Inpaspasing 26:16 - Dibshon Mengi-kan Ni Pansigshan

¹⁶ Nem angken dayat ka, ta say nanpa‐sasan ko son si‐kam, si‐kam i shinotokan ko ja mansilbin mengikowan ni maypangkep son si‐kak. Si‐kam i onpaneknek ni in‐asas mowak so niman, tan ẃara pay aliy banag ja ipa‐sas ko son si‐kam, jet si‐kam i mengikowan so ni eshom.

Inpaspasing 26:16 Iomraidhean Croise

San Lucas 1:2

jet inonod sha ni olay sota intoro met laeng nonta apostol nen Jesus, tep si‐karay sigod ja eki‐odo‐odop son si‐kato, si‐karay engasas ni inpaspasing to, tan si‐kara pay i inbetkag ton engitosho ni esel to.

Inpaspasing 20:24

Nem si‐kak, say biyag ko, ekak ibilang ey epateg ono ebanol son si‐kak. Say ẃared nemnem ko, piyan kon meksheng sota obda ja in‐awat nen Apo Jesus son si‐kak ja mengitosho ni mapteng nga shamag pangkep ni kaasi nen Apo Shiyos.

Inpaspasing 21:19

Idi naksheng nga inkowan nen Pablo ey salamat ta mapteng sota inpan‐a‐aspol mi, sina‐sa‐key ton inistoriya ma sota emin na banag ja dingdingka nen Apo Shiyos ja nansigshan nonta ira toon aliẃen Hodiyos ni inpansilbi nen Pablo son si‐kara.

Inpaspasing 22:10

Jet sota eman‐a‐sel, inbag‐an ko ja kowan ko ey, ‘Apo, ngantoy dag‐en ko?’ Simongbat si Apo ja kowan to son si‐kak ey, ‘Dayat ka, jet daw ka shi Damasko, jet ẃaray mengikowan son si‐kam shiman ni emin na piyan nen Apo Shiyos sa dag‐en mo.’

Inpaspasing 23:11

Jet nontan na dabi, nanpa‐sas si Apo Jesus so nen Pablo, ja kowan to ey, “Pakedsang moy nemnem mo, kareka medismaya. Inkowan moy maypangkep son si‐kak shiya Jerusalem, isonga mesepol ngon ikowan moy maypangkep son si‐kak shi Roma.”

Inpaspasing 26:15

Jet simongbatak ja kowan ko ey, ‘Sipa ka apo?’ Say kowan to son si‐kak, ‘Si‐kak si Jesus ja singa moka pedigata, ta epaladoy moka pesing so ira nonta emati son si‐kak.

Inpaspasing 6:4

Jet say metopog ga dag‐en mi ngo ni olay ja apostol, sota mansheẃat, tan en mengitosho nonta esel nen Apo Shiyos maypangkep so nen Jesus.”

I-Roma 1:5

Si Cristo i kabol la engaasi‐an towak so nen Apo Shiyos; isonga shinotokan towak ja en mengikowan ni maypangkep son si‐kato so nonta ira totoon eg maka‐amta, say si‐katoy pati‐en sha, tan say si‐katoy mayshedjaw shi emin na ili.

I-Roma 15:16

jet naka mansilbi so nen Cristo Jesus niya naka pengitosho so nonta ira aliẃen Hodiyos pangkep son si‐kato. Naka mansilbi ja singa sota parin para akan ni daton; nem say inpasing ko, intorok sota mapteng nga shamag ja edapo so nen Apo Shiyos, say eẃaten nen Apo Shiyos ira sota aliẃen Hodiyos. Jet ineẃat to ira ta singa indaton sha shorog i bakdang sha son si‐kato, ni intolok sha so ey sota Ispirito Santo to i mengitoshong son si‐kara.

2 I-Korinto 4:1

Si Apo Shiyos, kinaasi‐an tokami jet si‐katoy engipedaw son si‐kami ni sajay ya obda. Isonga eg kami medismaya.

2 I-Korinto 5:18

Jet emin iyay, si Apo Shiyos i dimaga so, ta si‐kato met laeng i engawat son si‐katejo pangkep nonta inkatey nen Cristo, jet in‐esop shakito met laeng son si‐kato say dag‐en tayo may piyan to. Jet say piyan to ngon dag‐en min apostol, itod‐an miy eshom ma totoo say may‐a‐sop ngo ira son si‐kato.

I-Galasia 1:12

Ta aliẃen too i ineẃatan ko so; enshiy engitosho son si‐kak, no diket mismon si Jesucristo i engipa‐amta son si‐kak.

I-Galasia 2:2

Dimawak shiman ta si‐katoy inpa‐amta nen Apo Shiyos ja dag‐en ko, jet ekitbalak nin na epangdo so nonta ira emebigbig ja pangolo nonta ira ematid Jerusalem, ni abos sha. Jet siningpet kon sinodsod son si‐kara sota maypangkep ni naka pan‐itoro so nonta ira toon aliẃen Hodiyos, ey angken eg sha onoren sota ogadi min Hodiyos, maysedakan ngo eshan ira. Sajay i inpasing ko say eg mekolkol sota obden dingkak, tan sota obden dag‐en ko di.

I-Ipiso 3:3

Amtak ka amtayo pay ey inpa‐amta nen Apo Shiyos son si‐kak sota ebayag ga plano ton enshiy maka‐amta. Si‐kato iya ootik ka insolat ko la.

I-Kolosas 1:23

Nem mesepol la itoloy joy pamatiyo, karejo ibi‐jag; mesepol la edagshay pamatiyo. Jet mesepol pay ya eg jo itolok ka maysi‐jan nodta esel nen Apo Shiyos ja naytoro son si‐kayo, ta sajay i kawad‐an ni namnama jo. Jet sajay ya esel nen Apo Shiyos, naykowan da shi emin na sakop ni dobong, jet si‐kak i sakey ja kaontolong ja mengikowan so.

I-Kolosas 1:25

Si Apo Shiyos i enotok son si‐kak ja ontolong so ira nonta emati son Cristo, say ikowan ko sota esel to ja mesepol la amta‐an ni totood ja dobong. Jet sajay, panmaptengan jon aliẃen Hodiyos.

I-Kolosas 1:7

Amta mi ey sajay met laeng i intoro da nen Ipapras son si‐kayo. Si Ipapras, emepiyal, isonga si‐katoy inbetkag mi ja en menosho son si‐kayo. Si‐katoy sakey ya ensemek mi ja emansilbi met laeng son Cristo.

1 Timoteo 1:12

Ebadeg i iyaman ko son Cristo Jesus ja Apo tayo, ta in‐aknan towak ni kedsang ko, say tongpalen ko sota piyan to. Inbilang towak ey naka mepiyal; isonga shinotokan towak ja mansilbi son si‐kato.

1 Timoteo 4:6

No sajay i ibilin mo so nonta ira a‐aki shi pamati, mapteng i moka pansilbi so nen Cristo Jesus et ipa‐sas mo pay ey amtam i esel nen Apo Shiyos maypangkep ni pamati son Cristo, tan sota mapteng nga toro ja inonod mo shorog.

2 Timoteo 4:5

Nem si‐kam, tanshaanim, karam iba‐ba‐ngat i onod nima toro sha. Anosim ja manda‐kam ni digat, ipekat moy kabaalan mon mengitosho ni maypangkep son Jesucristo, tongpal mon emin sota nay‐awat son si‐kam ja dag‐en mo.