San Juan 13:1 - Dibshon Mengi-kan Ni Pansigshan

¹ Shanshani ja manshoki sota piyasta ni Hodiyos ja kowan sha ey Paskowa, jet si Jesus, amta to ey sotan may timpo ja idekjasan to so niya dobong, ja on‐oli ma so nen Ameto shi dangit. Nontan na timpo i pengipa‐sas to ey enshiy kolang ni semek to so ni totoo ton ẃared ja dobong, ta sigod ja ensemek to ngoreshan ira.

San Juan 13:1 Iomraidhean Croise

San Mateo 26:45

Idi naksheng, dimaw mowan ali so nonta too to, jet kowan to son si‐kara ey, “Ngantoy? Piyan jon ma‐okip ni olay? Edabas mala sota oras ja pansheẃat jo koma. Simabi ma sota timpo, jet si‐kak ja kowan ni para padto ey Anak ni Too, may‐eẃatak ma so nonta ira toon nankekedsel.

San Mateo 28:20

Jet itod‐iyo pay ira say emin sota inbilin ko son si‐kayo, si‐kato ngoy pati‐en sha. Jet nemnemnem jo ey ẃara‐ak ni olay son si‐kayo, ingkatod pantepos niya dobong.” Kowan nen Jesus.

San Lucas 22:53

Inakew met ja ẃara‐ak shima Timplo, ket apay nga eg jowak inshel nontan? Nem niman na kalebi‐an met kitdi i timpoyo, tep si‐katoy pan‐obda nen Satanas!”

San Lucas 9:51

Idi nay‐esop ma sota timpon i‐oli nen Jesus shi dangit, ninemnemnem to ey kenshat ta ondaw shi Jerusalem.

San Juan 11:55

Shanshani ma sota timpo ni piyasta ni Hodiyos ja kowan sha ey Paskowa jet eshakel iray toon dimaw shi Jerusalem ja edapod dogadogad ja nay‐esop shiman, say sha dag‐en sota sigod ja ogadi ni Hodiyos ja shaka dagdag‐a asan ireka makipiyasta.

San Juan 12:23

Jet si Jesus, simongbat ja kowan to ey, “Sota timpon i‐olik shi dangit, simabi ma, ta si‐kak sota Anak ni Too.

San Juan 13:29

Say ẃared nemnem ni eshom, kowan sha ey inbetkag nen Jesus si Judas ja en menongkal ni mesepol sha ta timpo ni piyasta, ono inbetkag to ja en mengi‐kan ni pilak so nonta ira nankebiteg. Ta si Judas i para egshi nonta pilak sha.

San Juan 13:34

Niman, iyay pay i ikowan ko son si‐kayo, ja badon bilin. Mesepol la ẃaray semek jo so ni sakey tan sakey son si‐kayo, ja inges toy semek ko son si‐kayo.

San Juan 14:28

Intenengan jo met sota inkowan ko la ey angken idekjas takejo, on‐oli‐ak mowan ali son si‐kayo. No ẃara komay semek jo son si‐kak, istay nan‐imdeng kayo koma, ta si Amak ja daẃan ko, engatngato ngo eshan ey say si‐kak.

San Juan 14:31

Dag‐en ko ngo eshan sota inbilin nen Amak ja obda‐en ko, say amta‐en ni tood ja dobong ey ensemek ko si Amak.” Idi enaksheng nga inkowan nen Jesus iyay, kowan to son si‐kara ey, “Eti ondaw kito; idekjas tayo iyay ya dogad.”

San Juan 16:28

Si Amak ka ẃared dangit i edapo‐an ko di, jet niman si‐kato met laeng i odi‐an ko.” Sajay i inkowan nen Jesus.

San Juan 17:1

Idi naksheng nga inkowan nen Jesus iyay, timangkak shi dangit ja kowan to ey, “Ama, simabi ma sota timpo ja si‐kam met laeng i mengi‐kan ni kayshedjawan ko, say si‐kak ngoy mengi‐kan ni kayshedjawan mo.

San Juan 17:16

Si‐kak, aliẃen inges ko iya tood ja dobong ja eg emati, jet saja took, inges sha‐ak ja aliẃen tood ja dobong.

