San Juan 13:34 - Dibshon Mengi-kan Ni Pansigshan

³⁴ Niman, iyay pay i ikowan ko son si‐kayo, ja badon bilin. Mesepol la ẃaray semek jo so ni sakey tan sakey son si‐kayo, ja inges toy semek ko son si‐kayo.

San Juan 13:34 Iomraidhean Croise

San Mateo 5:44

Nem say kowan ko son si‐kayo, sota makakontra son si‐kayo, semek jo kari, tan ireẃati jo son Apo Shiyos sota ememedigat son si‐kayo.

San Juan 15:17

Say bilin ko son si‐kayo, mesepol la ẃaray semek jo so ni sakey tan sakey son si‐kayo.

San Juan 17:21

Tan say shawat ko pay son si‐kam Ama, manseksekey koma iren emin, ja inges toy kawashak son si‐kam, tan kawasham ngo son si‐kak, say maykasakey ira son si‐kata, say pati‐en ira nonta tood ja dobong ey agpayson si‐kam i engibetkag ali son si‐kak shiyay.

I-Roma 12:10

Semek joy kait jon emati ja inges toy semek jo so ni mismon agi jo, jet ẃara komay pengiredjaw jon pasiya so ni sakey tan sakey.

I-Roma 13:10

No ensemek moy kait mo, aliẃen mo doko‐en, no diket mapteng ni olay i pesing mo son si‐kato. Isonga sotan na semek, si‐katoy timongpal nonta emin na bilin nen Apo Shiyos.

I-Roma 13:8

No ẃaray otang jo, mesepol la bayshan jo say meksheng; nem no sota maypangkep ni semek jo so ni sakey tan sakey, mesepol mangon ẃara sotan ni olay. Jet no ẃaray semek jo so ni kait jo, singa tinongpal jon emin sota kowan nonta bilin nen Apo Shiyos ja naysolat nonta bayag da.

I-Galasia 5:22

Nem sota toon kaishalan ni Ispirito Santo nen Apo Shiyos, iyay iray ma‐sas son si‐kato: semek, imdeng, talna, anos, pengaasi, mapteng nga nemnem, tan emepiyal pay;

I-Galasia 5:6

Jet no memati kito son Cristo, say epateg bengat ja nemnemen tayo, sota pamati son si‐kato. Ta sotan na pamati, si‐katoy kedepo‐i ni semek. No sota maypangkep ni pengonod nonta bilin ni Hodiyos, enshiy to naykamitan shi pamati son Cristo.

I-Galasia 6:10

Isonga mesepol la ishingan tayo ni olay ja mandeka ni mapteng so ni emin na too, agdalo so nonta ira a‐aki tayod pamati.

I-Ipiso 5:2

Mesepol la ẃaray semek jo ni olay shi sakey tan sakey. Nemnem jo ey si Cristo, ebadeg i semek to ngo son si‐katejo; isonga intolok toy bakdang ton metey para son si‐katejo. Saja engitodokan to ni bakdang to, may‐eshig ga daton ja piyan nen Apo Shiyos.

I-Kolosas 1:4

ta shinemag mi ey ebadeg i pamatiyo son Cristo Jesus, tan ebadeg i semek jo so ni emin na kait jon emati. Nonta pilmiro, intenengan jo iya esel nen Apo Shiyos pangkep so nen Jesucristo, ja podno, jet pinatiyo jet amtayo ma niman ey ẃaray kon‐oren jo la ja i‐akan nen Apo Shiyos ali shi dangit. Isonga niman ẃara ma i ebadeg ga semek jo tan pamatiyo.

1 I-Tisalonika 3:12

Jet say shawat ko pay son Apo Shiyos, si‐kato komay on‐eshom so ni semek jo so ni sakey tan sakey son si‐kayo, tan onbadeg pay i semek jo so ni angken sipen totoo ja inges toy kaba‐deg ni semek mi son si‐kayo.

2 I-Tisalonika 1:3

A‐aki mi shi pamati, mika nemnema ni olay ey mesepol la man‐iyaman kami son Apo Shiyos ni maypangkep son si‐kayo. Anam ton man‐iyaman kami, ta say pamatiyo, emanba‐deg ga pasiya et angken sota semek jo ni sakey tan sakey, emanba‐deg ngon pasiya.

Hodiyos 13:1

Say mesepol la ẃara ni olay son si‐katejon san‐a‐aki shi pamati, sota semek ni sakey tan sakey.

Santiago 2:8

Say mapteng nga dag‐en jo, sota pengonod ni bilin nen Apo Shiyos ja Kangeto‐an na toray. Say kowan ni esel to ja naysolat, kowan to ey, “Semek moy kait mon too ja inges toy moka penmek ni bakdang mo.”

1 San Pedro 1:22

Jet niman, ta kayoka memati nonta podnon toro ja maypangkep son si‐kato, poro kayo ma ja edinisan jet enshiy jo kebedawan son Apo Shiyos. Isonga enam‐ay kayon menmek ni kait jon emati ni aliẃen sinsinan na semek. Isonga say bilin ko son si‐kayo, ipekat jon emin i kabaalan jon menmek ni sakey tan sakey son si‐kayo.

2 San Pedro 1:7

Mesepol pay ya meẃad‐an kayo ni olay ni semek so ni eshom, jet aliẃen sota kait jo bengat shi pamati i sesmeken jo, no diket emin na kait jon too.

1 San Juan 3:11

Angken nonta pilmiron emati kayo, sajay ngoreshan i intenengan jo, ey mesepol la ensemek tayoy kait tayo.

1 San Juan 3:23

Jet say bilin nen Apo Shiyos, kowan to ey mesepol la pati‐en tayo i ngaran nonta Anak ton si Jesucristo, tan mesepol la ensemek tayoy kait tayo. Jet angken si Cristo, sajay met laeng i inbilin to son si‐katejo.

1 San Juan 4:21

Nemnem jo sota bilin nen Cristo son si‐katejo, ja kowan to ey, “No sipay toon ẃaray semek to son Apo Shiyos, mesepol ngon ensemek toy kait to.”

2 San Juan 1:5

Niman, iyay pay i piyan kon ikowan son si‐kam ma biin pinidi nen Apo Shiyos. Jet sajay sota sigod ja bilin nen Cristo ja intenengan tayo, manipod nonta pilmiro, ja kowan to ey mesepol la ẃaray semek tayo ni sakey tan sakey. Enshiy nak isolat ja badon bilin.