San Juan 15:5 - Dibshon Mengi-kan Ni Pansigshan

⁵ Si‐kak sota may‐eshig ey sengeg ni mola, jet si‐kayo sota may‐eshig ey panga, jet sota on‐onong ja memati son si‐kak, ẃara‐ak ngo ni olay son si‐kato jet si‐kato sota asdeg toy panbenagan ton mapteng. Nem sota toon enshi‐ak son si‐kato, enshiy to panbenagan.

San Juan 15:5 Iomraidhean Croise

San Juan 12:24

Kinapodpodno iya ikowan ko son si‐kayo. Say kay‐eshigan ko, sota ilik ni pagey. Sota ilik ni pagey, no mebaybay‐an ja eg may‐a‐sek shi bo‐day, eg ma onshakel. Nem no sotan na ilik ket maymoda shi bo‐day, onshakel ma.

San Juan 15:16

Aliẃen si‐kayoy emili son si‐kak ja maistoro jo, nem si‐kak i emili son si‐kayo. Jet ibetkag takejo so ni totoo ja en mengikowan ni maypangkep son si‐kak, jet sota dag‐en jo, ebadeg i panbenagan to, ja eg mepokaw. Jet no ngantoy sheẃaten jo son Amak, pangkep ni joka pengi‐edagey son si‐kak, i‐akan to son si‐kayo.

San Juan 5:19

Jet si Jesus, kowan to so nonta ira Hodiyos ey, “Kinapodpodno iya ikowan ko son si‐kayo. Si‐kak ja Anak to, enshiy kabedinan kon mandeka ni angken nganto, no a‐abos ko bengat; jet say mebedin bengat ja dag‐en ko, sota inon‐an ko ja obda nen Amak. Sota obdak, inges toy obda nen Amak.

San Juan 9:33

No sotan na too ket aliẃen si Apo Shiyos i edapo‐an to, istay eg to koma mebedinan na pan‐esas i toon ekorab.”

Inpaspasing 4:12

Enshiy eshom ma tood ja dobong nga inbetkag ali nen Apo Shiyos ja mengisedakan, nem eg si Jesus bengat.” Kowan nen Pedro.

I-Roma 12:5

Isonga angken eshakel kito, naykasakey kito son Cristo pangkep ni pamati tayo son si‐kato, jet sankagait kito ma.

I-Roma 6:22

Nem niman ma ja aliẃen basol i timengel son si‐kayo, si Apo Shiyos i naydowaman jon onoren, jet asdeg to may kinon‐od jo tep emanmapteng may ogadiyo, ja mebedin na ẃaray kay‐ingesan to son Apo Shiyos. Jet say panpa‐no‐an niyay, meẃad‐an kayo ni biyag ja enshiy to engintegan.

I-Roma 7:4

Sajay i may‐eshig son si‐kayon a‐akik shi pamati. Singa etey kayo ta enshiy jo kaybiyangan nonta bilin ja naysolat nonta bayag da. Ta nonta etey i bakdang nen Cristo, singa angken si‐kayo, etey kayo ngo. Jet si‐katoy makatoo son si‐kayo. Ta angken etey nontan da, nanbiyag mowan say mebedin na tongpalen jo sota sigod ja piyan nen Apo Shiyos ey dag‐en jo.

1 I-Korinto 10:16

No mesa‐nop kitejon emati, tayoka ipa‐sas ey naykait kito so nen Cristo ni tayoka pandilikob. Emebindisiyoni sota tasen tayoka penginomi, jet sota meki‐inom nontan, tan mekikan nonta tinapay ja mepetpet‐ing, singa naykasakey ira son Cristo, ta nayda‐kam ira shi shaleto, tan shi bakdang to.

1 I-Korinto 12:12

Sajay ya kai‐akan ni Ispirito Santo nen Apo Shiyos so ni emati, arig toy bakdang ja eshakel i parti to. Jet sotan na parti, eshakel nem sakey bengat i bakdang ja naypeketan sha. Sajay i kay‐ingesan ni emati son Cristo, ta eshakel kito, nem sakey i bakdang nen Cristo ja naymongsanan tayo.