San Juan 17:26

Inpa‐amtak son si‐kara sota maypangkep son si‐kam, jet itoloy kon ipa‐amta iyay son si‐kara, say mayda‐kam ngo ira nodta semek mo ja ẃara son si‐kak, say si‐kak, ẃara‐ak ngo son si‐kara, ja ontolong.” Sajay i shawat nen Jesus so nen Ameto.

San Juan 17:5

Jet niman Ama, si‐kam i mengi‐odi nonta sigod ja shayaw ko ngo eshan nonta ẃara‐ak shi kad‐an mo, nonta eg pay laeng epalsowa iya dobong.

San Juan 18:4

Si Jesus, amta ton sigod i mepesamak son si‐kato; isonga to inaspol ira jay ya totoo, jet kowan to son si‐kara ey, “Sipay joka pan‐enapa?”

San Juan 19:28

Jet nontan ma, amta nen Jesus ey nontan ma i kepospos nonta obda to, jet inkowan to ey, “Na‐keẃak ni shanom.” Ta piyan ton metongpal sota inkowan ni padto ja naysolat nonta bayag da ja pangkep son si‐kato.

San Juan 2:13

Nontan na timpo, shanshani ma sota piyasta ni Hodiyos ja kowan sha ey Paskowa, jet si Jesus, dimaw shi Jerusalem.

San Juan 6:4

Nontan na timpo, shanshani ma sota piyasta ni Hodiyos ja kowan sha ey Paskowa.

San Juan 7:30

Idi enaksheng nga inkowan to iyay son si‐kara, piyan sha ma ja a‐shelen si Jesus, nem enshiy angken sakey ya engitodoy, ta aneng nin sota timpon naykesheng nga pandikat to.

San Juan 7:6

Jet si Jesus, simongbat ja kowan to son si‐kara ey, “Si‐kak, aneng nin sota timpon pengipa‐sas ko ni maypangkep son si‐kak. Nem si‐kayo, angken bina‐ngatan mangoy dag‐anan jo so ni piyan jon dag‐en, angken ngaranton akew.

San Juan 8:20

Sajay i inkowan nen Jesus so nonta ira totoo nonta inpantoro to nodta nay‐esop shima tado‐an ni pilak ka shaka idaton son Apo Shiyos shi Timplo. Jet nontan, enshiy nangshel son si‐kato, ta aneng nin sota timpon naykesheng ja pandikat to.

I-Roma 8:37

Nem emin iyay ya digat ja emepespesamak niman, mengebak kito ngoreshan, tep si Cristo, ebadeg ni olay i semek to son si‐katejo.

1 I-Korinto 1:8

Si Apo Shiyos i mengi‐kan met laeng ni kedsang jo say enshiy jo kebedawan no onsabi sota akew wa pengigsheng nen Jesucristo ja Apo tayo no sipay maysedakan.

Hodiyos 3:14

Sajay i kowan ko ta mesepol la eki‐det ni olay i panshinel tayo son Cristo, ja inges to nonta pilmiron inpamati tayo. Mapteng no sotan ni olay, say metodoy ja mayda‐kam kito ali son Cristo.

Hodiyos 3:6

Nem si Cristo, aliẃen nansilbi bengat. Si‐katoy mismon Anak nen Apo Shiyos, ja apo ira nonta may‐eshig ey pamilja nen Apo Shiyos. Jet si‐katejo, ẃara kito nodtan na pamilja ja intorayan nen Cristo, no itoloy tayoy epigsen tayoka panshinel tan tayoka pansi‐met pangkep ni inkari nen Cristo.

Hodiyos 6:11

Jet say piyan min dag‐en jo, emin kayo koma ket itodoy jon man‐edisto ni olay, ingkatod onsabi ali sota joka segsegsha ja panmaptengan jon tongpalen ali nen Apo Shiyos shi ka‐onoran.

1 San Pedro 1:13

Isonga niman, say nemnemnemen jo, sota kaasi ali nen Apo Shiyos son si‐kayo ni idaw ali mowan nen Jesucristo. Mesepol la esagana kayo ni olay ja menongpal ni bilin nen Apo Shiyos, say enshiy dag‐en jon jo kaydaw‐anan.

1 San Juan 4:19

Si Apo Shiyos i epangdon ẃaray semek to son si‐katejo, isonga ẃara ngoy semek tayo.