Inpaspasing 28:3 - Dibshon Mengi-kan Ni Pansigshan

³ Si Pablo, en engolnong ali ni eshakel la pating jet inpongpong to nodta apoy. Idi pimetang sota pating, ẃaray bimo‐day alin oleg nodtan et kindat toy takday nen Pablo.

Inpaspasing 28:3 Iomraidhean Croise

San Mateo 12:34

“Si‐kayon singa oleg i ogadiyo, enshiy mapteng nga esel ja kaonbo‐day shi bongot jo ta ngaaw i ẃared nemnem jo. Ta sota ẃared nemnem ni too, si‐kato met laeng i kaonbo‐day shi bongot to no ẃaray ikowan to.

San Mateo 23:33

Si‐kayo, singa oleg i ogadiyo! Isonga eg mebedin na disi‐an jon meshosa shi impiyarno!

San Mateo 3:7

Nem idi inon‐an nen Juan ira sota Parisiyo, tan sota ira Sadosiyo, ja emandaw son si‐kato, ja kowan sha ey ira manpabonjag ngo son si‐kato, kowan nen Juan son si‐kara ey, “Si‐kayo, singa oleg i ogadiyo! Say kowan jo emo, mebedin na disi‐an joy penosa nen Apo Shiyos no manpabonjag kayo bengat?

San Marcos 16:18

angken egni‐an sha pay i oleg tan inomen shay sabishong ja istay keteyan sha koma, eg ira mesekitan; tan ontakal iray emanpansekit no isakpal shay takday sha son si‐kara.”

Inpaspasing 28:2

Jet sota too nodtan na dogad, masmek ira; siningpet shakami noman na emin. Nan‐apoy ira jet inpanangshang shakamin emin, ta eman‐oshan ma mowan et teg‐in.

Inpaspasing 28:4

Jet sota ira too nodtan na dogad, inon‐an sha sotan na oleg ja nanba‐jat shi takday nen Pablo jet kowan sha ey, “Enshiy showashowa, sigoradon sajay ya too, bimono ni too. Agpayson indasat toy biyag to alid baybay, nem kenshat ta eg maypedobos ja manbiyag.”

2 I-Korinto 11:23

Singa ẃaray angaw ko ni sajay ya naka pan‐ikowan, nem angkena. Itoloy ko et ja ikowan. No kowan sha ey ireka emansilbi so nen Cristo, mas pay ya naka mansilbi, ta eshakel i digat ko nem say si‐kara. Ebadbadeg ngo eshan i obdak nem say si‐kara, tan eminshakelak pay ja naybalod nem say si‐kara. Jet eminshakel pay ya sinepsepdat sha‐ak nonta toon naykontra son si‐kak, tan eminshakel pay ya singa ngannganin meteyak.

2 I-Korinto 6:9

Sota karakdan na too, eg shakami am‐amta, nem si Apo Shiyos, tan sota ira too to, amtara kami. Inbilang shakami ni karakdan ey etey kami, nem ẃara kami pay laeng met shi biyag. Pinedigat shakami, nem eg kami ebono met laeng.