San Juan 19:30 - Dibshon Mengi-kan Ni Pansigshan

³⁰ Jet idi ninamtan nen Jesus sota tapey ya inka‐ẃat nonta solsharo shi bongot to, kowan nen Jesus ey, “Naksheng ma.” Jet nanjokmos, asan ma ma‐bosi.

San Juan 19:30 Iomraidhean Croise

San Mateo 20:28

Ta angken si‐kak ja naypadto nonta bayag da ey Anak ni Too, ekak dimaw ali ja pansilbi‐an ni karakdan, no diket dimawak ali say mansilbi‐ak son si‐kara. Tan say sakey pay ya dinaẃan ko di, say itolok koy bakdang kon metey, tep si‐katoy kaysedakan ni eshakel la totoo.”

San Mateo 27:50

Jet si Jesus, inkedsang toy keljaw to mowan, asan ma ma‐bosi.

San Mateo 3:15

Nem si Jesus, simongbat ja kowan to ey, “Eti, dagam et niman. Bonjagimak ma. Mapteng i itongpal ta so ni bilin nen Apo Shiyos maypangkep niyay.” Jet si Juan, timolok.

San Marcos 15:37

Jet si Jesus, inkedsang toy keljaw to mowan, asan ma ma‐bosi.

San Lucas 23:46

Jet si Jesus, inkeljaw ton kowan to son Apo Shiyos ey, “Ama, ipiyal ko son si‐kam i ispiritok!” Inkowan to iyay asan ma ma‐bosi.

San Juan 10:11

Si‐kak sota mapteng nga emengajowan ni kalniro, jet si‐kak, ja makakokowa nonta kalniro, naka isakit ira ja angken si‐karay kabol la keteyan ko.

San Juan 10:18

Angken sipen too, enshiy kabaalan ton onbono son si‐kak no ekak itolok i bakdang ko, ta si‐kak met laeng i maka‐amta ni biyag ko, no piyan kon metey ono enshi. Mebedin na itolok ko iya biyag ko ja metey, jet mebedin met laeng nga odi‐en ko ja manbiyag mowan, ta si‐katoy inbilin nen Amak son si‐kak.”

San Juan 17:4

Sota obda ja inkowan mo son si‐kak ey dag‐en ko shiya dobong, kinsheng ko jet si‐katoy nayshayawan mo.

San Juan 19:28

Jet nontan ma, amta nen Jesus ey nontan ma i kepospos nonta obda to, jet inkowan to ey, “Na‐keẃak ni shanom.” Ta piyan ton metongpal sota inkowan ni padto ja naysolat nonta bayag da ja pangkep son si‐kato.

San Juan 4:34

Si Jesus kowan to son si‐kara ey, “Say singa naka kena, ja emengi‐kan ni kedsang ko, sota pandekak ni piyan nen Apo Shiyos ja engibetkag son si‐kak; sota obden inpiyal to son si‐kak i dag‐en ko ingkatod meksheng.

I-Roma 10:4

Sota bilin nen Apo Shiyos nonta bayag da, eg ma mansilbi niman ta binediwan to ni indaw ali nen Cristo; isonga si Cristoy singa engintegan ni sakop nonta sigod ja bilin. Jet niman, emin na memati son si‐kato, kosto‐an nen Apo Shiyos.

I-Roma 3:25

Si Apo Shiyos, ninemnem to ngo eshan ey si Cristo, metey ja maybokbok i shaleto shi koros, say emin na memati son si‐kato, mepekawanan i basol sha. Sajay i dingka nen Apo Shiyos say ma‐amta‐an ey kosto ngo eshan i toka dagdag‐a. Ta angken inpalebas to nin nontan da sota basol ni totoo ta na‐anos,

1 I-Korinto 5:7

Isonga ibi‐jag jo sota sigod ja ngaaw wa ogadiyo, ja may‐eshig nodta para debag ni tinapay. Ibong jo sota tinapay ya na‐alinan ni para debag jet sa‐dati jo ni bado ja enshiy daok to. Say piyan nen Apo Shiyos, enshi koma sota ogadin ngaaw son si‐kayo ja man‐a‐elbat. Piyan ton may‐eshig kayo nodta tinapay ya enshiy daok ton para debag tep sotan i ema‐osal ni timpon piyasta ni Paskowa. Si Cristo i may‐eshig ngo nodta kalniron maydeton ni timpon Paskowa, tep naksheng nga etey da say ma‐kal i basol tayo.

I-Pilipos 2:8

Jet nonta nanbalin ni too, inbaba toy bakdang to shorog et in‐onod ton angken manda‐kam ni kabebaing nga ketey to shi koros ja singa bimasol et ngo mowan.

Hodiyos 12:2

Jet topogen tayo ja si Jesus i nemnemen tayo, ta si‐katoy nanshogi‐an ni pamati tayo, jet si‐kato met laeng i onoren tayo ingkatod meksheng. Jet anam ton si‐katoy onoran tayo, ta inenosan toy digat nonta naydansa shi koros, ta amta to ey ẃaray mapmapteng ja naysagana shi dangit ja para son si‐kato; isonga angken na dinamsis sha tan binebaingan sha, inenosan to. Jet niman, ẃara ma shi petek ni kanawan nonta tinongawan nen Apo Shiyos, jet si‐kato ngo ma i Kangeto‐an na toray.

Hodiyos 9:22

Say agpayso, no sota sigod ja bilin i onoren sha, ngannganin shalen emin i ema‐osal no piyan shen ibilang nen Apo Shiyos ey mapteng sota kompormin banag ga ẃara son si‐kara. No enshiy shalen maybokbok, eg mebedin ja mepekawan i basol ni too.