybiyangan nitan; olay toka ngo.”

San Mateo 27:54

Sota kapitan ni solsharo, tan sota kait ton emanbantay son Jesus ja naykoros, dineknara sota jegjeg jet mismon inon‐an shay epasemak. Eta‐kot iren pasiya jet kowan sha ey, “Agpayso gayam ey sajay ya too ket anak ni Shiyos!”

San Lucas 23:4

Jet kowan nen Pilato so ira nonta apo ni papashi tan sota kait shen eshakel ey, “Enshi met i sinepolan kon ngaaw wa aramid niyay ya too.”

San Lucas 23:41

nem kanebengan ta mangon mengikesho ni dingdingka ten ngaaw; si‐kato, enshiy basol to!”

San Lucas 23:47

Sota kapitan ni solsharo, inon‐an ton emin iya epasemak et nanshayaw son Apo Shiyos ja kowan to ey, “Agpayso gayam ma maronong iyay ya too!”

San Juan 18:33

Si Pilato, nay‐oli shima naydaem ni baley to jet inpaskep to ali si Jesus, jet inbag‐an to ja kowan to ey, “Jet agpayso ja si‐kam ket ari ni Hodiyos?”

San Juan 18:38

Jet si Pilato, kowan to ey, “Jet ngarantoy piyan mon a‐selen ni engikowanan mo ni podno?” Idi naksheng nga inkowan nen Pilato iyay, bimo‐day mowan ali jet kowan to so nonta ira pangolo ni Hodiyos ey, “Enshi met i naka sokali ja basol niyay ya too ja to kebono‐an.

San Juan 19:6

Idi inon‐an nonta ira apo ni papashi, tan sota ira kowadja ni Timplo, kimeljaw ira ja kowan sha ey, “Paidansam shi koros! Paidansam shi koros!” Nem si Pilato, simongbat ja kowan to son si‐kara ey, “Si‐kayo ngoy mengilansa son si‐kato shi koros tep enshi met i nak dinoktalan na to nanbasolan!”

2 I-Korinto 5:21

Si Cristo, enshin polos i ngaaw wa aramid to, nem si Apo Shiyos, inkowan to ey si‐kato et ngo mowan i mengikesho nonta basol tayon totoo, say no memati kito son si‐kato, ibilang shakito ma nen Apo Shiyos ey mapteng kito, ja inges ni ogadi tayoy ogadi to met laeng.

Hodiyos 7:26

Anam ton si Jesus i kangeto‐an na pari ja mengita‐shel son si‐katejo, ta enshiy kolang to, tan enshin polos i basol to, tan say sakey pay, aliẃen inges toy si‐katejon toon ngaaw i aramid tayo, ta si‐kato, dimaw da shi dangit, ja nay‐apil ma shi totoon mabesol.

1 San Pedro 1:19

no diket say inpasing to, may‐eshig ey sota shala nen Cristo nonta inkatey tod koros i inbayad to. Isonga si Cristoy kay‐eshigan nonta kalniron naydaton son Apo Shiyos ja enshin polos i to kebedawan.

1 San Pedro 2:22

Si Cristo, enshin polos i basol to, tan angken sipa, enshiy emengikowan ey ẃaray intenengan ton o‐owap ja inkowan to.

1 San Pedro 3:18

Nemnem jo sota inkatey nen Cristo. Ta si Cristo, si‐katoy engitodok ni bakdang to shorog ja metey say ikaro ton emin i basol ni totoo, tan say i‐esop shakito so nen Apo Shiyos. Jet si Apo Jesus, enshin polos i basol to, nem etey ni maypangkep son si‐katejon toon eshakel i basol to. Etey nin mangon pinsak i bakdang to, nem sota dinaẃa to, eg etey.

1 San Juan 3:5

Amtayo met ey say kabol la dinaẃan ali nen Cristo, to omasen iray ngaaw wa aramid tayo, ono basol tayo. Jet amtayo pay jey si‐kato, enshiy basol to.