San Juan 10:28 - Dibshon Mengi-kan Ni Pansigshan

²⁸ Jet sotan iren kokowak, naka akni ira ni biyag ja enshiy to engintegan, jet eg sha ma da‐kaman i shosa ingkatod ingka, jet enshiy makabaal ja onpiliw son si‐kak ni angken sakey son si‐kara.

San Juan 10:28 Iomraidhean Croise

San Marcos 13:22

Ta eshakel aliy toon kowan sha ey si‐kara si Cristo, ono kowan sha ey si‐karay para padto nen Apo Shiyos, jet eshakel i dag‐en shen kaskasshaaw wa aramid ono milagro. Jet no mebedin, kowan sha pay ey i‐owapan sha ira sota too nen Apo Shiyos ja pinidi to.

San Lucas 23:46

Jet si Jesus, inkeljaw ton kowan to son Apo Shiyos ey, “Ama, ipiyal ko son si‐kam i ispiritok!” Inkowan to iyay asan ma ma‐bosi.

San Juan 10:29

Si Apo Shiyos ja Amak, si‐katoy Kangeto‐an ni emin. Isonga sota in‐awat to son si‐kak, angken sipa, enshiy en onpiliw so, ta si Amak i emengajowan son si‐kara.

San Juan 11:25

Simongbat si Jesus mowan, ja kowan to ey, “Si‐kak i panbiyag so ira nonta nanketey, tan mengi‐kan ni biyag sha; isonga sota memati son si‐kak, angken na metey, manbiyag met laeng.

San Juan 14:19

Niman, entikey ya timpoy i‐asas sha‐ak so ira niya tood ja dobong ja eg emati, nem si‐kayo, asen jowak mowan tep manbiyagak mowan ali. Jet angken si‐kayo, manbiyag kayo ngo ali.

San Juan 17:2

Ta si‐kam Ama i engi‐kan son si‐kak ni panakabalin na mengitoshay so ni emin na too, jet si‐kak i mengi‐kan ni biyag ja enshiy to engintegan so nonta totoon piyan mon meẃad‐an ni biyag.

San Juan 18:9

(Sajay ya inkowan nen Jesus, si‐katoy ketongpalan met laeng nonta inkowan to nonta epangdo len akew, ja kowan to ey, “Sota toon in‐awat mo son si‐kak, angken sakey son si‐kara, enshiy en epokaw.”)

San Juan 3:36

Sota toon memati so nonta Anak nen Apo Shiyos, may‐aknan ni biyag ja enshiy to engintegan, nem sota eg memati so nonta Anak nen Apo Shiyos, eg may‐aknan nonta biyag ja enshiy to engintegan, no diket emansessesked son si‐kato sota penosa nen Apo Shiyos ja shosen ingkatod ingka.”

San Juan 4:14

Nem sota shanom ma naka pan‐i‐akan, si‐kato sota biyag ja enshiy to engintegan, jet sota on‐inom so, eg mowan messho, ono ma‐kew, ta ẃara ni olay son si‐kato, ja singa inges to sota temtem ja eg ma‐ma‐ti‐an.”

San Juan 5:24

Kinapodpodno iya ikowan ko son si‐kayo. Sota memati nonta ikowan ko tan memati son Amak ja engibetkag ali son si‐kak, si‐katoy eẃad‐an ni biyag ja enshiy to engintegan, jet eg to da‐kaman na meshosa, ta ẃara son si‐kato sota biyag ja edapo son Apo Shiyos.

San Juan 6:27

Aliẃa komen sota mekan i jo kamkamkaman, ta say mekan, ema‐bos. Isonga say kamkaman jo koma ja jo enapen, sota may‐eshig ey mekan ja mengi‐kan ni biyag ja enshiy to engintegan. Sajay ya mekan na naka pan‐ikowan, sota kowan sha ey Anak ni Too, si‐kato i mengi‐kan son si‐kayo. Say ka‐amta‐an to ey ẃaray in‐akan nen Apo Shiyos ja kanebengan kon mengi‐kan ket inpa‐sas to ey towakka kosto‐i.”

