San Juan 14:19 - Dibshon Mengi-kan Ni Pansigshan

¹⁹ Niman, entikey ya timpoy i‐asas sha‐ak so ira niya tood ja dobong ja eg emati, nem si‐kayo, asen jowak mowan tep manbiyagak mowan ali. Jet angken si‐kayo, manbiyag kayo ngo ali.

San Juan 14:19 Iomraidhean Croise

San Juan 11:25

Simongbat si Jesus mowan, ja kowan to ey, “Si‐kak i panbiyag so ira nonta nanketey, tan mengi‐kan ni biyag sha; isonga sota memati son si‐kak, angken na metey, manbiyag met laeng.

San Juan 12:35

Simongbat si Jesus, ja kowan to son si‐kara ey, “Sota may‐eshig ey silew ja ondawag ni nemnem jo, entikey ya timpoy kawasha to son si‐kayo. Isonga niman ta ẃara pay laeng son si‐kayo, iringan jon man‐ekad; ta no medebi‐an kayo, eg jo amtay toshongen jo.

San Juan 13:33

Si‐kayon took ja naka ikari ey annak ko, aliẃen enshokey ya timpoy kawashak son si‐kayo. Jet niman, ipinshowak sota inkowan ko so nonta ira toray ni Hodiyos, ey ẃaray timpon onsabi ja en‐enapen jowak, nem shima daẃan ko, eg mebedin na on‐onod kayo.

San Juan 14:6

Jet si Jesus, simongbat ja kowan to ey, “Si‐kak i may‐eshig ja shalan, si‐kak i podno, si‐kak i mengi‐kan ni biyag. Enshiy angken sipa ja maka‐edaw so nen Amak, no eg nin manshedan son si‐kak.

San Juan 16:16

“Nem ekay, eg jowak ma nin asen ni sanka‐atikan, nem asen jowak met laeng nga shagos.” Sajay i inkowan nen Jesus.

San Juan 16:22

Sajay i kay‐eshigan jo. Niman, kayoka mandeshingit, ta idekjas takejo, nem asen takejo met laeng nga shagos, jet man‐imdeng kayo mowan na pasiya ma. Jet sotan na imdeng jo, enshiy en ondingding so, angken sipa.

San Juan 6:40

Say piyan pay nen Amak, emin ira sota toon eẃatan toy maypangkep son si‐kak, jet memati, may‐aknan ira ni biyag ja enshiy to engintegan, tan panbiyag ko ira di shi ka‐onoran na akew.” Kowan nen Jesus.

San Juan 7:33

Nem si Jesus, amta toy ẃared nemnem sha, jet kowan to so nonta ira toon eshakel ja esa‐nop ey, “Say kawashak son si‐kayo, entikey ya timpo. On‐oli‐ak ka shagos so nonta engibetkag son si‐kak alid ja dobong.

San Juan 8:21

Jet si Jesus, nantoro pay son si‐kara ja kowan to ey, “Waray timpon idekjas takejo, jet en‐enapen jowak, nem si‐kayo, metey kayo ey eg epakaẃanan i basol jo. Jet eg mebedin na on‐onod kayo son si‐kak shima dogad ja daẃan ko.”

Inpaspasing 10:41

Nem aliẃen emin na too ket inon‐an sha. Say engasas bengat son si‐kato, si‐kami ja shinotokan nen Apo Shiyos ja mengikowan ni maypangkep son si‐kato. Nonta naksheng nga nanbiyag, ekipengan pay son si‐kami.

I-Roma 5:10

Agpayso ey nonta pilmiro, endedamsis tayos Apo Shiyos, isonga eg shakito kosto. Nem idi etey sota Anak to shi koros, ja inkaro toy basol tayo, mapteng ma, enshi la sota istay inkaysi‐jan tayo son Apo Shiyos. Sigod ja naysi‐jan kito son si‐kato, nem intolok ton etey sota Anak to para son si‐katejo, jet sigorado men amta tayo ey maysedakan kito ma shi anongosto tep ẃares Cristo shi biyag ja emengibediw son si‐katejo.

I-Roma 8:34

Angken sipa, enshiy kanebengan shen mengigsheng ey meshosa kito tep imed ma petek ni kanawan nen Apo Shiyos si Cristo Jesus; isonga enshiy en ma‐an‐ano son si‐katejo, tep shakitoka itakshel so nen Apo Shiyos. Nemnem jo ey saja si Cristo Jesus, si‐katoy etey, nem nanbiyag mowan.

1 I-Korinto 15:20

Nem say agpayso, si Cristo, nan‐ongal. Jet sotan i kesigorado‐an to ey manbiyag ira di ngo sota nanketey.

1 I-Korinto 15:45

Naytotop shiyay met laeng sota naysolat nonta bayag da ja kowan to ey, “Si Adan ja pilmiron too, nay‐aknan ni biyag.” Si Cristo, singa paris nen Adan, jet si‐kato ngoy emengi‐kan ni biyag, nem sajay ya biyag, anam ton man‐iyan shi dangit.

Hodiyos 7:25

Isonga niman ma, tan angken nganton timpo ali, mebedin na isalakan to ira sota emanshinel son si‐kato ja si‐katoy mengi‐sop son si‐kara son Apo Shiyos, ta si‐kato, ẃara ni olay shi biyag, ja emengita‐shel son si‐kara so nen Apo Shiyos.

Inpa-Amta Nen Jesucristo 20:4

Jet ẃara iray inon‐an kon tongawan, jet say timongaw nodtan, si‐karay epiyal ja mantoshay. Jet inon‐an ko pay i dinaẃa ira nonta ebono shi dobong maypangkep nonta inpangitoro sha nonta maypangkep son Jesus, tan sota inpangikowan sha nonta esel nen Apo Shiyos. Sajay ira sota eg nanshayaw so nonta Animal, ono eg nanshayaw so nonta kabakbakdang nonta Animal ja inemag. Tan sajay ira sota eg timolok ja memalka‐an i temok sha, ono takday sha nonta malka ni Animal. Nem angken ebono ira, nanbiyag met laeng ira jay et ekitoshay ira so nen Cristo ni sandibon tawen.