1 I-Korinto 12:27

Jet niman ma, si‐kayo i kay‐eshigan nonta bakdang nen Cristo, jet emin sota sakey tan sakey son si‐kayo, parti nontan na bakdang nen Cristo,

2 I-Korinto 13:8

Jet say shawat mi son Apo Shiyos, piyan min onmapteng i ogadiyo; eg mi nemnemen ey eg kayo koma manbebawi say ipa‐sas miy panakabalin nen Apo Shiyos ja ẃara son si‐kami ja menosa son si‐kayo. Enshi, eg mebedin na piyan min medeka sota maykontra nodta podnon toro nen Apo Shiyos. Say piyan mi, sota podno ni olay i medeka. Mas pay komay imdeng mi no si‐kamiy ekapoy, ey si‐kayo ngoy makedsang.

2 I-Korinto 9:10

Jet si Apo Shiyos ja emengi‐kan ni botil so nonta ira manmoda, tan emengi‐kan ni mekan, si‐kato met laeng i peshekel so nonta ẃara son si‐kayo say eshakel ngoy todongan jo. Si‐katoy mengi‐kan ni olay son si‐kayo say ẃaray pesing jon mandeka ni mapteng.

I-Galasia 5:22

Nem sota toon kaishalan ni Ispirito Santo nen Apo Shiyos, iyay iray ma‐sas son si‐kato: semek, imdeng, talna, anos, pengaasi, mapteng nga nemnem, tan emepiyal pay;

I-Ipiso 5:9

Ta sota toon ẃared maniyal, si‐kara sota mandeka ni mapteng nga aramid, tan sota kostoy pesing sha shi kait sha, tan podnoy ikowan sha.

I-Pilipos 1:11

Piyan kon ẃaray pengasan ko ey agpayson inonod jo sota mapteng nga ogadi ja edapo so nen Jesucristo, ta no asen ni too ey mapteng i ogadiyo, si Apo Shiyos i ishayaw sha, ta si‐katoy kabol ja nanbalbaliẃan jo.

I-Pilipos 4:13

Esagana‐ak ja mengitoded ni angken nganto, ta si Jesucristo, si‐katoy emengi‐kan ni kedsang ko.

I-Pilipos 4:17

Nem aliẃen sota in‐akan jo son si‐kak i naka pan‐imdengi, nem say naka pan‐imdengin pasiya, inon‐an ko ey amtayon ontolong. Jet si Apo Shiyos, si‐katoy onsobadit son si‐kayon ma‐ekan.

I-Kolosas 1:6

Jet sota esel nen Apo Shiyos pangkep so nen Jesucristo, ja simabi son si‐kayo, si‐katoy emankaiweshis shi emin na dogad shiya dobong. Jet ẃaray nanbanagan to ni olay, ja inges to son si‐kayo, manshoki nonta pilmiron akew wa inamta‐an jo ey sota podnon kaasi, medepo son Apo Shiyos.

Santiago 1:17

Ta emin na kompormin mapteng nga banag ja kaonsabi son si‐katejo, si Apo Shiyos i toka kedepo‐i. Si‐katoy Ametayo ja emalsowa so ni emin na kaonniyal alid naykayang. Mapteng ni olay i aramid nen Apo Shiyos; eg manbinaliw i itsora to.

1 San Pedro 2:4

Si Apo Jesus i onoren jo ni olay, ta si‐katoy emengi‐kan ni biyag son si‐katejo. Si‐kato, may‐eshig ey baton binedaw ira nonta emengemag ni baley ta kowan sha ey enshiy silbi to, nem eg sha amta ey si Apo Shiyos i emili nontan na binedaw shen bato tep son si‐kato, epateg mango iyay ya bato.

2 San Pedro 3:18

Niman ma, pakedsang joy pamatiyo nodta kaasi nen Apo Jesucristo ja engisedakan son si‐katejo, say ma‐shoman i amtayo maypangkep son si‐kato. Si‐katoy panshedjawan tayo niman ingkatod ingka. Siya, satan da.