San Juan 6:37

Sota ira i‐awat nen Amak son si‐kak, si‐karay memati son si‐kak, jet sajay ira ja ondaw ali son si‐kak, man‐imdengak ja mengeẃat son si‐kara.

San Juan 6:47

Kinapodpodno iya inkowan ko son si‐kayo. Sota memati son si‐kak, may‐aknan ni biyag ja enshiy to engintegan.

San Juan 6:68

Jet si Simon Pedro, simongbat ja kowan to ey, “Sipa ngay i daẃan min eshom no aliẃen si‐kam? Ket si‐kam bengat i kawad‐an ni esel ja emengi‐kan ni biyag ja enshiy to engintegan,

Inpaspasing 7:59

Nonta marama ja shaka pankespigi ni bato si Esteban, nanshawat, ja kowan to ey, “Apo Jesus, awat mo ngo iya biyag ko.”

I-Roma 5:17

Isonga no maypangkep nonta basol nonta sakey ya too ja si Adan, emin ma ja too, kenshat ta metey, manshoki nontan ingkato niman. Sotan i nanbanagan nonta aramid nen Adan. Nem say nanbanagan nonta aramid nonta sakey ya too ja si Jesucristo, mayda‐kam ira so nen Jesucristo sota totoon ibilang to ey enshiy basol sha, no onsabi ali sota badon biyag.

I-Roma 5:2

jet niman, si‐katoy nayda‐kaman tayo nodta kaasi nen Apo Shiyos ni inpamati tayo son si‐kato. Jet kitoka ma man‐imdeng nodta namnama tayo ja mayda‐kam so nen Apo Shiyos shi dangit.

I-Roma 5:21

Agpayso ey say singa enanngel ni biyag ni emin na totoo ket sota basol, isonga ẃaray patey. Nem niman ma, sota kaasi nen Apo Shiyos, si‐katoy mengebak ja mengi‐kan ni biyag ja enshiy to engintegan so nonta ira toon toka kosto‐i. Jet sajay ya toka isalakani son si‐kara, emedepo son Jesucristo ja Apo tayo.

I-Roma 5:9

Sota naybokbok ka shala nen Cristo nonta inkatey to shi koros i kaybidangan tayo ma ey singa enshiy basol tayo; isonga ẃaray namnama tayo ma ja isalakan shakito no onsabi sota timpon penosa nen Apo Shiyos so nonta ira eg emati.

I-Roma 6:23

Isonga say sobadit ni basol, patey ingkatod ingka, nem ẃaray dibshin i‐akan nen Apo Shiyos so nonta ira ẃara son Cristo Jesus ja Apo tayo; si‐kato sota biyag ja enshiy to engintegan.

I-Roma 8:1

Owen agpayso, angken saman i kakapoy ni bakdang tayo, eg shakito shosa‐en nen Apo Shiyos, basta ẃara kito et so nen Cristo Jesus.

I-Roma 8:29

Ta amta ton sigod no sipa aliy memati son si‐kato jet ninemnem to ey ingesen sha sota mismon Anak to ja si Cristo, ta piyan ton si Cristoy Pangodowan shen emin ja san‐a‐aki.

I-Pilipos 1:6

Jet ebadeg i namnamak ey si Apo Shiyos, ja engaasi son si‐kayo nonta pilmiron emati kayo son Cristo, si‐kato met laeng i mengitodoy so nontan na mapteng nga obda to son si‐kayo ingkatod onsabi ali sota akew wa idaw mowan nen Jesucristo ja mandepod dangit. Ta sotan aliy ka‐enay ni kaysedakan jo.

2 I-Tisalonika 2:13

Nem si‐kayon a‐aki mi shi pamati ja ensemek nen Apo Jesus, anam ton man‐iyaman kami ni olay son Apo Shiyos ni maypangkep son si‐kayo, ta sigod ja pinidi shakejo nen Apo Shiyos ja maysedakan. Jet naysalakan kayo nontan, ta intorong shakejo ni Ispirito Santo nen Apo Shiyos say metopog sota podno ja maypangkep son Cristo i pati‐en jo.

