San Juan 12:34 - Dibshon Mengi-kan Ni Pansigshan

³⁴ Nem sota ira totoo, simongbat ira ja kowan sha ey, “Say intenengan mi met ja kowan ira ni dinteg ket sota naypadton mengisedakan ja ibetkag ali nen Apo Shiyos ket eg kono metmetey ingkatod ingka. Ngantoy pesing nita kowan mo ey maykedjang ka ja maydansa? Kowan mi nem si‐kam sota naypadton Anak ni Too! No aliẃen si‐kam, sipa ngarod ngay i kaytoshongan nonta naypadton ibetkag ali nen Apo Shiyos?”

San Juan 12:34 Iomraidhean Croise

San Mateo 16:13

Idi simabi si Jesus nodta sakop ni Sisaria Pilipos, inbag‐an to ira sota too to ja kowan to ey, “Ngarantoy kaikokowan ira ni totoo ni maypangkep so nonta naypadton Anak ni Too? Eg sha aya tabtabalen nem sipa‐ak?”

San Mateo 21:10

Idi emanmotok ma si Jesus shi Jerusalem, emin ira sota too nodta siyodad, eg sha tongolan no ngantoy emankepasemak, isonga kowan sha ey, “Apay sipa aya itan na toon emanmotok?”

San Mateo 8:20

Jet si Jesus, simongbat ja kowan to son si‐kato ey, “Pannemnem ka nin, ta saja obdak, edigat. Onito pay sota atap pa animal, tan titit, ta ẃaray koston shaka pan‐ini. Nem si‐kak, enshiy koston baley ko ja pansalshengan ko.”

San Juan 10:34

Simongbat si Jesus ja kowan to ey, “Wara met i naysolat shi dinteg tayo ja kowan nen Apo Shiyos pangkep so nonta ira pangolo nonta bayag da, ja kowan to ey si‐kara, singa shiyos ngo ira.

San Juan 12:32

No meksheng nga maykedjangak ja maydansa, si‐kak met laeng i mengeẃis ni toon ondaw ali son si‐kak ja memati.”

San Juan 15:25

Nem sajay i ketongpalan nonta naysolat shi dinteg sha, ja kowan to ey, ‘Kinontra sha‐ak ey enshiy kabol.’

San Juan 8:28

Isonga si Jesus, ẃara pay i inkowan to son si‐kara, ja kowan to ey, “No onsabi sota timpo ja ikayang jo sota Anak ni Too ja idansa, amta‐an jo ma ey si‐kak sota naypadton mengisedakan ja ibetkag ali nen Apo Shiyos. Tan amta‐an jo pay ey emin na maramen naka pan‐ikowan niman ket aliẃen na edapod nemnem ko, no diket sotan i inkowan nen Amak son si‐kak.

I-Roma 3:19

jet amta tayo ey sota kowan nonta bilin ja nay‐awat nonta bayag da, say kaytoshongan to, sota ira toon nay‐awatan to ngo ja Hodiyos. Jet say kabol la naysolatan nontan, say angken sipen too, mayda‐kam ira ngo ja enshiy sha idason son Apo Shiyos, tan say amta‐an pay ni emin na tood ja dobong ey ẃaray ikaro sha so nen Apo Shiyos ja basol sha.

I-Roma 5:18

Sotan na basol ni sakey ya too, ja si Adan, si‐katoy kabol la istay shosa‐an so nen Apo Shiyos so ni emin na totoo. Nem si Cristo, pinati ton emin i bilin nen Apo Shiyos ingkato nonta eteyan to shi koros, jet sotan na inpasing to ngo, si‐katoy ibilangan so nen Apo Shiyos so ni emin na too ey singa enshiy basol sha, jet i‐aknan to ira ni biyag.

Hodiyos 7:24

Nem si Jesus, si‐katoy pari ni olay ingkatod ingka ta angken pigan eg metmetey.