San Juan 15:12 - Dibshon Mengi-kan Ni Pansigshan

¹² “Iyay pay i piyan kon ikowan son si‐kayo ja bilin. Mesepol la ensemek joy sakey tan sakey son si‐kayo ja inges toy itsora ni semek ko son si‐kayo.

San Juan 15:12 Iomraidhean Croise

San Juan 13:34

Niman, iyay pay i ikowan ko son si‐kayo, ja badon bilin. Mesepol la ẃaray semek jo so ni sakey tan sakey son si‐kayo, ja inges toy semek ko son si‐kayo.

San Juan 15:17

Say bilin ko son si‐kayo, mesepol la ẃaray semek jo so ni sakey tan sakey son si‐kayo.

I-Roma 12:10

Semek joy kait jon emati ja inges toy semek jo so ni mismon agi jo, jet ẃara komay pengiredjaw jon pasiya so ni sakey tan sakey.

I-Ipiso 5:2

Mesepol la ẃaray semek jo ni olay shi sakey tan sakey. Nemnem jo ey si Cristo, ebadeg i semek to ngo son si‐katejo; isonga intolok toy bakdang ton metey para son si‐katejo. Saja engitodokan to ni bakdang to, may‐eshig ga daton ja piyan nen Apo Shiyos.

1 I-Tisalonika 3:12

Jet say shawat ko pay son Apo Shiyos, si‐kato komay on‐eshom so ni semek jo so ni sakey tan sakey son si‐kayo, tan onbadeg pay i semek jo so ni angken sipen totoo ja inges toy kaba‐deg ni semek mi son si‐kayo.

1 I-Tisalonika 4:9

Nem no sota maypangkep ni penmek jo ni kait jon emati, eg mesepol la ẃaray en maysodat ja pengamta‐an jo ni pesing jo, ta si Apo Shiyos, si‐katoy mismon engitosho son si‐kayo ey sesmeken joy kait jo,

2 I-Tisalonika 1:3

A‐aki mi shi pamati, mika nemnema ni olay ey mesepol la man‐iyaman kami son Apo Shiyos ni maypangkep son si‐kayo. Anam ton man‐iyaman kami, ta say pamatiyo, emanba‐deg ga pasiya et angken sota semek jo ni sakey tan sakey, emanba‐deg ngon pasiya.

1 San Pedro 1:22

Jet niman, ta kayoka memati nonta podnon toro ja maypangkep son si‐kato, poro kayo ma ja edinisan jet enshiy jo kebedawan son Apo Shiyos. Isonga enam‐ay kayon menmek ni kait jon emati ni aliẃen sinsinan na semek. Isonga say bilin ko son si‐kayo, ipekat jon emin i kabaalan jon menmek ni sakey tan sakey son si‐kayo.

1 San Pedro 3:8

Say piyan na a‐selen nonta emin na inkowan ko la, sajay. Mesepol la man‐i‐inawatan kayo, tan mesepol la ẃaray pengisekit jo ni sakey tan sakey son si‐kayo. Semek joy sakey tan sakey son si‐kayo, ta san‐a‐aki kayo shi pamati. Nemnem joy pansigshan ni eshom jet pankikinombaba kayo.

1 San Pedro 4:8

Say epateg so ni emin, mesepol la ẃara ni olay son si‐kayo sota agpayson semek jo so ni sakey tan sakey son si‐kayo. Ta no ẃara iyay ya semek son si‐kayo, mebedin ma ja manpipinasinsiya kayo ni nankolangan ni sakey tan sakey son si‐kayo, angken nansasekdet i nankolangan sha.

1 San Juan 3:23

Jet say bilin nen Apo Shiyos, kowan to ey mesepol la pati‐en tayo i ngaran nonta Anak ton si Jesucristo, tan mesepol la ensemek tayoy kait tayo. Jet angken si Cristo, sajay met laeng i inbilin to son si‐katejo.

1 San Juan 4:21

Nemnem jo sota bilin nen Cristo son si‐katejo, ja kowan to ey, “No sipay toon ẃaray semek to son Apo Shiyos, mesepol ngon ensemek toy kait to.”

2 San Juan 1:5

Niman, iyay pay i piyan kon ikowan son si‐kam ma biin pinidi nen Apo Shiyos. Jet sajay sota sigod ja bilin nen Cristo ja intenengan tayo, manipod nonta pilmiro, ja kowan to ey mesepol la ẃaray semek tayo ni sakey tan sakey. Enshiy nak isolat ja badon bilin.