1 Timoteo 1:16

Say kabol la kinaasi‐an towak so, jey angken na si‐kak i kabalkan i basol to, piyan nen Jesucristo ja ipa‐sas i ebadeg ga ka‐anos to, say ẃaray pengasan ira nonta toon memati ali son si‐kato ja meẃad‐an ni biyag ja enshiy to engintegan.

2 Timoteo 1:12

jet sajay i kabol la naka da‐da‐kami so ni digat niman. Nem ekak ibaing ta amtak ka mismo i pinatik, jet ebadeg i namnamak ey eg towak baybay‐an pangkep nonta obden inpiyal to son si‐kak, ingkatod imotok to di, ta kabaalan ton emin.

Hodiyos 7:25

Isonga niman ma, tan angken nganton timpo ali, mebedin na isalakan to ira sota emanshinel son si‐kato ja si‐katoy mengi‐sop son si‐kara son Apo Shiyos, ta si‐kato, ẃara ni olay shi biyag, ja emengita‐shel son si‐kara so nen Apo Shiyos.

1 San Pedro 1:5

Sota panakabalin nen Apo Shiyos i emengajowan son si‐kayo ingkatod onsabi ali sota timpon ketongpal nonta namnama tayon maysedakan. Jet say kabol la eg tokejo i‐owayan, sota joka pemati so nen Cristo. Sajay ya kaysedakan tayo, insagana ngoreshan nen Apo Shiyos, nem eg tayo nin asen ingkatod ka‐onoran alin timpo.

1 San Juan 1:2

Si‐katoy kawad‐an ni biyag ja enshiy to engintegan jet sigod ja ẃara ngoreshan son Apo Shiyos ja Ameto. Jet si Apo Shiyos, inbetkag to di son si‐kami, jet inon‐an min mismo sotan na biyag ja ẃara son si‐kato. Isonga niman, mesepol ngon sota inon‐an mi tan intenengan mi, ikowan mi son si‐kayo, say maykait kayo ngo son si‐kami ni inpakikadẃa mi son Apo Shiyos ja Ama, tan si Jesucristo ja Anak to.

1 San Juan 2:19

Sajay iren too, istay ya singa nay‐eshom ira son si‐katejon emati son Cristo, nem enshi gayam. Isonga tinaynan shakito, ja eg sha ma intoloy ja mekikadẃa son si‐katejo. No agpayson naykait ira son si‐katejo, ka‐onong koma ira niman. Nem indekjas shakito, jet sajay i ka‐amta‐an ton pasiya ey emin ira, apil ira, aliẃa karin kait tayod pamati.

1 San Juan 2:25

Jet say inkari nen Cristo son si‐katejon on‐onong ja memati son si‐kato, biyag ga enshiy to engintegan.

1 San Juan 5:11

Jet sotan na kowan nen Apo Shiyos, ja mesepol la pati‐en, kowan to ey ẃaray in‐akan ton biyag son si‐katejo ja enshiy to engintegan, jet sajay ya biyag, may‐ekan bengat so nonta ira memati son Jesus ja Anak to.

San Judas 1:1

Si‐kak si Judas ja agi nen Santiago. Sajay ya solat ko, para son si‐kayon emin na toon pinidi nen Apo Shiyos ja Ametayo ja nanbalin ni too to. Si Apo Shiyos, ebadeg i semek to son si‐kayo, isonga si‐kato met laeng i mengajowan son si‐kayo, ingkatod ondaw ali si Jesucristo. Si‐kak i sakey ya shinotokan nen Jesucristo ja mansilbi son si‐kato, isonga itnengi jon pasiya iya ikowan ko.

San Judas 1:21

Karejo pay dibdibkan sota ebadeg ga semek nen Apo Shiyos son si‐kayo. Anosiyon mansessesked ni idaw ali mowan nen Jesucristo ja Apo tayo, ta kaasi‐an shakito di ja i‐aknan shakito ni biyag ga enshiy to engintegan.

San Judas 1:24

Si Apo Shiyos bengat i makabaal ja mengitoshong son si‐kayo, say enshiy jo pankodangan ja kaybebaingan jo ingkatod onsabi kayo son si‐kato shima kawad‐an tod dangit. Jet ebadeg i imdeng jo no onsabi kayod man.